الاثنين، يناير 18، 2010

قلة المسؤولية أحلى :)

ياااااه ما احلى الشعور بعدم الارتباط و المسؤولية
يعني هلا ما في تحضير او وسائل او تصحيح او علامات
او افلاممممممم
هلا فهمت كلمة مشغول . و انو ما بقدر اتواصل بالتلفون لانو مجرد الحكي بالتلفون رح يضيع من وقتي و يخلي الشغل يتراكم
عن جد قلة المسؤولية ححلوة خاصة بهاي الفترة من السنة فترة اختبارات الفصل الدراسي الاول
اليوم كان اختبار الفصل الاول لمادة العلوم اللي انا بدرسها للصف الخامس الابتدائي و من نص ساعة خلصت التصحيح و بعد 14 ساعة دوام متواصل اول شي عملتوا اني فتحت لاب توب مستعار من احد افراد الاسرة الكريمة لانو الاب توب تبعي لهلا بيشتكي من اثار عاصفة الفيروسات اللي كان ببها الفيلم التعليمي
بمناسبة الفيلم التعليمي
طبعا ما كان في وقت لاوج راسكم فيه بس هلا انا بقدر و بعد اذنكم اني اوجع راسكم
المسابقة بتخص الصف الثالث الابتدائي ضمن اي موضوع من مواضيع المنهج و تم الاتفاق على عمل فيلم عن الدينوصورات و سبب انقراضها و التصوير في المتحف و المدرسة و اضافة كم فيلم ملطوش من النت خلص لكن بعد ما اعديت النصو الترتيبات الاولية فجأة اتصلت بمشرفة المادة لاخبرها انو الموضوع متشعب و عادي جدا و ما بنقدر نتعمق فيه كتير لانو عقل الطلاب اللي عمرهم 9 سنين ما رح يتمكن من حصر كل المعلومات و تطبيقها المهم قررت بدكتاتوية اني اغير الموضوع و قعدت ليلة كاملو و انا عم اتصفح الكتاب لفجاة فتحت صفحة البراكين و صرت اتخيل شو ممكن يحكوا الطلاب و كيف رح يطبقوا و اماكن التصوير و على الساعة 5 الصبح كان النص و الاعداد و الصور و المصادر جاهزة و لبست و رحت على الدوام و شرحت الفكرة وتم اللموافقة عليها بمضضضض شديد
و اخترت الطلاب و دربتهم و بدانا بالتصوير اللي بيتضمن بيئات متعددة منها مكتبة المدرسة اللي لازم نصور فيها الباحث الصغير و هو بيقرا كتاب عن البراكين و حصة كاملة و انا عم فتش على مفتاح المكتبة اللي المفروض تكون مفتوحة دائما و بعد ما لقيناه مرمي باحد الادراج نزلت بهمة عالية على السرداب و مشيت مسافة طويلة لحدد ما وصلت للمكتبة اللي بجوار مسجد المكتبة ( ساعتها اول مرة بعرف انو عنا مسجد ) و كبير و مرتب
المهم فتحت باب المكتبر الضخمة اللي رفوفها مبينة عالية و لاقيت مصيبة ....................
المكتبة مهجورة و مش مفتوحة من شي سنة . و الكتب كلها قصص للاطفال سخيفة و مجانية و بلا معني الا بعض الكتب الدينية اللي ما بتناسب الابتدائي و غبرة و ما في طاولات
اذا مكتبة المدرسة هيك
ليش بنلوم الاولاد انو ما عندهم طريقة و لا اسلوب ليعبوا فيه عن اجاباتهم
المهم
رتبت المكتبر و ناديت موظفة النظافة اللي نظفت و رصيت كتب جبتها من البيت و موسوعات علمية مستعارة لتكون خلفية مناسبة و بدا التصوير / و انتهى في مختبر الحاسوب و قدمت الفيلم التعليمي و ان شاء الله طمنتني الموجهة انو لهلا و بعد مقابلة التلاميذ نحنا المرشحين للمركز الاول
لكن بالفعل
شو بنستنى من جيل كامل ربي بدون قراءة
بدون اطلاع
بدون ما يعرف ادب القراءة و احترام المكتبة
لما كنت صغيرة و في سنهم كان عنا ساعة قراءة حرة و كنت بشتاق لهاي الساعة الاسبوعية واستناها بشوق كبير
كانت يوم الثلاثاء بعد الحصة الرابعة
كنت اختار دايما سلسة قصص اطارها اخضر اقراها و بعدين اقوم و احكي ملخص القصة قدام الطلاب و المدرسة و اسمع ملخص القصص اللي قراوها باقي الطلاب .
و في المرحلة الثانوية كانت المكتبر قريبة من صفنا و كنت اهرب من بعض الحصص بس لاقعد اقرا فيها و لما تسالني امينة المكتبة عن الحصة اللي علي ارد عليها بثقة حصة دين و طبعا كانوا يسمحوا للمسيحيين انهم يجلسوا بالمكتبة وقت حصص التربية الاسلامية
انا ما كنت اكدب الا بنوعية الحصة اللي غالبا ما تكون اقتصاد منزلي و تعليم الطبخ
و امينة المكتبة تصدق
و نسمحلي باني اقضي ساعة الا ربع بصلاة في حرم الحروف و لاجلها :)
بجد زعلت كتير على طلاب مدرستنا اللي بيقدوا لمتعة الجلوس بالمكتبة و القراءة
و اظن انها رح تكون خسارة كبيرة الهم مش للكتب
بكفي وجع راس لليوم
بس بجد اشتقتلكم

