شو بدك بالحكي - القلب على اليسار

هي " هاي البنت شو جنسيتها

أنا : هلا شو بدك بالجنسية بكفي انها بني ادمة و فوق هيك بتحكي عربي

هي : انتي لهلا قومية عربية

أنا : الله يرحمك يا ابونا بس هلا عم حاول اكون قومية انسانية

هي : ليش

أنا : اذا الانسان نفسو ما عاد الو احترام ؟

العربي رح يكون الو احترام ؟ نرجع بني ادمين بعدين بنحكي بالقوميات

____________________

هي : هلا فتح و الا حماس ؟؟؟

أنا : حاليا ما بقدر كون الا خضرا شوي و صفرا شوي

هي : ليش ؟

أنا : صرت استحي من زلم المنظمة و عمايلهم و الله اشي بخزي

هي : يعني انتي اخوان ؟

انا : هلا انتي شايفة في شبه بيني و بين الاخوان اشي ؟؟؟؟؟

الله وكيلك كل واحد منا من اب شكل بس هي الام اللي بتكسر الخاطر

هي : لا بس موقفك ....

انا : زلم فتح و السلطة خلونا نكرههم و لك شوفي

اي مقابلة تلفزيونية بردحوا فيها

و الله اشي بخزي و عاملين زي بياعة الفجل

هي : يعني انت مو اسلامية

انا : لا

هي : الله لا يوطرزلك لتكوني شيوعية ...انا كنت حاسة انك منهم .....

انا هههههههههههه : لا بس بحبهم اخلاقهم عالية اكتر من الراسماليين

هي : مالهم الراص ماليين

انا : الله وكيلك نازلين هز على جيبتنا

لفضيت و بعدين انا من الفقرا عمرك شفتي فقير راسمالي ؟

هي : علمانية ؟

انا : مش عارفة بس الله عندي بكون بكل اشي ما بقدر افصل و اكون بين و بين

هي : طيب ايا من ايا حزب

انا : لا ما بحب التزم بحزب -

انا بني ادمة هادا هو الحزب تبعي

لو التزمت بحزب يعني لازم افكر زيو و اكون وفية الو

بكل عمايلو و برر اخطاءوا و سامحوا

انا ما بعرف اعمل هيك -

انا معترة بحكي للاعور اعور بعينوا و ما بعرف احكي بسياسة

ما عندي ادب سياسي .

اصلي فلاحة فاهمة شو يعني فلاحة

هي : بس ميالة لشي على الاكيد

انا : يا بنتي القلب على اليسار هو مايل لحالوا شو بدك بهالحكي

تعي نشرب القهوة بردت

أرغب أو لا أرغب ---

جرت العادة سنويا على تقديم طلبات ارغب و لا ارغب في المدارس في هذه الفترة

و هذه الطلبات تعطى للمعلمات

حتى تبين ان كانت ستستمر في العمل في المدرسة او انها لا ترغب بالاستمرار

كانت الاوراق تعطى لي او لاحد الزميلات فكانت تتولى

احدنا الكتابة ارغب بقلم واحد و بخط واحد في جميع الاوراق

منا او حتى ان نستشير بعضنا ان كانت بالفعل هي رغبتنا بالبقاء او مجرد تعود

رغم الصعوبات التي تمر بنا سنويا خاصة ببداية كل عام دراسي

الا ان هذه المرة كانت مختلفة عن سابقاتها ووزعت

الاوراق بيد كل معلمة و كنت اتخذت قرارا في الفترة الماضية

انني لا ارغب في ان استمر في عملي كمعلمة لاسباب عدة

و اخذت الورقة بحماس و بابتسامة رضى

و شاركتني احدى زميلاتي بردة الفعل ذاتها

و سحبت الورقة بنفس حركة اليد التي تعبر عن سعادة

و هممنا بالكتابة و لكن قامت زميلتي و قريبتي ايضا و التي تعمل معي

بالصراخ فجأة و لانها حامل اعتقدت انها على وشك الولادة و قالت لا لا

و سحبت الاوراق منا

لم اكن اعتقد ان الاقدام على كتابة لا ارغب بسيطة

و لكن عندما طلبت رئيسة القسم منا تبريرا لقرارنا انا و زميلتي

قلت بكل بساطة الكثير من الاسباب و لم ابدي واحدة

بالفعل حاولت ان اتذرع بكمية من الاسباب و لكنها لم تكن مقنعة حتى لي ....

