ايام و مواقف

اليوم كان غريب كتير

رح احكيلكم شو صار معي

انا زي ما انا دايما بحاول اكون احسن و ادور على الفرص الوظيفية اللي بعتبرها افضل بلا ملل

يعني ما بكمل سنتين الا انا مغيرة وظيفتي و مش مكان الوظيفة لا بغير نوعية الوظيفة يعني مرة معلمة و مرة سكرتارية طبية و مرة محاضرة في معهد و مرة ............. يعني كتير

و كل ما اشوف اعلان هه شوي برفع من معنوياتي بتحمس

مرة كنت مقدمة لوظيفة ما فهمت شو هي الشركة بالظبط اسمها غريب بس قلت يلا بنقابل و بنشوف شو هي و طبعا كعادة الغربيين بتصلوا فيك و بحددوا المقابلة بنفس اليوم

رحت و زي العادة متاخرة لاني لازم اتاخر على اي موعد بحياتي ما بعرف ليش عمري ما وصلت على موعدي حتى بالدوام

المهم قابلتني السكرتيرة و ادخلتني للمكتب و قالتلي بدك تستني ليخلص المدير شغلة ضرورية و الحق عليكي اتاخرتي

و قعدت بالمكتب الفخم و بلشت اتفرج على اكسسوارات المكتب زي العادة و لفت نظري انو الاكسسوارات كلها اشكالها غريبة و مريبة و مسكت وحدة و اكتشفت انها زي القنبلة و دخل المدير و تركت اللي بايدي و سلم علي بطريقة غريبة يعني كتير هالاجانب بكونوا ودودين و كانوا بعرفك من زمان و سالني عن حالي و دردشنا بامور الحياة و كاني جاية بس لاشرب قهوة بس مو مقابلة شغل

المهم الصدمة وين كانت

انها شركة لانتزاع الالغام الارضية و انو المدير بحاجة لمديرة مكتب بتقدر هذا العمل الانساني و بتحب السفر

اجا في بالي الحج ( الحج يعني بابا ) يعني تخيل و انا حاملة شنتايتي السفر السودا الكبيرة الصبح و طالعة من البيت

والله وين رايحة يا بابا

و الله مسافرة

اوكي بابي الله معك

مع انو بابا مو كتير بدق بس مش لدرجة السفر مع مين ما كان

المهم اعتذرت بطريقة لبقة كتير

هاي وحدة من المقابلات الغريبة

لكن اليوم كانت اكتر غرابة

اتصلوا فيي شركة طبية بدهم سكرتيرة ولاني مليت من شغل التدريس اللي صار معقد كتير اخدت موعد و رحت

طبعا لما بتدخل على الشركة بتلاقي شي عشر اشخاص على الاقل بستنوا المقابلة وانا على الاكيد اخرهم لاني متاخرة

و دور ورا دور و انا حاسة بتانيب الضمير بالنسبة الهم

يعني انا موظفة و راتبي منيح هم يمكن ما بشتغلوا ؟ و محتاجين شغل ؟

و انا وحدة انانية بقطع رزقة غيري

و هيك طلعت اخر وحدة و بعد خمس دقايق ما لقيت الا العالم كلهم بركضوا و حالتهم حالة

يا ساتر و يدخلوا على المكتب و يطلعوا و اصوات غريبة و حالة

و انا زي الاطرش بالزفة و كل ما حاولت اسال حدا بركض و بصرخ

يا ربي شو في

انا هون خفت

ما لقيت الا صوت سيارة الاسعاف و حمالة و مسعفين دخلوا على المكتب و حملوا المدير اللي المفروض يقابلني على حمالة و اخدوا

و الكل وراه

انا انصدمت و لما انصدم بتجمد

ضليت واقفة بمكاني و انتبهت اني لحالي بالمكتب و ما في حدا غيري

صابتني موجة من الضحك فجاة على الموقف اللي صار بعشر دقايق

و نزلت من المكتب

يعني الله يشفيه شو ما كان معوا

لكن ما اظن اني ما رح ارجع بعد هيك على الشركة ابدا

ذنب جدتي

لم يكن ذنبك انك لا تقراين الا اشعة الشمس

و لا تفسرين الا الاحرف الاولى للعشق

فهي ابسط و اجمل

كما لم يكن ذنب مريم انها حملت به

و اورثته الالم

ومرره الينا مقنعا بسريالية القدر

و لم يكن ذنبي انني اشتاقك

تعبت من انتظار الشرفات يا جدتي

قلت لي ان الحياة واسعة و كبيرة

و لم تذكر لي انها تضيق فجاة

و لا يعود هناك مكان للحلم

لم تقولي لي ان الاحلام بعيدة في زمننا

بل كنت تجملين لي الحلم و تزيدينه روعة

و تنثرين عليه رائحة الزعتر

( تناولي حلمك )

