حادث عرضي

متأخرة متل العادة بس بصراحة الله يرجع ايام الروتين على خير :)
تخيلوا بدي ملل و روتين و بطالب بحقي فيهم . نفسي اني الاقي حالي ملانة و ما عندي شي اعملوا . و اكيد ما رح اطلع من البيت
لاني فكرت امبارح اطلع من البيت بعد ترتيب دورية مع اخواني مين اللي بقدر يطلع و لاي ساعة و مين اللي بقدر يقعد مع بابا لانو حالتوا هاي الايام ما بتسمح انو ينترك لحالوا
و قررت اني اطلع و احضر عيد ميلاد ابن صاحبتي اللي قررت هي التانية انها تغير الروتين المعتاد لحفلات اعياد الميلاد و تعمل حفلة صغيرة او قعدة بلغة نون النسوة على البحر و البلاجات و بما انو الجو هي الايام كتير حلو قلنا ليش لا تغيييير روتين
و انا ما وصلت و نزلت من السيارة و باشر لصاحبتي بكل حيوية الا اسمع تشحيطة كبيرة و شرار و صوت عالم بتصرخ و اطفال و ضربة سيارة كبيرة على السايد التاني من الشارع و هرن السيارة ما وقف تزمير لانو بحسب خيالي الواسع تخيلت انو اللي عم يسوق لزق بالستيرنج . و بشكل لا شعوري قلت راحوا الاولاد و مع الناس اللي عم تدافع كنت انا اولهم مع اني بكره التدافع على الحوادث لكن الموضوع طلع لا شعوري و لقيت سيارة همر قالبة بعد ما صدمت عمود الكهربا . و طبعا البركة بالشباب قلبوا السيارة و رجعوها و بلشت عملية انقاذ من اطراف ما الهم خبرة بس للصراحة و الحق كانت منظمة بطريقة غريبة . ناس عم يحاولوا يطفوا بطارية السيارة اللي تقريبا ظاهرة . و ناس عم تبعد العالم المتجمعة و اتصلوا بالشرطة و انا شفت ايد عم تدق على شباك السيارة الخلفي . مش عارفة يمكن انا لحالي شفتها ؟ معقول . و حاولت افتح الباب . بس للاسف ما قدرت و طلبت من شخص واقف جنبي انو يحاول بس ما قدر و طلعت قبضة الباب بايدوا و دخلوا شباب و باب السيارة ( الطبون ) و بحاولوا يدورا على الاولاد الصغار اللي الكل مش بس انا سمعت صوتهم . ما لقيوا حدا لدرجة انهم تخيلوا انو الاطفال صاروا تحت الكرسي و خلعوا ليلاقوا شي ... ابدا . طلعت اللي بالسيارة بنت لحالها و من قوة الضربة و مش لابسة حزام الامان طارت من كرسيها للكرسي الل جنبها . لو كانت لابسة الحزام لكان ماتت على الاكيد لانو الجزء اللي عند السواق كان من الاخر ... معفوس
و لقيت حالي عند البنت عم اسالها اذا بدها شي و شبين دخلوا السيارة اللي استغربتوا انو واحد منهم لابس حلق لكن من اول ما دخل عم يقلها اذكري الله و صار يقرا قران . طبعا هاي الصور بمخيلتي عم تدور لكن بوقتها كنت عم حاول اساعدها بايا شي . البنت الحمد لله بخير لاني اتطمنت عليها اليوم بما انهم استخدموا مبايلي ليحكوا مع اهلها . و ما فيها الا رضوض . الاغرب من الحادث الاشاعت اللي وصلت للسما بعدها بخمس دقايق . اللي بقول مرة و اولادها و التاني بقول مسرعة مع انو الشارع ما بسمح بسرعة كبيرة لانو زحمة هي بس شكلها تفاجات من الزحمة و ما سيطرت على السيارة . و الاغرب من هيك انو الكل لما شافها مو متحجبة قالوا انو الشباب ( ابو الحلق و التاني ) اصحابها و بتعرفهم . طبعا انا كنت واقفة طول الوقت معهم الصبية ما بتعرفهم بس هم سالوها ع ن اسمها و و ضلينا نحكي معها مشان ما يغمى عليها و مش غريب انو يكون الانسان بهادا الوقت عاطفي و انو يحاول يساعد على قد ما بيقدر و بما انها لابسة جسنز و مش محجبة و مشغلة اغاني فهي اكيد ( براي العالم اللي حكوها قدامي ) هاي اشارة من الله ابصر وين كانت رايحة تقول البنت طالعة ببكيني و الا ......عالم غريبة و بتحشر حالها بكل شي حتى باخلاق عالم ما بتعرفها و حتى بين العبد و ربو...
لكن شي استغربتوا اني ما خفت ... بصراحة انا كان همي الاطفال و ما طلع في اطفال . و بعد ما حكوا مع اهلها ووصلت الشرطة كتير عالم راحت بحالها . و كملنا عيد ميلاد عبود و احتفلت فيه عادي كانوا ما صار شي
مش عارفة بس حاسة حالي بلا احساس هاي الايم و الحادث اكدلي الموضوع
ما خفت - كنت مع بني ادمة مصابة و اهتزلي شعرة ؟؟؟؟ و بعدها كملت اليوم عادي ....؟؟
مع انو اختي اللي بعيدة عنا صارت تبكي و انهارت مع انها ما شافت شي .... بتضحك علي و بتقولي انو الشغلة قدرات و نعمة من ربنا ؟
و روحت عندي برد لاني ما توقعت انو الشط يكون بارد هالقد و ما تقلت باللبس . كان يوم تحفة .
لهيك قررت اني اقعد كم يوم بالبيت و اعتكف لاني مريت الشهر هادا بمواقف كتير صعبة من دخلة بابا للمشفى و عمليات و قصص - لمواقف شخصية - و الدوام - و لما قررت اطلع اغير جو صار الحادث اللي حكيت عنو
مش عارفة بس الايام هاي كتير ملخبطة مع اني مشتاقة اقرالكم و اعرف اخباركم
لهيك بحاول امر بشكل سريع بس بدون تركيز
و للناس اللي بعتولي ايميل اتطنوا علي شكرا كتير كلكم زوء ... هلا فتحت الايميل - تخيلوا لقيت 77 رسالة غير الاعلانات :)
حسيت حالي مهمة
waw
شعور حلو . بس اكيد راجعة . و رح اعرف اخباركم و شو حكيتوا بغيابي

اللي بسال ليش كان في صوت اطفال ؟؟؟ اكتشفنا بعد فترة انو السيارة الل كانت وراها فيها اطفال و صرخوا لما شافووا الحادث
الكل فكر انو الاطفال و الصراخ من جوا سيارة الهمر نفسها :)
بالمناسبة بحب اطمنكم على عمود الكهربا اللي ضربتوا السيارة :::: طفى ثواني و رجعت اضاءتوا قوية اكتر :)
مش عارفة ليش كنت قلقانة عليه انا

مرحلة الدوخان

ممكن نقطة مي صغيرة تغير شكل الجبل

هاي الحكمة انا اخترعتها ........ مش كافية لتعبر عن اللي مريت فيه الفترة الماضية
بس كانت شوية ظروف عائلية اكتشفت فيها انو الانسان كتير ضعيف و ممكن اي هزة صغيرة يتعرضلها
تخليه يلف حولين حالو و هو مش شاعر
و ما رح يحس بالدوخة الا بعد ما يهدا
و انا شخصيا هلا بمرحلة الدوخان :)
بس نصيحة صغيرة
" ما تقول باي يوم انك زهئت من الروتين و بدك تغير . احيانا الروتين اليومي بكون احسن من التغيير .. و تصير تتمنى انك ترجع للروتين "

صايرة حكيمة انا ؟؟؟ مش حكيمة اللي بتعطي ابر
لا حكيمة يعني كتيرة حكي
:$

اشتقت كتير لاقرالكم و اخربش هون

PEACE yA mAn

هي : شو رايك بطرق السلام هالأيام ( صوت الارجيلة يعلو كانك تغطس بالبحر و بتبقبق )


أنا : و الله مسخرة


هي : ليش ( سحابة دخانية متطايرة )


تبديل البربيش من يد لاخرى


أنا : يعني انا برايي انو السلام من منطق قوة بصير سلام بس طرف ضاغط على التاني ما بصير سلام


يعني يا حبيبتي انت عم تلوي ايدي ساعتها ما بتقولي سلمي بتقولي استسلمي و نحنا وصلنا لمرحلة مقرفة تجاوزت الاستسلام


و كل واحد نازل يستغل فينا من ناحية اللي بدو ينكش الكبار بيدعمنا و اللي بدو رضاهم بدعس على رغبتنا


و احنا من قد الدعس بلشنا نفرط - مرة فتح و مرة حماس و حكومة مقالة و حكومة مش عارفة شو و سيارات مرسيدس و علام و احقر جندي امو مش عارفة مين ابو بدخل على ايا بيت بفتش و بأمر و بيعتقل و أيا حركة بننضرب فسفوري و بتقولي سلام والا مفاوضات


دخيلك ايا سلام هادا اذا نحنا مآدن ما عم نمون نبني و هم بصروا على دولة يهودية يعني اذا قلنا اسلام صرنا متطرفين بس ادا قلنا يهودية صارت القصة فيها طرح جديد


مستوطنات و عم تنبني - اقصى و عم ينهد - ترحيل - جدار - قصف - اعتقالات - ملف اسرى - انتشار المخدرات - بطالة - فساد - هادا اللي احنا فيه


