السبت، مايو 22، 2010

برشلونية بالفطرة و بالقطر كمان



طبعا انا انسانة بحب الرياضة بس ما يوصل الفكر لكرة السلة او القدم
كل الرياضة اللي ممكن امارسها متلا المشي او السباحة
و من سنة لسنة يعني محسوبتكم مش لائقة بدنيا
لاني كل ما افكر اروح امشي على البحر بتشدني ريحة القهوة و الارجيلة
في اي كافيه منتشر على الشاطئ
و بوعد حالي انها اخر مرة و بروح قاعدة
و طالبة اكبر فنجان قهوة و ارجيلة تفاحتين
و بتفرج على اللي بمشو و بفتح كتاب و بقرا
و هيك بكون عوضت الرياضة البدنية برياضة ذهنية
اما اذا كان حدا معي
فما بنخلي موضوع الا بنفتحوا من سلطة رام الله لاسعار الدهب و لنوصل للنميمة على جارتنا
نميمة مو مقصودة يعني موضوع بجر موضوع بس :)
و هيك بكون عوضت الرياضة البدنية برياضة فكية و لسانية و سمعية
لانو الحكي المتشعب عند البنات بيوطى و بيعلى حسب الموضوع
يعني متلا لو جبنا سيرة بنت بتلاقينا وطينا صوتنا بالبديهة
و لو حكينا عن السوق و الاسعار بتلاقينا علينا صوتنا بردو بالبديهة
اخر مرة رحنا على كافيه لاتلاقى مع صديقة جاي من السعودية
و الي فترة ما شفتها من وقت سفرة تركيا و هي صاحبتي من 10 سنين
المهم ما لقينا غير الاضواء صارت خافته و الشباب الطيب
لابس ابيض و جزء لابس احمر و الصبايا على نفس الوتيرة
و بنص الحكي علي صوت المعلق
( الان سنعرف تشكيلة برشلونة و بلد الوليد )
يا دي برشلونة و ريال مدريد
بصراحة مش مهتمة مين اخد الدوري
و القصص هاي بس من كترة ما اسمهم بتردد عنا بالبيت و الجكر
و المغايظة على الفيس بوك
بين اخواني و اقاربي صرت اهتم اني اعرف مين اللي رح يجيب كنافة الليلة
- الاخوة في ريال او الاخوات في برشلونة
موضوع الكنافة عندي ما الو حل و صرت كل ما احب اكل كنافة اسال مين رح يلعب الليلة ؟
لاعرف على مين الكنافة هاي المرة
و لكن من باب الفضول بس كنت حابة اتعرف على لباس كل فريق
و بما انو القلب على اليسار جذبني اللون الاحمر اكتر و سلاسة ميسي
و طريقته القروية بالتعبير عن نفسو مع اني سمعت انو من اغلى لاعبين كرة القدم
و بالفعل الشب شاطر
( هادا حسب خبرتي الكروية اللي ما بتتعدى خبرتي بالطبخ كمان )
الا انو بتصرف بطريقة طبيعية و غريبة ببعض الاحيان على شب غني و مشهور متلو
المهم نرجع للكافيه
طبعا الشاشات عرض الحيط و الدنيا مولعة
و الاغلبية مع الفريق البرشلوني و المدريديين مش عاجبهم
لانو ما في ولا شاشة بتعرض مباريات فريقهم
و انا و صاحبتي موضوعنا غير
عن الكل احنا مو عارفين ننم على حدا و حتى نحكي ايا شي اصلا
مو سامعين غير المعلق و لو علينا صوتنا بدنا مايكروفون لنسمع بعض
المهم اكتفينا بالتحدي مين الو نفس اطول لحد ما خلص رحت لاختنق
و طلعنا من المحل
كتير بسالوني انتي مين بتشجعي
بصراحة انا ما بشجع حدا
لاني مو متابعة لكن بمعرفتي القليلة
و متابعتي اللي اقل جذبني فريق برشلونة للسلة لما طرد اللعيبة الاسرائيليين
اه انا متطرفة حتى بالرياضة و بعترف كمان
و قرات شوي عنهم
و عن الكاتلونييين و غيرو و لقيت انو انجذابي الهم هو بالفطرة مش اكتر
يعني احمر و القلب على اليسار
و العلم الكاتلوني بجنب العلم الفلسطيني
و قصة الحلم الكاتلوني تبعهم
و قصتنا يعني نوع من انواع التعاطف يعني الموضوع تعدى كرة القدم
و لقيت حالي بستنى مباراة كرة القدم اللي جاي
مش عشان اتابع لا
بس جاي على بالي كنافة
( ملاحظة ممكن يكون في معلومات
رياضية مش صح او مخربطة
بس اعذروني لجهلي
و على فكرة هادا الحكي
بعد اخر مباراة من كم يوم لبرسا و بلد الوليد )
اه صحيح بالمناسبة الشباب المثقف الرياضي سمعتو
عم يحكي على بلد الوليد و ليش اسمها هيك ؟
طبعا قام كبير الثقافة فيهم و حكى يمكن اللي فتحها
و حررها الوليد بن المغيرة ( ابو خالد بن الوليد )
بجد ميلة تميلوا بجد يا فرحة امو لا و هادا الفهمان اللي فيهم كمان
( لا ميلة تميلهم كلهم )
بس للعلم هي على اسم الوليد بن عبد الملك بن مروان
على حسب معلوماتي او هيك بتذكر

