الجمعة، أكتوبر 29، 2010

مرحلة الدوخان

ممكن نقطة مي صغيرة تغير شكل الجبل

هاي الحكمة انا اخترعتها ........ مش كافية لتعبر عن اللي مريت فيه الفترة الماضية
بس كانت شوية ظروف عائلية اكتشفت فيها انو الانسان كتير ضعيف و ممكن اي هزة صغيرة يتعرضلها
تخليه يلف حولين حالو و هو مش شاعر
و ما رح يحس بالدوخة الا بعد ما يهدا
و انا شخصيا هلا بمرحلة الدوخان :)
بس نصيحة صغيرة
" ما تقول باي يوم انك زهئت من الروتين و بدك تغير . احيانا الروتين اليومي بكون احسن من التغيير .. و تصير تتمنى انك ترجع للروتين "

صايرة حكيمة انا ؟؟؟ مش حكيمة اللي بتعطي ابر
لا حكيمة يعني كتيرة حكي
:$

اشتقت كتير لاقرالكم و اخربش هون


هناك 11 تعليقًا:

marwa joe يقول...

الله يفتحها عليكي و ييسر امرك ..
كلنا بنمر بمراحل و ايام صعبة بالحياة بس لازم نصبر و نطلب العون من رب العالمين ..

مياسي يقول...

الحمدلله عالسلامة
بيحكو لو علمتم ما في الغيب لاخترتم الواقع مش هيك؟!

naysan يقول...

وانا اشتقتلك كمان ...ذكرتيني بشي صار معي بالصيف ...كنت زهقانه كتير من البيت وبشكي من الروتين وعم اخطط لرحله برا البلد...بعد يومين تعرض زوجي لحادث سير صغير فقضينا بقية الاسبوع بالمستشفى ...وقتها صار نفسي بس ارجع اقعد بالبيت وما بدي اسافر ولا شي ...بس ارجع لروتيني اليومي بدون مستشفيات...الحمدلله عدت على خير وسافرت كمان

يا رب تبقي دايما بخير انتي وكل الاحباب يا رب

Tareq M. Samhouri يقول...

I do agree most of the time routine is better than changing certain things in life
I'm going thru this these days

جعفر حجير يقول...

" ما تقول باي يوم انك زهئت من الروتين و بدك تغير . احيانا الروتين اليومي بكون احسن من التغيير .. و تصير تتمنى انك ترجع للروتين "

سلامات جفرا.. هذه الجملة نابعة من تجربة؟؟ صراحة خوفتيني لأني حاليا أنا صرت أحكي زهقت من الروتين"

إن شاء الله ربنا يحماكي و يرشدك للأفضل

Whisper يقول...

اليوم كنت مقررة ابعتلك ايميل اتطمن عليكي :)
اشتقنالك كتير...كنت بدي احكيلك هو اي نعم التدريس متعب بس مش مقبول ياخدك منّا

مرحلة الدوخان!!!
اذا الحمد لله هديتي هلأ

ان شاء الله يكون كل شي صار معك لخير و ربنا يفرجها علينا كلنا

في اشياء بحياتنا بتصير بتخلينا نقدّر اللي كنّا عايشينه....لكن من تجربه بحكيلك بعد ما تخلصي و تصحي من الدوخه حترجعي تقدري حياتك لفتره و بعديها ترجعي تكرهي الروتين :)

هيك الحياة اجمالا :)

jafra يقول...

مروة شكرا الك
الصبر مفتاح الفرج :) مع اني بمل من هاي القصص بس لما ما يكون عندك غير انك تصبري و تستني بتبلشي تامني فيها :)

مياسي : بالفعل كتير بكون الواقع احسن من الغيب
يا ستي ان شاء الله كلو خير واقع او غيب

نيسان : بالفعل القصة قريبة على اللي صار معي بس مع بابا
و اليوم بس لطلع من المشفى نشكر الله
و على هيك بالنسبة الي الرجعة لرتابة و روتين الحياة رحمة اكتر من المستشفيات

طارق : بتمنالك الخير بالايام الجاية
موفق

جعفر : لا ما تزهق لانو احيانا بكون الروتين رحمة
بس مع هيك و بما اني بلشت اصحصح :) الحياة بلزمها شوية تغيير :)))

ويسبر : كيفك . تسلمي كلك زوء و اعتبري الايميل وصل
عم حاول لحق كل اللي كتبتوا الفترة الماضية . يا ستي طلع التدريس ارحم من قعدة المشفى . بصراحة البابا كان مريض او بالاصح زاد مرضوا و اليوم بس لطلع . يا ريت القصص بحياتنا بتوقف على الشغل ما كان حدا غلب :)
كانك اتاخرتي بالسفر ؟ يلا الخليج العربي بستناكي . بتصيري اقرب علينا

ميسم يقول...

الحمدلله على سلامة الوالد والله يشفيه يارب كنت ازورك كتير هون واحكي وينها ام الجفافير :))))
اشتئنالك والله

زينة زيدان يقول...

مرحبا جفرا اقبليني ضيفة جديدة لمدونتك
ممكن قطرة الماء تهدم جبل مو بس تغيره بس بشرط تكون قطرات مستمرة
الروتين حياة والتغير حياة
لكن المهم سيطرتنا على الامور
والدوخان يبقى شيء وقتي وينتهي
تحياتي

Haitham هيثم Al-Sheeshany الشيشاني يقول...

الله يدوّخ عدوينيك ! "ما عداي" :]]

حمدا ً لله على السلامة... إن شاء الله تمر الفترة الصعبة على خييير

الروتين حلو! مالو الروتين؟ بجنن! ملل؟ معلش بس النتائج درجة التحكم فيها + التوقعات بتكون عالية و بالإيد! صح؟

badido يقول...

كل النقاط تغير الجبال وكل الكلمات تعبر عن صاحبها
نحن نريد نقاط تغير أفكارنا من سلبية ألى الأيجابية وكيف نغير مجتمع سلبي ألى مجتمع أيجابي