السبت، فبراير 25، 2012

خالد : هو وين الله ؟

بعض الاشياء بتكرر بحياتنا لكن
الانسان اللي اكتسب خبرة و مهارة معينة ممكن يغيرها لتكون افضل
" تعودك على الشيئ ليس دليلا على ذكائك او مقدرتك على التعايش
هو فقط استسلام و فقر في مهارات الحياة "
مثلا من و انا صغيرة كنت بكره الاجوبة العادية لاي سؤال
بحب دايما التفاصيل
بحب دايما حل عقد كل مسالة بهدوء و بدون تسرع
و مع مرور الايام بكتشف حالي بانو في اشياء كتير فاتتني و مهارات كتير ما تعلمتها
شو اللي خلاني احكي هادا الحكي ببساطة
لما كنت صغيرة سالت بابا سؤال " هو وين الله ؟ليش ما بشوفنا حالوا ؟ ليش ما بيحكي معي ؟ "
طبعا كاي اب حاول يجاوب و يبعتني عند  ماما او اي حدا قاعد جنبوا و كل واحد يحاول يجاوب بس ما اقتنعت
بس كبرت قررت انو اولادي لما يسالوني  عن ايا شي لازم اكون اكتر ايجابية  و اعتمد وسائل ايضاحية اكتر مثل قصص - حكايات
يمكن بعد فترة عرفت اجوبة لكتير اسئلة بحياتي بس  هاي الاجوبة كانت تفتح ابواب اكتر
متلا ليش الله خلقنا ؟ بس ليختبرنا ؟ طيب كان خلانا كلنا كويسين و فتنا الجنة ؟ طيب ليش ابونا ادم بيغلط و نحنا بنتعاقب
و باب الاسئلة كل مرة بيكبر و الاجوبة بتكون مشتته اكتر
ممكن تقتنع ببعضها و ممكن انت تتغاضى عنها
او تبطل تسال
حاولت اني اكون عادلة مع طلابي و يكون لكل سؤال عندي اجابة منطقية و مقنعة
ما هو مش كل شي مقنع منطقي و مش كل شي منطقي مقنع :)
متلا " ما بعرف اذا حكيت عن هاي الحادثة قبل هيك او لا ؟"
بنت في الصف الخامس و اثناء شرح درس انتقال الصوت و عند فقرة انو  ان الصوت لا ينتقل عبر الفراغ و يحتاج الى مادة لينتقل عبر اهتزاز جزيئاتها مثال : نحنا ما بنسمع الصوت على القمر 
 بتوقف بنت و بتكون غير مقتنعة بالمنطق العلمي لانها سمعت من اهلها انو العلماء او رائد فضاء سمع صوت الاذان على القمر ؟؟؟؟؟
انا شخصيا ما سمعت بهاي الحادثة و لا حادثة اسلامه . و البنت كانت مستنكرة و بتناقشني بطفولة فيها شوية غباء فكري
انو هاي الحادثة من المسلمات ..... و كانها نزلت بالقران . حاولت اني اجاوبها و انو مش كل شي بالنت بكون حقيقي بس مادام الشغلة فيها دين لازم نحنا نصدق على طول ؟؟؟ و بدون تفكير ؟؟؟ و مرت هاي القصة و فهمت انو في بعض الناس الدين عندها تفكر و تامل و بعضهم هو مجرد افيون
.......................
موقف تاني : طبعا بما انو كل شباب عيلتنا تقريبا هو متل اخواني و اغلبنا تربينا مع بعض فاي طفل بالعيلة هو يا ابن اخي او ابن اختي بس واقعيا و بعيلتنا الصغيرة نحنا لهلا ما عنا احفاد ( مجرد توضيح )
خالد اول حفيد بعائلتنا الكبيرة .  و انا بمرتبة عمتو . بس طبعا الاولاد الصغار هلا ما بهمهم الالقاب :) فانا لبنى مجردة و بس............ خالد في روضة اولى 
كانت اختي بتقول لخالد ما ترمي الاكل على الارض الله بزعل منا و بعدين ببطل يعطينا اكل 
خالد ترك الكل و التفت الي و سالني " لولو هو وين الله ؟ ليش ما بيحكي معي ؟ ) و كويس انو الاسئلة وقفت لهون
طبعا انا اطلعت عليه و على عيونه الصغيرة اللي بتجنن لما بسال سؤال .
حكيتلوا الاجابة العادية
الله موجود بكل مكان
طفل بيلعب  بالاي فون و جالاكسي تاب و بيعرف يشغل الكمبيوتر و يدخل على النت ما اقتع بهيك اجابة و اتطلع حواليه و بكل بساطة قاللي " انتي هبلة ما بتعرفي شي ... وين موجود ؟ "
انا اتداركت حالي و كتير اشيا مرت ببالي و كيف كنت مقررة انو اجاباتي تكون افضل من اجابات اهلي
قلتلوا " انت لازم تعرف لحالك وين الله ؟ فكر كويس و اذا عرفت رح احكيلك كيف هو بيحكي معنا "
بردو قللي انتي هبلة و راح
بعد فترة رجع و قالي الله فوق في السما صح ؟
انا فرحت كتير انو هو استنتج شي
بس كنت عارفة انو السؤال الاصعب جاي " هو ليش ما بيحكي معنا ؟ "
سالتو سؤال " انت لما تكون خايف من شي ؟ او بدك شي احكي معوا و هو رح يرد عليك اكيد "
بردو قاللي انتي هبلة
الولد مصمم
بس انا متاكدة انو رح يرجع و يحكيلي شي جديد عن تجربة مش درس احفظوا و ممكن تنساه
او انك تتذكروا بس لانك خايف من عقاب ما ...
.......................................
اذا حبيت انك تكون اب او عم او عمة او ام
و يكونوا اطفالك متميزين حاول انك تكتسب مهارات كتيرة
لانو الاطفال بهاليومين مش زينا
هم بفكروا بوجودية اكتر بسبب ظروف الحياة و ما تعتمد على تربية اهلك
لانها بصراحة صارت قديمة . حتى لو ان القيم الاساسية ما تغيرت بس صار لازمنا اسلوب جديد
لنكسب  الجيل اللي جاي
و نقدر نغير شي