و وجدت ان الانسان او انا شخصيا اتخذت القرار تبعا لتراكمات ...

تراكمات و لم اتذكر منها سوى انني ضقت ذرعا بالمدرسة

و الادارة و الاسلوب التعليمي و الاستغلال و طريقة التعامل التي تغيرت تماما في القسم

كنا في السنوات السابقة نتعاون في كل شيئ

و لو قامت احدانا بعمل حصة نموذجية كنا نقف معها

و نتعاون حتى لو لم توجه كلمة شكر

لكن

في بداية هذه السنة

لاحظت ان تغيرا طرا على علاقتنا ببعضنا فما عدنا كما كنا

ووجدت نفسي لم اتغير و بقيت اساعد اي احد كالعادة دون حتى ان يطلب مني ....

حتى قالت لي احدى الزميلات قبل فترة

( على فكرة انتي هبلة عم تساعدي الكل مع انو بمشروع مسابقة الفيلم التعليمي

ما حدا ساعدك بالعكس

في كم وحدة رفعت ايدها لربها و دعت من كل قلبها انك تفشلي :0 )

انصدمت ...

و عندما قالت لي رئيسة القسم ان كل اسبابي غير منطقية

كنت اود ان ارد

عليها و ان اقول بكل ثقة ما هو العمل المنطقي التي تقومين به منذ بداية العام

سوى انك تزيدين الفرقى و المشاكل بيننا

و انك سبب رئيسي لتغير اسلوب عملنا من الفريق الواحد الى حارة كل من ايدو الو

و لكن لذت بالصمت احتراما لسنها

و ايضا لان كلامي لن يقدم و لن يؤخر شيئا

بل بالعكس سيكون له تأثير سلبي على علاقتي بها

و التي لن تستمر بالتاكيد بعد انتهاء هذا العام الدراسي

قالت هذا قدر المعلم يعني ان يكون هذا قدرنا

فقلت لها و انا اهم بحمل اغراضي لالوذ بالفرار من الاسئلة التي بدات تصيبني بالضغط

انا لا ارغب بان يكون هذا قدري

و لا ارغب

للاسف لم استطع سحب الورقة من زميلتي التي اخفتها عنا

و لكن الان

و بعد تفكير عميق قررت بانني لا ارغب بالاستمرار في قول هذا قدري ؟؟

ما هو القدر ؟؟؟ بالفعل لم اجد ابدا اجابة على هذا السؤال .

ايعرف احدا تفسيرا جيدا للقدر و يقنعني به ؟؟

لم اقدم لاي عمل جديد و لا اعرف حتى ماهية العمل الذي اود ان اعمل به

و طبعا ساحاول

ان اقرر ما سافعله فلدي فرصة جيدة لنهاية العام الدراسي

في اخذ قرار يجعل التغيير يقهر القدر الذي يتحدثون عنه

( بجد مو عارفة شو بدي اشتغل ؟؟؟؟ و لا عندي اي طموح او فكرة ؟؟؟؟ بس اكيد رح حاول )

و الله ربطة الحمار صعبة

المكان قاعة كبيرة في أحد الفنادق الضخمة

المناسبة : محاضرة لتطوير التعليم الاكتروني

الوقت : من زمان :)

هي : الفنادق الضخمة لها هيبة كبيرة - انا هون رح اعمل عرسي بعد 300 سنة

أنا : انت لاقي المسخم اللي رح يتجوزك و بعدين فكري بالفندق

هي : على رأيك .

فلاش صورة مفاجئ في نص عيني

هي : شوفي المصور شو امور شكلو مندوب عن جريدة ...........

او صحفي بشبه اسمر و الله و احلى منو . انت بتحبي الصحفيين

أنا : اسكتي بلشوا حكي ... مين أسمر؟

هي : مش عارفة اسمر وين عايشة انتي ؟ بذمتك مش لو خلوه هو يحكي احسن

أنا : هششششششششششش

فلاش تاني بقوة و بعد الوميض الابيض نظرة من المصور باتجاهنا مع ابتسامة

أنا : العمى انعميت انا

هي : مش مشكلة انعمي بعد ما تشوفي هالجمال احسن ما تنعمي على منظر قبيح

ضحكة خافتة

وقت الأسئلة

أنا : بالنسبة للمشروع المتضمن تطوير التعلمي الالكتروني

بالمنطقة اثبت فشله و سلبيته في التاثير على التلاميذ

و تم ايقافه و استبداله من بعض الدول و العودة الى الطريقة القديمة .

