تخت شرقي

من أول رمضان و أنا في غيبوبة


مش عارفة الوقت كيف عم يمشي بطريقة غريبة - سهر طول الليل و نوم بالنهار انتقاما لرضان الماضي اللي داومت فيه تخيلوا صيام و ما في قهوة و حر و اربعين طالب راجعين متل القرود بدهم يصرفوا كل الطاقة اللي حوشوها طول 3 شهور على راس المعلمة الصايمة


غير الادارة و القوانين و هالقصص


رمضان هادا اجازة معناها نوم و راحة و تدليل و قطايف و كنافة كانوا بعد رمضان رح يخلص الاكل و الحلويات فالكل نازل نسف


حتى النت ما بمر عليه الا بسرعة مش عارفة ليش بس السهرات و العزايم ماخدة وقت البيت كلو و الانجاز الكبير اني بتابع مسلسل طبعا مش باب الحارة و هيك بكون ضمنت بال طويل لبعد رمضان يعني تخيلوا مسلسل حلو و دعايات بتنط بوجه الواحد كل 3 دقايق


شي بجلط لكن بهون لانو بعد هيك اكيد رح اعتزل التلفزيون و ارجع للروتين


المسلسل هو تخت شرقي . طبعا انا مش ناقدة و ما بعرف انتقد شي بس بحكي بحس المشاهد المعتر بعد حروب المسلسلات التركية و الايرانية و المكسيكية اللي غرقنا فيها قبل فترة


طبعا انا من محبي الدراما السورية خاصة لو توجت باسم حاتم علي بس المسلسل اللي بتابعوا مش من اخراجه من اخراج رشا شربتجي و تمثيل نخبة من الممثيل الرائعين برايي


اللي شدني بهادا المسلسل هو طبيعة الواقع المحظور اللي ما حدا بقرب عليه لانو الخوض فيه و برمضان يعتبر خطر لكن من رايي القصة مش رمضان او غيروا فاللي ما بنحضر برمضان هو نفسوا اللي ما بنحضر بعد رمضان


المبدأ لا يتجزأ


لهيك عم تابع حلقاتوا باستمتاع المشاهد اللي عم يشوف حالات من العالم ممكن تكون حوليه او عايش معها و يوم من الايام تعرف عليها او يمكن يصدف حالة بتشبهوا او نقيضوا


اللي بحبوا في نوعية هيك اعمال الطريقة اللي بتسلسل فيها الامور بسلاسة و بدون تعقيد و طبعا طريقة تقديم الشخصيات مش ممل بالعكس كل يوم او فترة بتكتشفي شي عن الشخصية


يمكن انا من النوع اللي بهمني سياق الدراما و الاستنتاج و ما بحب صحون الفضة اللي بتتقدم فيه المعلومات هيك على استهبال و بدون مراعاة لعقلي


ليش عم احكيلكم عن المسلسل ؟؟؟ ممممممم


لفت نظري عبارة قالها عبد الهادي صباغ في حلقة من الحلقات و بصراحة بتنطبق على جيلنا لو فكرنا فيها منيح و هي :


انتوا جيل فقد سمة التعاطف الانساني . لازم يكون في سبب لكل شي . و نسيوا انو الانسانية اهم سبب .....


احنا وصلنا لهاي المرحلة و ما بنقدر ننكرها ممكن يكون فينا شوي لكن على طريق الانقراض


تعوا نتخيل متلا هادا الحادث لو صار 1960 مثلا او قبل 1990 لانو بهادا العام انفرضت فيه نظريات جديدة و كتيرة


سمعت صوت صراخ استغاثة من شقة انت ما بتعرف مين ساكن فيها


صدقوني العالم بتلتم و الرجال اللي في العمارة ما رح يضلهم يتفرجوا و يمكن يكسروا الباب كمان المهم الحالة الانسانية اللي جوا


بعد ال 2000 لو سمعت صوت جارتك اللي ما بتعرفها او بتعرفها مش مهم ...بتستغيث ..... اغلب سكان العمارة رح يسكروا الشباك و الباب و ما النا دخل هي الجملة الاساسية و بيتبعا خبرها خلينا في حالنا ......


