الأحد، يوليو 25، 2010

في البدء . كانت التفاحة . و الان ........





غيرة من الغيرة





امتد نظرها الى البحر الازرق الواسع و هي تنتظر صديقتها



هي : تاخرت علي كتير



الاخرى : زحمة على الدائري الخامس مش عارفة ليش ؟ شكلو حادث



هي : الله يستر . ليش ما لبستي الفستان الزهري اللي اشتريتيه كان بدي اشوفو عليكي



الاخرى : ما خلاني قال شو ضيق و قصير



هي : طيب فيه خير الرجال بغار عليكي مش زي اللي عندي شكلو كبرت على الغيرة و ما عاد يسالني شو لابسة ووين رايحة



الاخرى : اريحلك عاطيكي حريتك و مش مقيدة بنوع واحد من اللبس . و بنضحك عليكي بكلمة بغار عليكي



هي : بس بتعرفي احيانا بشتهي يقولي لا ما تلبسي هيك او شي يبين غيرتوا علي شكلي ختيرت بعيونوا



الاخرى : كان فضحتيه



و ضحكات امتزجت مع صوت البحر


........................................................



حريات



دخلت الى بيتها و اتجهت مباشرة الى جهاز الحاسوب . نظرة سريعة على الرسائل الواردة و فتحت مدونتها ذات اللون الابيض الناصع و ابتسمت " انت احلى شي " و دخلت الى المطبخ لتعد فنجان القهوة . يباغتها " هو " بالعودة مبكرا الى المنزل



هو : سلام . اعملي حسابي بالقهوة



هي: مبكر بالرجعة خير



هو يتجه الى شاشة الحاسوب و تبدأ عينيه بتتبع الكلمات المكتوبة و يمسك بالفأرة " ماوس " و يبدأ بتحريكها و ملامح وجهه تدل على تعجب - اندهاش - ابتسامة مقتضبة - لاااااااااااا تنطلق منه بصوت مرتفع



هي : مالك حبيبي ؟



هو : شو هاد



هي بارتباك من فعلت جرما ابيض اللون و لكنه جرم



" المبادئ لا تتجزأ "



هي : مدوووو ... نة بتعرف شي عن المدونات ؟



هو: لا يا عمري ممكن تقوليلي ؟



هي بدات بالشرح و الاسهاب و شبهتها بصحيفة شخصية تكتب ما يخطر ببالها و هناك من يقرا و يعلق



هو : و هاي الصفحة بقراها العالم و بتفرجوا عليها ؟



هي : يعني اللي بحبوا يقروا المدونات بس



هو : بس . في مرة محترمة بتكتب خصوصياتها و بتخلي العالم يقراها يعني مشاكلنا . اخبار ولادنا . و شعر حب كمان



هي : ما هو كلوا فيك . كل الشعر الك .



هو : لا يا شيخة اكتبيه كمان لغيري ..........



هي : اسمع ( بحدة انثى تبدا بالفحيح الذي يسبق العاصفة ) بكل بساطة هاي مساحة حرية الي و ما اظن انها بتهينك او بتقلل من قيمتك



هو : لما يكون الموضوع خاص فيكي لحالك . و ما الك زلمة . اعملي اللي بدك اياه



هي : انت الك حساب بالفيس بوك و كمان الك في تويتر عمري اعترضت



هو : على شو تعترضي ........ اسمعي من الاخر استري على حالك و علينا و سيبك من هالافكار و بعدين مين فلان و علتان اللي معلقين و باعتيلهم ابتسامات



هي: و من فلانة و علتانة اللي بتحكي معهم على الفيس بوك - على الاقل احنا ما بنعرف بعض شخصيا و يمكن يمروا من جنبي بس ما يعرفوني



هو : اسمعي هاي القصة منتهية . شيليها - الغيها - اعملي اللي بدك اياه و الا بتكوني طالق



هي في سرها تلعن غيرة الرجال الحمقاء



هو بسره النسوان ما بينعطوا عين قال مدونة و مساحة حرية و بصوت عال



هو : اذا حبيتي تكتبي عني شعر حب و غزل ما في مانع اكتبيه على ورقة و اقرايلي اياها و انا بعلق ................



( انا " للرجال فقط ) : بصراحة ماذا تفعل ان اكتشفت ان لزوجتك مدونة . لخطيبتك . لصاحبتك . او انها كشفت لك عن مدونتها ؟)



..........................................................