افففففففففففف شو طويل البوست

هناك 20 تعليقًا:

Khubaizeh يقول...

ليس بالضرورة تلقيناً ..
لكن الطفل بحاجة للمحاورة والمناظرة احياناً ..

من وجهة نظري ..
الطفل مهما كان نضوجه ..
ومهما كان ذكائه ..
يحتاج أن يأخذ المعلومة من مصدرٍ هو يثق به .. من مصدرٍ تعود أن يلجأ له ..
ويحتاج جداً أن يجد الاجوبة عند هذا المصدر ..

الاسأله المتعلقة بالدين والذات الاهيه هي الاكثر تعقيداً فالاجابة ..
ربما لأننا لا نعرف عنها الكثير .. وربما لأنه من الصعب تبسيطها للغة يفهمها الطفل ..

احياناً تقديم المعلومه قبل أن يسأل السؤال نفسه .. تجنبنا الكثير من التعقيد ..


كل الاحترام
وتقبلي مروري

جعفر حجير يقول...

مرحبا، تدوينة رائعة جدا و موضوع فعلا يستحق الإثارة

للأسف أن كل أو معظم المفكرين و المهتمين بقضايا التربية المعاصرة ..يعلمونا كيفية تربية أبنائنا صحيا و فكريا و تعليميا و ترفيهيا..إلا دينيا

ما بجيبوا سيرتها، أتمنى إنك ما تقطعينا من هيك تجارب


مع التحية، جعفر

غير معرف يقول...