الطفولة امتد الها هادا المرض


يعني و نحنا صغار و بنلعب في ساحة البناية العصر كنا نشوف مثلا جار حامل معوا اغراض او جارة حاملة كياس فالعادي انا نركض نساعدها و في بالنا كلنا ياي هلا انا الله بحبني لاني بساعد الناس الكبار و طبعا الكبار بستغلوا الصغار و بغروهم بحبة شوكولا او مديح قدام الام و هيك النفسية بتطلع بالسما


هلا الماما بتعلم الولد انو انت حبيبي مو شغال لحدا اوعك تحمل كياس و لو شاف الولد اي عجوز حاملة غرض او وقعت و لا هو هون و ممكن يدير ظهروا و بخبر القصة و بنقلها للماما و اذا سالتوا انت شو عملت بهز كتافوا و بقول انا مو شغال عند حدا


ليش لانو سمة التعاطف اللي ذكرناها بلشت تنقرض


او انقرضت الا الباقي اللي ضل للذكرى


عرفتوا ليش بحب بعض المسلسلات السورية


في شي بينحكى بضل بالبال


منها عبارة تانية انا باكدها كتير


الممثلين كانوا بيحكوا عن الموسيقى الشرقية و التخت الشرقي الاصيل و العبارة هي :


الناس نسيوا الشرقي و ما تذكروا الا التخت





صحيح مين شاف مسلسل ذاكرة جسد ؟؟؟؟ طبعا انا اجلتوا لبعد رمضان يعني معقول اقعد اتابع مسلسلين ؟؟؟ صعب





عم حاول لحق كل اللي انكتب برمضان طولوا بالكم شو هالنشاط يا جماعة انا لحالي بغيبوبة ؟

حوار مع رمضان

طرق جميل على الباب ............ و يصاحبه عطر





رمضان : أنا وصلت افتحيلي الباب


أنا : اهلا رمضان


رمضان : شو اخباركم يا فتاة ؟


أنا : انت لوين وصلت معنا بالسنة الماضية


رمضان يبدا بحك راسه و السرد


انا : لا فات عليك الكتير يا سيدي صار ................. و اسهبت بالسرد


رمضان : كل هادا صار لما تركتكم


انا : ما هو انت رحت من هون و الشياطين فلتت علينا من هون و بتعرف انو ايمانا شوي بدو اساسات


رمضان : مممممممممم و دخلك العالم اللي صايمة و مصلية و داعية وين بتروح بعد رمضان . ما هم كل مرة بوعدوني .. للاحسن


انا: ممممممممم بنستناك لنوعدك بنفس الاشياء في السنة اللي بعدها


رمضان : ليش


انا : قلتلك بدنا اساسات .. اساسات اصلية مش تقليد اعمى و حكي على الفاضي


رمضان : الله يسامحكم و يهديكم





___________________________


هامش1 : برمضان و الشياطين محبوسة . الناس بردو بتقول اعوذ بالله من الشيطان الرجيم


الشياطين بترد : اعوذ بالله من نفس الانسان الشريرة


----------


هامش 2 : احلى شي بعد ما يثبتوا رمضان بحس بريحة غريبة بالجو بتصير ؟؟؟ هيك مريحة و عطرة ؟ حدا بصير معو هيك شي ؟


---------


هامش 3 : كل رمضان و انتوا بخير





هون اشي بشبهني ....

شجرة الليمون

رسائل بطعم الليمون

-1-


" لأنكِ لدي


أجد نفسي مبكرا في الكتابة على أي هامش أبيض


أطويه


أعلقه على شجرة الليمون


قبل أن تصحو العصافير


و أمضي "


فقط لأنكِ لدي . أجد سببا وجيها للحياة و الموت و المشي تحت المطر مبكرا . و اقطع حيا باكمله . حتى اقول لك


" صباح الخير " بطريقتي


لأنكِ لدي . أجد انني استحق الفرح بجدارة .


و الصباحات الجميلة .


و قهوة الرصيف الرديئة الني تكون أجمل دوما برفقتك


لانك لدي فقط


لا لسبب اخر


أجد نفسي حراً


و حل من كل العهود و المواثيق


لانك لدي فقط


صارت السماء و الأمنيات أقرب

لأنك لدي


..........


ملاحظة للجارة الفضولية التي لا تكف عن فتح الرسائل الرجاء علقي الرسالة حيثما وجدتها كل تستطيع " هي " قراءتها


" بطلي فضول . و مش صباح الخير "


.......................................................

-2-
ارتدت ملابسها مسرعة حتى تتمكن من اللحاق بالجارة قبل قراءة الرسالة . هرولت على الدرج و كادت تسقط مرة تلو المرة
التقت عينيها بعيني جارتها التي تملك البناية بأكملها و هي تشهق و تتمتم " صح انك قليل ادب الله لا يصبحك و لايمسيك ..."
هي تقترب و قد تمنت لو ان طلقة ما تصيب عقل تلك الجارة الفضولية التي صارت تنتظر الرسائل و تستلمها من شجرة الليمون .
لم لا تكون شجرة الليمون امينة اكثر على اسرارها ؟

الجارة : نفسي اعرف مين قليل هالحيا و مين هي قليلة الحيا هاي


هي : شو بدك فيهم ؟ ناس بتحب


الجارة : صح انو فاضي اشغال . حتى شعر ما بعرف يكتب و ما بفهم . و قال بحب ؟ كيف بدنا نعرف مين هي ؟


