حوار بين نون النسوة في مقهى خارج اطار المونديال
نون : هلا لنحكي عن جد لايمتى بدك تضلي هيك هي : مالني ؟
نون : يعني عزابية و بلا ارتباط يعني لتكوني مرتبطة و نحنا ما بنعرف
رشفة قهوة . نفثت دخانها
هي : لا يا ستي و اذا بدي ارتبط ليش ما بدي احكي ؟؟
نون : هلا و لا بعمرك ارتبطي ؟
هي : ارتبطت و انتي عارفة بمين ليش بتسالي
نون : بدي اوصل لشي
هي : و الله كنت عارفة.... اساليني دغري بلا لف و لا دوران
نون : هلا كل هالحب و العشرة كل هالسنين .. وين راح و ليش ما كملتوا ؟
هي : نصيب .... معك ولاعة و لاعتي بطلت تشتغل شكلو بدها غاز
نون تناولها ولاعة محترمة و طقطقة الولاعة لم تنسي نون ما تريد ان تعرفه
نون : طيب و بعد النصيب و هالقصص ... شو السبب
هي بخباثة و ضحكة جانبية لئيمة : القدر نون تلوح بيدها و كانها تقول لها التالي التالي : و بعد القدر و النصيب شو السبب الاساسي
هي : يا ستي طلب مني اني اوقف تدخين
نون : مش هو اللي كان يجيبلك الدخان من السوق السودا و بسعر ارخص
هي : اها
نون : و شو خطر على بالوا ؟
هي : عنت على بالوا الزلومية و بلشت المشاكل بعدها ...
نون : طيب بس انتي كنتي بتحبيه كتير هيك انا بعرف .... ليش ما بطلتي مشانوا كنتي حاولي
هي : ما انا ابديت استعدادي بس نوقف دخان مع بعض يعني انا و هو
نون : هلا هو شو دخلوا دخيلك ؟ هادا رجال
هي : ليش حبيبتي هو الدخان بسرطن بس البنات ؟ و بضرنا لحالنا شوفي يا ستي الدخان و الزنا و شرب المي متل بعض ما فيها شي اسمو رجال و مرة - يعني اللي بضروا بضرني و اللي بعيبوا بعيبني و اللي بيحتاجوا انا كمان بحتاجوا هي ما فيها رجال و مرة
نون : بس العالم مو هيك بتفكر
هي : لو فكرنا كيف العالم بتفكر لكنا اصلا ما ارتبطنا انا و هو من الاساس .... المبدأ واحد ..
نون : هادا تفكيري انا و انتي بس مش كل العالم
هي : و الله هادا اللي اجاه
نون : اكيد زعلتي لما افترقتوا بتذكر كانت حالتك صعبة بس ما طولتي
هي : بنص الاسبوع ماتت القطة اللي كنت مربيتها
نون : اه بتذكر
هي : فالتهيت بالزعل على القطة و نسيت موضوعوا
نون : يا سلام ليش يعني ؟
هي : القطة كانت بتحبني متل ما انا بعيوبي و بسيجارتي
و ما الها شروط لتعيش معي هو بلش يتفصحن و يحط شروط بعد 4 سنين
.......مين اللي بعادوا بزعل اكتر برايك ؟
نون : القطة طبعا .. ما بتعرفي عنو اخبار ؟
هي : اكيد
نون : شو ؟؟ احكي
هي : مرتوا كانت حردانة الاسبوع الماضي
نون : يا ويلي عليكي كيف عرفتي
هي ما هو اتزوج بنت ..........................................
و لم يبقى من القصة الا بقايا بن يلف الفنجان و دخان بدأ يتلاشى
هناك 26 تعليقًا:
مش بأحب التدخين سواء للرجالة او الستات
لكن ليه يرتبطوا بدون علاقة رسمية ( خطوبة ) ؟
اهلا باشمهندس
بالزبط يعني مش رجال من حقو و ست مش من حقها
و ست من حقها و رجال مش من حقوا
في بعض الناس او الجنسيات ما بقبلوا بالخطوبة الا بكتب كتاب على طول
و يرتبطوا بدون علاقة رسمية
ظروف يا هندسة ما تدقش
تحية
كيف التحضيرات ؟ بتمنى تتوفق فيها للنهاية
و تكون سلسة و بدون مطبات :)
هلأ مشكلتنا الكبيره باللي بنتعامل معهم وبنحب افكارهم وشخصياتهم فجأه بتطلع كلها قشور واللي جوا زي ما هو من 3000 سنه...