لماذا يجب علينا ان نجرب ما فشلت به الدول المتقدمة

على الدوام و لم لا نبدا بتجربة ما نجحوا به و لا نضطر الى

استخدام هذه التقنيات فقط لدعم بعض الشركات ؟؟؟

المنظر :::::

وجوه غاضبة و صاحب المشروع عيونو طلعوا لبرة

و انا حسيت بانتصار لاني ما بحب الاستهبال .

احد الموجهين الفنيين اشار لي بابهامه - ممتاز -

بعض الحضور نظروا الي و صاحب المشروع بعت يعرف اسمي

و لا رد على السؤال فجاة 3 فلاشات قوية بعيني كاني رح انزل الانتخابات

و اجابة ما سمعت نصها من صاحب المشروع المخنوق مني

هي : الله لا يوفقك هادا سؤال

أنا : لازم يقنعونا بالمنتج و ايجابياته

هي : بس صاحبنا ما شال عينو عنك

انتهت المحاضرة و اتجه الجمع للبوفيه

هي اسمعي بنشرب قهوة و بعدها بنروح

عيون صاحب المشروع لهلا ما فارقتني كانو بقولي سم يسمك

أنا : اسمعي انا برة بالسيارة جيبي قهوتك و تعالي

الشب الوسيم يقاطع بلطافة و بلهجة انجليزية مهجنة

Hi Im Jano - photographer from

................ newspaper . im from India

ابتسامة متبادلة

Hi

- can you translate your question to ? relly they are surprised

- هي : انا اللي اتسربزت على الاخر

و بعد الترجمة وعدنا بانو رح يبعت الصور النا على المدرسة

و بعد فترة خبرني الموجه الفني اللي ذكرتو فوق .

انو صاحب المشروع بالرغم من انو حقد علي

بس اعجب بطريقة تفكيري ووعيي بس ما قبل ترشيحي لتطبيق البرنامج

و عمل تجربة نظرية و بحث مترافق معو

شو ذكرني بالقصة

مممممممممممممم اني ما بعرف اربط الحمار يا مياسي ؟؟؟؟ صعبة

مناظرة و النتائج واضحة

قبل قليل كان هناك بث مباشر على قناة الجزيرة الفضائية

شاهدت جزءا منه و هو عبارة عن مناظرة بين طلاب ( طلااااب )

من الهند و نظرائهم من كوريا الشمالية

حول السلاح النووي و اهميته و خطورته على الدول

لفت نظري العنوان الذي جعلني أرفع الصوت

لأرى فتاة هندية في السابعة عشرة تناقش

و توضح وجهة نظرها حول انتشار السلاح النووي

و كيف يضر بمصلحة الإنسان و تدرجت الى استخدامه في الإرهاب

و الدول الراعية له و كان على ما يبدو اعتراض كوري

على ما تقوله و لكن تم مقاطعتها بكل احترام و ابداء

رأي كوري مقتضب و أكملت هي ما بدأت به دون أن يضربها

أحد و دون أن تقوم مشادة كلامية أو مقاطعة

أو ان ترى زجاجة ماء أرض جو مسددة إلى وجهها كما يحصل في برلماناتنا العربية

و هم مراهقون مجرد مراهقون تلقوا التعليم بشكل جيد و احترموا أسس النقاش و أدب الحديث

في المقابل و خلال تصفحي للموقع عمان نت وجدت هذا الخبر

في الزرقاء..شبان يقتحمون مدرسة بالسيوف

و طبعا شاركت بالاستفتاء المعروض بالاسفل عن سبب تعرض المعلمين للضرب في المدارس

و هذه الحادثة تتكرر و بشكل دوري في كثير من الدول .

و هذا يحدث اثناء قيام الكثير من الطلاب بالاعتداء على

زملائهم في الحرم المدرسي على مرأى من الادارة المدرسية

و هذه الحوادث منفصلة عما سمعناه

من فترة عن ضرب استاذ في مصر على ما اظن لطالب ضربا مبرحا ادى لموته .