هي : و لا يهمك انا بعرفلك عطيني الورقة و بشوف الا ما ينعرف ؟ شو كاتب هالمرة ؟


الجارة : طيب خبيها عندك ما بدي مقصوفة العمر اللي مبعوت الها الرسالة تلاقيها . بدي احرق دمها


هي في سرها تريد معرفة سبب حقد الجارة على الفتاة و الفتى ؟ الانها لم تجرب الحب يوما ؟


" فاضي اشغال " لو تدري تلك المراة انه يعمل و يدرس في نفس الجامعة و كي يستطيع ان يضع الرسالة مربوطة على جذع الليمونة لحبيبته عليه ان يقطع حيا باكمله . و لذا عليه ان يصحو مبكرا عن موعده بساعة حتى يتسنى له الوقت ليمشي و يمشي و يمشي الى ان يصل الى عمله .


" ماذا لو لم تعطها الجارة رسالة الغد ؟ ماذا لو سهرت و انتظرته ؟ "


لو ان كل انسان اعتنى بتفاصيل حياته اكثر و ارتاح من فضوله كانت حياته و حياة غيره أسهل


___________________________________


-3-


هي : بطل اتركلي رسايل و الله لو شافتنا الجارة و الا اكتشفت رح تعملنا مشكلة


هو : بدي اعرف كيف بتقدري تقنعيها كل مرة تعطيكي الرسائل ؟


هي : بحكيلها انو بخبيهم عندي مشان ما حدا يشك فيها و انو اخرتا رح اعرف مين


_________________________________


-4-

المشهد الأخير ... هو يسافر الى دبي ليستطيع البقاء حيا و هي لديه.

و الا سيفقدها عند اول قارعة طريق يتمختر بها عريس ات من الغربة

بعد سنة تزوجت عريس " مغترب " قريب الجارة الفضولية و بشهادتها

" كانت اشرف و أأدب بنات الحي عمروا ما اجاها رسالة و لا حدا عاكسها و لا شفنا عليها حركات هيك او هيك . عمري ما سمعتها بتحكي عن شب او بتطلع معو.......... مش متل بقية بنات البناية "و لوت شفاهها و غمزت العريس "

ضحكت هي و احست ان جارتها الفضولية غبية جدا او انها من فرط فضولها صار لها خيالا واسعا لدرجة انها للان تطالبها بالرسائل بحجة انها من وجدتها اولا ، لو تدري تلك الجارة بفنون البحث الجنائي و كشف الاشخاص من خطوطهم او بتحليل الشفرة الوراثية لاي شيئ عالق بالورقة قد تعرف من هو العاشق . و لربما دفعت نصف ما تملك لتعرف من عي المحبوبة لتنتقدها و تقول

" هلا هاي بتستاهل الحبر اللي انكتب فيه علة هالورقة "

كلنت ستردد هذه الجملة حتما ... حتى لو كانت ملكة جمال الكون ، هذا ما ستقوله تلك الفضولية

,,,,,,,,,

هو بعد عدة سنوات لم يستطع ان يقاوم فيها اغراءات البورصة و تقلباتها

عاد الى الوطن خالي الوفاض الا من جواز سفر تملؤه الأختام و ساعة ماركة

و ملابس بألوان صيفية زاهية و سيارة افلتت من المصادرة ولن تفلت من الجمارك

و من فرط تعلقه بشجرة الليمون التي حفرت ذكرياته الصباحية و كانت جزءا من أيامه

تزوج الجارة الفضولية حتى يبقى بالقرب منها" من شجرة الليمون " و يستطيع ان يمارس عادته الصباحية بفرك اوراقها بيديه و شم الرائحة عن قرب . و لم يعلق بعدها اي رسالة

الجارة الفضولية ... تتمنى لو كان زوجها الذي يصغرها بعشر سنين قادر على كتابة الشعر كالعاشق الاحمق

كانت ستسمي شجرة الليمون باسمه

زوجها ممد بجانبها و هي تفكر بسرها

و تسأل " وين راح هالعاشق ؟ كان نفسي اشوفه ولو مرة "

______________________________

الي خمسة ايام بحاول الاقي نهاية للقصة ---- و ما لقيت

أنت منذ الآن غيرك ..........