كنت تقولينها بحنان زخات المطر

كان حلمي بك اجمل

جدتي لم تكن تقرا لكنها كانت تقول لي ان الله يحبني

ما عاد الله يحبني منذ ان رحلت

و لم تعد الشمس تشرق من مكانها المعتاد

.

.

.

.

.

اشتقتك

ثرثرة

في خطاب الامين العام لحزب الله اليوم و كعادته في كل خطاب قسم حديثه الى عدة اقسام و كان واضحا صريحا و عندما يهاجم احدا يذكر المسببات و الادلة

لست مضطرة الى ان اكون شيعية لاحترم مبدا هذا الرجل و تاريخه و الاهم ما حققه من انتصارات داخلية و خارجية بالرغم من كثرة التاويلات

لكن ما جعلني اضحك خلال الخطاب ما قاله السيد عن تصريح نتنياهو انه يطالب بالقبض على السيد لانه متهم بقتل الحريري

نتنياهو يهتم بالحريري و يريد ان ياخذ بثاره ؟؟؟؟؟؟ و يطالب بالقبض على قاتله ؟؟؟؟؟

كان تعليق السيد الساخر من ان اسرائيل حامية اهل السنة و الجماعة تعليقا لاذعا
اعتقد انه تجاوز حد التعليق

(معو حق الرجال يعني ما وصلت المواصيل لهالدرجة )

يعني نتنياهوا الحمل الوديع و اسرائيل حامية الحمى هي التي تطالب بمعاقبة المجرم الذي قتل الحريري

و هدول مين قتلهم يا سنة و يا عرب من كل دين و طائفة

أو لازم يكونوا أولاد أو أحفاد رؤساء ليكونوا مهمين و تنقام الهم جنازات عسكرية و فيها أكبر الشخصيات و نياشين و ضباط أو مالكين السوليدير لينسأل بس مجرد سؤال عن محاكمة قاتلهم ؟؟؟؟؟

هذيان الصور

لا تحن ظهرك

لست متسولا

لا تبتسم

هل انت في عرس ؟

قف

اعرض البطاقة

اشر على الرقم

انت الان رقم

و لن تكون غيره بنظرهم

اقطب جبينك

.

كان الأولى بالمصور ان يصور عينيه فقط

كي يعرف طريق بيته في اللد

او الرملة

او يافا

او الجليل

او حيفا

لم يكن بحاجة الى البطاقة

فقط انظر الى عينيه

لتعرف البلاد خطوة خطوة

و ان تعرف ماذا تعني كلمة

لاجئ

____________________________________________

شوفي يا سيدي صحيني لما الجيش العربي يوصل و الثوار ييجوا

مش تنسيني نايم و تروحوا على البلاد بدوني

ما رح تندلوا على الطريك

انا حافظها عن غيب

اكلك هي غفوة صغيرة يا دوب و رح ييجوا

اوعك يا سيدي ما تصحيني

نام يا سيدي و انا رح استناهم

كيف ما اصحيك

اكيد رح اصحيك بس هم يوصلوا

( نام الى الان و ما زال يحلم )

يومين و بترجعوا ؟؟؟؟

- يعني هلا يا فاطمة لشو وصلنا ؟

- انا عارفة يا حج ؟

- هلا يا فاطمة مش لو متنا في بيتنا ما كان اكرم

- مش كالوا يا حج يومين و بترجعوا

- ولك مين اللي بدوا يرجعها اذا اللي كالولك هيك طلعوا كبلنا

- يعني هلا يا حج لشو وصلنا

- ولا شي يا فاطمة صرنا فرجة

http://arabic.salmiya.net/songs/marcel/rm/marcel29.rm

لي ما لي هناك ..................