انا مابحب الدخان لا للست ولا للرجال,بس اللي بكرهو اكتر هو ان حد معجب بكل شي بخصني فجأه يصير بدو يغير اشياء اساسيه فيي
ويسبر :
و اللي بزيد الطين بلة اذا كان هو
( هي ) كلو عيوب مش قادر يشوفها او يعترف فيها
كوني بخير دوما :)
البنت زي الولد...على راي الست سعاد :)
هو الضرر للجميع ولازم تبطل يا ريت
اما نظره الرجل فده اوضاع مجتمع بقا للاسف
تحياتي
كتيييير حبيتها جد
شوفي يا ستي مره وحده خالتي بتعرفها قالتلها كلمتين من واقع تجربتها دايمن بيرنوا في بالي:
قال الرجال قبل ما تتجوزيه بيكون معجب بشخصيتك القويه بكل ما فيها وبعد هيك بيصير بيعمل جهدو يقضي على هالشخصيه
وسلامه فهمك طبعا انتي والسيجاره:)
فتاة من الصعيد : انا كتير بحب هاي الغنية من و انا صغيرة
بالفعل هو المجتمع احيانا بيحكم بس دخيلك مين اللي غير بالمجتمعات و العادات مش برده الافراد
القصة مش قصة سيجارة
القصة قصة مبدا :)))
جفرا يا جفرا
انو مش عارفه شو أعلق
بس حبيت احكي اني كنت هون
عاسيجاره...........
أل حب أل
بس بلاشششش........
مياسي كيف الاجازة القصرية معك ؟
يا ستي قبل فترة حضرت عرس شب كان شرطوا الاساسي انو يتزوج وحدة محجبة و ما بتدخن و بتشتغل
طلعت بالصدفة بعرف العروس
و معرفة كويسة
طلعت بتدخن و تركت الشغل بعد الزواج و اظن انها على طريق خلع الحجاب بعد تغيير كامل لنمط اللبس اللي عم تلبسوا
و بعرف قصة قديمة لرجال امو جبرتوا يتزوج بنت عمو المتوفي و كانت صغيرة و مش مكملة تعليمها مش الثانوي بس لا المتوسط و هو خريج الجامعة الامريكية و كان يحب زميلتو في الجامعة و بتشتغل معو
ما ضرب كف بكف و اتدهورت حالتو بالعكس خلى بنت عمو تكمل تعليمها و الجامعي لاخدت الماستر
و صارت تحكي انجليزي و فرنسي و اولادهم صاروا هلا بالجامعة الامريكية على وجه التحديد و بموت بمرته و بحبها كتير و بصرح بعفوية قدام الكل انو عمل جهدوا و هي ما قصرت ليكونوا مع بعض و يضلوا
القصة بتعتمد على شخصية الرجال و البنت و محيطهم و مستواهم الثقافي و طريقة تعاملهم مع الواقع
القصة مش زواج ديليفري و كلو جاهز و بعدها بتبلش المشاكل
القصة انو الزواج بيعتمد على تقبل الطرفين للحياة و اقبالهم عليها
انا بتمنى اني الاقي شخص الو حب للحياة و اقبل و ثقة بالتغيير زي الرجال اللي حول مرتوا من قروية ما بتعرف العصاية من كوز الدرة لانسانة مثقفة و متعلمة و اولادها بيفخروا فيها اكتر من ابوهم
مش رجال متل ما صار مع ( هي ) بعد 4 سنين علاقة و حب و قصص
صار وقت الجد
و بدو تغيير بلا مقابل
هادا رايي الشخصي
يا دليي و عم تقولي اني ما بحكي كتير :))
يا لهوي!!!
راده علي 3 مرات يعني بتحكي اوفر!!
بس انو عادي هاد حكي مسلي يا بنتي انا اتسليت بهالقصتين:)
والاجازه القصريه قربت تخلص على فكره، لانو الحمدلله لقيت وظيفه تانيه ورح ابلش دوام قريبا
والله يستر
ويا حياتي كلنا بنتمنى متل هاد الشخص اللي بيفهم
والله الفهم صاير عزيز هاليومين!!
مياسي شايفة على هالرد و عم حاول اشيلهم مش زابط معي :)))
بتمنالك التوفيق
و اكيد رح تخبرينا عنك
بس ما تطولي
كوني بخير
ميسم : شايفة على هالحب شايفة
هادا لو لقيها مع ارجيلة شو بعمل ؟
اشطبيهم من السله:)
ان شالله ما بطول، بتعرفي التدوين طلع بس للاجازات :) ايام الدوام انسي
عن جد غباء الكتروني صايبني :)))
تصدقي الي ساعة عم دور على السلة هلا لشفتا
لا يا ستي نحنا بنشتقلك لهيك
خصصي وقت للتدوين و حاولي
ما ظل كلام بعد التعليقات الوافية :)
بس جد حروفك قوية كالعادة!
و على قولتك... بلاش تدقيق كثير ... بنخلصش بعدين :(
هيثم
شكرا الك و حروفي عم تشكرك كمان :)
نورت كالعادة
"
هي : ليش حبيبتي هو الدخان بسرطن بس البنات ؟ و بضرنا لحالنا شوفي يا ستي الدخان و الزنا و شرب المي متل بعض ما فيها شي اسمو رجال و مرة - يعني اللي بضروا بضرني و اللي بعيبوا بعيبني و اللي بيحتاجوا انا كمان بحتاجوا هي ما فيها رجال و مرة
"
قوية قوية
مع انها منطقية بس ما حدا راضي فيها ولا حتى مقتنع بصحتها !!