أعدي لي الأرض كي أستريح

فإني أحبك حتى التعب

..................................................
اطمئن يا محمود فلا شيئ يدعو للتفكير بنا
لا تغيير
حصار و اقتتال و فضائح علنية و القدس في طريقها للانهيار
سوبر ستار فلسطيني و قنوات تتغنى بالتراث و اخرى تلعن و ندها يصيح
الفرقة صارت ميزة يا رفيق
و اعتقلات بالضفة -( من الجهتين اذا ما اندق بابك من السلطة بندق من ولاد الحرام الجنود الاسرائيليين )
اما في غزة فالاقوال متضاربة و ما عدت أصدق أحد
سيتم الانتقال للمفاوضات المباشرة ( هيك بدو عباس و اوباما و ايهود )
ليش ؟ و لا شي تغيير روتين و ( على الاغلب بدهم يعملوا حرب تانية فبهدوا الوضع عند ولاد عمنا )
شو استفدنا ؟
ولا شي بس لهلا ما صار في قرار ياخدوا مفاتيح بيوتنا في الجليل و يافا و حيفا و صفد و مخلينهم للذكرى
شي غريب ؟

الشي الوحيد الغريب انو لما بتيجي سيرتك
زهر اللوز بصير أحمر

سلام لروحك

امومة الالفية الجديدة - 2010

رمى حقيبته المليئة بالكتب في الرواق المؤدي الى الصالة - داهم والدته بقبلة في خصرها
هو : لا ماما لهلا ما في اكل رح اموت من الجوع
هي : اوكي بس بدنا نستنا بابا . رح يجي بكير اليوم
روح غسل و ضب الشنتة و تعا ساعدني
............
هي : شو ماما كيف المدرسة و التمرينات ؟
هو : goooooooooooood بس انا جوعان كتير
هي : شو عملتوا اليوم . و تناولت كوب القهوة التي تشربه ببطء طوال النهار و كان باردا و تستمتع به كانه كاس كوكتيل
هو : ماما صحيح ممكن اسال شي ؟ ليش في بالدنيا فقرا مادام الله بقدر يعطيعهم و يرزقهم . ليش بستنوا من الاغنيا يعطوهم ؟
هي بعد صدمة حاولت اخفاءها . طفل في التاسعة من عمره قلما يرى فقيرا معدما و يتحدث هكذا ؟
هي : طيب انت وين نقطة اعتراضك او سؤالك
هو : مش الله بقدر يعطيهم - ووين الله عنهم . ليش عم يستنوا انو الناس تشفق عليهم اكتر من اللي خلقهم . هيك انا بفكر او بتخيل
هي : طيب ممكن انا اخليك تتخيل شغلة صغيرة . سكر عيونك . . تخيل انو الناس كلها اغنياء و ما في فقرا . كيف الدنيا رح تصير ؟ كل الناس رح يصيروا مدرا و كل العالم رح يصير بدهم فلل و مزارع و رح يكون تفكيرهم كيف بدي اخلي ثروتي تزيد او احافظ عليها
شوف متلا بابا.موظف و انا موظفة هلا لو كنا اغنيا رح نفتح شركة و كل العالم يعمل زينا من وين رح نجيب موظفين ؟ و الفقرا اللي عم يشتغلوا عند العالم الاغنيا - رح يصيروا هم كمان بدهم يفتحوا شركات . و هيك ما رح نلاقي موظفين
هو : ممممممممم ممكن . طيب ليش الناس بتموت من المرض خاصة الفقرا
هي بعد رشفة اخرى من الكوب الذي احسته سخن فجاة
هي : ماما حبيبي في كتير امراض زمان كانت خطيرة و هلا صارت عادية متل الانفلونزا . بعد ما مات كتير من العالم صاروا يدور الانسان على طريقة و دوا يساعد المريض على الشفا
هو : بس الله ممكن يشفيهم و يعطي الفقرا مصاري و يريح الناس بس هو ما بيعمل هيك
هي و قد بدات ركبها بالارتجاف و لا تستطيع اخفاء توترها
هي : ماما حبيبي لو خلص الفقر من العالم بتروح الرحمة منو . لانو العالم بتصير تاكل بعضها و رحمة ربنا اللي بتنزل علينا لما تساعد الفقير رح تزول و هيك رح نصير نفكر بطريقة البقاء للاقوى زي ما الاسد و النمر بفكروا بالغابة
بس ماما بدي احكيلك شي بسيط . كتير من العالم الفقرا و اللي ما كانوا لاقيين ياكلوا زمان طبعا . صاروا ادباء و علماء و الامراض خلت كتير ناس تعمل تجارب و ابحاث و تقدمت الانسانية بفضلها يعني مش كل شي مش كويس حولينا بكون نقمة و لكن لازم نتعلم منو . انت لازم تعملي ورقة بحث فيها ثلاث خطوات لمساعدة فقير و نفذها هادا الويك اند شو رايك
انت شو كان عندك دروس اليوم ؟ صحيح خلصت اسئلتك ؟ فكر في اللي قلتوا و بعدها اذا بدك شي بنتناقش
هو : حلو . اوكي هلا رح بلش بس
هو : رح نحكي بعد الظهر في سؤال . وين هو الله ان كان معنا في هذه الغرفة ؟
هي : شدت على يدها و قالت حسنا لكن بعد ما تكمل دروسك . و نرجع من تدريب الكراتيه _________________________________________________

المشهد الثاني :