لم اكن اعلم يا فاطمة

ان الطريق طويلة الى هذا الحد

و لم اكن اعلم

ايضا

ان الايام ستشنق نفسها

عند اخر شجرة زيتون على الطريق

ولم اكن اعلم

ان جميع مآسينا ستختصر باسم

النكبة

( كل نكبة و انتم بخير )

حمى و ديك تشيني

امضيت ليلة الامس بطولها بعمل كمادات لتخفيض الحرارة المفاجاة التي اصابتني


حمى على غفلة من المناعة اصابتني


لم تنفع الابر او اي انواع من المسكنات


و بعد صراع كامل دام ليلة كاملة


انخفضت حرارتي من 40.5 الى 39


انجاز


و لكن قالت لي امي انني بدات بالهذيان


حيث طلبت منها ان تحضر لي اوراق الاختبارات لاصلحها ؟؟؟ و انا في عز التعب و المرض و السخونية ؟؟


ممكن


المهم استيقظت صباحا و بعد تناول الادوية التي وصفها الطبيب


و كم كاسة زهورات روقت و كالعادة


عادة اي مواطن عربي مهزوم


قرات بعض الاخبار


بصراحة هذيان الحمى اهون بالف مرة يعني شوفلك هالخبرية :

خلية امريكية تحت امرة ديك تشيني قامت بالتنسيق مع خلية اسرائيلية بامرة شارون باغتيالات في لبنان منها عملية اغتيال ايلي حبيقة وعملية اغتيال رفيق الحريري

http://www.youtube.com/watch?v=5a1PtiiNqtg

يعني بصراحة خبرية بتستاهل


فركت عيني مرة و مرتين


لهالدرجة الحمى اثرت فيي

و اعدت قرااءة المقال هنا

http://www.almanar.com.lb/NewsSite/NewsDetails.aspx?id=84541&language=ar





له له يا سعد وين بدك تودي وجهك هلا ؟؟؟


و يرد علي صوت داخلي : ما تخافي على وجهو ... اللي استحوا ماتوا

توقعت الخبرية التانية انها اعلان مسؤولية اسرائيل و امريكا عن احداث 11 سبتمبر
يعني بالمرة كشف كل الاوراق و اغلاق ملفات
يعني شكلو اوباما بدو يسكر كم ملف تم فتحه على زمن الاخرق الذي سبقه ليتفضى لامور معينة
طبعا لا تؤاخذني ايها القارئ لا تنسى ان اللي عم تكتب هلا درجة حرارتها 39.5






جعجع: السيد نصر الله نصب نفسه مدعيا عاما للتمييز وكلامه خطير جدا





شوف مين اللي عم يحكي ؟؟؟؟ عن القانون و عن السيد ؟؟؟

و هون كانت الخاتمة

لا حول الله

لا اضل محمومة و بلا نت احسن

و بلشت غني

رجعت السخونة

بدل رجعت الشتوية بالاذن من الست فيروز

ليل و شال كشمير

ارتدت شال الكشمير


و استعدت لجلسة نسائية


لا ضير ببعض النميمة في يوم الاجازة


" كلما ارتدت شال الكشمير امتد الى انفها رائحته - لم تدري هل علقت الرائحة بالشال ام بمخيلتها "


ارادت ان تتذكره اليوم بملئ ارادتها


تعرفت على احدى النساء التي لم تخف اعجابها بالشال و بصاحبته


عندما نثرته على السرير قررت ان تتصل به


لا ضير بقليل من الخطيئة في ليلة شتائية


غيومها خرقاء


____________


على بعد شارعين و ذكرى


___________


جلس على اريكته المقابلة للتلفاز


يقلب القنوات و يستمع الى ثرثرة زوجته


لم تكف عن الحديث عن شال الكشمير و صاحبته


عرف انها هي


قرر ان يتصل بها


كل شيئ مسموح الان


انه المطر


ما ان يهطل حتى يفتح باب المغفرة حتى لذنوب لم تقم بها بعد


رفع السماعة


طلب الرقم


_________________


استمع الاثنان الى الى صافرة و بعدها المشترك مشغول بمكالمة اخرى





اخذت نفسا عميقا و قالت ............احسن


قرر ان يشتري شالا من الكشمير لزوجته حتى تصمت