الثلاثاء، يوليو 31، 2012

احكي شو ما بدك بس اكتب بالعربي



من اول ما صار استخدام الانترنت للعامة في المحلات و حتى البيوت و انا انترنتية مجتهدة .
صار استخدامه شي من اساسيات الحياة لدرجة انو نسيت كيف كانت الحياة قبله . او حتى ما بتصورها
و مع تطور الشبكات الاجتماعية و صفحات الفيس بوك
تطورت فجاة اللغة لدينا
يعني ممكن لغة شات او عامية و صرنا نحكي و نعبر كل واحد بطريقته
مثل ما هلا انا بكتب بلغة عامية " بحتة تقريبا " مع انو كنت بفضل اعرض الموضوع  بلغة عربية فصحة لكن
" لغاية في نفس يعقوب " حبيت اكتب بالعامية
من اكتر الاشياء اللي بتستفزني لهلا في قراءة بعض المكتوب او التعليقات
هي الاملاء . مش اخطاء في الطباعة . الكل بصير معو اخطاء لكن اخطاء املائية بجد  .
يعني يا جماعة بكون الشب او البنت خريجين جامعات و معتدين برايهم  لكن لما تقرا الكلمات اللي بكتبوها بتحس انهم خريجين ابتدائي و هاي ظاهرة منتشرة
يعني يا عالم كلمة لـــــــــــــــــــــكـــــــــــــــــــن  من ايمتى صارت لاكن
. يعني ما اخدوها بالابتدائي . طيب ما قراوها  باي ورقة مكتوبة . مستحيل ؟
طيب شوفوا الباقي :
الله يرحميك يا فلانة . الكسرة صارت مد بالياء
و غيروا كتير بغض النظر عن الجمع اللي بجمعوه و المثنى اللي بستخدموه
كلو تشوه
و شو بالنسبة للصبية اللي بتكتب تعليق بشي صفحة  متل
" الحئيئة لازم تضهر او تزهر  " ؟
يا حبيبة قلبي لما تكوني ناعمة و امورة لازم كمان يصاحب هادا الشي شوية  ادب لغوي يعني مش مهم نعرف انك بنت مدنية مش فلاحة و  مش ضروري تبيني هادا الموضوع بطريقة تخليكي سخيفة
لما تكتبي تعليق بجريدة او بشي صفحة الناس يا حبيبتي بتقرا اللي بعقلك مش بتشوف طريقة حكيك لتخطبك ..
او الصبايا الحلوين الناعمين اللي بكتبوا " سحلئت  لانو البلات كان مي :(  ( الترجمة " زحلقت الاخت لانو البلاط  كان مي :) )
. او سبايا وين رايحين اليوم ؟ هاي غلتة عمري
انا اسفة صبايا بس  انا بعتبر اللي بتكتب  بهيك طريقة اما بتكون مصطنعة و عندها نقص او بيكون عندها  شي بالنطق و السمع  و لازم تتعالج
ممكن على فكرة انو وحدة تحكي بهاي الطريقة كتير حروف بتسقط منا بدون وعي لكن انو تنكتب هيك . هاي أُميــَــــة
و الشباب قدام البنات لازم يبينوا انهم " عضل " و هيك قصص
فالجملة هيك بتصير
" صطحي عالي "
او مثلا " انا ما بنصى " يعني ما بينسى :)
يعني عمو عرفنا انك قوي و عضل و قصص متل هيك بس على فكرة  حرف السين مش للبنات فقط :)

و غير انو القاف بتصير كاف و (غ) بتصير (ق)
و التاء المربوطة و التاء المفتوحة " تاء التانيث "  الهم قصة تانية . و من هاي القصص
فلانة زوجت فلان . و امرت فرعون . و هاي أمثلة بسيطة على اللي بشوفه
اما اللام القمرية و الشمسية  انطفى ضوهم الاتنين يعني
اشمس بدل الشمس  - اطيب بدل الطيب  و في منه كتير
و غير الناس اللي مو عارفة تعبر بجملة مفيدة و بتكتب 100 سطر  . ..... بس  بدون فايدة الفكرة ما بتوصل
ارحموا اللغة
و ارحموني
انا مش معلمة لغة عربية بس هي الطريقة في كتابة الاحرف بتعملي تلوث بصري
كل الامم تعتز بلغتها .  الا نحنا بنحاول نشوه اي شيئ جميل فينا . و لازم نهتم بهادا الشي . مش عارفة كيف ؟؟؟؟للاسف
يعني لو كم فكرة نجمعها و ننشرها بصفحاتنامممممم ممكن ؟
او حدا بيخترعلنا برنامج للتصحيح اللغوي و يكون بيشتغل في كل الصفحات و البرنامج زي اللي على word ( بس مصيبة لو المخترع بيكون صيني )
مش عارفة بس حاسة انو الموضوع بيتطور لدرجة انو في ناس ما بفهم شو بدها
و بالنهاية .... بس توضيح صغير : حبيت اكتب بالعامية عن الموضوع حتى ابين انو نحنا فينا نتحاشى الاخطاء الاملائية حتى لو استخدمنا لهجاتنا  العامية  .
هامش 1: يمكن الموضوع يكون بنظرك سخيف او ما بدو هالضجة . بس وقتها اعمل حسابك انو لو ضل الوضع هيك و تطور اكتر . رح تطلب مترجم يترجم كلام ابنك الك . :) هادا اذا ضل حدا بحكي بالعربي ؟؟؟
هامش 2 :  عندي مشكلة مع الهمزات ما عم تطلع عندي فسامحوني
هامش 3 :  بما انو نحنا في  ايام مغفرة فالله يغفرلنا كلنا.
و اغفرولي اذا كان في اخطاء املائية و يا ريت تنبهوني الها :)