الام مع مديرة المدرسة ( شقراء جدا و عيونها بحر لم تبلغ السبعين بعد ) و احد اساتذة الولد ( عربي ذو بشرة سمراء و لكن بجنسية غربية )

الام : بعض الاحيان يتوجب علينا ان نسال ان كانت هذه هي المدرسة المناسبة ليتلقى فيها ابني علمه . انا ساتحدث قليلا عن وجهة نظري في كون ابني يتعلم في هذه المدرسة دون غيرها طبعا هذه المدرسة تعليمها اجنبي و لكن قلتم عند تسجيل الولد انكم ستراعون اداب و عادات و تقاليد المجتمع الذي يعيش به الطلب و لهذا نحن نكد طوال الشهر حتى نؤمن قسطا كبيرا .

المديرة بلكنة برطانية متعجرفة : تاكدي ان هذا هدفنا . و انكم تدفعون ليتلقى ابنكم اعلى و ارقى مستوى تعليمي

الام : في الايام الماضية كان ابني لا يتردد عن طرح اسئلة غريبة على بيتنا و على ثقافته الاجتماعية - و ايضا لا تطرح هذه الافكار في عائلتنا و عند استفساري عن الدروس التي ياخذها قال لي ان الاستاذ هو من يناقشهم فيها . يناقش نظرية وجود الله و قدرته في صف يحوي اطفال لم يتعدوا التاسعة من عمرهم

انا لست هنا لاشكو لو اردت ذلك كان من الممكن ان اتوجه مع طفلي الى اقرب صحيفة او وزارة التربية و اعرض عليهم ما يقوله المعلم في الحصة و لم و لن يتوانوا عن ابعاد المعلم و ادارة المدرسة و لكن ما اود مناقشته مع المعلم . ماذا تريد بالضبط ؟ اذا كنت انت ملحدا فهذا لا يعطيك الحق ابدا في زرع هذه الافكار بعقول غضة

المعلم : المعرفة منذ الصغر خير من الصدمة بالكبر

الام : من قال لك ان معرفتك هي الصحيحة و التي نود ان نعلمها لاطفالنا . ارجوك اسمعني . انت حر في اي اتجاه عقائدي تعتنقه او لا تعتنقه . هذا ليس موضوعنا . و لكن من المفروض كانسان تدعي الثقافة و الحرية و التحرر من كل قيود العبودية ان لا تمارسها على عقول صغيرة لن تعطيها حرية الاختيار بل انت تسكب بها ما تود فقط لتجبل مع السنوات

انا لا امانع ان يكون ابني ما يريد هو . لكن بعقل سليم تطرح امامه الخيارات و يختار و لكن لا اسمح لاحد بان يؤثر على خياراته بطرح اناني من معلم اعتقد انه رسول الالحاد الذي سينقد البشرية

لا اريد لابني ان يتطرف فكره ايا كان نوعه . و ان يبني خياراته حسب علمه و تجربته و ليس بحسب ما زرعه استاذه بعقله

ارجو ان اكون قد اوضحت الفكرة و لا اريد ان يظن ابني انني احارب فكرة ما بطرد استاذه الذي يحبه . و يتعلق بها لهذا ساكون مراقبة لما تطرحه في عقل التلاميذ و اعذرني ففي المرة القادمة ساكون في مكان اخر و ساسجل شكوى

ايدت المديرة . و التزم الاستاذ و تم انذاره . و انتهى الموضوع

________________________________________________

القصة من وحي الخيال فقط . و لكن من الممكن ان تحصل في اي بيت و في اي مدرسة ليس بالضرورة ان تكون اجنبية و لكن من الممكن ان تكون مدرسة عادية .

لكن بدي اوضح انو الفتيات في هذا الزمن ممكن يصلحوا يكونوا امهات لاولاد من هذا الزمن ........ مجرد تركيبة

لكن لو كانت صلاحيتها و تميزها لا يتعدى المنزل و اساسياته . ما الذي سيحصل

..................................................ما اود طرحه هنا ماذا لو لم تكن الام على ثقافة و متعلمة و قادرة على استيعاب عقل ابنها

ماذا لو نهرته و طلبت منه السكوت ؟

او ذهبت الى الوزارة و اثارت قضية قد يفتحها ابنها عندما يكبر و يقول تلك فكرة صودرت . و ما هو ممنوع مرغوب

ماذا لو لم يحدث شيئ في قضيتها و لم يعرها احد اي انتباه ؟

لماذا لا تربى الفتاة على ان تكون اما بكل المقاييس ؟

بعض الاولاد اراهم اصبحوا اكثر خبرة و حنكة بالحياة من امهاتهم ؟

اقتراح بالاحمر . لماذا لا يكون هناك معاهد او نوادي مختصة للرقي بالامومة و اعطاء النصح من قبل استشاريين و اطباء و علماء نفس و متخصصون بدراسات لها اهتمام بالاعداد التربوي ؟ و تكون خيرية و التسجيل باسعار رمزية و يشرف عليها جمعيات خيرية نسائية ( بدل ما هم فاضيين بس للقيل و القال ) و يمكن للاخصائيين ان يتبرعوا بالقليل من وقتهم . لاعداد ام تستطيع ان تجاري التطورات بكفاءة . و يتم الاعلان عنها و التبرع لها و ......الخ