هناك 12 تعليقًا:

نادر احمد يقول...

مساء الخير جفرا
كيف أنت أيتها اليسارية، أكيد لو أنك مارست كرة القدم لكنت عسراء،
مع أنني "مدريدي" حتى النخاع، لكن مشهد العلم استوقفني يوم المباراة،
على العموم كل الدول الأوروبية المطلة على المتوسط، متعاطفين مع القضية، المنتخب الإيطالي يوم فوزه بكأس العالم 1982 قام بإهدائه إلى منظمة التحرير الفلسطينية، أعتقد أن أغلب الإسبان متعاطفين مع القضية، وأكثر النوادي المتصهينة في العالم هو نادي (أياكس امستردام) حيث لا تخلو أي مبارة لهذا الفريق من خمسين علم صهيوني على الأقل
( على سيرة الأرجيلة، أنا هلاء قاعد في أنترنت مقابل مقهى جفرا وسط البلد، وريحة التفاحتين واصلة عندي، أكيد أنتي من رواد جفرا لما تكوني في عمان) -:)
كل الود جفرا وأتمنى لك زيارة قريبة لـ( جفرا )

نيسآان يقول...

مساء الخير جفرا
اولا ...شرفتيني بمرورك و مرحبا فيكي دائماً
تانياً:طالما في فريقين يبقى انتي كسبانه القطر على الجهتين...صحتين
تالتا يا عزيزتي...حضري حالك الليله في مباراة حاسمه...نهائي بطوله انديه اوروبا وصحتين مقدما
شرفتيني ويسعد مساكي

لبنــــــــــى يقول...

مسا الخيرات نادر
هلا يعني لو حسدتك شوي على هالقعدة ما رح يصير شي اكيد عيني باردة :)
يسارية مممممم ما بخفي انو القلب على اليسار بس ما بحب التصنيفات
بصراحة انا ما عندي اهتمام كروي و حاليا و بهاي الساعة مشتاقة تخلص المباراة لناكل الكنافة :) بس مش اكتر لكن صرت زي العاللم اللي بتعلقوا بقشة و بحبوا اي حدا بتعاطف مع افكارهم و قضاياهم مع اني بوقت ما كنت اعتبر هالشي ضعف لكن هاي هي الدنيا الواقعية الحالية
بتمنى زيارة جفرا اللي للاسف ما زرتوا لهلا لاني ما زرت عمان من زمان
بلكن على الصيف تحية

لبنــــــــــى يقول...

نيسان
زيارتي كانت الاولى و ما رح تكون الاخيرة على الاكيد
مدونة حلوة و ممتعة و مشوقة كمان
بالنسبة للقطر الليلة كان مجاملة او عادة
مع انو اللي عنا مع الانتر حاليا مادام ما في برشا ولا ريال
و
صحتين على قلبك تفضلي

مهندس مصري بيحب مصر يقول...