و الاخذ بالاعتبار ما يدور في مدارس المناطق النائية و التي لا نسمع بما يدور فيها

ذكرتني المناظرة و الخبر باحد صديقاتي التي قالت لي فرحة منذ فترة

ان ابنها و هو يدرس باحد الجامعات قد طلب منه اقامة بريسنتيشن

حول المقارنة بين شخصيات عامة و قالت لي و كلها فرح

وهي تريني الصور ان ابنها اختار أن يقيم مناظرة بين

عمرو دياب و تامر حسني كأشهر شخصيات بالنسبة له

و بالفعل قاعة المحاضرة الممتلئة

و الأساتذة و الصور المنتشرة لأشهر شخصيتين في تاريخ هذا الصبي

منتشرة و تصفيق من الزملاء و اعجاب من قبل المحاضرة

التي بانت صف أسنانها و هي مستمتعة لانها من محبي الفنان عمرو دياب

و هنا اتوقف قليلا لاجري انا المقارنة بين عدة اشياء

1- ما يناظر حوله طلاب مراهقون في كوريا و الهند و ما اختاره طالب في السنة الاولى من دراسة الصيدلة

2- طرق التعليم عندنا و عندهم و النتائج التي يصل اليها مستوى التلاميذ الفكري

3- حال المعلم عندنا و عندهم

4- المؤسسة التعليمية ونظرتها إلى العلم والمتعليمن

5- النتائج و اظنها واضحة جدا و الفروق بين التلاميذ و اظنني لا احتاج التوضيح اكثر من ذلك

و هنا تجد بعض اللمحات البسيطة عن التعليم في كوريا و الهند

و اذا اردت ان تتعرف على كوريا اكثر اضغط هنا

هل السبب في فشل النظام التعليمي يقف عندنا على المعلم او الطالب او المؤسسة التعليمية او المجتمع او الدولة ؟

للأسف لم أتمكن من متابعة المناظرة لقطع البث و نقل كلمة لأحمدي نجاد في ذكرى الثورة الايرانية :(

و ما زلت اسمع

محاولة أخرى

التقته على باب البناية التي تجمعهما معا منذ الطفولة

كل حائط في تلك الساحة الدائرية ذات السور الرمادي

شهدت على ما كان يحصل بينهما

أو كاد أن يحصل

صعدت على السلم حتى لا تنحصر مع ذكرياتها و عبق عطره في المصعد

لن تضعف ككل مرة

لعنته في سرها و كادت أن تقذف عليه ألف قبلة تفضح شوقها له

وصلت إلى باب بيتها لاهثة فتحت الباب و

توجهت إلى الحمام لتغسل وجهها الذي أحست أنه تحول إلى وهج ساخن

قد تذوب يدها عليه إن لمسته

تجاهلت صوت أمها " إنتي وصلتي أسخنلك الاكل ؟ "

دخلت مسرعة إلى الحمام و اقفلت الباب

بدأ الماء يتدفق

و هي تنظر إليه

قررت أن تنزل و ترن جرس بابه

و ما أن يفتح الباب ستغمره و تهمس إليه أنها تحبه

تعشقه

لا تستطيع ان تعيش بدونه

تموت

لا بل ستنفجر

لا بل أكثر

و أنها لن تجعله يغضب منها أبدا

و أنها ستترك عملها الذي يرفضه في السياحة

اتجهت الى الباب و نزلت على السلالم

توقفت

لا ستقول له انها ستترك العمل عندما تجد عملا اخر

لا بل ستترك الدنيا لأجله

رنت جرس الباب

تحرك مقبض الباب و كأنه يضغط على قلبها بيديه

فتح الباب

عقدت يديها خلف ظهرها و رفعت رأسها

.

.

.

قالت بصوت يعلو و ينخفض

" ماما عندكم ما لقيت حدا فقلت اكيد عم تشرب القهوة مع خالتو ؟ او تركت المفتاح عندكم ؟".....

و ما ان فتح فمه ليتحدث

أتى صوت أمها من الطابق العلوي

يا بنتي وين رحتي سخنتلك الاكل - ليش فاتحة المي ؟ انت وين رحتي

قالت " شكرا أزعجتكم ماما ...و انا ما... و ........

هو : بس ما بدك تحكي شي تاني ؟

هي : شكرا

و ركضت مسرعة على السلالم حتى تنسى ابتسامته الخبيثة السعيدة ال............