هذا اقراح لا اكثر و لا اقل

كي نتوقف قليلا عن لوم الام ( 2010 ) و اعطائها الفرصة لتثبت جدارتها

لماذا جفرا ؟ لماذا لجوء ؟

في كثير من الاحيان تصلني رسائل بالبريد الالكتروني تسالني لماذا جفرا و لماذا لجوء


و ما هو سبب اختياري لاسم مستعار لا يجذب الانتباه كثيرا الا و انني لم اجد الوقت احيانا لاجيب و في بعض الاحيان اظن ان الكثيرين على اطلاع و معرفة لهذا الاسم و انك لو بحثت في جوجل ستجد مواقع و محلات و حتى مقاهي بذات الاسم


و طبعا سيزودك محرك البحث باغاني لفرق فلسطينية و الاغنية المتميزة لمرسيل خليفة ( الرائع )


جفرا من لم يعرف جفرا فليدفن رأسه في الرمضاء


ارخيت سهامي و قلت ........... للنهاية


و يمكنك التعرف على قصة جفرا الحقيقة من خلال الروابط التالية لانها ستزيد من معلوماتك و لا حاجة للقص و النسخ


جفرا ( ويكيبيديا )
جفرا من موقع جفرا
جفرا من منتديات - الجزيرة توك
جفرا - منتديات مخيم


و كلها تردد نفس القصة تقريبا احيانا مع اضافة الصور


لماذا اخترت جفرا ؟


السؤال له اجابة ابسط مما تتوقع - في بدايات استخدامي للانترنت كان من المفروض ان يكون لكل شخص اسم مستعار و كلما استخدمت اسمي الحقيقي يكون مستخدما من قبل شخص اخر لذا كان علي اختيار اسم اخر قريب مني و بما انني مرسيلية الهوى اخترت جفرا حتى دون ان اعرف المعنى الحقيقي للاسم و اكتفيت بالرمز و كنت امقت اختيار اسماء مستعارة مثل الالام و وواحة العشق ووووو مع احترامي لاصحابها لكنني وجدت ان اختيار الاسم يدل على شخصية المختار لذا يفترض ان يكون قريبا مني و لا انكر بعض الغرور الذي يصاحبني عندما يشدو مرسيل


و لجفرا ساغني - جفرا من لم يعرف جفرا ؟ و غيرها و من ثم ارتبط الاسم بي حتى بين الرفاق في الجامعة حتى ان اراد احد ما ان يعبر عني بشيئ كانت المواويل المتعلقة بجفرا كافية و التي احس بنشوة عارمة عند سماع بعض منها :)
( لا مش مرض نفسي بالمرة )
و طبعا بعد معرفتي بالاسم و صاحبته بعد فترة قصيرة من اختياره و انه رمز فلسطيني . طبعا تمسكت به اكثر فاكثر :)

( مش عنصرية بالمرة )

و هذه قصتي مع جفرا

لجوء ( لماذا اخترت لجوء ) ( هادا اسم مدونة تجذب العالم لو انا كنت بلاقيها كان سكرت على طول ) ( شو يعني لجوء نصيحة تغيريها لانك بتكتبي حلو ) و كثير من الاسئلة و التعليقات


كنت بالبداية اود ان اطلق عليها عدة اسماء منها حرية - صلاة - محراب - ترتيل - لكن كانت كل الاسماء واردة و لا احب ان اتطفل بالاسم على مدونة اخرى فانا اشعر ايضا بقليل من الضيق او كثير عندما يرد اسمي المستعار او اسم المدونة من قبل شخص اخر مع انني اعرف انه ليس حكرا علي و لا على غيري و لكن احسه احيانا فقد التميز او الخصوصية او بعض من الانانية لا اعرف حقيقة الشعور


لكن لجوء ارتبط بعدة خصائص بحياتي


اولها انني لاجئة فلسطينية من 48 وهذه الصفة نتوارثها مع كرت المؤن من جيل لاخر و القرية التي انتمي اليها هي فجة -قضاء يافا- و قد تم تهجير اهلها مرتين اول مرة كانت من فجة الى قلقيلية و من قلقيلية الى نابلس و من ثم الى خارج الوطن بعد حزيران 67


فاللجوء صفة نتميز بها عن غيرها


ثانيا انني اعتقد ان معظم المدونين لجئوا الى التدوين لتلبية رغبات في انفسهم و انا لجأت معهم