اسمحي لي بأن أقول أن عبارة ( طيب ليش ابونا ادم بيغلط و نحنا بنتعاقب ) غير دقيقة.

(كل نفس بما كسبت رهينة)، أي أنها مسؤولة عن أفعالها، (ولا تز وازرة وز أخرى) أي لا تتحمل أي نفس ذنوب النفوس الأخرى، وخروج آدم من الجنة كان أمرا قد قضاه الله عليه قبل حادثة إغواء إبليس عندما قال للملائكة (إني جاعل في الأرض خليفة) وجاءت حادثة الغواية إختبارا ليتعلم آدم أنه خطّاء وليتعلم أن إبليس عدو له وليتعلم التوبة والعودة إلى الله وقد تاب الله عليه (فتلقى آدم من ربه كلمات فتاب عليه إنه هو التواب الرحيم).
فلا أحد منا مسؤول عن آدم وليس آدم بمسؤول عن أخطاء أي منا.

فالله خلقنا لنعرفه ونعبده ونعمّر أرضه وليست الجنة هي البداية بل هي النهاية والجزاء للصالحين من خلق الله.

الكيل بمكيالين يقول...

أما رؤية الله, فالله جعلها مستحيلة على هيئتنا البشرية في الحياة الدنيا, وجميعنا يراوده هذا السؤال, وحتى موسى عليه السلام كان توّاقا لرؤية الله وطلب ذلك صراحة(رب أرني أنظرإليك قال لن تراني ولكن انظر إلى الجبل فإن استقر مكانه فسوف تراني فلما تجلى ربه للجبل جهله دكا وخر موسى صعقا)الأعراف 143.
لكنه عجز عن ذلك ووقع على الأرض مغشيا عليه لأن هيئته البشرية وتكوينه -في الحياة الدنيا-لا يقوى على رؤية الله .
من أجل ذلك كان التواصل بين الله والبشر من خلال الوحي أو الرسل أو من وراء حجاب ولم يكن مباشرا.

لكن الله جعل رؤيته ممكنة في حالة أخرى وهيئة أخرى في الآخرة عندما يكون تكوين البشر مختلفا وجعلها جائزة لعباده المؤمنين عندما قال (وجوه يومئذ ناضرة إلى ربها ناظرة) وحجب الكافر عن رؤيته حتى في الآخرة (كلا إنهم عن ربهم يومئذ لمحجوبون).
فهو شرف اختص الله به عباده المؤمنين فقط.

أنصحك دائما بالعودة لما كتبه الشعراوي رحمه الله من كتب أو تفسير فهو ينظر عميقا ويجيب على كثير من هذه التساؤلات, وما كتبته هنا هو ما قرأته للشعراوي من تفسير لهذه الآية.

غير معرف يقول...

,

بوبو يقول...

بالعكس.. كنت محتاجة البوست يطول اكتر عشان افهم واشوف ازاي اتعامل مع اسئلة الاطفال اللي ملهاش سقف ولا حدود.. كنت بواجه مواقف من دي لما كنت لسه في شغلي بالمدرسة، بس اكتر شيء بيرعبني حاليا ان عمر ابني يكبر ويبتدي يسال ومعرفش اجاوب.. بحاول اربي نفسي على كسر قوالب اجابات ابائنا اللي مش دايما مقنعة.. ربنا يكون في عون اباء وامهات هذا الجيل

لبنــــــــــى يقول...