سلام قال ؟


هي : انتي شو بتحكي و بطلي احضري هالاشياء الله يخليكي انا مو قصدي هيك


أنا : شو قصدك ؟


هي : يعني شو رأيك بموضة السلام الدارجة " هاي " بدل السلام عليكم شي مقرف صح


سحابة دخان برائحة العنب و قربت تمطر
أنا : مقرف ... ? وجهة نظر

طريق خارج عن الروتين

جلست على طاولتها . كعادتها جاءت مبكرة و فضلت أن تراقب الطريق بدلا من ساعة يدها

انه انتظارك

تمنت لو أنه يفاجئها بشيئ . ليس من الضروري ان تعانق اصابع يديه زهرة لتفرح . ودت لو أنه يبتدع اي شيئ لجعلها سعيدة . ان يضع يده على كتفها تلقائيا عند قطع الطرق . او ان يشتري لها كيسا من اللوز الأخضر و يأكلانه سويا

لا تريد تلك العاشقة شيئا منه سوى ان يكسر الجدار . أو كسر الروتين ولو مرة واحدة منذ ثلاث سنوات و الوصول قبل الموعد المحدد . لم كل تلك الخيالات تداهمها فجأة . " هو طيب .. لكن جاف " قالت في سرها و نفثت دخان سيجارتها بعيدا عن النافذة


لم لا تبدأ هي بكسر الروتين و تطلب القهوة قبل وصوله ؟

لفت نظرها فتاة تقترب من بعيد بخطوات متسارعة . خطوات عاشقة على ارض مبتلة . تكون حذرة بخطوة و عجولة بالاخرى .

كما كانت هي

و لكنه اطفأ شيئا ما بداخلها . جمرة عشق غطاها بوابل من تراب العادات و التقاليد و الناس

" و حكي الناس " و بس نصير لحالنا اعملي اللي بدك اياه "

اقتربت تلك العاشقة اكثر فأكثر

و كأنها تريد قطع الطريق و التوجه الى ذات المحل الذي تجلس فيه

نظرت الى اليمين ثم الى اليسار و همت بقطع الشارع و يفاجئها رجل بحركة من يديه و تعانقه في منتصف الشارع . احست بحرارة العناق . و مرت الثواني كانها ساعة و هي متجمدة في مكانها تحتبس انفاسها

لم يحدق بهم احد و لو فعل فهو مثلها يريد ان يجرب ما فعلاه العاشقان بعفوية .

ليش أكثر

" ليس هناك اجمل من طريق واسع يضيق بعناق عاشقين . و يحفران بقدميهما ارضا حملتهما يوما "

قطع صوته حبل افكارها و هو يقول بجدية مبالغ فيها

" دخان و بمكان عام . كم مرة حكيت اعملي شو ما بدك بس ........."

وضعت كفها على فمه و نزعه بعصبية فورا

" مش حكينا بلاش هالحركات قدام العالم ؟ لما نكون لحالنا ..........."

هي : ما رح نكون لحالنا .

و تركت مقعدها و احست ببرودة تسري في جسمها فجأة

و مرت فوق اثار قدمي العاشقين على الطريق

و أحست أن الأرض ما زالت مشتعلة هناك



وَتــــــَـــــر( مني )

مواقعي المفضلة :)

شكلي رح صير مدمنة تاج أنا
و شكرا لأشرف على التاج و لأنو تذكرني و لأنو متل هيك تاجات بتخلي الواحد يتعرف أكتر على مواقع ممكن يستفيد منها و تساعده حتى بحياته العملية
طبعا هو سؤال واحد بس رح أغش طريقة أشرف بالتقسيم
مع إني مش مدمنة مواقع بس رح احكي عن المواقع اللي غالبا بزورها بشكل دائم او متقطع لكنها على المفضلة عندي
نبدأ بالسؤال :)

1- ما هي المواقع المفضلة لديك (كِ) وتزورها باستمرار؟ ضع (ي) رابطها و ما تستفيده منها ؟



اولا المواقع الأدبية :

1- الموسوعة العالمية للشعر العربي

2- القصة السورية

3- جهة الشعر

4- الورّاق

5- مكتبة مداد

6- مواقع الكتاب و الشعراء اللي بحب كتاباتهم و بمر عليهم من فترة لفترة

- محمود درويش

- أحلام مستغانمي

-غسان كنفاني

- نزار قباني

بستفيد منها ادبيا كتير خاصة للاطلاع مع اني بحب القراءة الورقية و مسك الكتب بكلتا اليدين لكن للاطلاع او الاقتباس او التذكير :)

ثانيا المواقع الإخبارية :

1- الجزيرة

2- عمان نت

بشوف اخبار الدنيا

ثالثا الصحف و المجلات "
بصراحة كنت دائمة القراءة للصحف خاصة مؤنس الرزاز ايام الجامعة بس بعد هيك ما ووفاة مؤنس الرزاز صارت الجرايد متل بعض و مملة لكن بتابعها من باب العلم بالشيئ و لقراءة مقالات ابراهيم عيسى اللي بحترموا في الدستور المصري و كامل نصيرات احيانا و طبعا الكاركاتير ( بيني و بينكم ما تحكوا لحدا لما اكون فاضية بسحب صفحة الكلمات المتقاطعة و ببلش فيها بس عمري ما خلصت و لا وحدة للاخر :) )
1- الرأي الكويتية

2- الدستور الاردينة

3- الدستور المصرية

4- الغد الأردنية

5- القدس العربي

6- الكرمل ايام ما كان رئيس تحريرها محمود درويش

رابعا : المواقع التعليمية و الأطفال ( ممكن يستفيد منها اولياء الأمور :) ) بستفيد منها كتير بالتدريس

هاي المواقع بتفيدني لشغلي كتير و بنصح فيها الامهاب و الاباء كمان لانها بتوسع ادراكم و مفهومكم للتعليم الحديث و كمان للطلب و بتساعده على استرجاع او استيعاب مفاهيم و بطريقة حلوة
1- أدب الأطفال

2- موقع بنين و بنات

3-e-learning for kids

4-kids.jor

5-قناة الجزيرة للأطفال

6-موقع للتلوين ( أنا بحب الون كمان )

7- اكاديمية الأطفال

8-bbc kids



خامسا : مواقع البحث

1- طبعا الأخ جوجل

2- Ask.com

3- ويكيبيديا

ما الي غنى عنهم طبعا الكل بيعرف كيف بنستفيد منها


سادسا: مواقع لازم أمر عليها كل يوم . مدوناتكم في بلوجر او ووردبرس او المواقع الشخصية



سابعا : منتديات

1- أمارتا

2- كانت أخوية بس ما بعرف شو صارلها ؟

3- وصال العرب - بس من زمان ما مريت عليه و كان الها فضل كبير علي باشياء كتيرة .

هون الاستفادة الاساسية هي التواصل و عرض الافكار و مناقشتها مع اني بسجل بالمنتدى بس نادرا ما اناقش فيه بس بحب في وقت الفراغ اعرف راي العالم و غير هيك هاي المنتديات فيها زوايا بتجذب اهتمامتي بالادب و الموسيقى و السياسة كمان لهيك من فترة لفترة لازم امر عليها

ثامنا : موسيقى
غذاء الروح متل ما قالوا و انا هون بتغدى دايما
1- http://www.rainymood.com/

2- طرب

3- سالمية

4- موقع فيروز الرسمي



تاسعا : كاركاتير
مش عارفة وين الاستفادة بس اظن انو الضحك المبكي بتلاقيه هون و ممكن كل اللي في قلبك يكون باحد رسوماتهم
1- أكيد ناجي العلي

2- أبو محجوب

3- أمية جحا في اي مكان بترسم فيه حتى على الحيطان

عاشرا : مواقع الفيديو

1- http://www.youtube.com/

2- http://www.voobys.com/home_l.html

بستفيد منهم لشغلي اكتر شي خاصة الافلام التعليمية

الحادي عشر : مواقع تحميل الملفات :

http://www.4shared.com/

الثاني عشر : مواقع روحية بتختص بالديانات السماوية :

1- القرآن الكريم

2- الكتاب المقدس

3- موقع يوسف زيدان للكتب و المخطوطات

2- ارسال الدعوة إلى أربعة مدونين :

1- ريتا

2- طبشورة

3- مياسي

4- ويسبر

اربعة بس . شو رأيكم تكون مفتوحة لكل اللي بزورني ؟

هيك كلنا رح نستفيد و يكون النا اطلاع

اكيد قلتوا عن جد وحدة فاضية خير الله بس هاي المواقع اساسية و بشكل دوري لازم امر عليها على الاقل مرة بالاسبوع او بالشهر ما بعرف هيك قصد التاج او لا ؟ بس حبيت اشارككم بالمواقع يمكن تستفيدوا منها

الحمار ما رح يغرّد

لما تكون مدرس أو معلم و نافخ قلبك اعدادات مشان العام الدراسي الجديد و تحضر حالك لسنة دراسية جديدة المفروض تكون متفائل نوعا ما
لكن لو كنت معلم علوم بمدرسة خاصة عربية تعتبر الجاجة اللي بتبيض دهب لصاحبها لازم تتوقع غير هيك



انو يا جماعة انا بستغرب على قوة قلب ولي الأمر لعدة أسباب لهلا بقول هادا مو رجل او ست طبيعية لازم يكون فيهم جينات سوبرمانية ليكونوا هيك مثلا بيسجل ابنوا مع 40 طالب بالصف الواحد . اذا مو اكتر و احسب كم صف بالمدرسة يعني ممكن نقول كم الف طالب بالمدرسة و الحسبة شغالة مع هيك ببعتوا و ما بودعوا على الباب انا لو كنت ولية امر كنت بوست ابني و بكيت كاني رح شوفوا لاخر مرة



