الجمعة، أبريل 23، 2010

شكرا للاحتباس الحراري


مع اني من انصار الارض الخضراء
و الخط الاخضر و الطبيعة
بس اول مرة بشكر التلوث و الاحتباس الحراري اللي عيشنا بجو المطر كم يوم
شكرا للراس مالية اللي خلتني بعز الصيف و الحر
( عنا طبعا لانو في عالم عندهم ربيع )
استمتع بالمطر و اسمع فيروز
و اشرب فنجان قهوة
و يمكن هاي من اللحظات اللي بحبها بحياتي كتير - جد روقان -
شكرا لكل المصانع
شكرا لكل واحد عندو استعداد يسحق جيل بكامله بمرض السرطان
شكرا للمطر الاسود و الاخضر و الاحمر و اللي بينزل عنا مو عارفة لونه
يمكن هلا عم اشكر لاني من 10 سنين
عم اعترض و اسب و احرق باعصابي و ازرع اي شي ممكن ينزرع و يعيش
بس ما في فايدة ( كنت اسمعت اذا ناديت حيا )
الى اكتر من سنة بعلم بطلابي اهمية انو يكون كل انسان عندو نبته يعتني فيها
و الي اكتر من شهر بترجى نبتاتي ما يموتوا
بالنهاية توصلت اني اشكر الاحتباس الحراري لانو عطاني وقت قليل كنت بدي اياه من زمان
و عطى شباكي صك غفران و زحت الستارة عنو
و اطلق رصاصة الرحمة على شوية الريحان اللي زارعتهم الي سنة و عم ينازعوا
و سمعت فيروز على طقطقة المطر
هامش : مع اني ما كملت شهر و انا غايبة عن المدونة بس حسيت بانو الي سنة او اكتر
كنت بمر متل اي زائر على مدونتي و كل المدونات اذا صحلي وقت
للي بيسال ...لا انا ما بشتغل شي مهم و لا انا في الكونجرس
و لا حتى بمجلس النواب الاردني
انا معلمة علوم و مع هيك مش لاقية وقت افتح ايميلي .... ليش ؟
انا شخصيا ما بعرف ؟:(
حلو انك تلاقي 220 ايميل عندك مع انو اغلبهم اعلانات
بس الشعور الاجمل
انك لهلا عايش و فيك تعمل delete

هناك 14 تعليقًا:

فتاه من الصعيد يقول...

للاسف نحن ندفع ثمن ما فعله الاغنياء ليزدادوا غنا ... ونزداد فقرا ومعاناه :(

تحياتي

حمدى جعوان يقول...

اولا تحياتى وعودا حميدا
ثانيا .... يعيش الاحتباس الحرارى

:)

Haitham هيثم Al-Sheeshany الشيشاني يقول...

كلام جميل و خواطر حالمة ، شكرا ً ... استمتعت بالتحليق حول ما كتبت اليوم.

هيثم

jafra يقول...

فتاة من الصعيد
نزداد فقرا ... يا ريت وقفت على هيك صارت العبارة اللي لازم نستخدمهايا رفيقة نزداد فقرا و مرضا
زمان كانوا بقولوا انو الانسان غني بصحتوا نشكر الله هلا اذا مرض الواحد بنفلونزا صار بدو قصةو عناية و كورسين انتيبيوتك ليتحسن و يقدر يداوم
نورت


حمدي جعوان : كيفك ؟
هيك احسن بلا ما ننطح بالسقف العالي و خلينا من انصار و احن مالنا
يعيش الاحتباس الحراري
يعني هو هيموت على ايدينا :)


هيثم نورت بزيارتك
:)

ميسم يقول...

يعني هو فكرك سهل نعمل delete
والله مهي زابطه
ياريت فينا نعمل delete لكل شي كان عرفنا نعيش

Whisper يقول...

مع ان هالمطر محزن و اسود زي ما حكيتي بس جد فرحتلك من كل قلبي :)

اخيرا اجا المطر و وصل لعندكم :)

الله يعين الاجيال الجاي ما راح يضللهم اشي, لا مي ولا خضار ولا حتى هوا زي العالم

Rita يقول...

انا هاداك اليوم كنت اشكر ثقب الاوزون .. لسبب مماثل شوي

كنت عم بشكرو لانو مطرح ما انا ساكنة السنة اللي فاتت بهاد الوقت كانت ابرد بكتييييييييير .. و كنا نطلع برا بجاكيتات

هلا العالم مصيفة .. و انا بكره البرد :D

كل واحد فينا الو اسبابو الله وكيلك :P

أشرف محيي الدين يقول...

عن جد جفرا بكمل على كلام ميسم وبقول إنو في كتير ناس وأحداث وأفكار محتاجة إنو نعمللها delete وبالسرعة القصوى .