ثالثا اننا دوما ( او انا حصريا ) نلجأ الى اكتساب حقوقنا التي من المفروض اننا ولدنا مستحقين لها مثل الحرية - المساواة - على الاقل ان تعتبر انسانا و نحن للان نلجأ الى اثبات ما نستحقه


من منا لم يلجأ يوما ما ؟


لذا فاللجوء دوما يرافقنا


لماذا تكلمت الان بالموضوع


لان الايميلات التي تصلني للاستفسار تعدت الثلاثين


و حتى لا اكون ( قليلة ذوق )





هامش : بتمنى اني ما اكون مللتكم :)
اللوحة اسمها جفرا لاسماعيل شموط


هاي انا


جفـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــرا

يا ميت . يا أهب...ل.... :)

المكان : و الموقف


موقف تابع لمؤسسة حكومية . الأم تنزل من السيارة لانهاء و توقيع بعض المعاملات و تبقى هي
السيارة غير مظللة و الشبابيك مغلقة في يوم حار و فتاة ترتدي نظارات سوداء و يقع معظم شعرها على وجهها
فتحت هي حقيبتها و اخرجت منها شيئا يهمها
مر الوقت دون ان تشعر به فهي دوما لا تشعر بالوقت الا متاخرة " ربما اعواما و فاتها الكثير "

المشهد التالي :
سيارة بها رجل و امراة يقفان بالقرب منها
الرجل : يختي الله يرضى عليكي قرري هلا بدك اياه و الا لأ
المراة : لا خلص روح وقع المعاملة
الرجل : وولادك ؟ بكرا بتصيري تعيطي و بدك اياهم و انتي عارفة لو برميهم بالشارع ما برجعلك اياهم و احنا لا تبعون شرطة و لا مخافر فكري يختي
المراة بسرها : كل هادا بس لحتى ما اقعد عندك بالبيت و ازعج الخانوم مرتك . الله يسامحك يابا لو كنت بس كتبت البيت باسمي لكان هلا انا اللي بتحكم بمصيري مش اخوي و جوزي واحد بضربني كل ما شافني و التاني خايف مرتو تضربوا اذا اختوا قعدت في البيت
الرجل : لا تفكيرك ما يروح لبعيد " و كانه قرا افكارها " اذا بدك بنترك البيت و بتقعدي انتي فيه لحالك القصة انو جوزك على كل عيوبوا بس الله يعنوا من وين بدو يلحق ليلحق . انا عملت اللي علي و رايح اوقع المعاملة خليكي هون
المراة رح اضل مكاني ما الى خمس سنين مكاني وين بدي اروح . مالها هاي اللي بالسيارة شكلها نايمة
الرجل : يختي تعبت من الانتظار مالك مفكرة توقيع معاملة بالحكومة بتاخذلها وقت - اذا بدك مي باردة بس نادي على هالولد هناك بجيبلك
و نزل من السيارة و هو يتمتم : الله يسامحك يابا بس لو ما ربيتها على العناد هلا كل فكرها البيت بجيب مصاري ما انا بدفع دم قلبي على التصليح كل شهر و مفكرة انو واسعنا انا وولادي
_____________________

المشهد الثاني :

امراة تنزل من التاكسي و تقول له : رح اتصل فيك بس اخلص
التاكسي : اوكي ماما بس انا يكون فاضي يجي
المراة : الله يقطعك قال ماما قال . و مضت مطرقة الراس . لم لا يتم انتهاء المعاملة في دائرة واحدة " مرت بالقرب من السيارة و لفت نظرها لون شعر الفتاة الجالسة بها " شو حلو اللون بس اخلص من هالمعمعة بدي اعملو
يلا نسلي حالا جواز وما تجوزنا ... حب و ما حبينا ---بلكن بتنفرج على هاللون الجديد
حملت الملف التي تريد توقيع ورقة منه بكلتا يديها و هي تنظر بطرف عينها الى الفتاة تارة و الى الشارع تارة اخرى و قالت " مالها هاي نايمة كنها ؟ و الا صايرلها شي ؟
____________________