ليش



تخيل التدافع اللي بصير اول و وسط و اخر الدوام على الدرج



بلاش



تخيل تدافع اكتر من 400 طالب على شباك المقصف المدرسي و هو ما بيوسع اكتر من 50 ولد



بلاش



تخيل قعدته بالصف مع تعطيل التكييف و الرطوبة و الحر غير الطوز



يعني عن جد رحمة ربنا كبيرة



لا و ولي الامر مع كل هادا بدو خدمة اكستر ا



مش انو نحنا بنكون قاعدين بنعلم و بنظم و بنأسس في مبادئ بدو اكتر من هيك



يعني اذا المعلمة صرخت شوي على 40 راس ليسكتوا لتعرف تبدا حصتها



هون بتكون معلمة غير كفؤ و لازم تلاقي وسيلة احسن


مو مهم كيف تتوفر و من وين . لا . و هادا الحكي لجيل ما عادت الصور بتلفت نظروا


هادا جيل PSP


بدي اسأل ولي الأمر لما ولادك بعملوا دوشة بالبيت انت كيف بتسكتهم ؟و هم 4 او 5 على اكبر تقدير


لا و لازم تكون مصلحة الكتب و حافظة اسماء كل الاولاد و كنيتهم كمان و لازم هو يجي من اول يوم يسألها عن المحروس فتجاوب على طول بتقرير مفصل عن مستواه كامل مع انو نحنا ما كملنا اسبوعين



و المعلمة لازم تكون حريصة على غرز مبادئ النظافة و الترتيب و النظام في عقول هالطلاب


مع انو الطالب منهم بروّح على بيت أهلوا بنسى شو عمل و اتعلم لانو الست الماما و البابا بعلموا انو هو فوق الكل و بشيلوا الوسخ من تحتوا


و من أول يوم لازم تعرف المعلمة انو كل الطلاب بلا استثناء اذكياء و الأوائل و معدلاتهم عالية و مؤدبين وولاد عيل و أهاليهم دافعين دم قلبهم


ما قلنا شي بس يا أخي المعلمة هاي لهلا بني ادمة ما تحولت لربوت . لما تتحول ممكن تعملوا اللي بدكم اياه


مع هادا كلو غير الادارة و الزميلات المعلمات و المقالب و الزحمة و الدوشة


على فكرة ولي الامر بكون دافع شي 1500 دولار يا اخي قبل ما تحمل العالم جميلة بدم قلبك فكر بتحديد النسل مشان تقدر تعلموا بمدارس احسن و بعدين هاي 1500 لمدة عام دراسي احسبوها باليومية كانو الطالب مستاجر سكوتر فيهم مش قسط مدرسة . و بعدين المعلمة ما بتاخدهم بجيبتها هم كم ملطوش باخر الشهر يا دوب يا دوب يكفوا


و ما تقولوا بدنا نحرر فلسطين كيف و نرفع راية ابصر شو


مش بكترتهم ......... بعقلهم ....... و بتعليمهم


ما هو تخلف 4 او 5 او 10 مشان يكبروا و يشحدوا الرواتب شحدة و يلفوا على رجليهم طول النهار ما رح يلاقوا وقت لشي او حتى نشرة اخبار


اما واحد . اتنين بتعليم كويس ببيئة كويسة يمكن يطلع معهم شي


هيك انا بحسبها


بس يا جماعة كل سنة الواحد بتطلع باكتشاف جديد


يا أخي الحمار لو ضليت طول عمرك الممتد لعمر سيدنا أيوب تعلموا يغرد ما رح يغرّد


انك تعلم 40 طالب انو يا حبايب قلبي هون سلة الزبالة اللي بتقدروا تكبوا فيها بلاويكم بلاش على الأرض لمدة 5 سنين و في الصف الخامس تكتشف انهم ما تعلموا .......... وين المشكلة اكيد مو بالمدرسة و لا بالحكومة و لا تحت قبة البرلمان اكيد


المشكلة فردية و مسؤولية فرد


كمان ما فيك تلوم الوزارات و الحكومة و لا المعارضة اذا الطلاب الهم 5 سنين بيتعلموا يصفوا دور و طابور و ما في فايدة ؟


كل سنة بتبدأ تعلم و تغرس مبادئ


لكن هل التربة اللي انت بتغرس فيها صالحة . و البيئة مناسبة لنمو و عيش هاي المبادئ ؟


ما حدا يزعل من التشبيه بالحمار على الأقل ما قلت قرود


بس اللي لقيتوا انو الحمار هو الوحيد اللي ما رح يغرّد


و أخيرا الخميس و نهاية الأسبوع


عن جد بحاجة كبيرة لأني ارتاح من كل هالقصص و التفكير


مع اني ما أظن انو رح اريح بالي


هاي عادتي


ما أنا حكيتلكم


الحمار ما رح يغرّد





نهاية اسبوع سعيدة

مدينة بلا اسوار -

جَعلت مني يوما ما مدينة

و عندما رحلت

تهاوت جميع الاسوار


و بقي قلب المدينة هشا
.................


لكَ سنبلة واحدة مني


و لي منك شجرة سنديان


لماذا ؟


لان الانثى تحتاج لاكثر من موت لتنسى


اما انت فلا تحتاج الا لسنبلة

واحدة لتكتب بها تاريخ عاشق

حطم اسوار مدينته و رحل
.....................


ان رحلت ساقتلك


هكذا تمتمت لك ذات مساء

لكن لن افعلها


كي تبقى


و تندم اكثر على كسر ذاك السور
..................


لن تكون انت تلك الاسطورة التي سارويها يوما ما



بل ستبقى اللعنة الوحيدة التي امارسها كل صباح و مساء



لستُ حِلاً منك بعد



لكنني يا رجل



أُمارس طقوسي الانثوية



في نسف النسيان
............



اكتشاف



لم تكن الاسوار هشة و لم تكن انت قويا



لكن



كنت انا على استعداد



لاستقبال حزن لاشعر يوما ما بالفرح
........


جميع جواسيس المملكة لم يعرفوا خبرا واحدا عنك يا رجل



لانهم لم يجربوا يوما حدس الانثى
......



عاد



أمسك بقلب المدينة بكلتا يديه



لكنه لم يستطع يوما



ان يبني تلك الاسوار التي سبق



و حطمها
...



انتصرت هي على ذاتها



و خرجت من المدينة بعدما سكن بها هو

دوري أنا

هلا انا بحب هاي النوعية من التاج
و بسمي تاج تثقيفي
ليش ؟
لانو بدلك على كتب و اراء فيها احيانا بتشجعك لتقرا او تدافع او تحكي رايك
لهيك بشكر مياسي انها تذكرتني بهيك شي حلو
و عم اكتب و انا مستمتعة :)

من أرسل الدعوة ؟
مياسي

ما هي كتب الطفولة التي بقيت عالقة في ذاكرتك؟

لو حسبنا سن الطفولة ل 14 سنة
طبعا لولو الصغيرة
كل قصص تانتان و ماجد
كتير من المكتبة الخضراء


بحيرة البجع - ساندريلا - سنو وايت
انتهاءا بالبؤساء لفكتور هيوجو


من هو الكاتب الذي قررت أن لا تقرأ له مجددا؟
بدون استغراب
" نجيب محفوظ "
يمكن لاني قرات رواياته كتير
لهيك قررت اني ما اعود اقراله مع اني استفدت منو كتير

من هو الكاتب الذي لم تقرأ له أبدا وتتمنى قراءة كتبه؟

قائمة طويلة عريضة

ما هي قائمة كتبك المفضلة؟
شعر و نثر محمود درويش


كل غسان كنفاني


"مدن الملح " عبد الرحمن منيف


كل جبران خليل جبران


" السفينة " جبرا ابراهيم جبرا


عمرو بن كلثوم( شعر)
ثلاثية احلام مستغانمي
أغلب كتابات حنا مينا


الكتب المقدسة


الياذة هوميروس


الكثير لغادة السمان


نزار قباني " شعر "

ذهب مع الريح " مارغريت ميتشل "
و طبعا كتير كتير

الكتب التي تقرؤها حاليا ؟
بعد رواية الرابح يبقى وحيدا لباولو كويلو و بعد رمضان عم اقرا كتاب خفيف و حلو لبلال فضل و هو ما فعله العيان بالميت و بصراحة ممتع جدا و رح ادور هاليومين بالمكتبات على شي لديكينز و بتمنى اقرا ترنيمة الميلاد مش عارفة ليش

في صحراء قاحلة اي الكتب تحمل معك ؟
تعويذات امي و هي محفوظة

ارسال الدعوة الى اربع مدونين ؟؟؟؟؟؟
ريتا
ميسم
سيدة الزرقة
اشرف

مش عارفة يمكن مر التاج عليهم
و اللي بحب يحكي عن الكتب اكتر يا ريت
مشان تفيد و تستفيد