مع انها ابسط من 1 + 1 = 2
بس غريب وضع العالم وقت بعد كل هلمعايير بيرفضوا تسمية المجتمع الذكوري وبيرفضوا المطالبة بالأجزاء والقيم والمعايير اللي عم تشجع على التفرقة بين الجنسين وتعاملن بطرق مختلفة خصوصا بما يتعلق بقضايا الشرف والحاجات الجسدية !
جابرييل : مش كل الاشيا المنطقية مقنعة بهاي الايام :)
المجتمع الو معياروا لهاي الامور
و الحكومات الها معيارها حسب توجهها و بهاي الايام كل شوي في توجه مختلف
لا المجتمع حابب يفكر و لا الحكومات
و هينا عايشين
عمار يا بلد
أتساءل ان كنتي تنتمين لبرج القوس
فأهم صفاتهم البحث عن الحرية!!
على كل .. المساواة بين الرجل والمرأة أمر غير ممكن
اما التوازن فهو الاساس بينهما
أظنك قد فهمتني :)
تحياتي
أنا متخلف شوي وشرقي بضم الشر لهيك رح دافع عن الرجل الشرقي بشرقية شرسة:
أنو إظهار الرجل الشرقي على أنو تور عنيد أمر غلط وفيه اجحاف (منين اجت معي هالكلمة) هلأ هو تور بس قلبو طيب كتير يعني هي لازم قالتلو تكرم عيونك يا حبيب قلبي ويا أحلى شبوبية وهو كان رح ينبسط ويضيفها سيكارة ع السريع... بدها عم نفس بس مو فرويد الأزعر :)
احمد : كيفك ؟
لا يت سيدي انا برج الحمل مش القوس
براي البسيط
انو الحرية اداة ووسيلة الكل بتمنى يمتلكها لتحقيق غرض ما و يسير حياتوا على اسس معينة و مع انو الحرية ما بتتجزا الا انو في جزء خاص بالحرية الاجتماعية انا مكتفية فيها و بحسها عم تساعدني و حتى اطرها اللي احيانا بتزعجني في الغالب بتكون في صالحي
يعني ما بعاني من مشكلة الحرية
اما المساواة فانا بفكر فيها باطار معين خارج عن الاطر الاعلامية الهشة
يعني بقول انو الحكم على السارق و السارقة و الزاني و الزانية و الجاسوس و الجاسوسة واحد
لانو الفعل الاجرامي واحد ؟ و اذية المجتمع فيها واحد
لكن تقولي انو المراة المدخنة ( كمثال ) هي شذوذ اجتماعي و الرجل المدخن طبيعي ؟؟؟ معلش
شو الفرق
؟
يعني التدخين بلوث و بضر الكل يعني شو الاطار الاجتماعي اللي ممكن ينكسر بتدخين المراة ؟
يا سيدي انا ما بطالب بحقوق تبغية و دخانية للمراة اظن انو مشاكل المراة اكبر من هيك و بتتوازن مع مشاكل الطفل و الرجل و العجوز و العجوزة و كل اطياف المجتمع عنا
نحنا بنقصنا حقوق
و بس نولها
ساعتها بنطالب بالمساواة
كنان : يعني طلعتوني مجحفة للرجل الشرقي
دخييلك شو فرق وضع الرجل عن المراة بهالايام
ما كلنا ماكلينها
و يا سيدي شو عرفك انو شرقي بلكن اللي بتحبوا الماني او فرنسي ؟
يعني هاي قصة ممكن تصير باي مكان مو بس عنا
كانت معي موظفة المانية بتخبي باكيت السجاير عن جوزها و ما بتروحوا معها على البيت :))))
يعني القصة مش قصة عرب و شرقيين
بس على هيك افهم من حكيك انو الرجال الشرقي ما بحب الدغري
بحب ينضحك عليه
يا سيدي بنعيش و بنتعلم
هاي نصيحة منيحة
يبدو انك مافهمتني بالمرة !!
على كل المساواة من النواحي اللي ذكرتيها ممكنة وانا اوفقك عليها وبشدة .. العقاب بهيك شغلات واحد .. والدين أصلا ما فرق بيناتهم بهالاشي .. بس فرق بأدوار تانية بالحياة لكل واحد .. وهاد من باب الموازنة .. ربنا مثلاً خص المرأة بميزة الحياة .. انها بتقدر توهب الحياة -طبعا بمشيئة الله- لاطفالها
وما بصير انه نساوي الرجل بالمرأة بهاي القصة
بس وازنه بقضايا تانية تناسبه
ولولا هيك
كان خلقنا ربنا كلنا من جنس واحد
وليه التنوع من اصله اذا ال2 متساويين بكل اشي
تقبلي تحياتي :)
احمد مسا الخير
يا سيدي شكلي كنت متعصبة شوي
من رسالة وقحة وصلتني على الايميل
بس انا باكد اني فهمتك من اول مرة و تاكدت من رايك من تفصيلك بتاني مرة
بس انا و اياك متفقين بموضوع المساواة و التكامل الاجتماعي
و الحكي عنها هون ما بكفي
شكرا لوجودك
طبعا بيحب ينضحك عليه ليش هي عيب؟ لأ هيك زعلتيني منك لكان ليش عايش متل الكلب والحكومات بترميلو عظام..
إرسال تعليق