MR.KOOZ:
نورت مدونتي المتواضعة
انا بعترف انو الاسئلة الدينية و العلمية احيانا بتكون معقدة لعمر معين . و هادا الشي بيعتمد على ذكاء الطفل و قدرة ملاحظتوا
و انو نشرح للاطفال نظري هاي الايام صعبة و لازم نكون حذرين
انا مدرسة علوم و لما بكون بمهد لشرح نظرية علمية لازم ابسطها و اكون قريبة فكيف اسئلة عن الذات الالهية
؟
الله يعين الاباء و الامهات على هيك جيل




جعفر : كيف حالك . على فكرة التبسيط لسير الانبياء و الاديان موجود و معتمد من زمان نحنا تعلمناه بس الاسلوب هلا لازم يختلف
المشكلة انو نحنا بطلنا نقدر نجاري هادا الجيل
صاروا يتفوقوا علينا بكتير اشياء
و بالنسبة للمفكرين و غيروا فاظن انو اغلبهم هلا ملتهي ببرامج التوك شو و هاي القصص و بطل همهم التغيير و التطوير
الا من رحم ربي
شكرا لمرورك

لبنــــــــــى يقول...

غير معرف
و الكيل بمكيالين
هادا الحكي بدكم اياني احكيه لطفل ما تجاوز الخمس سنين ؟؟؟؟؟؟
اظن انو في شي بالبوست فاتكم :)

لبنــــــــــى يقول...

بوبو : كيف حالك و الله يحفظلك عمر
المسالة بسيطة بطفولتنا حتى لو ما كانت بعيدة كان بكفينا قصة صغيرة او كتاب مصور
و برنامج تلفزيوني كان بالنسبة النا اعجاز
هلا الاطفال بيعتمدوا على المهارة البصرية اكتر من اي مهارة تانية فلازم تكوني واثقة انك توفري طريقة تجذبهم و تنمي خيالهم حتى لو بحركات ايديكي
هاي انا بستخدمها بالشرح في المدرسة
اي معلومة صعبة بعمل معها حركة معينة فبتذكروها الطلاب فورا لانها بتميز هاي المعلومة
:)
الله يعينك
و يخليلك اولادك يا رب

غير معرف يقول...

ما فاتني شي بالبوست بس أنا حبيت أوضح بعض المفاهيم, الآن دورك انت توضحي الصورة وتبسطيها للطفل بطريقة تجاوبي فيها الجواب الصح وما تلفي وتدوري وتعطي اجابات غير مقنعة.
حتى الاجابة في التعليق الثاني يمكن اعطاءها للطفل بطريقة مبسطة ومباشرة وانت بنفسك حكيتي انه اطفال اليوم ما بينضحك عليهم وبدهم اجابات واضحة ومنطقية ومش أي شي بمشي عليهم, ولا لأ؟

Em Ommar يقول...

يعني الولد حكالك إنك هبله
إختصري وخلصت فكت
ههههههههههههه

الموضوع مفرح ومحزن بنفس الوقت,, زي ما أطفالنا المنتفحين عم يسألو,, إحنا كنا بنسأل
بس الفرق إنه كان كلامنا يروح بالهوا لإنه معظم الأحيان فش حدن فاضيلنا يجاوب

لمى يجيني عموره بسوعال منطقي وبخوف زي هيك,, ع طول بعمله جلسة إستحضار أرواح وببلشله القصه من أساس سلسفيلها

عارفيته مارح يقتنع,, ولا رح يتركني إلا إزا كان الجواب شافي ومن الصمصوم طالع

الله يكون بعونا عليهم يارب,, وما نقصير بحقهم


**مسلمة الأذان على القمر هاي غريبه بصراحه,بس الأغرب إنه يكون الطفل حافظها زي الأحرف الهجائيه ومابده يناقشها عشان " أبوه " حكاله إنها معجزه

صباحك خير,, طلع كومنتي أطول من بوستك
هههههههههه

sheeshany يقول...

لا طويل و لا شي
:المزيد المزيد: + متابعة و خبرينا شو بيصير معك و مع خالد
---
الأطفال أطفال... أوكي

بس الجيل "زي ما هو بكل جيل" عنده قفزات مختلفة عن جيلنا و علاقتنا مع جيل آبائنا و أمهاتنا
و نحتاج "أكيد" مقاربة مختلفة.