بحكي مع حالي - جدل ذاتي

في البداية حابة اوضح انو هالحكي كلو براسي و من راسي للازرار و انتو عم تشوفوا هلا يعني هادا جدل مع حالي
وصلت لمرحلة في الفترة الاخيرة كتير احكي و احلل مع حالي الامور اللي بتعرضلها و لهيك حبيت اني احكي بصوت مسموع شوي و هو عبارة عن دقة كم زر يمكن اوصل لسلام روحي و مصالحة مع ذاتي
و اول ما بلشت كنت رح احكي بموضوع تاني تماما لكن لقيت حالي عم ادرج موضوع مختلف عن اللي كنت عم افكر فيه
الموضوع المختلف هو " المسامح كريم "
انو ليش يا جماعة المسامح كريم و هون ببدا الجدل العقيم و اللي بيوصل لافكار غريبة و هي الحالة اللي انا عايشة فيها هلا
من زمان و انا بحاول امشي على شوية مبادئ منها المسامح كريم و التعاطف و تقدير الظروف و هون الواحد بينجر مرة و را مرة لخازوق اجتماعي من نوع معروف للكل
مثلا زمان كنت عم اتعامل بمبدأ من ضربك على خدك الايمن ادر له خدك الايسر و استمريت لفترة طويلة من حياتي على هادا المنوال و طبعا هون بيلحقك موضوع المسامح كريم و الحق عند الله ما بضيع بتوصل لمرحلة معينة بحياتك بتلاقي حالك وصل لمفترق طرق
الاول بقولك الحق ما بضيع و انو الله رح يبعتلك مين ياخد بحقك خاصة لو كان الكف فولتو عالي
بتستنى و بتضل تتسامح لتوصل لمفترق طرق تاني
الاول منه انك بتضل تاكل كفوف و تستنى رحمة ربي فاي دعسة بالبطن معناها انك تتقبل الامور لتوصل لمرحلة انك تلوم حالك و تتقوقع عليها و تحط الحق على حالك مهما كان فبالاخير بتصفي متوحد مع حالة الذنب و عدم الثقة بالنفس و تحسب الف حساب لاي خطوة اجتماعية و ما رح توصل لاشي و بترجع لتقول ليش الله ما اخدلي حقي و انا مظلومة ؟
يا الله وينك عني و حسب قوة الكف و الايمان ممكن توصل للالحاد الداخلي
و هون بتكون جمعت كم كف و كم دعسة بالبطن و بتتجه للانتقام ممكن من اشخاص اصلا ما غلطوا و بتمشي على الحياة و الناس بطرف كعب حذاءك العالي و تراكميا بترجع وبتحط الحق على حالك و هيك ما استفدت اشي و الانتقام الالهي ممكن يكون منك مش من غيرك
لكن لو رجعنا للمفترق الاول بنلاقي انك لو ما استنيت و تراجعت و غلطت حالك و حملتها اعباء الذنوب اللي ما اقترفتها و اخدت موقف من الاول و تعلمت من الكف و عشت بنظريات اخرى كان ممكن تتلافى كل هالتعب النفسي و الجدل
ما هو المساح كريم بس بحدود يعني حدا دعس على رجلي بالغلط ممكن
بس حدا يدعس ببطنك و مشان تقدر تقوم مرة تاني بتكون ضيعت من عمرك سنة او اكتر ؟ هون ما بكون المسامح كريم بكون انسان ماشي مع طرش الغنم لوين ؟؟ هو اصلا ما بعرف
لهيك وصلت لقرار العين بالعين و السن بالسن و البادي اظلم
مع هيك بردوا العالم بقولولي مستقوية و كاني انا اللي بدات ؟ مع اني انا اللي اندعس ببطني لكن للموضوع عدة فوائد جنيتها من تجربتي الشخصية على المستوى الاجتماعي و هي
انك تقعد تحط ايدك على خدك و تقول بكرا الله بياخد حقي ممكن بس مادام بايدك تاخد حقك فكرم منك انك ترحم المخطئ من غضب ربنا
و ترحم حالك من النطرة و هز الثثقة بالنفس و النطرة لسنين لحد ما تصحى
و حاول ما تكون ردة الفعل اكبر من الفعل نفسو مشان ما تتجنى و اوعك توصل معك للقتل الجسدي او الروحي الموضوع لو تحكمت فيه من الاول رح تلاقي نفسك كريم و متعاطف و كمان عادل بس بتاخد حقك
و هيك ممكن تستمر بهدوء
مش قصة انك تقتلوا لا
بس على الاقل تكون راضي عن نفسك و ما توصل لمرحلة القوقعة و لا الاحساس بالذنب تجاه المجتمع كلو و تكرّم اي واحد ما مشي من جنبك و مــــــــــــــا دعس ببطنك
و تعتبره من الاله المنقرضة و تضرب فيه المثل
و بهيك كمان بترحم حالك من الانضمام للطرش الماشي بلا وجهة معينة و بتكون فرد قادر على اتخاذ موقف ولو شخصي من ناحية معينة بلكن بنقدر بعد هيك ناخد موقف علني لاشيا كتير بحياتنا
عمرو طرش الغنم ما توفق انو ياخد حقو حتى من العشب و المي لهيك اخترعوا ابر الهرمونات
و انا مش ناوية اخد هرمونات لهيك رح اتخذ موقف من كل شي حولي و احاول اني اغير و اتغير بس للاحسن و اطلع من هالقوقعة
و بصراحة ما عاد عندي مساحة للمسامحة لانو الموضوع مش اني بخيلة او مش مؤمنة او .............
لا الموضوع اني بدي اكون برة طرش الغنم
و مع العالم الحقيقي و بس

اصحو بكير

بكرا أول يوم دوام

في مكان ما عدت أحبو

و مع ناس أغلبهم ما بحترمهم

بس رح أمشي مع طرش هالغنم

لوين ؟

ما بعرف

كل عام و انتو بخير بلشت المدارس

يعني بلشت الزحمة لهيك نصيحة

اصحو بكير

قبل ما ينسرق الفرح

كل عام و انت بخير
طيب مين قال اصلا انو انا بخير على رأي المعلم زياد :)
هلا أنا ممكن أكون بخير طبقا لمعايير مش عارفة مين حددها بس اللي أنا بأكد عليه
اني مستعدة للفرح
قبل العيد بيوم سألت حالي
" كيف أهل غزة رح يعيدوا "
" مساكين أهل باكستان "
" و دارفور "
" و الضفة ؟ لا كل فلسطين "
" حتى فرانسسكو ؟ )
هاجس كل عيد
مش بس العيد هاجس كل فرح ممكن يصيبني بيطلعلي ميت شغلة براسي بتخليني تعاطفا مع الناس ما افرح
او ابدي استعدادي للفرح او بالاصح استحي اني افرح يعني ممكن اكون انا منهم
" بلشت احكي متل العواجيز انا مش اكتر من 32 سنة "
المهم . كنت صغيرة و كان وقتها بالتمانينات و الانتفاضة الاولى القوية اللي هزت العالم و صور الولاد اللي كسروا الجنود الاسرائيليين ايديهم بالحجار طازة و مش متذكرة شو كان صاير بلبنان وقتها و صدف عيد ميلادي
و كان المفروض انو ماما تعملي عيد ميلاد كبير لسبب ما و لكن بابا رفض و كانت بالنسبة الي صدمة
و اتطلعت على العلم الاسود اللي معلق على البلكونة و سمعت بابا بيحكي لماما
كيف بدك تعملي حفلة و عيد ميلاد و العالم بتموت هناك كيف الكم نفس تفرحوا و الضفة مولعة و طبعا صوت موسيقى تراجيدي و كمل القصة على راسي جدو و كل رجال العيلة
بحضرة جارتنا لبنانية قالت انتوا احرار بس لا اهل الضفة و لا لبنان رح يزعلوا من العالم لما تفرح
هم اصلا بتمنوا يفرحوا و فاجأتني بعيد ميلاد الو طنة و رنة تاني يوم
وقالتلي يا حبيبتي افرحي قد ما بتقدري بكرا بنسرق منك الفرح و ما بتعودي بتلاقيه و رح تندمي
و ما حدا بزعل منك لما بتنبسطي
الله بحب الانبساط لهيك خلقت التبولة و الدبكة بس للبنانيين .. الله بحبنا
مش عارفة شو الرابط بين لبنان و التبولة :)
المهم قررت اني افرح بهالعيد و العالم مستغربة من نشاطي الزايد و سؤالي عن الناس و تلفونات اشتغلت
و طلعت لبس جديد و حضرت حالي و على اقرب صالون و استلمت ضيافة العيد و انا اللي رتبت الكعك ( اكيد جاهز )
هاي انا اللي كنت من كم سنة ما احب اصحى بكير بالعيد و اضل اقول الله يعين العالم
قررت افرح لايا شي و اي مناسبة رح استغلها لانو ببساطة ما حدا بزعل من فرحتي
بس اكيد ما رح انسى انو في ناس بتمنوها
و انو في ناس العيد عندهم بس يفتح المعبر او يدق باب حدا
حامل معو كم كيس او قافلة مساعدات لاطفال قتلهم العطش و الحر
بفرحوا
تخيل انو العيد يكون عندك بس تقدر تفتح شباك الغرفة
و تحتفل لانك فتحت شباك
و تلبس اواعي جديدة و تبارك للعالم بس لانك قدرت تتنفس من الهوا اللي دخل من الشباك
عن جد دنيا مسخرة
بس حتى لو كانت مسخرة رح احتفل و افرح لايا شي جاي من بعيد
قبل ما ينسرق الفرح
متل ما انسرق اشيا كتير غيروا
رح افرح كمان باشياء ابسط متلا عم هيئ حالي و افرح لاني قربت اداوم
حتى لو صرت اكره شغلي بس خلص - خلي للفرح مطرح لو بالغصب
لهيك كل عام و انتوا بفرح
( و العيد لالنا ) معلش اول مرة جوليا انا ما بكون معك
شو بالنسبة للعيدية ما حدا لهلا عيدني
شو القصة
بردوا حجة الاقتصاد العالمي
لا
مش علي
بدي عيدية