المهم إنك أكلتي الكنافة في الآخر
:)

أشرف محيي الدين يقول...

مرحبا جفرا

في البداية صحتين وهنا على الكنافة :)

وعلى فكرة كأس العالم بعد عشرين يوم فبتوقع رح يكون عندك شهر حافل بالحلويات :)

في الواقع هذه المباراة التي ذكرتها في الادراج شاهدها الملايين حول العالم وهذا بحد ذاته أمر إيجابي في التفاعل والتعاطف مع القضية الفلسطينية .

تغيرت كثيرا الصور المطبوعة في أذهان الغرب عن القضية الفلسطينية بعد حرب غزه ولربما سنشاهد المزيد والمزيد من تلك المشاهدات في المستقبل ولكن أحقا هذا سيغير شيئا من الواقع المؤلم للقضية ؟

تحية ودمت بكل الخير

لبنــــــــــى يقول...

مهندس مصري
بما انو هاي المسالة لا ناقة لي فيها و لا جمل خليني استفيد منها :)

اشرف : مسا الخير
التغير اذا ما اجا منا راح نضل محلك سر و فهم القضية من قبل الاروبيين شي مهم لانو اسرائيل سممت عقولهم لمدة لا يستهان بها و هادا بصراحة انجاز انو نحطم الهيئة الاسرائيلية المظلومة على مدى عقود
لكن السؤال الاهم كم منا لازم يموت كل يوم لنحصل على تعاطف فقط ؟
بنرجع لنفس النقطة .... احنا وين من القضية اصلا

غير معرف يقول...

ههههههههه

ولا اعرف حاجه عن مدريد او برسلونه غير انهم فريقين كوره :)

تحياتي

Whisper يقول...

كيف ما شفت البوست الجديد الا اليوم؟؟
غريبه ما بين عندي انو في شي جديد

انا ولا الي بالرياضه الا في كأس العالم :) بصير مشجعه رقم 1 ...للبرازيل طبعا :) وما بتروح علي مباراه الا للشديد القوي

وبتعرفي اني لهلأ ما بعرف شكله لميسي هاد :$ هلأ بدي ادور عليه, الكل بحكي عنه :)

لكن ما شاء الله معلوماتك الكرويه شكلها منيحه, صحتين عالقهوه و الكنافه و بلالك الارجيله, مضارها كتيره :(

بس تيجي الاردن بنروح سوا على جفرا لاني نفسي اروح عليه كمان ومش صاححلي لهلأ :)

لبنــــــــــى يقول...

فتاة من الصعيد
كويسة معلوماتك الرياضية و الله
انا بشجعك انك ما تطوريها الا برشوة من احد البرشلونيين او المدريديين
انا شخصيا رشوني بكنافة :)

ويسبر :
لا انت مطنشتينا يا عمي شو بدك بهالحكي :)
ما خبرتيني كيف شفتي لميسي :)

خلص يا ستي اول زيارة للاردن انا و اياكي على جفرا قبل ما يسكر و الا ينباع:))

mood يقول...

جفرا العزيزة
بوح جميل ... ايقظني من ملل المكتب

وبما اني لا من مواليد مدريد ولامن مواليد برشلونه فما بهمني مين اخذ الدوري الاسباني ام من لم يأخذه
وكمان بما انه ما في حد ببرشلونه بعرف مخيم المحطة وهو مكان سقوط رأسي والاكيد انو مافي حد بمدريد بشجع نادي الوحدات

فهم ما بهموني

بحب اتمسخر فقط على المشجعين من كلا الطرفين والتمتع بلعبهم الجميل وملاعبهم الاجمل وجمهورهم المنظم

بس

ولتبقي يسارية للابد

لبنــــــــــى يقول...

هلا ببرشلونة ما حدا رح يشجع الوحدات اكيد
لانهم لهلا ما بعرفوا يلعبوا و لا حتى بنعرف ندافع عن قضايانا
المهم اني كسرت ملل المكتب

تحية