الأربعاء، يونيو 30، 2010

مين قال المونديال عاطل ؟؟



بالفعل هاي الايام الها نكهة غريبة



يعني لو فكرت انك تروح شي مطعم او كافيه



ببداية خطواتك رح تحس حالك داخل على مقر للأمم المتحدة و الأعلام عم ترفرف على يمينك و شمالك و ما بتقرب من الباب بتصحى من تخيلك و بتشم ريحة الارجيلة على الغالب تفاحتين



يعني تخيل الاعضاء في الامم المتحدة عم يارجلوا زغلول و تفاحتين و بعضهم رح يكون تخصص حشيش



و الله ساعتها القرارات رح تمشي و الدنيا رح تصير احسن بدل ما كل واحد مادد بوز و مش فاهم على التاني



المهم



بيجي واحد لابس برتغالي و حاطط اسم رونالدو على البلوزة و بدلك على الطاولة المحجوزة و ميسي باللبس الارجنتيني بزبط الارجيلة و بحط فحم اما دروغبا فهو تخصص العصير و الكوكتيل و بيجي رونالدو ليرحب فيك مرة تانية و يصبلك القهوة



شو هالعز اللي احنا فيه



و صاحب المحل قاعد و لابس مردونا و التاني برازيلي و بصرخوا و بحكوا كانهم في بيت ابوهم



الشباب الطيبة جايين يرندفو و يخلصوا من نق الانسة فبيجيبوها على هيك اماكن ليخلصوا من الحكي و النق



و بالمرة بحضروا المباريات و كل وحدة فيهم قالبة بوزها و هو عيونوا مش عم تنشال من على الشاشة اللي بحجم الحيط الكبير



و انا طبعا مكيفة



ليش ؟



يعني قاعدة بمقر الامم المتحدة و اللي بحطلي القهوة رونالدو و اللي بزبطلي الفحم ميسي



اي هارون الرشيد ما حلم بهيك ابدا



و اذا فاز الفريق اللي بشجعوا صاحب المحل بنزل ضيافة و حلو للقاعدين



شو بدك احلى من هيك قعدة



بس هلا لنحكي جد ....



عم تابع على قد ما بقدر المباريات لاني ( و انا صاحبة وقت فراغ قاتل ) عم استمتع باللعب الحلو بصراحة و عم اتعلم اللهجة المغربية او الجزائرية عن طريق المعلق و غير هيك عم شوف و قدر روح رياضية عالية انا شخصيا ما عندي اياها



يعني لاعب بدز التاني و بياخد الكرة وبنتبه انو غلط بيرجع ليساعد المشحر اللي على الارض و لا كمان بسلم عليه و بيعتذرلوا و التاني بابتسامة بتقبل الموضوع و كيف عم يتعاملوا اللعيبة مع بعض



و اللي بياخد انذار بوقف قدام الحكم متل التلميذ الشاطر و راسوا بالارض



و اللي بياخد طرد بمشي و بيطلع بادب من غير ما يسب و يعمل



( يعني لو انا بدل كاكا و اخدت طرد يمكن كنت ضربت الكرة بوش الحكم )



و احلى شي اني بكون بشجع شي فريق



يعني ما بكون قاعدة هيك بدون اي تفاعل



و بيدخل جول بصير شفقانة على الفريق التاني و بدي اياهم يدخلوا جول حتى ما يزعلوا :)



لا روحي رياضية و بحب التحدي خير الله



و اكتسبت معلومات هامة متلا انو ميسي ما بلعب مع اسبانبا و هو لاعب ارجنتيني



و رونالدو ما بيلعب مع ايطاليا و هو لاعب برتغالي



مين وين اجتني فكرة انو ميسي مع اسبانيا و رونالدو ايطالي ما بعرف



و طبعا تعليق انثوي على لبس هادا الفريق و هداك يعني هلا البرازيل ما عندهم زوق ابدا شو شورت ازرق و بلوزة صفرا فيها خطوط خضرا شو بصير لو الشورت اخضر او اصفر و يصير في تناسق بالالوان