رأي مجرد

منذ يومين و في احد الشوارع قابلني طفل صغير يمارس مهنة الشحادة العالمية
استغربت كثيرا ليس لمجرد انه طفل بل لان وجود أمثاله في احد دول الخليج غريب ففي هذه الدول لا تنتشر هذه الظاهرة في الاماكن العامة خاصة و لكن اعتبرها البعض مهنة رمضانية تدر عليه الربح الكبير ( خاصة بعد تحويل العملة ) فصار بعض الرجال المقيمين هنا يستقدمون زوجاتهم و اطفالهم لممارستها و حاولت الجهات الامنية الحد منها حتى وصل الامر منع تصريحات الزيارة لبعض الدول العربية ايا كان عمل المتقدم
سالت هذا الطفل " انت من وين " الرد اتى ببديهية " فلسطيني "
صعقت و لكن تم استيعاب الموضوع بسرعة
طبعا اهل هذا الطفل لم يعرفوا بعد طبيعة هذا البلد و طرق استقدام الاجانب به و يعتقدون ان الفلسطينيين يستطيعون ان يدخلوا ببساطة او بسهولة و للتفسير اذكر بعض النقاط
الفلسطينيون الذين يحملون الجنسية الاردنية او حملة الوثائق يقيمون هنا بشكل شرعي و لديهم مهنة و يخاف كل منهم خاصة حملة الوثائق الخوض في اي مغامرة لانه سيتم الغاء اقاماتهم و تسفيرهم . فالى اين المفر ؟ و حملة الجواز الاردني ايضا ليسوا مستعدين لخسارة وظيفة دائمة لاجل دنانير قد تصرف في يومين .
اما الفلسطينيين الذين يحملون الجواز الفلسطيني فممنوع دخولهم اغلب دول الخليج و منها الكويت
الطفل ذو لكنة دولة عربية واضحة و لكنني لم ارد التعاطي معه اكثر
و لكن لِم استخدم كلمة فلسطيني ؟ لان الناس تتعاطف معهم دون ان يفكروا ان كان صدقا الطفل فلسطيني او لا
و لان كلمة فلسطيني تفتح باب التعاطف الانساني و طبعا المتبرع ان لم يكن خبيرا في موضوع الاقامة او لا يهتم للتفاصيل سيتبرع و يسخى ايضا و ان قال له الطرف الثاني انه من غزة فمن الممكن ان يقع المتبرع ارضا و يبكي و يقبل يد الشحاذ " هذا ان كان يتواصل اخباريا او متعاطف و ليس ليبرالي او ضد حماس "
و قد صدف ان القت الشرطة على مجموعات من النساء و الاطفال الذين يتسولون في رمضان الماضي من خلال مراقبتهم و ذكر احد افراد الشرطة ان احداهن كانت تتخذ من باب الجامع مقرا لها و عند انتهاء صلاة التراويح تقوم بلم عباءتها السوداء و ركوب سيارة تاتي لتاخذها و عند ملاحقة السيارة ضبط فيها ثلاث متسولات و السائق زوج احداهن بينما الاثنتين هن اخواته
و تذكرت ما حدث معي عند مشاهدتي لاحد الاعلانات التي تقدمها شركة زين و احببت الفكرة و اخترت رمز امراة لانني اعتقد ان ايجاد عمل للشخص خير له من اطعامه ليوم فالعمل سيوفر له الحياة و التعليم و الملابس و الغذاء و اهمها الكرامة
و صادف ان اخبرني شخص انه احب هذه المحاولة التي تقوم بها الاونروا لمساعدة الفلسطينيين طبعا صدمت في البداية خاصة انني شاهدتها و لم انتبه للتفاصيل و عنددما اعدت مشاهدتها رايت العلم الفلسطيني بكل وضوح
و قد اثارني الامر في البداية " فلسطين صارت قضية شحدة " و قرات ما كتب ناصر و موود بشان هذا الموضوع
و لكن فكر في الامر من ابعاد مختلفة عن القضية الفلسطينية او الاستغلال و الكرامة
ما هي الاونروا ؟
هي منظمة مسؤولة عن رعاية اللاجئين الفلسطينيين في المخيمات و يتركز عملها في الاردن و سوريا و لبنان و الاراضي المحتلة الى ان يتم ايجاد حل لمعاناتهم
و طبعا هذه المنظمة تعمل منذ اكثر من62 عاما و لكن ما هي مصادر تمويلها ؟
التمويل :
تعتمد الاونروا حسب علمي على تمويلها من التبرعات التي تتقدم بها الدول على شكل مساعدات للاجئين و بعضها عيني و الاخر مادي حيث تتبرع بعض الدول بالغذاء كالدقيق و القمح او بمواد بناء او خيم كمان كان سائدا في بداية النكبة و بعضها يتبرع بمال
و الاونروا مسؤولة عن اكثر من اربعة ملايين لاجئ فلسطيني
و لكن ما الذي حصل بالتمويل ؟
منذ فترة قامت الاونروا بتقديم اقتراحات لزيادة التبرعات التي انخفضت الى اكثر من النصف لاسباب متعددة كالحروب التي مرت بها المنطقة و الوضع الاقتصادي فبعض البلدان التي كانت تمدها باموال طائلة تتعرض لازمة مالية حادة و بعض الدول لا تود الاستمرار بالتبرع و تستمر بتخفيض المساعدات حتى تصل الى العدم و قلت التبرعات اكثر بعد عملية السلام الزائفة و التخبطات التي تواجهها و كورقة ضغط احيانا و لاسباب اخرى كثيرة
بالاضافة الى العدد المتزايد من الاجئين و الذي لم تعد هذه المنظمة تسوعبه
هل يستفيد اللاجئ الفلسطيني بالفعل من خدمات الاونروا ؟
لا يغيب عن الكثيرين المدارس التي قد افتتحتها الانوروا . و خدمات الصحة و الاغاثة و غيرها الكثير التي تقدمها و لو انها صارت متواضعة لزمن تحكمه الاستهلاكية و لكن ما الذي يترتب على الاجئ الفلسطيني لو توقفت هذه الخدمات او قلت المشاريع التي تعد خاصة في اطار التعليم و الصحة ؟
بعد هذه المعلومات التي راجعتها وجدت ان من واجب الجميع و الفلسطينيين خاصة التبرع للانوروا
لماذا ؟
كي لا يصبح الاجئ الفلسطيني كالطفل الذي ذكرته بالبداية مجرد شحاذ لا اكثر و بدون قضية
رؤيتنا للوضع الفلسطيني و القضية الفلسطينية يجب ان تراعي ان الفلسطينيون عامة هم بشر يستحقون الحياة كغيرهم و اسم فلسطيني يجب ان لا يحكم عليهم بان يفقدوا انسانيتهم
يجب ان نتقبل الفلسطيني كانسان يحب - يخطئ - يسرق - يحكم - يجور - يعدل - يحرر- بطل - منافق- ملاك - شيطان - عائد - خائن - يغني - يرقص - يصلي - يجب ان يكون انسانا و ان لا نجرده من احتياجاته الاساسية حتى يبقى و لا تنقرض القضية
لماذا علي انا ان العن ذلك الاعلان ؟ و انا اجلس تحت التكييف و امامي سفرة طعام متنوعة و عندما أمِلّ استطيع قيادة سيارتي الى اقرب كافيه يطل على البحر
انا ايضا فلسطينية و من حقي التمتع كما من حق اللاجئ الفلسطين في اي مخيم ان يحيا و يتعلم و يتداوى
اعلان انوروا لا يذل الفلسطينيين بل يذكرنا بانسانيتهم التي اسقطناها من اعتباراتنا و صار الفلسطيني كمثل سوبرمان العربي الذي يحارب اليهود بحجر و ينتصر بان يردهم متر واحد للوراء و يستطيع ان يصمد في مخيم و تسيل من تحته مياه المجاري و المطر يهطل على راسه
الا يحتاج هذا السوبرمان الى الغذاء و التعليم و الكساء ؟
و ايضا اليست تلك مدارس الانوروا التي درس بها اغلب رجالات القضية ؟ و التي خرج من ظلال مخيماتها افضل رجال الزمن الفلسطيني
ربما انا لست مع او ضد و لكن دعونا نحتترم انسانية الفلسطيني
و هذا رأي يحتمل الخطأ و يحتمل الصواب

يمكن ......... تفجروا انتوا الثورة

كالعادة و في هذا التاريخ في الايام العادية الخالية من رمضان
تُزج صوره و يكتب الاخرون عنه
و لكن الان رمضان يا ابو خالد الناس مش فاضية
الله يرحمك
شو كنت عملت لو مثلا مثلا مش اكتر حضرت اخبار امبارح على قناة الجزيرة
رئيس السلطة و الوزراء للسطة الفلسطينية ---- اها صار عنا سلطة و دولة انت فاتك الكتير -
بدينوا قتل 4 مستوطنين و بعتبرها مؤامرة على الفلسطينيين .............
يلعن اخت الشغلة يا زلمة فش حيا بالمرة
- اللهم اني صائم -
سمعت بدهم ينقلوك و يحطوك جنب صاحبك ؟ يمكن تتفقوا على شي بعد خناقاتكم بالدنيا
و من مكانكم تفجروا ثورة .. يمكن
كل مرة بدور فيها على شي يعبر عن الوضع الفلسطيني المغبر-- الحالي ---المعتر
بلاقيك انت
سلام لروحك أبو خالد

يومها التقيت بناجي العلي

تخت شرقي

من أول رمضان و أنا في غيبوبة


مش عارفة الوقت كيف عم يمشي بطريقة غريبة - سهر طول الليل و نوم بالنهار انتقاما لرضان الماضي اللي داومت فيه تخيلوا صيام و ما في قهوة و حر و اربعين طالب راجعين متل القرود بدهم يصرفوا كل الطاقة اللي حوشوها طول 3 شهور على راس المعلمة الصايمة


