الأحد، أكتوبر 03، 2010
PEACE yA mAn
هي : شو رايك بطرق السلام هالأيام ( صوت الارجيلة يعلو كانك تغطس بالبحر و بتبقبق )
أنا : و الله مسخرة
هي : ليش ( سحابة دخانية متطايرة )
تبديل البربيش من يد لاخرى
أنا : يعني انا برايي انو السلام من منطق قوة بصير سلام بس طرف ضاغط على التاني ما بصير سلام
يعني يا حبيبتي انت عم تلوي ايدي ساعتها ما بتقولي سلمي بتقولي استسلمي و نحنا وصلنا لمرحلة مقرفة تجاوزت الاستسلام
و كل واحد نازل يستغل فينا من ناحية اللي بدو ينكش الكبار بيدعمنا و اللي بدو رضاهم بدعس على رغبتنا
و احنا من قد الدعس بلشنا نفرط - مرة فتح و مرة حماس و حكومة مقالة و حكومة مش عارفة شو و سيارات مرسيدس و علام و احقر جندي امو مش عارفة مين ابو بدخل على ايا بيت بفتش و بأمر و بيعتقل و أيا حركة بننضرب فسفوري و بتقولي سلام والا مفاوضات
دخيلك ايا سلام هادا اذا نحنا مآدن ما عم نمون نبني و هم بصروا على دولة يهودية يعني اذا قلنا اسلام صرنا متطرفين بس ادا قلنا يهودية صارت القصة فيها طرح جديد
مستوطنات و عم تنبني - اقصى و عم ينهد - ترحيل - جدار - قصف - اعتقالات - ملف اسرى - انتشار المخدرات - بطالة - فساد - هادا اللي احنا فيه
سلام قال ؟
هي : انتي شو بتحكي و بطلي احضري هالاشياء الله يخليكي انا مو قصدي هيك
أنا : شو قصدك ؟
هي : يعني شو رأيك بموضة السلام الدارجة " هاي " بدل السلام عليكم شي مقرف صح
سحابة دخان برائحة العنب و قربت تمطر
أنا : مقرف ... ? وجهة نظر
خط عريض باسم :
أشلاء وطن,
ثرثراتي,
عالم من ورق
الاشتراك في:
تعليقات الرسالة (Atom)
هناك 29 تعليقًا:
انت وين وهي وين :)
بتحسينا صايرين على نكشه و بننفجر باللي قدامنا
بس بيني و بينك وعلى رأيك....كله مقرف
جميل موقف هي.. و الأجمل قاموسها.. ذلك الذي لا يوجد فيه معنى لكلمة "سلام" سوى تحية "السلام عليكم"
قرش الحشيش مضروب :D
مهو الموضوع خلا الواحد بدو يفقع , عجبنا ردها سيبك من هل شغلات هاي
بطلت اولولية :(
يلاه بيس
دخان ,, دخااااااااااااان,, دخاااااان
دخلت المود معك,, وبلشت اكح من كتر الدخان
ضحكتيني جد
جد شو عيب نحكي "هاي" شي مقرف!!!!!
شكلها ما انتبهت على كل الي حكتيه
هههههههههههههه
كيف بتفكر هاي الناس بأي أسلوب
نفسي أفهم وما حفهم ...
أنداري
ويسبر شفتي بفصل احيانا انا
بس قرف عن قرف بفرق
جعفر نورت المدونة
يعني هلا لو ما حكيت السلام عليكم ما بتكون جميلة :) المهم النية بالسلام
قط البكتيريا : و عليكم البيس و رحمته و بركاته
فرحت لانها عجبتك
ام عمر طولي بالك خلص الك مني دوا كحة
اكسترا كمان
ميسم المشكلة انو انا كتير بحكي هاي
يعني القصة ما بدها تدقيق
المهم اني اسلم على حدا
مش قلتلك السلام نية
لا يمكن لنا أن نسير والإله يلوي أذرعنا إلى الوراء ..حتى وإن مشينا فإنها ارادته
مسلوبي الإرادة لن نسالم بل نستسلم
سلام قبل الحكي سلام بعد الحكي سلامي الك
مع انو ما في حكي ولا حتى في بكي
في قلوب فيها وجع
جفرا هي هاي انا ماعندي مشكله باي طريقه للتسليم
بس المشكله بهالعالم الي بتسطح كلشي وبتتطلع على أصغر الأمور وبتتدايق منها لا وبناقشوك فيها كمان وفي امور أخرى بتناسوها وبتكون أخر أولوياتهم :\
جفرا
شكلنا بدنا نطاوش باللغة هلقيت :)
أنا قصدي إنو كلمة سلام عندها لها معنى واحد و هي التحية المعروفة بالسلام عليكم و ما بتعترف بالمعني الثاني اللي فهمه الأخ "هو"
