السبت، أكتوبر 17، 2009

يوميات مدرسية - من وحل انفلونزا الخنازير

طبعا مع بداية السنة الدراسية و الكل ما الو سيرة غير انفلونزا الخنازير و اختلفت الاراء بين مؤيد و معارض لتاجيل الدراسة و مع اني كنت من المؤيدين و المعارضين و لا حل وسط لهذا الموضوع ضرب المسؤولين كل المطالب بتاجيل الدراسة عرض اكبر حائط يضرب به المواطن راسه دوما مع ارتفاع الاسعار و ضيق اليد و اخرها القضايا العربية المعلقة
المهم لفيت راسي اثر الضربة و ابتدات الدراسة . المشكلة مش هون و لا ببداية الدراسة يعني مستوى التعليم المنخفض و مستوى التلاميذ المزري بجميع المواد لا يسمح بتاجيل الدراسة . بصراحة كل مرة بشعر باحباط لما بطلع بهادا الجيل . مش كلهم بس الاغلبية و رح نحكي بهادا الموضوع بشكل مطول بعدين
المهم
بدات الدراسة بعمل احتياطات و غرفة عزل و بعض التعليمات اللي لازم المدرسة تتبعها للحد من انتشار المرض خاصة انو التعامل بكون اصعب مع الصغار بوجود حالات مثل مرضى ربو و قلب و مدرسات حوامل و غيره . من التعلميات الغير منطقية و اللي ضرب بها ايضا عرض الحائط ( الحائط نفسو اللي فوق ) انو الممرضة الوحيدة بالمدرسة تقيس حرارة التلاميذ اللي عددهم 1500 تلميذ في مدرسة طويلة و عريضة - طبعا مش منطقي لانو رح يخلص الدوام و الممرضة ما قاست حرارة كل التلاميذ .
داوم التلاميذ و طبعا بتعرف اي واحد منهم اهلو مهتمين او لا . متلا تلميذ لابس كمامة و لما ياكل بلبس جلفز و بستخدم المعقم و صابونة خاصة الو اذا دخل التواليت و تلميذ تاني مشان اهلو يسكتوا عاطينوا كريم للاقدام و اقنعوا انو هادا معقم بس انقلع من وجهنا و داوم
و تلميذ اخر صارت مهمتوا الاساسية هو سرقة المعقمات و كمامات التلاميذ . و طبعا بعد يومين صارت الكمامات تستخدم كمقلاعة للاعين و الاذن و المعقمات كجل للشعر ( الطلاب بعملوا سبايكي فيها )
هلا للصراحة انا استفدت من موضوع التعقيم و المعقمات يعني ريحة الصفوف صارت لطيفة و كمان الطلاب و ببدا حصتي بطلب تعقيم الايدي و الادراج و فتح الشبابيك . و مع هيك بلشت الاشاعات تنتشر و طلعت مش شائعات
اصيبت مدرسة حامل بالشهر الخامس بالمرض و نقلت العدوى لزوجها و ابنها ( بعمر السنتين) و الكم تتخيلوا هاي المدرسة كم فصل فاتت و كم تلميذ اقتربت منو . و بدات الحالات تظهر بشكل تدريجي و غياب التلاميذ صار ملحوظ و انا لهلا بمارس طقوس التعقيم و ما بلبس كمامة لانو مو معقول تشرح درس للصف الثالث و انت لابسها . يادوب هم مركزين
الادهى من هيك التكتم الفظيع اللي بتعملوا ادارة المدرسة و كل ولي امر بسالهم بقولوا ما ظهرت عنا ولا حالة طيب بس احكوا لاولياء الامور اللي عندهم اولاد مريضين بالقلب و الربو . بس مش اكتر ( انا بصراحة اللي بسالني بحكيلوا ما بكدب بولا خبرية لاني مو ناقصة اتحمل خطايا )