و كنت مفكرة انو الافرقة ما بتغير لبسها تفاجات انو بغيروا الالوان ببعض الحالات



و ما بعرف ليش بحب اشوف المدربين و اراقب ردات فعلهم و بالفعل الانجليز هم الانجليز



بذمتكم هادا مدرب و الا ناظر مدرسة على هالكشرة اللي عليه و حالتو حالة



حتى لما يدخلوا هدف بكون مكشر



اهم شي بالمباريات لمة العيلة و كل واحد بشجع حدا شكل



و الروح عنا مو رياضية بالمرة خاصة مع مشجعين المانيا كتير متعصبين



بس انا و لا بهمني كل شوي بشجع حدا



على الاقل ما اكون قاعدة بلا شغلة و لا عملة



شوية روح رياضية و تسلية رياضية احسن من ميلودي دراما و روتانا افلام و mbc4



تغيييييييييييييييييييييييييييييييييييييييير

هناك 17 تعليقًا:

نادر احمد يقول...

مسا الخير جفرا
الحمد لله انك بلشتي تتذوقي متعة كرة القدم، عشان الستات دايما بتهمو الرجال بصغر العقل، لما يكون الموضوع عن كرة القدم، يعني أمي الله يرحمها كانت دايما تحكيلي بلهجتها السورية، لك شو قلة هالعقل اللي بتابعوها، 22 رجال بيلحقوا جلدة مدورة، وأضافت انو لو هي بتلعب بتجيب جوال متل الفاصوليااااا _ :)
جفرا مدرب انجلترا (كابيلو) ايطالي مش انجليزي
كل الود جفرا

مهندس مصري بيحب مصر يقول...

:)
انتوا شاغلين بالكم زيادة عن اللزوم

غير معرف يقول...

ahlaaaaaaaaaaaaan keefeeek???
eja 3bali zorek.. isht2telek :)

3njd el world cup bahjeta '3er :) bs mo bl USA akeeeeeed :S
hon kteer malal ma fi shee.. :S bdalni esm3 el radio stations b amman w bsm3 kel yali 3m yseer.. w btmna kon hnak :)

sa3edae ya amar.. raj3tlkon soon inchalla ;)

لبنــــــــــى يقول...

نادر لا انا بني ادمة اميبية بتاقلم مع كل شي حتى اجت فترة علي اتعلمت الطرنيب و التركس و بدبل البنات كمان :))))
و انا من راي المرحومة صدقني انا هيك بس عم اتماشى مع الموضوع و عندي افكار رهيبة متلا ليش حكم واحد ميحطوا حكمين متلا او 3 و ليش متلا ما يزيدوا عدد اللعيبة
بعرف نادر ما تكمل الفيفا رح تقطع عني المباريات لو سمعت :)
بالنسبة للمدرب الانكليزي انا متاكدة انو لما اجا من ايطاليا كان وضعوا غير و شكلوا غير بس هي عشرة الانكليز خلتوا هيك
الله يسامحك هيك خجلتني على الملأ خليني معتبرة حالي خبيرة كروية :)


مهندس مصري
وحياتك الفراغ رح يخليني اتابع كرة امريكية لو ما لحقت حالي بشغلة :)
كيف الاجازة ؟؟؟


جمـــــــــــــانة اخص عليكي وينك اختفيتي و الله اشتقنالك يا بنت
اهلا فيكي
نورت البلوجرو الوورد برس و كل النت مرة تانية

Kenan Alqurhaly يقول...

هادا هو الحكي اللي بحبوا.. أصلا هادا أفضل استثمار للوقت :)

مهندس مصري بيحب مصر يقول...

الحمد لله
مشغول بإستعدادات الزفاف :)

لبنــــــــــى يقول...

كنان : مش قلتلك انو في اشياء كتير انقتلت
هيني عم تابع المونديال في وقت الفراغ اللي قبل سنتين كنت بتمنى من الله بس ساعة نوم هادية او ساعة فراغ لارتب فيها خزانتي
ووصلت اني اتابع المونديال
لتصدقني بس :))


مهندس مصري : الف مبروك و الله يتمم على خير
بتمنالك كل السعادة
بس حلو انك لاقي وقت لتابع المدونات
:)

م م يقول...