تذكرت انها نسيت ان تغلق الباب و ان توقف سيلان المياه و نسيت ما كانت تود قوله

فقط تذكرت كم تحبه

هو اغلق الباب و في سره " زي ما بدك عاندي بس وين بدك تروحي مني ؟"

مِلــــــــــــــــــــــــــــــــحْ

مدت يدها بهدوء و على استحياء منه

عانق أناملها بتأني

غمرها

اقتربت منه أكثر

بدأت حرارة تتغلغل فيها

قبضت يدها و أحست أن شيئا يتسلل من بين أصابعها خلسة

فتحت كفها

فما وجدت إلا بعض الطين يختنق بين التجاعيد المرسومة بعناية في باطن كفها الأيمن

تناولت عصاتها المرتكزة على كتفها

كأنها تشهد عليها و على حماقاتها

تواسيها أم تلعنها

لا فرق

و تشد على رمل تتسرب حباته تباعا من بين أصباعها و ملح مــُر

كما هو العمر و كما هو الوقت

تعلـََقت برفيقة العقد الخامس من العمر

اتكأت عليها و مشت

و التفت إلى البحر لتسأله

ألـــــــَن يأتــــــــــي ؟؟؟؟؟؟؟

____________

( الصورة للبحر الميت في الاردن )

مستشرق من طول كرم

تاثرا على ما قد رايته من صفاقة وجه

بعض الشخصيات التي تقبع في معقل رام الله

متحصنة بالامن الاسرائيلي و بعض المرتزقة

ارجو ان تعذروني على ما ساقوله الان

" يعني هاي سلطة رام الله اكيد خرفت او صاير فيها شي

- لا مش لهالدرجة الوقاحة يا عمي صاروا بلا حيا بالمرة من بعد ضربة غزة ما عادوا استحوا .

اي ورقة توت سقطت هدول اتعروا على الاخر و مبسوطين بفضايحهم . تعقيبا على سلام فياض

يا اخي علمي انك من طول كرم مش من باريس

و معاصر للقضية يعني حسستني انك جاي على البلد

من بعد اوسلو بشي خمس سنين و هالفلسطيني

خدعوك و انت هلا المصلح للوضع .

ما هو لما بتحضر مؤتمر قومي امني يهودي ما بكون هادا فخر

او حب لا هادا اعلان انو نحنا مقاطعة تابعة للدولة الاسرائيلية اليهودية

يا فياض

و بس الاختلاف انو رح نكون دولة منزوعة القيم و الاخلاق

و الارض و السلاح و عايشين متل ما بدها اسرائيل و على هوى نتنياهو و خلافه "

ما عاد هناك اي حس وطني يا اخي بلاش مشان اهل غزة

مشان الاسرى تبعونكم و الشهدا

و الاطفال و الحواجز و الا انت جاي من برة مو عارف باللي بصير

قال بيريز عنه :" فياض البن غوريوني الأول للفلسطينيين "

بكفي هيك و بكفي تشبيهك ب ... بن غوريون

هامش - على فكرة ماما من طول كرم يعني ما تزعلوا مني انا بحبها كتير و كان مجرد تعبير -

ليلة ضحكت بها ثم استمر البكاء

في ظل الزخم الاعلامي الذي تزخر به قنواتنا الاعلامية و المقابلات اللا حصرية مع فنانينا العرب الذين لا يتورعون بكل مناسبة الا و يذكرون اسم الرب شاكرين له نعمة تعريهم و اعطائهم الفرصة الذهبية للانحطاط بالذوق العام و غيره من الاعلامين المتعصبين و الذين ينقصهم الكثير للظهور على الشاشة الفضية التي تسكن كل بيت و يكونون جزءا احيانا من يوميات بعض الاسر فتخيل الجيل الذي سينشا تباعا من نشرات الاخبار و النشرات الفنية و اعلاميين اغلبهم يفتقدون للادب الاعلامي و فنانين .... بلا ما نحكي

كل هذا ادى الى مقاطعتي للتلفاز و لم ينقص من عمري شييء لكن بالامس و مع تقليب القنوات سمعت صوت منى الشاذلي و التي احترمها كاعلامية تستطيع مشاهدتها دون ان تحس بالغثيان و لفت نظري الرجل الجالس بجانبها و هو الاعلامي محمود سعد