غير الادارة و القوانين و هالقصص


رمضان هادا اجازة معناها نوم و راحة و تدليل و قطايف و كنافة كانوا بعد رمضان رح يخلص الاكل و الحلويات فالكل نازل نسف


حتى النت ما بمر عليه الا بسرعة مش عارفة ليش بس السهرات و العزايم ماخدة وقت البيت كلو و الانجاز الكبير اني بتابع مسلسل طبعا مش باب الحارة و هيك بكون ضمنت بال طويل لبعد رمضان يعني تخيلوا مسلسل حلو و دعايات بتنط بوجه الواحد كل 3 دقايق


شي بجلط لكن بهون لانو بعد هيك اكيد رح اعتزل التلفزيون و ارجع للروتين


المسلسل هو تخت شرقي . طبعا انا مش ناقدة و ما بعرف انتقد شي بس بحكي بحس المشاهد المعتر بعد حروب المسلسلات التركية و الايرانية و المكسيكية اللي غرقنا فيها قبل فترة


طبعا انا من محبي الدراما السورية خاصة لو توجت باسم حاتم علي بس المسلسل اللي بتابعوا مش من اخراجه من اخراج رشا شربتجي و تمثيل نخبة من الممثيل الرائعين برايي


اللي شدني بهادا المسلسل هو طبيعة الواقع المحظور اللي ما حدا بقرب عليه لانو الخوض فيه و برمضان يعتبر خطر لكن من رايي القصة مش رمضان او غيروا فاللي ما بنحضر برمضان هو نفسوا اللي ما بنحضر بعد رمضان


المبدأ لا يتجزأ


لهيك عم تابع حلقاتوا باستمتاع المشاهد اللي عم يشوف حالات من العالم ممكن تكون حوليه او عايش معها و يوم من الايام تعرف عليها او يمكن يصدف حالة بتشبهوا او نقيضوا


اللي بحبوا في نوعية هيك اعمال الطريقة اللي بتسلسل فيها الامور بسلاسة و بدون تعقيد و طبعا طريقة تقديم الشخصيات مش ممل بالعكس كل يوم او فترة بتكتشفي شي عن الشخصية


يمكن انا من النوع اللي بهمني سياق الدراما و الاستنتاج و ما بحب صحون الفضة اللي بتتقدم فيه المعلومات هيك على استهبال و بدون مراعاة لعقلي


ليش عم احكيلكم عن المسلسل ؟؟؟ ممممممم


لفت نظري عبارة قالها عبد الهادي صباغ في حلقة من الحلقات و بصراحة بتنطبق على جيلنا لو فكرنا فيها منيح و هي :


انتوا جيل فقد سمة التعاطف الانساني . لازم يكون في سبب لكل شي . و نسيوا انو الانسانية اهم سبب .....


احنا وصلنا لهاي المرحلة و ما بنقدر ننكرها ممكن يكون فينا شوي لكن على طريق الانقراض


تعوا نتخيل متلا هادا الحادث لو صار 1960 مثلا او قبل 1990 لانو بهادا العام انفرضت فيه نظريات جديدة و كتيرة


سمعت صوت صراخ استغاثة من شقة انت ما بتعرف مين ساكن فيها


صدقوني العالم بتلتم و الرجال اللي في العمارة ما رح يضلهم يتفرجوا و يمكن يكسروا الباب كمان المهم الحالة الانسانية اللي جوا


بعد ال 2000 لو سمعت صوت جارتك اللي ما بتعرفها او بتعرفها مش مهم ...بتستغيث ..... اغلب سكان العمارة رح يسكروا الشباك و الباب و ما النا دخل هي الجملة الاساسية و بيتبعا خبرها خلينا في حالنا ......


الطفولة امتد الها هادا المرض


يعني و نحنا صغار و بنلعب في ساحة البناية العصر كنا نشوف مثلا جار حامل معوا اغراض او جارة حاملة كياس فالعادي انا نركض نساعدها و في بالنا كلنا ياي هلا انا الله بحبني لاني بساعد الناس الكبار و طبعا الكبار بستغلوا الصغار و بغروهم بحبة شوكولا او مديح قدام الام و هيك النفسية بتطلع بالسما


هلا الماما بتعلم الولد انو انت حبيبي مو شغال لحدا اوعك تحمل كياس و لو شاف الولد اي عجوز حاملة غرض او وقعت و لا هو هون و ممكن يدير ظهروا و بخبر القصة و بنقلها للماما و اذا سالتوا انت شو عملت بهز كتافوا و بقول انا مو شغال عند حدا


ليش لانو سمة التعاطف اللي ذكرناها بلشت تنقرض


او انقرضت الا الباقي اللي ضل للذكرى


عرفتوا ليش بحب بعض المسلسلات السورية


في شي بينحكى بضل بالبال


منها عبارة تانية انا باكدها كتير


الممثلين كانوا بيحكوا عن الموسيقى الشرقية و التخت الشرقي الاصيل و العبارة هي :


الناس نسيوا الشرقي و ما تذكروا الا التخت





صحيح مين شاف مسلسل ذاكرة جسد ؟؟؟؟ طبعا انا اجلتوا لبعد رمضان يعني معقول اقعد اتابع مسلسلين ؟؟؟ صعب





عم حاول لحق كل اللي انكتب برمضان طولوا بالكم شو هالنشاط يا جماعة انا لحالي بغيبوبة ؟

حوار مع رمضان

طرق جميل على الباب ............ و يصاحبه عطر





رمضان : أنا وصلت افتحيلي الباب


أنا : اهلا رمضان


رمضان : شو اخباركم يا فتاة ؟


أنا : انت لوين وصلت معنا بالسنة الماضية


رمضان يبدا بحك راسه و السرد


انا : لا فات عليك الكتير يا سيدي صار ................. و اسهبت بالسرد


رمضان : كل هادا صار لما تركتكم


انا : ما هو انت رحت من هون و الشياطين فلتت علينا من هون و بتعرف انو ايمانا شوي بدو اساسات


رمضان : مممممممممم و دخلك العالم اللي صايمة و مصلية و داعية وين بتروح بعد رمضان . ما هم كل مرة بوعدوني .. للاحسن


انا: ممممممممم بنستناك لنوعدك بنفس الاشياء في السنة اللي بعدها


رمضان : ليش


انا : قلتلك بدنا اساسات .. اساسات اصلية مش تقليد اعمى و حكي على الفاضي


رمضان : الله يسامحكم و يهديكم





___________________________


هامش1 : برمضان و الشياطين محبوسة . الناس بردو بتقول اعوذ بالله من الشيطان الرجيم


الشياطين بترد : اعوذ بالله من نفس الانسان الشريرة


----------


هامش 2 : احلى شي بعد ما يثبتوا رمضان بحس بريحة غريبة بالجو بتصير ؟؟؟ هيك مريحة و عطرة ؟ حدا بصير معو هيك شي ؟


---------


هامش 3 : كل رمضان و انتوا بخير





هون اشي بشبهني ....

شجرة الليمون

رسائل بطعم الليمون

-1-


" لأنكِ لدي


أجد نفسي مبكرا في الكتابة على أي هامش أبيض


أطويه


أعلقه على شجرة الليمون


قبل أن تصحو العصافير


و أمضي "


فقط لأنكِ لدي . أجد سببا وجيها للحياة و الموت و المشي تحت المطر مبكرا . و اقطع حيا باكمله . حتى اقول لك


" صباح الخير " بطريقتي


لأنكِ لدي . أجد انني استحق الفرح بجدارة .


و الصباحات الجميلة .


و قهوة الرصيف الرديئة الني تكون أجمل دوما برفقتك


لانك لدي فقط


لا لسبب اخر


أجد نفسي حراً


و حل من كل العهود و المواثيق


لانك لدي فقط


صارت السماء و الأمنيات أقرب

لأنك لدي


..........


ملاحظة للجارة الفضولية التي لا تكف عن فتح الرسائل الرجاء علقي الرسالة حيثما وجدتها كل تستطيع " هي " قراءتها


" بطلي فضول . و مش صباح الخير "


.......................................................

-2-
ارتدت ملابسها مسرعة حتى تتمكن من اللحاق بالجارة قبل قراءة الرسالة . هرولت على الدرج و كادت تسقط مرة تلو المرة
التقت عينيها بعيني جارتها التي تملك البناية بأكملها و هي تشهق و تتمتم " صح انك قليل ادب الله لا يصبحك و لايمسيك ..."
هي تقترب و قد تمنت لو ان طلقة ما تصيب عقل تلك الجارة الفضولية التي صارت تنتظر الرسائل و تستلمها من شجرة الليمون .
لم لا تكون شجرة الليمون امينة اكثر على اسرارها ؟

الجارة : نفسي اعرف مين قليل هالحيا و مين هي قليلة الحيا هاي


هي : شو بدك فيهم ؟ ناس بتحب


الجارة : صح انو فاضي اشغال . حتى شعر ما بعرف يكتب و ما بفهم . و قال بحب ؟ كيف بدنا نعرف مين هي ؟


هي : و لا يهمك انا بعرفلك عطيني الورقة و بشوف الا ما ينعرف ؟ شو كاتب هالمرة ؟


الجارة : طيب خبيها عندك ما بدي مقصوفة العمر اللي مبعوت الها الرسالة تلاقيها . بدي احرق دمها


هي في سرها تريد معرفة سبب حقد الجارة على الفتاة و الفتى ؟ الانها لم تجرب الحب يوما ؟


" فاضي اشغال " لو تدري تلك المراة انه يعمل و يدرس في نفس الجامعة و كي يستطيع ان يضع الرسالة مربوطة على جذع الليمونة لحبيبته عليه ان يقطع حيا باكمله . و لذا عليه ان يصحو مبكرا عن موعده بساعة حتى يتسنى له الوقت ليمشي و يمشي و يمشي الى ان يصل الى عمله .