المشهد الثالث
شاب يقترب من السيارة بيده اكثر من ملف و يحاول لفت نظر الفتاة الا انها ابقت راسها مطرقا و لم تنتبه ثم وقف امامها يتمختر ثم مل و ذهب في طريقه و هو يقول " لو انني غني لما انتظرت منها شيئا على الاقل كنت تزوجت دون ان اتخطى الثلاثين و اصبح شابا ثلاثينيا مازال يتحرش بالفتيات في الشارع ، و يسألون لم يتحرش الشباب بالفتيات و لم لا نصبح كالعالم المتقدم ؟ في العالم الغربي المتقدم يستطيع الرجل ان يتزوج و لكن لا يريد ان يتحمل مسؤولية فيذهب الى الحانة و يجد فتاة قد ترافقه لليلة او يستمران معا و من الممكن ان يتزوجا اما الجميع و في نفس الحانة بل سيرويان قصتهما للاحفاد و الجيران و من يمر بهم . لو كانت الحادثة هذه واقعة في بلادنا لكان الرجل اكتفى بها عشيقة و ان تزوجها و هذا نادرا لاعتزل العمل و ظل يراقبها ليل نهار فمن الممكن ان تكون فتاة الحانة خائنة ؟؟
__________________
و كذلك الرجل الذي يعمل بجمع القمامة حاول جاهدا ان يلفت نظرها علها تعطيه اي شيئ
فالزبال عندنا يجمع بعض القاذورات و يخلف بعضها لانه غير مقتنع بما يسمى بالنظافة ابدا و و يعرف انها ليس لها اهمية
كيف لشعب مازال يرمي قمامته و الاكياس مفتوحة على مصرعيها و ينزلق نصف الكيس على الارض
و هذا الشعب تديره حكومة تعطي عامل النظافة مرتبا لا يصلح لعيش قطة فيعتاش ايضا من التسول و احيانا من بقايا الطعام في الاكياس المفتوحة .
عامل النظافة في بلادنا و هو رمز " النظافة و التفاني لاظهار النظافة " ذو رائحة نتنة و هيئة لم تعرف الاستحمام و لا النظافة منذ قرون
_________________
مضت ساعة الا ربع و المراة التي تنتظر اخاها بدات تنتابها الريبة من وضع الفتاة التي لم تتحرك داخل السيارة
و اجتاز الزبال الشارع حتى يستطيع ان يراها عن قرب علها ميتة او مغمى عليها
خرجت المراة من المؤسسة الحكومية ( اللي كانت راكبة تاكسي ) و نظرت الى الفتاة . " معقول صاير معها شي المسكينة و ما حدا منتبه " رن هاتفها و ردت عليه و ادارت وجهها
ركب الاخ السيارة و قالت له اخته " ما تحركت من اول ما نزلت ؟"
رد عليها " و الله ؟ يا عمي لو صاير معها شي بكرة بنقرا بالجرايد بلاش ندخل بسين و جيم احنا مش ناقصنا ، حماك اتصل و موافق على كل شروطك مع هيك انا وقعت المعاملة و يختي فكرت انو اترك البيت اذا بدك اجريه لاني تعبت من تصليحو و ........تحركت السيارة ثم عاد ادراجه و اعينهم معلقة بتلك الفتاة التي داخل السيارة )

اثناء قيام الزبال بالاقتراب نادى عليه رجل ليعطيه شيئا فنسي امر الفتاة و ذهب الى الرجل و لكن ظل يراقب الفتاة داخل السيارة



مر الشاب الثلاثيني و هو مستعجل لانه نسي احد البطاقات في الدائرة الحكومية و نظر الى الفتاة " هاي يا ميتة يا مغيبة " و توقف قليلا و لكن لفت انتباهه صوت المراة التي تتحدث بالهاتف و تقول للهندي " طيب انا مين بدو يروحني ؟ "
عدل من هيئته و اقترب منها . مدام اذا بتحبي انا بوصلك معي سيارة الشركة و .......... نظرت اليه و ابدت الموافقة . مشي خلفها و عيونهم متعلقة بالفتاة المسكينة داخل السيارة ___________________________

المشهد الاخير : والدة الفتاة التي بالسيارة تعود
يتركز نظر الاربعة اشخاص على السيارة و ينتظرون عويل المراة او حتى استنجادها و لكنها اغلقت الباب و رفعت الفتاة راسها و بدات بالتحدث مع امها و ما ان رفعت يدها حتى ركز الكل كتابا تحمله

الله يخزيها مفكرين صايرلها شي و خايفين . طلعت بتقرا . عن جد عالم فاضية ما وراها اشي . و الله هاي العالم هبل مفكرين حالهم عايشين باوروبا .
و مشي كل في طريقه
_________________________

القصة الحقيقة :) كانت معي لكن بدون كل تلك التفاصيل بالفعل رحت مع ماما لنوقع ورقة من مؤسسة حكومية و انا استرخيت بالسيارة و التكييف و فتحت رواية "لرابح يبقى وحيدا" ل باولو كويلو
بالفعل ضليت شي ساعة الا ربع و ما تحركت الا بوحدة ست كبيرة بدق علي الشباك و بتقولي مالك اشي يا بنتي . انا ابتسمت و شكرتها على اهتمامها بس اندمجت بالكتاب شوي و حسيت جسمي مكسر

العبرة : ما تحاول تقرا بمكان عام لانهم رح يفكروك يا ميت يا اهبل :)

بس أنا ما بتعلم

باقي الاحداث من خيالي :) طولت عليكم بالقصة صح ؟