---
قبل فترة بنت تسأل أباها "+3 سنة" : بابا و ين الله؟ / لاإجابة "شافية" / طيب بابا إذا سألنا غوغل مش ممكن يعرف؟ "لاحظوا النسبية هنا! "ممكن يعرف؟"

---
جد يا ويلنا من هالجيل :))))

---
شو هالتعليق طويل

---

لبنــــــــــى يقول...

غير معرف : صحيح انو الاطفال من زمان مش هلا بس ما بينضحك عليهم
بس هي طريقة عرض الفكرة او المعلومة اللي لازم تتغير و اختيار السن المناسب لعرضها و تفصيلها
كيف ممكن احكي لولد ب 3 سنين انو العقاب ايا يكن هو منيح الو او نوع من انواع حب ربنا النا ؟؟؟؟
اذا هو ما بيتقبل عقاب الام او الاب و هم ملموسين و عايشين معو و مرئيين ؟؟
انا باعتقادي انو نحنا لازم نكون صورة مشرقة عن رنا و عن دينا ايا يكن هادا الدين و بمرور الايام و مع تقدم سن الطفل فينا نفهموا موضوع العقاب و التخيير و غيروا
لما يكون الطفل بمرحلة عمرية من 3 الى 7 سنين
لازم ننشط عندو مهارة الاستنتاج مش التلقين
ليقدر يكون مقتنع و يستخدم هاي المهارة باي مجال من حياتوا
انا برايي انو الولد لازم يتثقف دينيا بس بطريقة استنتاجية تخليه يفكر
مش بطريقة عرض القصص ووجهة نظرنا و اللي احنا فاهمينوا من الدين
لانو لاحق على هاي المواضيع خاصة لما يتعلم الصلاة و الصيام . هي ممكن نستخدم فيها شوية تغيير بالعرض و افكار جديدة لتشويقه بس بمسالة الايمان اللي هو غريزي عندو لازم نتركلوا مجال اكبر ليستنتج و يفهم و يقتنع
هادا رايي انا و يمكن اسلوبي لاني بشوف نوعيات اطفال كتير التلقين مخرب عقلهم
و بحب انو يكون الطفل بدل ما هو حافظ شو ماما او بابا او شيخ الجامع شو قال
لا
لازم هو يحكي و يناقش و تتصحح المعلومة عندو
لانو مو ناقصنا بصراحة جيل اتلقن الدين بكفي اللي عنا

لبنــــــــــى يقول...

ام عمر : الله يخليلك عمورة
بس نصيحة ما تتشعبي بالمواضيع ايا كانت مشان ما يتشتت فكروا و يصير نوع من الخيال او قصص بحب يسمعها بس و انتهى
ركزي على المعلومة الاصلية و صيري جادليه فيها حتى يستنتج و يفكر و يقتنع
شغل القصص بطلت مقنعة للاطفال خاصة انو خيالهم مرتبط برسوم متحركة الله العالم فيه بس
يعني بصراحة
ما بحب احكي قصة للولد عن اي نبي او رسول او عن صحابي و يتخيلها الولد زي قصص بن تن و سبونج بوب
دايما في طريقة معينة لتصنعي فيها خيال للطفل و تربطيه فيه و هو بنفسوا رح يستنتج الصح من الغلط
هادا كلو مشان ما حدا يجي بكرا و يحكيلوا اشي و يصدقوا خاصة اسم الله كل شوي و طالعلنا مفتي و شيخ و بحكي عن قناعة و بالايام اللي جاية ما رح يكون حدا فاضي يدور على الصح و لا على الغلط
رح يدوروا جوة بذاكرتهم بطريقة اسهل
لهيك انتي لازم تكوني الذاكرة هاي :) طريقة احتلال مشروعة اظن :)))

و مثال على هيك البنت اللي مقتنعة تماما انو رائد الفضاء سمع الاذان على القمر ؟ كانها هي اللي سمعتوا مش هو ؟
شغل تلقين دون تعليم
حافظ مش فاهم
بس

صباحك ورد يا قمر
و طولي انا و البيج كلو على حسابك :)

لبنــــــــــى يقول...