و المقابلة مع من ؟؟؟؟

مع الدكتور احمد زويل العالم المصري العربي الحاصل

على جائزة نوبل في الكيمياء

لن اتكلم كثيرا عن انجازات هذا العالم الذي تستطيع التعرف عليه بمجرد

وضع اسمه بالعربية او باي لغة في محرك البحث جوجل

و الذي يستطيع اخبارك عنه افضل مني و من خربشاتي البسيطة

امام قدره الذي جعلني مستمتعة لاكثر من ثلاث ساعات و انا اشاهده

بالفعل هذا نموذج العالم الذي يجب ان نقتدي به

من المعتاد في افلامنا العربية القديمة و الحديثة

هي ذم العلماء و المدرسين و جعلهم ناس مسخرة

و التقليل من قيمتهم و شأنهم بمناسبة و بدون مناسبة

و لذلك الاثر الكبير على اجيال ترى ان الحرامي و السارق

يكون بطل و ذو خفة ظل و حبيب لدرجة كبير

و المدرس و العالم هو المسخرة

و الشخصية الدنيئة التي يضحك منها الجميع

و كالعادة تعتقد ان العالم هو انسان منكوش الشعر

و عبوس الوجه و ذو بدلة مرتقة او كاروهات و نظارة

و شكل يوحي بان الشيطان سيخرج من جنباته قريبا

كنت اتمنى ان يرى الجميع مثال العالم الحقيقي بمتابعة

برامج تستقبلهم و تتحدث عنهم و عن حياتهم

و احلامهم ببساطة كما حصل بالامس في قناة دريم

ما او د طرحه لو كنت تشاهد فنانا عربيا خارجا للتو من

وضع لا اعيبه و ادت سخافة البعض الى نجاح فيلمه لسبب او لاخر

لشعرت انه سينفجر غرورا و مدحا و ثقة

او سياسيا عربيا يصرخ و يردح لمجرد انتقاده و انتقلت لتشاهد

ذلك العالم الجالس على كرسي مقابل للمذيعة

يتحدث بتواضع و يضحك و يتحدث بروية عن احلامه

و كيف وأدت في وطننا العربي و كيف اثرت في خارجه

كان اللقاء مبكيا و مضحكا حقا انها تراجيديا عربية من الطراز الاول او كوميديا سوداء لا بل اكثر

انصح الجميع بمشاهدة المقابلة

و لنتعلم من جديد كيف نحترم العلماء

و كيف نقدرهم

حتى لو تعرضوا للضغوط او للاهانة او للطرد باسلوب مؤدب و غيره الكثير

و كيف نستطيع في عالمنا العربي ان ننتج عالما

و نصدره بصدر رحب الى الخارج

و عندما يود ان ينقل علمه و خبراته الى بلادنا ننفيه باسلوب بيروقراطي حقير

كنت اتمنى ان انقل لكم المقابلة و لكن للاسف سرعة تحميل الفيديو عندي بطيئة جدا

لكنني بحثت عنها ووجدتها

هنا الجزء 1

و هنا الجزء 2

و هنا الجزء 3

المقابلة طويلة لكنني لا اعتقد انك ستشعر بها

و من الملاحظات التي استوقفتني كثيرا ان اداء منى الشاذلي القوي كان على غير عادته في حضور هذا العالم و عندما تركز قليلا تجد انها تحاول استدراج هذا العالم بحياء للحديث بصراحة ولكنها لم تنجح

و خلال المقابلة ستجد اتصالات تلفونية تميز بها بلال فضل و علاء الاسواني ككتاب و صحفيين اعجب بهم

و ما ذكرته منى الشاذلي عن مقابلة الرئيس اردوغان للعالم و عدم السماح للسفير الامريكي بالتواجد

ستضحك كثيرا

ثم تبكي

و عذرا للاطالة

للتقليل من الخيانة فقط

هي : انا حامل

انا : مبروك لكن مش استعجلت شوي . ابنك ما كمل السنة و نص

هي : هيك احسن ورا بعض بتربوا مرة وحدة

انا : اسم الله صار عندك اربعة و هادا الخامس و انتي عارفة الدنيا و الغلا و قصص الاقامة

و المدارس و انت بطلت تشتغلي و الاهم انك عم تهلكي جسمك و كل ولد مش عم ياخد حقو منيح

هي : لا هيك احسن خليه يبطل يبصبص و يتطلع برة

انا : ؟؟؟؟؟؟؟ زوجك ؟؟؟

هي : اه

انا : بس هاي مش طريقة يعني قصة اربطيه بالاولاد صارت قديمة شوفي شو اللي ناقصه

هي: ناقصه عقل و دين

انا : و انت راضية

هي: شو بدي اعمل هيني بحاول

انا : لا انت بتخلفي مش بتحاولي و هاي مش طريقة و.....