" ماذا لو لم تعطها الجارة رسالة الغد ؟ ماذا لو سهرت و انتظرته ؟ "


لو ان كل انسان اعتنى بتفاصيل حياته اكثر و ارتاح من فضوله كانت حياته و حياة غيره أسهل


___________________________________


-3-


هي : بطل اتركلي رسايل و الله لو شافتنا الجارة و الا اكتشفت رح تعملنا مشكلة


هو : بدي اعرف كيف بتقدري تقنعيها كل مرة تعطيكي الرسائل ؟


هي : بحكيلها انو بخبيهم عندي مشان ما حدا يشك فيها و انو اخرتا رح اعرف مين


_________________________________


-4-

المشهد الأخير ... هو يسافر الى دبي ليستطيع البقاء حيا و هي لديه.

و الا سيفقدها عند اول قارعة طريق يتمختر بها عريس ات من الغربة

بعد سنة تزوجت عريس " مغترب " قريب الجارة الفضولية و بشهادتها

" كانت اشرف و أأدب بنات الحي عمروا ما اجاها رسالة و لا حدا عاكسها و لا شفنا عليها حركات هيك او هيك . عمري ما سمعتها بتحكي عن شب او بتطلع معو.......... مش متل بقية بنات البناية "و لوت شفاهها و غمزت العريس "

ضحكت هي و احست ان جارتها الفضولية غبية جدا او انها من فرط فضولها صار لها خيالا واسعا لدرجة انها للان تطالبها بالرسائل بحجة انها من وجدتها اولا ، لو تدري تلك الجارة بفنون البحث الجنائي و كشف الاشخاص من خطوطهم او بتحليل الشفرة الوراثية لاي شيئ عالق بالورقة قد تعرف من هو العاشق . و لربما دفعت نصف ما تملك لتعرف من عي المحبوبة لتنتقدها و تقول

" هلا هاي بتستاهل الحبر اللي انكتب فيه علة هالورقة "

كلنت ستردد هذه الجملة حتما ... حتى لو كانت ملكة جمال الكون ، هذا ما ستقوله تلك الفضولية

,,,,,,,,,

هو بعد عدة سنوات لم يستطع ان يقاوم فيها اغراءات البورصة و تقلباتها

عاد الى الوطن خالي الوفاض الا من جواز سفر تملؤه الأختام و ساعة ماركة

و ملابس بألوان صيفية زاهية و سيارة افلتت من المصادرة ولن تفلت من الجمارك

و من فرط تعلقه بشجرة الليمون التي حفرت ذكرياته الصباحية و كانت جزءا من أيامه

تزوج الجارة الفضولية حتى يبقى بالقرب منها" من شجرة الليمون " و يستطيع ان يمارس عادته الصباحية بفرك اوراقها بيديه و شم الرائحة عن قرب . و لم يعلق بعدها اي رسالة

الجارة الفضولية ... تتمنى لو كان زوجها الذي يصغرها بعشر سنين قادر على كتابة الشعر كالعاشق الاحمق

كانت ستسمي شجرة الليمون باسمه

زوجها ممد بجانبها و هي تفكر بسرها

و تسأل " وين راح هالعاشق ؟ كان نفسي اشوفه ولو مرة "

______________________________

الي خمسة ايام بحاول الاقي نهاية للقصة ---- و ما لقيت

أنت منذ الآن غيرك ..........

أعدي لي الأرض كي أستريح

فإني أحبك حتى التعب

..................................................
اطمئن يا محمود فلا شيئ يدعو للتفكير بنا
لا تغيير
حصار و اقتتال و فضائح علنية و القدس في طريقها للانهيار
سوبر ستار فلسطيني و قنوات تتغنى بالتراث و اخرى تلعن و ندها يصيح
الفرقة صارت ميزة يا رفيق
و اعتقلات بالضفة -( من الجهتين اذا ما اندق بابك من السلطة بندق من ولاد الحرام الجنود الاسرائيليين )
اما في غزة فالاقوال متضاربة و ما عدت أصدق أحد
سيتم الانتقال للمفاوضات المباشرة ( هيك بدو عباس و اوباما و ايهود )
ليش ؟ و لا شي تغيير روتين و ( على الاغلب بدهم يعملوا حرب تانية فبهدوا الوضع عند ولاد عمنا )
شو استفدنا ؟
ولا شي بس لهلا ما صار في قرار ياخدوا مفاتيح بيوتنا في الجليل و يافا و حيفا و صفد و مخلينهم للذكرى
شي غريب ؟

الشي الوحيد الغريب انو لما بتيجي سيرتك
زهر اللوز بصير أحمر

سلام لروحك

امومة الالفية الجديدة - 2010

رمى حقيبته المليئة بالكتب في الرواق المؤدي الى الصالة - داهم والدته بقبلة في خصرها
هو : لا ماما لهلا ما في اكل رح اموت من الجوع
هي : اوكي بس بدنا نستنا بابا . رح يجي بكير اليوم
روح غسل و ضب الشنتة و تعا ساعدني
............
هي : شو ماما كيف المدرسة و التمرينات ؟
هو : goooooooooooood بس انا جوعان كتير
هي : شو عملتوا اليوم . و تناولت كوب القهوة التي تشربه ببطء طوال النهار و كان باردا و تستمتع به كانه كاس كوكتيل
هو : ماما صحيح ممكن اسال شي ؟ ليش في بالدنيا فقرا مادام الله بقدر يعطيعهم و يرزقهم . ليش بستنوا من الاغنيا يعطوهم ؟
هي بعد صدمة حاولت اخفاءها . طفل في التاسعة من عمره قلما يرى فقيرا معدما و يتحدث هكذا ؟
هي : طيب انت وين نقطة اعتراضك او سؤالك
هو : مش الله بقدر يعطيهم - ووين الله عنهم . ليش عم يستنوا انو الناس تشفق عليهم اكتر من اللي خلقهم . هيك انا بفكر او بتخيل
هي : طيب ممكن انا اخليك تتخيل شغلة صغيرة . سكر عيونك . . تخيل انو الناس كلها اغنياء و ما في فقرا . كيف الدنيا رح تصير ؟ كل الناس رح يصيروا مدرا و كل العالم رح يصير بدهم فلل و مزارع و رح يكون تفكيرهم كيف بدي اخلي ثروتي تزيد او احافظ عليها
شوف متلا بابا.موظف و انا موظفة هلا لو كنا اغنيا رح نفتح شركة و كل العالم يعمل زينا من وين رح نجيب موظفين ؟ و الفقرا اللي عم يشتغلوا عند العالم الاغنيا - رح يصيروا هم كمان بدهم يفتحوا شركات . و هيك ما رح نلاقي موظفين
هو : ممممممممم ممكن . طيب ليش الناس بتموت من المرض خاصة الفقرا
هي بعد رشفة اخرى من الكوب الذي احسته سخن فجاة
هي : ماما حبيبي في كتير امراض زمان كانت خطيرة و هلا صارت عادية متل الانفلونزا . بعد ما مات كتير من العالم صاروا يدور الانسان على طريقة و دوا يساعد المريض على الشفا
هو : بس الله ممكن يشفيهم و يعطي الفقرا مصاري و يريح الناس بس هو ما بيعمل هيك
هي و قد بدات ركبها بالارتجاف و لا تستطيع اخفاء توترها
هي : ماما حبيبي لو خلص الفقر من العالم بتروح الرحمة منو . لانو العالم بتصير تاكل بعضها و رحمة ربنا اللي بتنزل علينا لما تساعد الفقير رح تزول و هيك رح نصير نفكر بطريقة البقاء للاقوى زي ما الاسد و النمر بفكروا بالغابة
بس ماما بدي احكيلك شي بسيط . كتير من العالم الفقرا و اللي ما كانوا لاقيين ياكلوا زمان طبعا . صاروا ادباء و علماء و الامراض خلت كتير ناس تعمل تجارب و ابحاث و تقدمت الانسانية بفضلها يعني مش كل شي مش كويس حولينا بكون نقمة و لكن لازم نتعلم منو . انت لازم تعملي ورقة بحث فيها ثلاث خطوات لمساعدة فقير و نفذها هادا الويك اند شو رايك
انت شو كان عندك دروس اليوم ؟ صحيح خلصت اسئلتك ؟ فكر في اللي قلتوا و بعدها اذا بدك شي بنتناقش
هو : حلو . اوكي هلا رح بلش بس
هو : رح نحكي بعد الظهر في سؤال . وين هو الله ان كان معنا في هذه الغرفة ؟
هي : شدت على يدها و قالت حسنا لكن بعد ما تكمل دروسك . و نرجع من تدريب الكراتيه _________________________________________________

المشهد الثاني :

الام مع مديرة المدرسة ( شقراء جدا و عيونها بحر لم تبلغ السبعين بعد ) و احد اساتذة الولد ( عربي ذو بشرة سمراء و لكن بجنسية غربية )

الام : بعض الاحيان يتوجب علينا ان نسال ان كانت هذه هي المدرسة المناسبة ليتلقى فيها ابني علمه . انا ساتحدث قليلا عن وجهة نظري في كون ابني يتعلم في هذه المدرسة دون غيرها طبعا هذه المدرسة تعليمها اجنبي و لكن قلتم عند تسجيل الولد انكم ستراعون اداب و عادات و تقاليد المجتمع الذي يعيش به الطلب و لهذا نحن نكد طوال الشهر حتى نؤمن قسطا كبيرا .