هيثم ( ابو انس حاليا ) :)
مسا الورد
لا يا سيدي التعليق مش طويل خد راحتك
بس قبل ما احكي ايا شي هيك جاي و ايدك فاضية وين الكنافة ؟؟؟
بالنسبة لاسال جوجل
منيح ما نسالوا لانو عمو جوجل توافقي بايد كل راي
ما هي هون مربط الفرس
انك تكون عندك اجابة مقنعة و قصيرة افضل ما يروح الطفل لمكان تاني
و يلاقي اجوبة الله اعلم فيها
يعني التربية الرحانية لازم ترتبط بالعقل
مثلا بالاسلام فيك تربط كتير اشياء بالعلم
مثلا سورة النجم
او نهاية فرعون تربطها باكتشاف طريقة موتوا
او سورة الحديد بالنيزك اللي ضرب الارض قديما
اشيا كتير و ابسطها موضوع الصلاة و الرياضة الجسدية
شي بسيط و سهل
و مقنع ... بس قصة التلقين و احفظ و عيب و حرام
اظنها طريقة بتضيع كتير
هيك رايي
صواب يحتمل الخطا
او خطا يحتمل الصواب

::::: شكلي ما صدقت احكي . بطلت اسكت انا "

sheeshany يقول...

كنافة!
سامع بهالكلمة

ما عنا إلا حلويات دايت، ينفع؟ :)))
----

حكيك م"ن"تاز :)

التربية الروحانية يجب أن تستند إلى العقل = مية مية يا فندم :)
---
أنا أبو هيام "سأبقى" :)

نيسآان يقول...

معك حق ...مهاراتنا قديمه وتعلمناها من اهلنا ولكن هينا بنحاول نطورها ..

اواجه نقطة الاسئله الصعبه باستمرار وبقدر ادبر حالي بجواب على قد السؤال وما اتوسع كتير لكن بيتحول السؤال الى مسلسل مثلا:
-ليش نحن بنصلي؟
-عشان الله يرضى علينا
-ليش؟
-عشان يدخلنا الجنه
-ليش لازم نسمع كلام الله
-عشان هو بيحبنا وبيعرف انه كلامه فيه مصلحه النا
-ليش؟
-ليش انتي بتسمعي كلامي لما اقولك غسلي ايديكي عشان ما تمرضي؟
-ممممممممم طيب ما انا بمرض حتى وانا بغسل ايدي !
-في جراثيم بتمرضنا بكل مكان مش بس على ايديكي
-طب ليش اغسل ايدي يعني؟؟؟

وهيك يستمر مسلسل ال"ليش" الى ما لانهايه.........اللهم صبرنا يا رب هههههههه
فاهمه علي؟؟؟
الصبر هو اول المهارات المطلوبه....

نيسآان يقول...

ع فكره
استمتعت واستفدت من التعليقات....شكرا لكل اللي علقوا وردودك مفيده جدا
:)

Unknown يقول...

أسئلة الصغار محرجة لأنها غير مقيدة
بصراحة بعرفش شخصيا كيف أجاوب عليهم
وين الطول بالبوست آه؟! :)

لبنــــــــــى يقول...

هيثم : اكيد ابو هيام بس بنحاول نعطي لانس حقو البلوجري
بعدين على فكرة في كنافة دايت :) ما تتهرب


نيسان مسلسل ( ليش ) هادا ببدا بعد اول كلمة
احيانا بكون بدو اكتر من الصبر
بدو معجزة :)
شكرا لزيارتك . و لانك استفدتي كمان


مياسي : اسئلتهم مش مفيده ؟ حرام عليكي :)
هي مش كلها مفيدة بس احيانا بخلوكي تفكري باشياء احيانا ما خطرت على بالك :)
نورت يا قمر