ولكن هناك أشكال أخرى للتحية مثل هاي.. و شلونك.. و تشيفالحال؟ :) و هادي ماشي حالها ..مع تفضيلي لـ"السلام عليكم" باعتبارها سنة النبي محمد صلى الله على و سلم
أتمنى يكون قصدي وضح
مع تحياتي
لـــ راسو يابس ـــداوي
:)
U r right.. It's just a manipulation of words
ههههه
ع فكرة أنا كنت عارفة من أول انو صاحبتها قصدها عن السلام العادي
مش سلام الشجعان:)
يسلملي المتطاير أنـا:))
جعفر
طول بالك شو هالتعليق الصاروخي
يا عمي الراس اليابس هاي ميزة فينا كلنا
انا بصراحة بهتم بالنية بالسلام و الشخص اللي بسلم
و بعدين طول بالك مين قال اني ضد السنة النبوية
الله يسعدك بلاش هاي النقطة لانها عاملة مشاكل هالايام
بكرة بيجيني واحد بقولي انت ربع نجاد
و انا القلب على اليسار بخاف يوقف
:)
كل هادا التعليق نتائج الحرارة العالية اللي صايبتني هلا
:)
فطول بالك علينا
طارق : احيانا بعض الكلمات البسيطة بتولد حروب لهيك حتى بالحكي ما عاد ناخد راحتنا
تحية
مياسي : احكيلك سر
هالايام صار بدي مترجم لاعرف شو قصد الناس
معلش موسم حساسية حاد
من وين شفتيني معصب؟؟ إذا كل هالابتسامات هدول :) مش نافعييييين؟؟ والله اني مروق و كنت بس بوضح
والله انا ما حكيت انك ضد السنة..
تحياتي مع ابتسامة مسروقة من معاناة واحد سهران بكمل شغله من البيت
جعفر
انا كنت بمزح مو مبين علي ؟:))
معلش انفلونزا حادة اثرت علي كتير :(
هو استسلام مش سلام..
كنت هنا..
سلام (عشان صاحبيتك ما تزعل).
معافية إن شاء الله.
شيشة و دخان، بتوصي ع دوا كحة ثاني لإلي (إشمعنا إم عمر).
نيجي لموضوعنا: بدي أعرف كيف بتطيقي تقعدي مع الناس إللي بمثل هيك محدودية بالتفكير و كل همها تنبلة بإنه تكمل جملة السلام.
تشاو
خالد : حتى الاستسلام مش هيك
ابدا مش هيك
يعني احباط مرة وحدة بس على جرعات هادا قتل بطيئ
صالح : ولو تكرم دوا الكحة صار جاهز و كمان بنزل الضغط لمدمني الاخبار
اذا بدي اقطع العالم هاي و ما اقعد معها معناتوا اني رح اقطع 99% من اللي بعرفهم
اذا مش اكتر :)
hahahahhaaaaaaaaaaaaaaaaaaaaaaaaa
love this!!!!!!!!!!!!!!!!!!! :D
صدقي صرت مكربعه 4 قزايز دوا كحه وعالفاضي
شكله حدن( مش صال صال) ضارب الدوا عين
خفي عني الدخان,, بطيب بسرعه
ناصر : مبسوطة انك حبيتها :)
ام عمر : هادا انت مدمنة و انا مش عارفة
بس اللي بدي اسالوا ادمان دخان و الا دوا كحة
كتير حلوة هالحبكة، يعني بالفعل شي بيخلي الواحد يسلم
فلنرقد في سلام
يابطه شكله إدمان مرض
مابدخن انا,, احيانن بحب ريحة الدخان,, بس بالغالب بكرهه كره العما
مش قادر أكتب لأنو الدخان كثيف + ما ظل حكي! لوول
*قال مياسي كانت عارفة! huh! هيهيي
مسا الخير بنت بلادي-جفرا- يشرفني ان اكون صديقة مدونتك واحيك على اسمك الذي فيه إحياء لتراثنا...
سلامنا هو استسلام ولا اقول الا ما قاله الشاعر:
لا أعتب على الظالمين إنما عتبي على من هادنوا الظلاما...
كم يسعدني زيارتك وزيارة أصدقائك لمدونتى الوليد حديثال{شروق الشمس}
زينة زيدان
شكرا الكم كتير مع اني متاخرة بس الظروف :)
مادامو يضحكون معهم ويسافحونهم فلن يكون هناسلام معنى السلام هو التعايش مع الغير بكل توجهاتهم وبكل دياناته و عقائدهم والقبول بهم كما هم هذا هو السلام
وهذا ما تخشاه الأيدي الخفية
إرسال تعليق