هي : الله يخليكي بلا حكي كتب و تلفزيونات بدي اخليه ما يعرف يرفع راسو

بعد فترة من الزمن و بوقت قياسي و بعد الطفل السادس

انا : هلا ما عاد يطًلع لبرة

هي : خف عن زمان صار بس مع وحدة انا عارفتها كويس

- يعني خفف خيانته و صار .. مرة بالاسبوع انا هيك حاسة

انا : ممتاز الله معك و للعاشر بكون انهد حيله (و بسري حكيت :و حيلك و حيل المجتمع معاه )

اجازة الربيع

اليوم رسميا بدأت اجازة منتصف العام الدراسي .

ما كنت يوم متحمسة لاجازة زي هلا

دائما قبل اي اجازة حتى لو لمدة يومين كنت اعمل مخطط و مشروع

و برنامج و قصص بس لهاي الاجازة طعم اخر

عن جد كنت محتاجة لاجازة لاعيد ترتيب اوراقي لعدة اشياء منها

اتعلم طرق جديدة بالتعليم و وسائل احدث و ترتيب علاقتي بالعمل و بالغير

اكتشفت اخر فترة اني انسانة مدمنة عمل

اذا كنت عم تشتغل 24على 24 و بتحس حالك مقصر ؟؟؟؟؟

اذا بتنام 4 ساعات بس في اليوم و يتحس انك ضيعت وقت بالنوم لانو في شغل اهم منو

و لما تنام تحلم في الشغل او بنتائج المسابقات او حتى بالتصليح ؟؟؟

اذا كنت عم تركض بالشغل و مش ملحق و كل مرة بتكون دايس و حاسس حالك عم تفوت بالحيط ؟؟؟؟

عم تأجل كل علاقاتك الشخصية لتخلص الشغل

و الشغل ما عم يخلص و تخسر اصحابك و علاقاتك

و تبطل تشوف اهلك اللي انت ساكن معهم بنفس البيت

و لتعرف اخبار اختك او اخوك لازم تتصل فيهم لانك ما فضيت تحكيهم

و انت معهم في البيت لانك متسمر قدام الكمبيوتر ؟؟؟؟

و انو اذا خلص مرحلة الضغط بالشغل بتحس بفراغ و انك بدك اي شي لتشتغلوا ؟؟؟؟

اي شي بس ما تقعد فاضي ؟

اعرف انك مدمن شغل و انك قربت من حالة الانهيار

و انك رح تحس بملل و وحدة

و يمكن تتطور الامر معك لتوصل لاكتئاب و مرض نفسي

و لهيك ما خططت لاي شي بهاي الاجازة و حابة انها تمضى ببديهية - لمدة اسبوعين لا غير

يعني كيف ببديهية ؟؟؟

يعني اصحى الصبح اشرب القهوة و اسمع فيروز و اروح امشي على البحر و العصر اقرا كتاب و غيروا

بدون خطط و اقعد مع ماما و نثرثر و ننم شوي

و ممكن اضيف للخطط اني اتفرج على التلفزيون

بس بعد هوسة الكرة ما تخلص و يمكن سينما

و يمكن و يمكن ........................

افتتحت الاجازة بقراءة ثالثة ليوميات الحزن العادي - محمود درويش

و رح روح شوف لي كتاب بالمكتبة - مشتاقة للقراءة بشكل مو طبيعي

اذا بتنصحوني بشي كتاب ما عندي مانع :)

هامش : على فكرة يا رفيق لهلا ما نزل عنا الكتاب - تخيل ؟؟؟؟صرت لافة اغلب مكتبات البلد و ما في الو اي اثر و ممكن ادخل مكتبة و ما يعرفوا اسم درويش ؟؟

تخيل اني لهلا ما قراتوا

وحتى على النت لاني بحب درويش على الورق لانو بكون اقرب و بتكون ذاكرتي اقوى على الورق