الأحد، يوليو 04، 2010

شو الجديد ؟

( افتحي الباب فما زلت واقفة .. .... انا من هناك )

مش عارفة شو مشكلة العالم لما بعرفوا انو اللي قدامهم فلسطيني ؟

هو في شي صار و انا مش منتبهة ؟

شو الجديد ؟

ما احنا من زمان كتير موجودين ليش كل يوم بتطلع نقرة

ما بكفينا السلطة و غيرها و حصار و هدم و تهجير و قصص بتعل

الكل بحاول يفهمني انو نحنا مشكلة العالم

طيب انا عندي حل للعالم كلو

:

:

:

:

:

انتحروا

احنا رح نضل موجودين

منيح هيك طلعوني عنصرية باخر هالليل

( الصورة لوديع خالد - رسم على القماش مش عارفة من وين جبتها )

هناك 13 تعليقًا:

أشرف محيي الدين يقول...

مرحبا جفرا

معك حق بس يا ترى شو السبب ؟ وهل هذه النظرة للفلسطيني هي من إخوانه العرب فقط ؟ أعتقد أن العديد من دول الغرب أصبحت تنظر بعين المحبة والاحترام للفلسطيني أكثر من دول عربية عديدة .

كل الود

Ahmad M. Al-Mahrouq يقول...

قمة العنصرية

لكن احييكي

Whisper يقول...

يعني فشيتي قلبهم و ازعجوكي

هدول الناس بدك تتعاملي معهم بكل برود اعصاب ولا يهمك....الجهل ما شاء الله منتشر فبدك تستوعبي هالشي :)

لبنــــــــــى يقول...

مسا الخير
اشرف - احمد - ويسبر
رح احكي عنه بالتفصيل بس لاخلص من كم نقطة للتوضيح و البحث و القراءة لاكون بس متاكدة من المعلومات و يكون الها مرجع او مصدر

ويسبر انا مش زعلانة
بس مستغربة
او اني كنت بغيبوبة و انا مش عارفة :$

غير معرف يقول...

الجبناء فقط هم من يستفزهم الشجعان

تحياتي

لبنــــــــــى يقول...

مش عارفة مين الشجعان او الجبناء
و ما في استفزاز
هو سؤال
هل بالفعل صاير شي جديد و انا مش عارفة ؟
يعني ممكن افوت اشياء كتيرة تكونوا انتبهتوا عليها و انا لا

رح احكي بالتفصيل

nawar يقول...

ليس هناك من جديد صديقتي ، نحن شعوب تحب أن تتسلى باكل لحمها فقط ... لنها ليست تجد شيئاً ىخر لتأكله ... هو زمن الجوع !
آسف لتطفلي ... " على اعتبار اني لست فلسطينياً كما يراني بعض الفلسطينين ... " سوري ما خصًوا

Rita يقول...

"يقولون أن علينا أن نغلق ملف القضية الفلسطينية، وان نحلها كما يريدون لنا أن نحلها، وأقول لهم أن كنتم تعبتم ففارقونا!"
- ناجي العلي.

مبدأيا هاد الاقتباس بيكفي.
ناطرة تفصيلك :)

قط البكتريا يقول...

هو نظرا لحشاشية الموضوع بحب اعطي وجهة نظري بنقطتين

الاولي

الموضوع ببساطه انو الانظمة شكلت فكرة بوعي الشعوب انو سبب المصايب والتخلف القضية الفلسطينية والفلسطينين

النقطة الثانية ( محدش يفهمها تكبر )
انو الفلسطيني رغم حرمانو وتشردو الا انو اكثر الشعوب ثقافة وتعليم وابداع وديمقراطيه ( مع كراهيتي للديمقراطية ) ,
وحتي السلطه الي بنحكي عنها خاينة وحرامية اكثر شفافية من كل الانظمة العربيه


قط البكتريا يعود الي السبات الصيفي ... انتهى الارسال

Unknown يقول...

والله يا حبيبتي
الناس بدهم يخلصوا من الهم الفلسطيني

فالحل انو يخلصو من الفلسطيني
وسلامة فهمك ياللي قلبك عالشمال

صح هاديك المره خطرلي سؤال:
"انتي ما بتنزلي عالاردن بالمره؟"

ما خطرلك شي يوم تيجي تزوري اربد؟:)

nawar يقول...

عندي مبدأ بالحياة أن صاحب القضية هو الأولى بها فإن قرر ان يدافع عنها فإني و الله معه ، و إن قرر أن يتخاذل فلست ملكياً أكثر منه ، و لكني لن أصفق له ، و سأنحاز لمن يتمسك بحقه و لو كان شخصاً واحداً ، و ليس يحق لي التنظير و أنا أجلس في غرفتي مسترخياً و هناك من يستشهدون ...
التفاصيل مملة أحياناً و لا أعتقد أنها تخدم قضيتنا بأي حال !
تحية ود

لبنــــــــــى يقول...

نوار ما ترد على هالحكي
القضية الفلسطينية متشعبة و بتخص الكل
و الحكي هون مش بس على الفلسطيني
لا ممكن يكون بكرا على اي حدا


ريتا بكفي الاقتباس و زيادة
الله يرحم ناجي العلي اللي متلو هادا وقتهم :)


قط البكتيريا بنعرف السبات شتوي معك صيفت :))


مياسي اشتقت كتير للاردن و اربد لكن للاسف من زمان ما نزلت
بس اكيد اذا في زيارة رح خبرك :)


نوار : في بعض القضايا بتكون مصيرية و مصيرية بحدة خاصة لدول الجوار
فاذا كان الحكم و الراي ملكي فما بلوم وقتها اي شي بيعملوا عباس بس ما يبقى حدا يقول اسرائيل خطر علينا بسبب فلان و علتان

ياسين السويحة | Yassin Swehat يقول...

الدول العربية بشكل عام صارت عبارة عن ثنائيات كراهية متبادلة فقط من أجل ترسيخ هوية معيّنة (يعني صار المصري مصري لأنو يكره الجزائري, اللبناني صار لبناني لأنو يكره السوري.. الخ), و أحياناً الفلسطينيين يصيرو متل البديل الشامل, مافي أسهل من لوم الفلسطينيين على حال العرب المزري