هناك 9 تعليقات:

ميسم يقول...

يعطيكي العافيه :)
بس انشالله تكون الاداره ئدرت ئيمة الشغل لأنه في عالم جد مابتئدر

jafra يقول...

هلا ميسم كيفك ؟
هلا لو بدنا نستنا تقدير الادارات العربية النا ما رح نشتغل
بتعرفي احلى شي كان فرحة الطلاب و قوتهم اللي عن جد استغربتها انا شخصيا

نورت :)

ميسم يقول...

هلأ يعني هو أكيد بس كنت عم بحكي من منطلق الجهد المبذول
بتعرفي شو الأطفال عندهم قوى كامنه وقدره كبيره عالعطاء مابعرف اذا سمعتي عن مبادرة كتابي كتابك لانشاء مكتبه بكل مخيم فلسطيني في مجموعه من الأطفال بالمخيم عالرغم من محدودية الموارد كان عندهم معرفه وعطاء مذهل وأذهلونا أثناء التحضير للمكتبه ويوم الافتتاح بمخيم غزه بجرش

Whisper يقول...

الله يعطيكي العافيه يا رب
انا فكرتك بالاجازه لساتكم مداومين!!!

يلاا هانت

انا شخصيا بكره التدريس كتير وخصوصا بعد تجربه تدريس بكليه ما صدقت اخلص منها, لكن انت و اسماء- Sim Sim- و مروى بحسكم ما شاء الله عليكم كتير مناسبين للتدريس, و عندكم طوله بال و اخلاص المفروض يكون موجود عند المدرسين بشكل عام

موفقه يا قمر :)

Yazid يقول...

فعلا أنا لما كنت زغير كنت أستتفه كل كتاب بهالمكتبة يلي عنا,
حبيت فكرة الفيلم , وما بيصير نستخف بعقل الولد الصغير لإنه ها هي الشغلات يلي بتنمي عقله و بتخلي يبدع :)
يعطيكي العافية :)))

mohra يقول...

رغم كل شيئ...اسلوبك التربوى متميز..يا ريت يكون باقى المدرسين عندكم كده برضه

jafra يقول...

يزيد : المفروض تكون في حلول و نساهم فيها
بس بصراحة مش عارفة كيف
بلكن بتخطرلنا فكرة و تقدر نعمل شي يساعد هالجيل

مهرة : طبعا مش كلنا بس صدقي الاغلبية لو اخدوا فرصتهم و توفرت الهم ظروف مناسبة رح يكونوا احسن مني بكتير

تحية

Yazid يقول...

أنا بشجع مثلا فكرة التعليم الموسيقي للولاد الزغار يلي ما بيعرفو إشي عن الموسيقى كلها مع العلم إنه الدراسات أثبتت إنه الولاد الزغار يلي بيتعلمو على آلات موسيقية و همه زغار كثير بيرفع من مستوى ذكائهم :)

jafra يقول...

يزيد : في المناهج الجديدة خاصة للصفوف الاولى بيبدا الفصل من كل وحدة باغنية او انشودة و لاحظت انو الاولاد بحفظهوها و برددوها لكن زي العادة صار في خلاف حول الموسيقى و الغناء و الحلال و الحرام و اللي انت عارفه
بصراحة الموسيقى اكيد بتنمي اشيا كتير بكفي الذق الفني و حسن الاصغاء و التاني
و هادا شي حلو بس لازم يصير في تربية موسيقية للكبار بالاول قبل الصغار
و انت شايف الذوق الفني العربي لوين واصل
و شي حلو انهم يتعلموا الموسيقى بس هادا الشي ما بيغني عن القراءة كل منهم الو اهميتوا