هادا موقف المدرسة اللي بتعتبر الطلاب سلعة او تجارة - احيانا بطّلع بالطلاب و خاصة الصف الاول و هم حاضنين بعض و بلعبوا و بتخيلهم عبوات تجارية . عن جد هيك بعتبروهم مش اكتر . ناس بتدفع فلوس و اقساط و خلص مش مهم عاشوا ماتوا مرضوا . و تخيل شو بصير بنفسيتي لما افكر بهالموضوع


في طالب داوم و معوا حالة اشتباه و قعد بالصف و درس 4 حصص و لما الممرضة فضيت و قرات التقرير الطبي ركضت للصف و طلعتوا وسط تكتم شديد بس لانها نمامة و بتحب تستعرض عضلاتها عرفنا كلنا . و لما استدعت ولي الامر جاوب بكل بساطة


- اي هي حالة اشتباه يعني احرم ابني من التعليم مشان اشتباه و عطيتوا انطيبيوطك و شربتوا كاسة برتقان و هيو مثل الحمار بركض


ما رح اعلق ابدا على موضوع ولي الامر هادا مع انو نوعية الطلاب اللي عنا بالمدرسة على الفرازة ( المادية ) فقط يعني اغلبهم اولاد دكاترة و مهندسين و غيروا بس طبعا اكيد الفرز المادي تخللوا بعض العشوائيين اللي ما بفرقوا بين الالف و كوز الدرة
هلا كل ما بنحكي عن الدوام و المدارس بطلع واحد متحذلق وبهز بحالوا بحكي ما كل الدول داوموا يعني انتوا احسن من الغرب
لا يا سيدي هم احسن منا لانهم عندهم توعية بمدارسهم و بكفي انو ثقافة البوس و التحضين مش منتشرة بينهم زي عنا و حالة اغلب المدارس هناك افضل من حالة المدارس عنا . عدد الاولاد بالصفوف بكفي لينتشر الف مرض مش مرض واحد
مش كل شي نقارن فيه بينا و بين الغرب . المدرس هناك ما بياخد اكتر من 3 حصص باليوم انا شخصيا بشتغل 6 و مو فاضية لانتبه لولد حرارتوا مرتفعة و تاني وجهوا دبلان و لو انتبهت ببعتوا للممرضة اللي غالبا بتكون مشغولة بالف شي فوق راسها
انا قارنت بين طلاب المدارس العربية و غيرها الاجنبية
الطفل هناك ما بشيل الكمامة وبمسح فيها درجه و برجع يلبسها و الطفل هناك مو بيحضن و ببوس لا بالمدرسة و لا باصحابوا يعني نوعية التوعية بالمدارس الاجنبية افضل فبلا ما نضلنا ننكر و نحاول نحسن امورنا و توعية اطفالنا و طبعا قبل هيك نوعي حالنا


يعني ما فيها شي لو مسكت نشرة عن المرض و قراتوا من غير ما تردد حكي سمعتوا من مذيع ( المرض هادا مفتعل و ما بخوف ) لا يا سيدي بخوف و اي مرض بتعرض الو الاطفال بخوف و لازم نراقب اطفالنا او ما في داعي تغلب حالك و تخلف و تقرفنا بعدها



مش معصبة بس حاسة باني ........... لهلا مو عارفة

هناك 15 تعليقًا:

SyrianGavroche يقول...

كثرة اللغط و العلاك المصدي بخصوص هالمرض صارت مشكلة, للأسف ما عنا وثيقة شرف إعلامية تفرض أسس توعوية بخصوص بعض الأمور مثل الصحة العامة و ما تسمح باستخدام هالأمور من أجل اللعب بها..

و الجزيرة و نظريات المؤامرة أبلغ مثال.. مو معقول انو ينسمح باستخدام أكبر منبر صحفي عربي من أجل نشر اللغظ و نظريات المؤامرة و زيادة ضياع المواطن العربي فوق مانو خلقة ضايع بهالخصوص..

مؤسف جداً

تحية

همسة يقول...

بتعرفي .. مشغولة كتير و صارلي فترة مش متابعة حتى مدونتي .. لما شفت هالبوست ما قدرت إلا اقرأو للأخر و ارد ..لأنو يااااه شو اجا الجرح !
انا معلمة كمان و هالشوفات هيي الروتين اليومي تبعي D:
فرق انو احنا ما عنا ممرضة واعتقد انو مسؤولة اللجنة الصحية هيي معلمة علوم (اقرب شي لقوه !)
بس تقريبا في وعي عند الاهل وعند الطلاب يعني الكمامات والمعقمات و كل دقيقة ونص بالزبط بتطلع البنت تغسل ايديها .. انا عفكرة صرت لما اسمع كلمة مس يصيبني انهيار عصبي من ورا مس بدي اروح اغسل ايدي :(
انما ما في تكتم ولا شي الادارة متعاملة مع الوضع باسلوب كتير راقي و المديرة عنا كتير فهمانة وهاد بسهل الموضوع كتير

اه كل هاد ومشغولة قولي منيح ما انا فاضية ! D:

تحياتي جفرا :)

Sofftheme يقول...

بصراحة الطرح رائع جدا .....
****
أرفض المساس بتراثنا العربي "التحضين و البوس" و أعتبر ذلك هجمة ثقافية غربية سنقف في وجهها موقفا صلباً
****
يا ست جفرا لو عطلوا المدارس يوم أو تنين شو راح يصير في النهاية؟ ..في الأردن و السعودية عطلوا شي أسبوع و بنابلس عطلوا يومين ...بعد هيك اكتشفوا انه هاد مش حل
****
أنا أتفق معكِ أن الوضع الصحي سيء بالمدارس العربية, و كذلك الأداري

نسأل الله صلاح أحوالنا...قولي آمين.

لبنــــــــــى يقول...

ياسين : اذا لاحظت انو اغلب اللي عم يحكوا هم عالم مش مختصة او بيعفوا بشكل سطحي عن المرض
المشكلة انو الاستهانة بالمرض كبرت اكتر من الخوف منو
و هاي مشكلة . انا قرات عن تاثيراته على السيدات الحوامل و الاطفال المرضى بامراض الجهاز التنفسي و عضلات القلب و لقيت انو الموضوع مو سهل
يعني هدول اطفال ما بتتحكم بافعالهم
و صارت حالات وفاة بتاكد هاي التقارير
بس متل ما قلتلك بتعاملوا معانا على اساس سلعة قابلة للتلف و تعوض بارخص الاسعار

تحية

همسة : اهلا زميلة المهنة . عم لاحظ انك غبتي الك فترة
يا ستي لا احنا عنا المدرسة عم تكذب على العالم و تحكي ما في حالات
و الاطفال زهقوا من قصص التعقيم مع انو ماشيين معي تمام بس مو بكل الحصص و مع كل المدرسات
ابقي ديري بالك على حالك :)
و احكي قد ما بدك ولو يا همسة
تحية

ثائر المعترض دوما
لا يا سيدي ثقافة التحضين و التبويس مو من عنا ما بعرف من وين جايه بس اتاكد انها مو عربية و لا اسلامية
هو من الافضل انو المدارس بين كل فترة و فترة تسكر اسبوع واحد بكفي للتعقيم و اللي معو شي ببين هاي خطوة كويسة
انا ما بحب التهويل بس بخاف على الاطفال لانهم مو واعيين و برائتهم بتخليهم يهونوا كل شي
و اكيد مو الحل انو نسكر المدارس
لا بس لازم يكون في توعية اكبر بكتير من هيك
تحية

ماء تشرين يقول...

نو كمنت ياجيفارا لانى مدرسه ومش هحكيلك على البيحصل عندنا عشان متتصدميش ربنا يستر بجد لانو اعتقد انو الوقت الصعب هيكون وقت الشتا ربنا يستر

عَوسَجْ يقول...

..

يا عيني على فوائد الحصار

لو هالفايروس زلمة يفوت غزة لشوف !


طرح جميل

Whisper يقول...

عنا نفس الشي
كل مدرسه اكتشفو فيها كم من حاله و تكتمو عالموضوع ولكن في كل مدرسه في نمّام بيطلع الخبر لبرّه

الموضوع بده شوي تنسيق و اداره للاسف الكل بفتقدلها

ما في توعيه عن المرض بشكل كافي و حتى اللقاح المنتظر, قبل ما يوصل للدول العربيه بدا الحكي عن صلاحيته و عن مخاطره, وكله تناقل حكي من الغرب...

NasEr يقول...

هاد وين الحكي ؟ بالأردن ؟ ملكيش غير تكتبي تقرير صحفي يا عمي ، الصراحة أنا ملاحظ إنو نشرات الأخبار بطلت تحكي إنفلونزا خنازير كتير ، صارو يحكو فايروس إتش ون إن ون ، يمكن عشان هالولد المسخمط اللي بنصاب بالمرض ما يصير عندو عقده نفسية و أهلو ما يخبو الموضوع !
ملاحظة : ما بدك تغيري الخط المايل هاد :((((((((((((( و الله بحول الواحد

Che يقول...

كأنك بتحكى اللى بيحصل عندنا بالظبط ... مع الاختلاف انى زهقت انى اسمع اى حاجه حوالين الموضوع ده

لبنــــــــــى يقول...

ماء تشرين : شكلو اغلب المدونات زميلات مهنة :)

الله يعينك و يعينا

It's me:
حتى هادا ما رح يسترجي يدخل عندكم بخاف ما يطلعوا بعد هيك من المعبر و ينطر متل اللي ناطرين


ويسبر : التنسيق و الادارة ممممممم انت شكلك نسيتي مديرك بس اتطلعي فيه و اعرفي اداراتنا شو هي

ناصر : لا الحكي مو بالاردن و لكن الموضوع ما بيختلف كتير
بدك معلم جريئ يكتب من وحل الواقع عندكم

che :
و الله كلنا زهقنا من الموضوع
بس بتذكروا كل ما اشوف الصف الاول
كتير بشفق عليهم

حسام كراسنه يقول...

الحمد لله ما انا استاذ، والله يكون بعونك وبعون المدرسين، بدون انفلونزا مش خلصانين :)
بكل خلاصة أي مشروع بحاجة إلى تنظيم أو تغيير في بعض العادات بالاردن هو مشروع فاشل. بدك المسؤولين يقنعو الشعب، واذا اقتنع كيف بده يتقبل الموضوع، واذا تقبل كيف بده يوصله لابنه...!
أي تغيير ولو جزئي يعتبر مصيبة.
"أحلى شي العطلة، مرة بالصف الخامس دغمت، أعطاني الدكتور اسبوع اجازة، بعد ما داومت لقيت الصف كله غايب "دغموا"" :)
الله يمرر هالمصيبة ع خير

Sofftheme يقول...

بومبات مدرسة صارت شهريات مدرسة......خلصي حطي بوست جديد!!!

لبنــــــــــى يقول...

ثائر حلوة هاي شهريات مدرسة :)

مهندس مصري بيحب مصر يقول...

يمكنك قراءة ما كتبته مدرسة مصرية في مدونتها عن نفس الموضوع
http://bohaelsabah.blogspot.com/2009/10/blog-post.html

لبنــــــــــى يقول...

مهندس مصري : قراته بس الفرق انو نحنا الاهتمام كان معدوم حتى بالطلبة
تصدق حتى غرفة العزل من اول ما عملوها ما فتحوها و لا مرة و الممرضة ما عندها مقياس حرارة عدل و هي ممرضة وحدة ل 1500 طالب
الوضع عم يزداد سوء عنا بالمدرسة و و عم يزداد معو التعتيم و قلة الوعي
الله يعينا
و متل ما حكت لو متنا نحنا المدرسين بلاقوا الف غيرنا
المشكلة انو نرجع نفهم مصطلح بني ادمين بس بمعنى جديد
و كالعادة نورت :)