هو كأس العالم بدأ؟

Whisper يقول...

انا كرة القدم اجمالا ما بتابعها لكن كأس العالم اله نكهه غير, احنا كل سنة النا طقوس و تجهيزات بالبيت لكأس العالم, الله لا يسامحهم اللي حرمونا منه, وبابا عصّب وحلف يمين ما يشترك :( و بابا واخوي بحضرو معظم المباريات بره, استفدنا من حلفان بابا احنا :$
يلا بسيطه, لاني اتفقت مع اخوي ياخدني لكل مباريات البرازيل من هلأ وللنهائي لما تفوز البرازيل عالارجنتين :)

المهم انا بشجع البرازيل و اخوي بشجع الارجنتين, وبابا بتنقل بين الكل ومرات بين الفريقين بنفس المباراة, المهم يكون ضد الفريق اللي بنشجعه, علشان يكون في اكشن يعني :)

Whisper يقول...

اسفة بس من بعد اذنك جفرا.....نسيت امسي على جمانه و احكيلها انّا زعلانين منها كتييييييييير ....كتيييييييير طولتي علينا يا قمر :)

Gabriel يقول...

حدث عالمي البشرية كلها عم اتابعو بشغف
انو ليش مصرّين نكون خارج نطاق البشرية وعايشين بكوكب تاني

خلي العالم تنبسط بالمونديال
انا مع هولندا انتِ مع مين جفرا ؟
لا تقوليلي البرازيل احسن ما توصل الادميا للركب يعني من أخيرا
خمسة أشياء لا مغفرة فيها ،الخيانة وتشجيع البرازيل

الحقوق محفوظة ها
:D

لبنــــــــــى يقول...

ويسبر
يعني الجزيرة عملت عملتها و مبسوطة و بتلم مصاري و العالم انحرمت من تسلية بسيطة بس هاي هي التجارة على العموم بردو انو تخصصوا وقت المباراة لاشياء خاصة و زيارات مش عاطل برده :) حلو البيت لما تختلي في الانثى فقط و تاخد ساعات استراحة :)
انا بشجع اي فريق قدامي يعني متل عمو :)
شكلو العتب على جمانة كبير
عن جد الكل عتبان عليها بهالغيبة



جابرييل
ليش هي هولندا ما طلعت لهلا
معلش انا متابعة بس بلا تركيز يا رفيق طول بالك علي :)
يعني فيك تحكي اني مع الارجنتين لهلا
اذا ما طرا بال و خاطر جديد
:)))
روحي كتير رياضية صح :)

مسرور :
هو بدا بس مش مهم
مادامك مش مهتم :)
صبح صبح يا عمي الحج

سقراط مصر يقول...

ايه الجمال ده
غلبتي المصريين في خفة الدم

واضح ان كاس العالم استفز فيكي الجانب المصري كمواطنة عربية

لبنــــــــــى يقول...

سقراط مصر
بالمصري ( حاجتين ما يتغلبوش فيهم المصريين الجدعنة و خفة الدم ) دول تخصص و لو مهما حاولنا مفيش فايدة

و لعلمك بحكي مصري منيح :))

نورت وينك من زمان ما طليت ؟

sheeshany يقول...

انا بدي أقلبها نكد و أعاكس تيارك و أقول: لأ عاطل عاطل عااااااطل ! :]

لبنــــــــــى يقول...

و لا يهمك عاطل :))
عاطل عاطل بالتلاتة
بس ماشي حالو تسلية للي فاضيين متلي
هلا اظن انو في مباراة :)

sheeshany يقول...

عاطل بالتلاتة <--- لوول ... عجبتني

أنا بشوف إنو و الله مبالغة المونديال / العرس الكروي / الحفلة الكونية كل 4 سنوات ... الخ

بس برضو الرياضة إلها مجانينها، ليش الحكي :)