فيس بوكي اصيل



هو : تعي شوفي مين عملي اضافة ( add ) على الفيس بوك



هي : هاي مين



هو : زميلتي من ايام الجامعة و بتقولي انو الولاد طالعين حلويين علي



هي : طيب حطلي صورة و بنشوف شو بتقول



هو : لا و الله ما اخف دمك صايرة



هي : اشمعنى حاطط صورك كلها و صور الولاد يعني انا وين



هو : ما احلاني و انا حاطط صورتك و مخلي اللي رايح و اللي جاي يتفرج



هي : حلو . يعني هلا مش كلهم عارفين اني مرتك و بشوفوني معك ؟ و الا خايف تصدم الصبايا بجمالي ؟ او مش قد المقام و بشعة و خايف يعايروك فيي . يعني ليش انا مش مرئية و اسمي دايما ام الولاد . هاي هي انا . بس ام الولاد



هو : لا و الك اسم تاني . العيلة و الحرمة . اسمعي حبيبتي بس يصير اسمي جوني او طوني بحطلك الصور اللي بدك اياهم



هي : ان شاء الله



هو : شو ؟؟؟؟؟؟؟؟؟؟؟؟



هي : تقلب طوني او جوني لاشوف شو بدك تعمل . يمكن يصير الي اسم - او اسمع اشطب اكاونتك و هيك بنكون متعادلين لا انا و لا انت مرئيين



هو في سره ... بشطبك انتي اسهل - قال اشطب اكاونتي - دخيلك شو خفة الدم هاي - انا الحق علي اللي معبرك و عاملك قيمة و بحكيلك عن اكاونتي ...شوف شو بدها ؟ . منيح اصلا اني بجيب سيرتك في الفيس بوك اصلا ؟



هو : قومي من جنبي خليني اشوف المطعم تبعي و الاكل و احصد الفيليج تبعتي يمكن خرب من لتك



و عجنك ,,,,,,,,,,,,,

هناك 11 تعليقًا:

sheeshany يقول...

جفرا... أكيد بكامل القوى العقلية؟ :]]]]
جد رهيب
تعرفي شو... مبارح كنت عم بسمع لبرنامج على الإذاعة - بعمان، كان الموضوع عن الفيس بوك - حوار مفتوح.
استمر لساعة و شوي...

تعرفي إنو كل إشي حكيتيه انذكر و بتفاصيل "مخزية" و محرجة كمان.

أنا بصراحة ما كنت متخيل إنو لهالدرجة.

حسابي أنا شطبتو من 2008 ، حسيت إنو جد تضييع وقت و ما كنت مستفيد منو.

اللي بدو يلاقيني يدور علي بغير الفيس بوك
و بصراحة صار في شوية مشاكل بالبيت + بين بعض أفراد العائلة من ورا الصور و التعليقات و ... و...

بالنسبة إذا زوجتي -أو أي حدا بيهمني أمره- عنده مشاركات على برامج مثل الفيس بوك أو غيرها فأنا ما بحط حدود من شاكلة (...و إلا ...) بس بحاول أشرح شو مضاره و سلبياته بالإضافة للسلبيات. هل حأراقب من طرف خفي؟ إذا الشخص صغير بالعمر -ذكرا ً أم أنثى- بالبداية يمكن أسأل و أستفسر بس مو من ورا ظهره/ا ، و أصلا ً بكون متفق على ذلك معه/ا مسبقا ً.

بالنسبة لشخص مثل زوجتي ، بصراحة -كشرقي الدم :]- حأغار إذا لقيت تعليق مثلا ً بس أنا بثق بحكم زوجتي و بعرف إنها ليست ساذجة و على فكرة هيه عندها حساب و مو مقتنعة بإلغائه.

آسف إذا حكيت كثير عن أشياء بالخصوص على حساب العموم.

لو إنك كنت تسمعي البرنامج و حكيته رأيك على الهوا، جد كان شيء جيد!

أشرف محيي الدين يقول...

مرحبا جفرا

صدقا لا أملك إلا أن أقول أنك أبدعت الغوص في دواخل عقد العقول العربية بهذا الأسلوب الرائع :)

كل الود

قط البكتريا يقول...

افهم من القصه انو صرتي خبيرة فيس بوك , مطعم ةفليج وسمك ؟؟

مالكم دابين على القصص يعني بس افهم انا مين الي نكش هل فايروس فيكم ... وينك يا مستغماني تشوووووفي
وييييييييينك , عشان تعرفي انو فيه مواهب مكنونة

اقتبسات مع بعض الاضافات ... جود جوب

لبنــــــــــى يقول...