هناك 11 تعليقًا:

LUNAR. يقول...

لا الاه ايلا الله عالى هالصوبح
شو بيدك منا انتي خالينا نوكتب زاي ما بيدنا

*الكلام السابق معظمه شفته بأم عيني على فكرة , وكأنه الحركات صارت حروف , الكسرة ياء والضمّة واو والفتحة ألف

لاكن شو بدنا نعمل :)

Um Ommar يقول...

ههههههههههههههه

حسيتك معصبنه وإنتي بتحكي

Haitham Jafar يقول...

أحييك و بعنف :)

المسألة ليست بسخيفة، أبدًا!

حسست على سحلأت / بلات

هههههههههه

أو لما الشب يصير يحكي بال "أ" قدام حبيبة القلب و صويحباتها و هيك

العامية ليست خطيئة! و لكن لا ضير في 50-50
كبداية على الأقل :)

--------
ما لها الهمزات؟ :) أ إ لأ ، هيهم زابطين

:)
---
أشكرك

لبنــــــــــى يقول...

lunar
بجد مش تشوه و تلوث بصري ؟؟؟
و انا شفته بس راح عن بالي و انا بكتب التدوينة كويس انك ذكرتني فيه
و لاكن كمان :))))))

شوف ممكن نضل نحكي شو لازم نعمل ؟ بس لازم نعمل شي مش عارفة شو هو بس لازم الاقيه

ام عمر : مش عارفة قديش الموضوع بستفزني زي ما بعض الناس بستفزهم اكل الثلج :))
مش معصبة بس الموضوع بيطور
لازم تلاقيلنا فكرة يا ام الافكار


هيثم : شكرا الك
معلش انا جديد عم بستخدم الحاسوب :)))
و لهيك لهلا مو متعودة عليه
بس لازم اتعود
أ
لأ
شفت :)

Um Ommar يقول...

خشم وفغم ثلج
يميميميممييييييييييي
:dream:

لو حكيتي حك أظافر بجينز,ممكن أحكيلك أه بوجع
ههههههههههه

مهندس مصري يقول...

معاكي حق
أنا بأتعب بجد لما بأشوف التشوهات اللغوية الفظيعة دي
مع إننا ممكن نكتب بالعامية بشكل محترم إملائياً

لبنــــــــــى يقول...

ام عمر : كمان اضافر بجينز يا ويلي ---------- ممكن برده :)


مهندس مصري : نورت و كل عام و انت بخير . معك حق ممكن نكتب بالعامية بشكل محترم

دُجانة غَيث- Jojana Ghaith يقول...

مرحبا لبنى :)

حبيت الموضوع كتير، واستمتعت بزيارتي الأولى لمدونتك. ولو إنه كنت بفضل ينكتب الموضوع بالفصحى، لإني بآمن إنه تأثير الفصحى أقوى، خاصة بهيك حالات، وإنه إحنا اللي عم نمحي دورها من خلال استخدامنا للعامية البسيطة جداً! ومع هيك بوركتِ على فكرتك وطرحك :) ومش رح نحاسبك عالخطئين اللغويين اللي لمحناهم لإنه شكلك كنتِ منرفزة وإنتِ تكتبي فسقطوا معك سهواً ;)
بتشرف بزيارتك لمدونتي.

لبنــــــــــى يقول...

عزيزتي دجانة :) لازمنا عصيان بجد على هالكوارث اللغوية
نورت مدونتي و بتمنى انها ما تكون الزيارة الاخيرة كمان
بالنسبة للطرح حبيت ابين انو نحنا فينا نكتب بالعامية و نعلق كمان
بس بطريقة تحفظ اللغة من الهرج اللي بنشوفه
سامحينا على الاخطاء اللغوية
تحية

Haitham Jafar يقول...

:)

Sarona Harb يقول...

الله يعطيكـ العافية ..المشكلة اذا لم نسعى لحلها حقاً سنحتاج لمترجم