كل الود

bobo يقول...

تصدقي ان احنا كمان هنا ف مصر كان عندنا مطر؟ مع ان دا مش وقت مطر خالص والجو كان ابتدا يبقى حر بس على رايك: شكرا للاحتباس الحراري اللي خلى مفيش حاجة ثابتة ف موضوع الجو والمناخ دا.. بقالنا اكتر من اسبوعين نلاقي الدنيا حر ونخفف لبسنا ونقول خلاص الصيف ابتدا وبعدين فجاة يرجع البرد والمطر من تاني.. تلاقي الناس اغلبها عيانة بانفلونزا وكحة.. بس انا بشكر الاحتباس الحراري انه رجعك تكتبي تاني.. وحشتيني
مش قلتي نازلة مصر؟ اوعي تكوني نزلتي من غير ما تقولي
انا مقدرة اوي انشغالك لاني ساعات كتير لما بقول لحد اني مشغولة ومش بدخل على النت بيستغربوا لاني مدرسة والمفروض يعني مكونش مشغولة اوي كدة.. بس انا اخترعت حكمة بتقول ان الفضا فضا البال.. يعني ممكن اكون وقتي فاضي بس بالي مشغول وبالتالي احس اني مشغولة كتير.. يلا سلامات لصوت فيروز الملائكي

NasEr يقول...

go science teachers :) my mom was one

ps: وأعطيك.. إلها همزة

قط البكتريا يقول...

اصلاطن ما في احسن من الاحتباس الحراري
يلاه بتنشف اوربا وبتصير تمطر عنا ... نحنا الراسمالين بنحقق حلم الاشتراكية بتوزيع عادل للثروة :D
كل مية سنه بنقلب الجو ... ابوكي يالعبقرية

زمان عنك قلت خطفوكي سكان المريخ :D
حمدالله على السلامة

jafra يقول...

ميسم انا براي المتواضع و الغير مقنع الا الي انا شخصيا ( شفتي التواضع ) بنقدر نعمل شو ما بدنا بس لو قررنا
بالنسبة الي سهل كتير تعملي الغاء لبني ادمين بس تكوني بالفعل مقتنعة و قادرة
يعني الحياة عمرها ما رح تتوقف لحد معين او عند شخص معين
الموضوع بسيط حاولي و رح تفرق معك :)
انا مو شريرة على فكرة بس عملية


ويسبر انا اللي شايفتو انو الاجيال الجاية ما بينخاف عليها ما راحت الا على جيلنا و بعدين متل ما عشنا بعيشوا ما بنخاف عليهم جيل مو طبيعي
مطر اسود مطر زهري انا موافقة بس مطر


ريتا :
صدقيني البرد حلو بس بدو اللي يقدروا ريتايعني لو عشتي بجو حر كنتي عرفتي انو البرد نعمة :)
على العموم ثقب الازون صار موضة قديمة :)

اشرف : المسالة بدها شوية قوية و اخد قرار و بعد هيك كل شي رح يكون سهل :) نورت

bobo :
كيفك خبروني انو بمصر حر قبل فترة
لا طبعا ما اجيت لو كنت زرت مصر كنت خبرتك على طول ولو :)
بس هي اتاجلت السفرة شوي
و متل ما قلتي الفاضي فاضي بال
تحية للاولاد :)

ناصر : هههههه يا سيدي مالهم مدرسات العلوم و الله انو نحنا عسل
بتذكر انو مرة ماما قالتلي انو انقع بتنجان او شي متل هيك بنحط بالمقلوبة قعدت اقدر نسبة الملح و المي مشان الضغط و الامتصاص الاسموزي :)
بحياتك هلا اي ربة بيت بتقدر هيك تعمل :))))
نصيحتي الك ازرع نبتة و رح تشوف كيف رح تتغير


قط البكتيريا الله يسلمك يعني هم اهل المريخ ما كان ناقصهم الا انا :0
لا يا سيدي لو اجو عنا ما رح ياخدوا حدا بس رح يتفرجوا علينا و يروحوا
ايوة بالزبط هو تحليلك احسن شي يعني الطبيعة معنا يا عمي شو بدك بالحرب و هالمواقف نحنا بنفاوض و الطبيعة بتشتغل شغلها :)
مش عارفة ليش ما اخدوك تفاوض معهم ؟؟؟ عن جد انهم ما بفهموا

قط البكتريا يقول...

هم كانو ناويين بس عرفوني فلسطيني ... قالو اعوذ بالله بدناش وجع راس ولاجئين وناس مميزين :D

Wa2el يقول...

عملي متل ما صرت اعمل مؤخرا..
شغلي هالموقع، وحطيلك غنية لفيروز، واشربي القهوة.. :)
http://www.rainymood.com/

تحية جفرا :)