هيثم اهل فيك
بتمنى تكون سعيد باجازتك
اغلب البرامج اللي بتتعلق بمناقشة مواضيع حيوية عم لاقيها هامشية و المعد بتلاقيه عايش بعالم تاني غير اللي عم يحكي عنو بس طبعا ما عم احكي عن البرنامج اللي ذكرته لاني للاسف ما سمعتو

انا بعد جهد جهيد و مؤامرة اخوية صار عندي فيس بوك و منور :)
بستخدموا بس مش يويما بس على فكرة لقيت اصحاب الي من زمان ما بعرف عنهم شي و تفرقنا بعد التخرج و قرايب كمان اضافوني بس قروا اسم العيلة لهيك اكاونتي بيتضمن العيلة و اقرب الصحاب و حاطة صوري عليه
و بحترمك لاحترامك لرغبة زوجتك و رغبتها و ثقتك فيها
تحية



اشرف شكرا الك
وجودك دايما بيسعدني :)



قط البكتيريا : لا و الله انا مسكينة بس بلاقيهم مندمجين بالالعاب فبسالهم لهلا في بقايا تخلف تكنو لعبي عندي
لا بس بعجبك مشتركة بجروبات و بنزل صور و فيديوهات انا عاملتها بمناسبات مختلفة و قصص
يعني مو قليلة :))
لا بلاش تقول وينك يا مستغانمي لاحس حالي عن بعمل نقط و خطوط قدام اسلوب الرائعة
بتعرف شو رح تقول مستغانمي اذا قرات شخابيطي ؟؟؟
رح تقول بسرها " هلا عرفت ليش لغتنا بانحطاط و خيالنا ضيق "
بس ما رح ازعل وقتها لانها احلام مستغانمي :)

لا رح ازعل
بس شوي
ضلك قريب
بتنورنا

غير معرف يقول...

تحفة، زي دايما :)

عجبني

غير معرف يقول...

:))

يابنتي الراجل راجل والست ست :))

لا بهزر طبعا... بس في احيانا رجاله بتغير بجد ... فعادي لما يزعل ان حد كلمك... بيخاف عليكي موش منك

تحياتي

NasEr يقول...

laish bedo ykoon 3ndha blog w m5abyeeto 3alay? :/ aslan mosta7eel elle ra7 artabet feeha tkoon "5ayfeh" te7keele inno 3ndha blog, as for my brother and sister I encouraged both of them, my ex had a blog and we actually met on my blog, and men ... a5... sho beddy a7ke, hay mesh '3eereh hay ta5allof

لبنــــــــــى يقول...

hamdanism
:
شكرا الك
مبسوطة لانو عجبك


فتاة من الصعيد : الشغلة نسبة و تناسب
الغيرة حلوة بس لشي محرز و مقبول
كل واحد حسب عقلاتوا
نورت :)


ناصر : مخبية ؟؟ ممكن تكون مستحية او حاسة انو خصوصيتها او شايفة الامر مو مهم يعني ممكن تكتب و تعلق على خبر بجريدة
احيانا كتير امور بناخدها ببساطة بس الطرف التي لا
. حسب العقلية او التعود
حلو انو عقليتك هيك بس مش الكل هيك
و بحترم رايك ناصر
و متل ما قلت أخخخخخخخخخ و ميت اخ

ميسم يقول...

جفراااااااااا
كتير حبيت البوست كلام واقعي ميه بالميه ومن الي شايفتو الاغلبيه العظمى هيك الله يعين
ببساطه قمه بالتخلف احنا

Whisper يقول...

هو عيب يكون عند البنت بلوج؟؟؟

ما كنت اتوقع انه هالشي جريمة, وحتى لو بتكتب بامور شخصيه :$, بُكره بس يجي سعيد النصبه - عأساس انو ورا الباب الاخ - بدي اعترف ان عندي بلوج و فيس بوك و وانا حاطه عيوني بالارض بحكي ان عندي تويتر :)

و بس الشب يوصف البنت اللّقطة اللي خطبها بحكي..تخيلو يا جماعه..ما عندها بلوج :)

يا الله شو بكره مبدأ بعض العالم اللي بدون اي سبب مقنع او مبرر حتى هو يقتنع فيه, انا شب و انتي بنت, شوووووووووو يعني؟؟؟؟؟

اذا في شي غلط, فهو غلط بدون تحديد جنس الفاعل

ملاحظه عالهامش
مرّه اجاني تعليق انه ليش بتضلي تحطي وجوه مبتسمة بالردود على الشباب!!!

O_O نعم يمّا

@ قط البكتريا
"فيكم"...حاسة ان اسمي مكتوب :)

لبنــــــــــى يقول...

ويسبر من هون لعشر سنين او اقل على الاكيد هاي الجملة رح تنقال
" خطبت وحدة يا جماعة من الاخر تخيلوا حتى فيس بوك ما عندها )
على فكرة انا كل معارفي ما بيعرفوا انو عندي بلوج لانو كلهم للاسف ناس ما بتحب تقرا او ما بتعرف شو يعني تدوين ( محظوظة انا )
حتى اهلي اوكي عندم مدونة شو يعني يمكن مرة او مرتين شافوها بس
و الشباب اللي عم يعلقوا هون مش عارفين انو في غيرهم ناس اذا شافوا وحدة ماسكة كتاب بتكون بنظرهم اما مجنونة او فاضية و بتقلد و ما عندها شغلة او متعلمة برة
عجبتني بوطي راسي و انا بحكيلوا عندي تويتر
:))

طولت الغيبة اشتقنالك يا بنت