المديرة بلكنة برطانية متعجرفة : تاكدي ان هذا هدفنا . و انكم تدفعون ليتلقى ابنكم اعلى و ارقى مستوى تعليمي

الام : في الايام الماضية كان ابني لا يتردد عن طرح اسئلة غريبة على بيتنا و على ثقافته الاجتماعية - و ايضا لا تطرح هذه الافكار في عائلتنا و عند استفساري عن الدروس التي ياخذها قال لي ان الاستاذ هو من يناقشهم فيها . يناقش نظرية وجود الله و قدرته في صف يحوي اطفال لم يتعدوا التاسعة من عمرهم

انا لست هنا لاشكو لو اردت ذلك كان من الممكن ان اتوجه مع طفلي الى اقرب صحيفة او وزارة التربية و اعرض عليهم ما يقوله المعلم في الحصة و لم و لن يتوانوا عن ابعاد المعلم و ادارة المدرسة و لكن ما اود مناقشته مع المعلم . ماذا تريد بالضبط ؟ اذا كنت انت ملحدا فهذا لا يعطيك الحق ابدا في زرع هذه الافكار بعقول غضة

المعلم : المعرفة منذ الصغر خير من الصدمة بالكبر

الام : من قال لك ان معرفتك هي الصحيحة و التي نود ان نعلمها لاطفالنا . ارجوك اسمعني . انت حر في اي اتجاه عقائدي تعتنقه او لا تعتنقه . هذا ليس موضوعنا . و لكن من المفروض كانسان تدعي الثقافة و الحرية و التحرر من كل قيود العبودية ان لا تمارسها على عقول صغيرة لن تعطيها حرية الاختيار بل انت تسكب بها ما تود فقط لتجبل مع السنوات

انا لا امانع ان يكون ابني ما يريد هو . لكن بعقل سليم تطرح امامه الخيارات و يختار و لكن لا اسمح لاحد بان يؤثر على خياراته بطرح اناني من معلم اعتقد انه رسول الالحاد الذي سينقد البشرية

لا اريد لابني ان يتطرف فكره ايا كان نوعه . و ان يبني خياراته حسب علمه و تجربته و ليس بحسب ما زرعه استاذه بعقله

ارجو ان اكون قد اوضحت الفكرة و لا اريد ان يظن ابني انني احارب فكرة ما بطرد استاذه الذي يحبه . و يتعلق بها لهذا ساكون مراقبة لما تطرحه في عقل التلاميذ و اعذرني ففي المرة القادمة ساكون في مكان اخر و ساسجل شكوى

ايدت المديرة . و التزم الاستاذ و تم انذاره . و انتهى الموضوع

________________________________________________

القصة من وحي الخيال فقط . و لكن من الممكن ان تحصل في اي بيت و في اي مدرسة ليس بالضرورة ان تكون اجنبية و لكن من الممكن ان تكون مدرسة عادية .

لكن بدي اوضح انو الفتيات في هذا الزمن ممكن يصلحوا يكونوا امهات لاولاد من هذا الزمن ........ مجرد تركيبة

لكن لو كانت صلاحيتها و تميزها لا يتعدى المنزل و اساسياته . ما الذي سيحصل

..................................................ما اود طرحه هنا ماذا لو لم تكن الام على ثقافة و متعلمة و قادرة على استيعاب عقل ابنها

ماذا لو نهرته و طلبت منه السكوت ؟

او ذهبت الى الوزارة و اثارت قضية قد يفتحها ابنها عندما يكبر و يقول تلك فكرة صودرت . و ما هو ممنوع مرغوب

ماذا لو لم يحدث شيئ في قضيتها و لم يعرها احد اي انتباه ؟

لماذا لا تربى الفتاة على ان تكون اما بكل المقاييس ؟

بعض الاولاد اراهم اصبحوا اكثر خبرة و حنكة بالحياة من امهاتهم ؟

اقتراح بالاحمر . لماذا لا يكون هناك معاهد او نوادي مختصة للرقي بالامومة و اعطاء النصح من قبل استشاريين و اطباء و علماء نفس و متخصصون بدراسات لها اهتمام بالاعداد التربوي ؟ و تكون خيرية و التسجيل باسعار رمزية و يشرف عليها جمعيات خيرية نسائية ( بدل ما هم فاضيين بس للقيل و القال ) و يمكن للاخصائيين ان يتبرعوا بالقليل من وقتهم . لاعداد ام تستطيع ان تجاري التطورات بكفاءة . و يتم الاعلان عنها و التبرع لها و ......الخ

هذا اقراح لا اكثر و لا اقل

كي نتوقف قليلا عن لوم الام ( 2010 ) و اعطائها الفرصة لتثبت جدارتها

لماذا جفرا ؟ لماذا لجوء ؟

في كثير من الاحيان تصلني رسائل بالبريد الالكتروني تسالني لماذا جفرا و لماذا لجوء


و ما هو سبب اختياري لاسم مستعار لا يجذب الانتباه كثيرا الا و انني لم اجد الوقت احيانا لاجيب و في بعض الاحيان اظن ان الكثيرين على اطلاع و معرفة لهذا الاسم و انك لو بحثت في جوجل ستجد مواقع و محلات و حتى مقاهي بذات الاسم


و طبعا سيزودك محرك البحث باغاني لفرق فلسطينية و الاغنية المتميزة لمرسيل خليفة ( الرائع )


جفرا من لم يعرف جفرا فليدفن رأسه في الرمضاء


ارخيت سهامي و قلت ........... للنهاية


و يمكنك التعرف على قصة جفرا الحقيقة من خلال الروابط التالية لانها ستزيد من معلوماتك و لا حاجة للقص و النسخ


جفرا ( ويكيبيديا )
جفرا من موقع جفرا
جفرا من منتديات - الجزيرة توك
جفرا - منتديات مخيم


و كلها تردد نفس القصة تقريبا احيانا مع اضافة الصور


لماذا اخترت جفرا ؟


السؤال له اجابة ابسط مما تتوقع - في بدايات استخدامي للانترنت كان من المفروض ان يكون لكل شخص اسم مستعار و كلما استخدمت اسمي الحقيقي يكون مستخدما من قبل شخص اخر لذا كان علي اختيار اسم اخر قريب مني و بما انني مرسيلية الهوى اخترت جفرا حتى دون ان اعرف المعنى الحقيقي للاسم و اكتفيت بالرمز و كنت امقت اختيار اسماء مستعارة مثل الالام و وواحة العشق ووووو مع احترامي لاصحابها لكنني وجدت ان اختيار الاسم يدل على شخصية المختار لذا يفترض ان يكون قريبا مني و لا انكر بعض الغرور الذي يصاحبني عندما يشدو مرسيل


و لجفرا ساغني - جفرا من لم يعرف جفرا ؟ و غيرها و من ثم ارتبط الاسم بي حتى بين الرفاق في الجامعة حتى ان اراد احد ما ان يعبر عني بشيئ كانت المواويل المتعلقة بجفرا كافية و التي احس بنشوة عارمة عند سماع بعض منها :)
( لا مش مرض نفسي بالمرة )
و طبعا بعد معرفتي بالاسم و صاحبته بعد فترة قصيرة من اختياره و انه رمز فلسطيني . طبعا تمسكت به اكثر فاكثر :)

( مش عنصرية بالمرة )

و هذه قصتي مع جفرا

لجوء ( لماذا اخترت لجوء ) ( هادا اسم مدونة تجذب العالم لو انا كنت بلاقيها كان سكرت على طول ) ( شو يعني لجوء نصيحة تغيريها لانك بتكتبي حلو ) و كثير من الاسئلة و التعليقات


كنت بالبداية اود ان اطلق عليها عدة اسماء منها حرية - صلاة - محراب - ترتيل - لكن كانت كل الاسماء واردة و لا احب ان اتطفل بالاسم على مدونة اخرى فانا اشعر ايضا بقليل من الضيق او كثير عندما يرد اسمي المستعار او اسم المدونة من قبل شخص اخر مع انني اعرف انه ليس حكرا علي و لا على غيري و لكن احسه احيانا فقد التميز او الخصوصية او بعض من الانانية لا اعرف حقيقة الشعور


لكن لجوء ارتبط بعدة خصائص بحياتي


اولها انني لاجئة فلسطينية من 48 وهذه الصفة نتوارثها مع كرت المؤن من جيل لاخر و القرية التي انتمي اليها هي فجة -قضاء يافا- و قد تم تهجير اهلها مرتين اول مرة كانت من فجة الى قلقيلية و من قلقيلية الى نابلس و من ثم الى خارج الوطن بعد حزيران 67


فاللجوء صفة نتميز بها عن غيرها


ثانيا انني اعتقد ان معظم المدونين لجئوا الى التدوين لتلبية رغبات في انفسهم و انا لجأت معهم


ثالثا اننا دوما ( او انا حصريا ) نلجأ الى اكتساب حقوقنا التي من المفروض اننا ولدنا مستحقين لها مثل الحرية - المساواة - على الاقل ان تعتبر انسانا و نحن للان نلجأ الى اثبات ما نستحقه


من منا لم يلجأ يوما ما ؟


لذا فاللجوء دوما يرافقنا


لماذا تكلمت الان بالموضوع


لان الايميلات التي تصلني للاستفسار تعدت الثلاثين


و حتى لا اكون ( قليلة ذوق )





هامش : بتمنى اني ما اكون مللتكم :)
اللوحة اسمها جفرا لاسماعيل شموط


هاي انا


جفـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــرا