الخميس، يناير 21، 2010

في حظيرة الرب.............. تيوس


كانت جيني صديقتي تستمع الى احد التراتيل في طريقنا الى الجامعة و كانت ايام صوم
انا شخصيا لم اكن اركز بالكلمات او التراتيل . على الاغلب كانت تعجبني الالحان و الاصوات التي تشدو الى ان تصل بي الى حالة روحانية و راحة نفسية
التفتت جيني الي ذات يوم و هي تقول بصوت متردد : بتعرفي انا بكره لما يحكوا حظيرة الرب . بحس انو نحنا خراف او شي ما بحبوا
الله خلقنا بني ادمين ليش بنحاول نكون مو بني ادمين

مشكلة جني انها مقتنعة بس ما بتقدر تناقش بهاي الامور بعلانية

وصلنا للجامعة و على الباب كانت في وحدة عجوز واقفة على جنب الباب و عم تطلب فلوس بادب من الرايح و الجاي يعني تسول شحادة ايا يكن

فجاة اقترب منها امن الجامعة و مع رمشة عين كانت على الارض

التفتت لجني و قلتلها احنا كتير علينا كلمة خراف الرب

احنا تيوس الرب


بس بعد كل هالوقت

و بعد اللي صار

بحب احكيلك ( ولو اني متاكدة انك ما رح تقراي بس يمكن شي يوم توصلك )
المشكلة مش باللفظ او الايمان
المشكلة انو نحنا اصلا مش خراف الرب
احنا يا صديقتي التيوس - اللي خلقها الرب
مع احترامي للكل


ليش عم بحكي هيك ؟

اسمع نشرة الاخبار

و رح تفهم



ويل للذي يكون عثرة لأخيه، فخير له أن يضع حجر الرحى في عنقه ويرمي بنفسه بالبحر"
( المسيح عيسى ابن مريم عليه السلام )

هناك تعليقان (2):

Gabriel يقول...

كيفك جفرا
بعد زمان

برأي القصة مالها علاقة بالرب
لا تيوس ولا غنم ولا شي
القصة كلها بطريقة التطور الفكري اللي وصلتله مجتمعات المنطقة

ممكن المرأة هي تتعامل كضحية بحاجة لرعاية وممكن تتعامل كشخص نكرة ( متل ما صار بالحادثة )

نحن منبقى نحن
بس المجتمع بيعملنا بشر أو تيوس أو حيوانات أخرى

ع الهامش :
لسع عم تفوتي من لابتوب ( إعاة أسريّة ) او مشي حال حامل الفايروسات بتاعك ?

jafra يقول...

هلا غابي كيفك
يعني فينا نقول تغير فكري مش تطور
الا اذا غيروا معنى مصطلح التطور بغيابي
يمكن عم اكتب بلا تركيز لاوضح الفكرة
انا متاكدة من انو هاي التصرفات ما الها علاقة بالرب او الانبيا او حتى الدين
صعب ربط افكار سامية بتصرفات حيوانية
بس ردة فعنا عليها غريبة
ربط المصطلحات بيعود احيانا لاسلوب او نمط حكي معين يعني متلا انا مش من النوع اللي بسكت كتير على اي شي او بمرق القصص بسلام لكن هالايام صايرة مرق
و لما اكون هيك بحس اني بمر بمرحلة ارنبة ( تشبيها بالارانب )

لهلا بعتمد على الاعانة العائلية لتصحلي فرصة و مر على اقرب شركة مضمونة تقدر تتخلص من الفيروسات و صلح الوضع
نوَرت