من اول ما صار استخدام الانترنت للعامة في المحلات و حتى البيوت و انا انترنتية مجتهدة .
صار استخدامه شي من اساسيات الحياة لدرجة انو نسيت كيف كانت الحياة قبله . او حتى ما بتصورها
و مع تطور الشبكات الاجتماعية و صفحات الفيس بوك
تطورت فجاة اللغة لدينا
يعني ممكن لغة شات او عامية و صرنا نحكي و نعبر كل واحد بطريقته
مثل ما هلا انا بكتب بلغة عامية " بحتة تقريبا " مع انو كنت بفضل اعرض الموضوع بلغة عربية فصحة لكن
" لغاية في نفس يعقوب " حبيت اكتب بالعامية
من اكتر الاشياء اللي بتستفزني لهلا في قراءة بعض المكتوب او التعليقات
هي الاملاء . مش اخطاء في الطباعة . الكل بصير معو اخطاء لكن اخطاء املائية بجد .
يعني يا جماعة بكون الشب او البنت خريجين جامعات و معتدين برايهم لكن لما تقرا الكلمات اللي بكتبوها بتحس انهم خريجين ابتدائي و هاي ظاهرة منتشرة
يعني يا عالم كلمة لـــــــــــــــــــــكـــــــــــــــــــن من ايمتى صارت لاكن
. يعني ما اخدوها بالابتدائي . طيب ما قراوها باي ورقة مكتوبة . مستحيل ؟
طيب شوفوا الباقي :
الله يرحميك يا فلانة . الكسرة صارت مد بالياء
و غيروا كتير بغض النظر عن الجمع اللي بجمعوه و المثنى اللي بستخدموه
كلو تشوه
و شو بالنسبة للصبية اللي بتكتب تعليق بشي صفحة متل
" الحئيئة لازم تضهر او تزهر " ؟
يا حبيبة قلبي لما تكوني ناعمة و امورة لازم كمان يصاحب هادا الشي شوية ادب لغوي يعني مش مهم نعرف انك بنت مدنية مش فلاحة و مش ضروري تبيني هادا الموضوع بطريقة تخليكي سخيفة
لما تكتبي تعليق بجريدة او بشي صفحة الناس يا حبيبتي بتقرا اللي بعقلك مش بتشوف طريقة حكيك لتخطبك ..
او الصبايا الحلوين الناعمين اللي بكتبوا " سحلئت لانو البلات كان مي :( ( الترجمة " زحلقت الاخت لانو البلاط كان مي :) )
. او سبايا وين رايحين اليوم ؟ هاي غلتة عمري
انا اسفة صبايا بس انا بعتبر اللي بتكتب بهيك طريقة اما بتكون مصطنعة و عندها نقص او بيكون عندها شي بالنطق و السمع و لازم تتعالج
ممكن على فكرة انو وحدة تحكي بهاي الطريقة كتير حروف بتسقط منا بدون وعي لكن انو تنكتب هيك . هاي أُميــَــــة
و الشباب قدام البنات لازم يبينوا انهم " عضل " و هيك قصص
فالجملة هيك بتصير
" صطحي عالي "
او مثلا " انا ما بنصى " يعني ما بينسى :)
يعني عمو عرفنا انك قوي و عضل و قصص متل هيك بس على فكرة حرف السين مش للبنات فقط :)
و غير انو القاف بتصير كاف و (غ) بتصير (ق)
و التاء المربوطة و التاء المفتوحة " تاء التانيث " الهم قصة تانية . و من هاي القصص
فلانة زوجت فلان . و امرت فرعون . و هاي أمثلة بسيطة على اللي بشوفه
اما اللام القمرية و الشمسية انطفى ضوهم الاتنين يعني
اشمس بدل الشمس - اطيب بدل الطيب و في منه كتير
و غير الناس اللي مو عارفة تعبر بجملة مفيدة و بتكتب 100 سطر . ..... بس بدون فايدة الفكرة ما بتوصل
ارحموا اللغة
و ارحموني
انا مش معلمة لغة عربية بس هي الطريقة في كتابة الاحرف بتعملي تلوث بصري
كل الامم تعتز بلغتها . الا نحنا بنحاول نشوه اي شيئ جميل فينا . و لازم نهتم بهادا الشي . مش عارفة كيف ؟؟؟؟للاسف
يعني لو كم فكرة نجمعها و ننشرها بصفحاتنامممممم ممكن ؟
او حدا بيخترعلنا برنامج للتصحيح اللغوي و يكون بيشتغل في كل الصفحات و البرنامج زي اللي على word ( بس مصيبة لو المخترع بيكون صيني )
مش عارفة بس حاسة انو الموضوع بيتطور لدرجة انو في ناس ما بفهم شو بدها
و بالنهاية .... بس توضيح صغير : حبيت اكتب بالعامية عن الموضوع حتى ابين انو نحنا فينا نتحاشى الاخطاء الاملائية حتى لو استخدمنا لهجاتنا العامية .
هامش 1: يمكن الموضوع يكون بنظرك سخيف او ما بدو هالضجة . بس وقتها اعمل حسابك انو لو ضل الوضع هيك و تطور اكتر . رح تطلب مترجم يترجم كلام ابنك الك . :) هادا اذا ضل حدا بحكي بالعربي ؟؟؟
هامش 2 : عندي مشكلة مع الهمزات ما عم تطلع عندي فسامحوني
هامش 3 : بما انو نحنا في ايام مغفرة فالله يغفرلنا كلنا.
و اغفرولي اذا كان في اخطاء املائية و يا ريت تنبهوني الها :)