الثلاثاء، يوليو 12، 2011

معاكسات معاكسات - بس نوع جديد شوي ... هاي اخرتها




المعاكسات مممممممممم




قررت انا كمان احكي عن المعاكسات بس بعد توضيح قناعاتي الشخصية




اللي بيعاكس و عندو الجراة او الوقاحة انو يتعرض و يتحرش في بنات العالم




ما بهمو اللبس او ايا شي اظن انو لو انقطعوا البنات . رح يتحرش ببسس الشوارع :)




و باكد انو البنت متل الشب الها الحرية . و بما انو مفهوم الحرية بيختلف حسب التربية و الاخلاق




بلا ما نضيع الموضوع




نرجع بالزمن ل 15 سنة




من 15 سنة او اكتر كنت بعمان و شفت انا و ماما و قريباتنا بنركب السيارة بالسوق و اذا بشرطة ماسكين واحد نازلين فيه خبط . احنا بصراحة خفنا لكن وضحولنا قرايبنا انو الشب اكيد اتحرش ببنت لهيك عم يتجازى . و ابدوا الستات الكبار تعاطفهم مع الشب مع انو غلطان بس حزنوا عليه كتير




بردو بنفس الفترة .. كان الشب اللي محلوق شعروا على الصفر و بطريقة بشعة هادا دليل على انو كان بيعاكس البنات و بات في الحبس ليلة و كانوا يتركوا علامة كمان ليفضحوا اكتر .








كانت بوقتها المعاكسات بريئة و لطيفة و غزل مع انو هادا الشي نحنا كلنا ضدو بس الامور كلها تغيرت








......................................................................








على فكرة بس مشان التوضيح ( انا اول بنت بالعيلة و اتربيت بين شباب كانوا كتير يخافوا علي من ولاد خال و خالة و غيروا لهيك يمكن وعيت بكير على قصص الشباب من الدروس اللي اخدتها :)








اول موقف تعرضتلوا ايام المدرسة كنت راجعة مشي من المدرسة و كانت ايام ربيع و حلو الجو و لحقني واحد بسيارته . المشكلة اني ميزت الشخص لاني شفتوا مرة بس ما اتذكرت وين




و ضل لاحقني لباب البيت و طلعت حكيت لماما و كنت فضيحة شوي و حكيت لبابا و اخواني كانوا صغار فاتصلت ببيت خالتو و خبرت الشباب و كنت مقهورة لاني خوفني و كان احيانا يعمل حالو بدو يدهسني و كنت خايفو انو يعمل شي و بما اني عمري 15 ما عرفت اتصرف و ضليت ماشية بجنب الشارع و بمكان فيه ناس




طبعا وصفت السيارة و بعدها تاني يوم لحقني و كانت ماما عم تنطر بسيارتها من جهة و بابا من جهة




و شباب العيلة من جهة




و الوكيلة من جهة




و انا طبعا مو عارفة و لا حدا عارف انو التاني عم ينطر الا ماما بس حكت شو بدها تعمل للوكيلة




المهم اكتشفنا انو هادا الاخ بكون اخو صاحبتي اللي زرتها نيابة عن بنات الصف لانها مريضة و كنت رئيسة الفريق التطوعي لهيك انا اللي اتدبست و رحت




ماما و بابا و الشباب و الوكيلة و حراس الامن حاصروا الشب و لما اتعرفت عليه اكتر و قالتيل مش صاحبتك اسمها كذا كذا




المهم ماما ما حبت تكبر الموضوع فاخدت تلفون اهلو و اشتكتو الهم و شكلهم ربوه لانو الكل منعني احكي مع اختو و لا اسال باي شي مع انهم المسكينة اجت تعتذر بس انا اعتذرتلها لاني ما بقدر اخالف اوامر ست الحبايب




و من بعدها لا في مشي لا بالربيع و لا حتى بالصيف :(




و من ساعتها فهموني اهلي اني ما اخاف و اطلب المساعدة من اي حدا و لو حدا قرب علي اعلي صوتي المهم اني ما اخاف








....................................................................








نقدم شوي الشريط لايام الجامعة




اول موقف : كنت راجعة بالليل من مبنى العلوم للسكن الداخلي و كنت اول سنة بدرس بالتكنو .... و وقفت سيارة نقل بتشبه سيارات نقل الطلاب و فتح الباب و قلي اركبي اوصلك




انا بطريقة بسيطة و عفوية




ضغطت على الباب الخلفي و فتحتوا




و ركبت مع صدمة السائق من كلمة عمو اللي عدتها 500 مرة و انا مو فاهمة




تكرر الموقف تاني يوم و لما




وصلت للسكن قلي عمو شكلك جديدة كتير على البلد ما تركب مع حدا تاني مرة




و انا ما فهمت




المهم انا شفت العمو بعد سنة




و قالي كيفك عمو فانا رديت عليه قالي بتعرفي انا شو بشتغل ؟




طبعا انا بنت فهمانة كتير و شطورة قلت سايق بالجامعة




قالي لهلا يا عمو ما كبرتي انا يا ستي بشتغل ................... بمستشفى الملك عبد الله :00000 صدمة




الرجال ما الو دخل و طلع مهندس و جاي يكب بلاه




و يعاكس بس شفق على السنفورة اللي مو عارفة الله وين حاطتها




و عطاني كم نصيحة و ركبت بنت من الجامعة كان لقطها على طريق السكن مرة و توفقوا ببعض ( ما تجوزها )








هون انا انجنيت و صرت حريصة اكتر لدرجة اني بطلت اصلا اركب مواصلات الجامعة و بلشت انتبه اكتر




..............................................................




سنة تانية كنت ساكنة بالسكن الخارجي في اربد و طبعا البنات هناك ما قصروا .




و ضلهم يدربوني على الخوف من كل اشي




بس من عشرتي لشباب العيلة خلتني مش مقتنعة




و بيوم كنا ماشيين عند مانجو و شب قاعد على كرسي هو و كم زميل الو .




رموا كلام بصراحة قمة في الانحطاط .




و ما رح ابرر و اقول مع اني لابسة و عاملة .........




لا انا الي حرية اني البس اللي بدي اياه و هادا ما بيعطي الحق لاي حدا يحكم علي و يحكي




المهم انا من الصدمة وقفت و لفيت وجهي على الشب طبعا




هيك اشكال لما تلاقي ردة فعل مو متوقعتها بصيروا متل الفيران المغسولة




و قربت منهم




و قلتلوا : لو انا والدة حضرتك او اختك او بنت جيرانكم بترضى حدا يسمعني هيك حكي .




رد : لا ............... طبعا لا ووقف على حيلوا . و قال اسف .




انا بصراحة انبسطت لاني اخدت حقي




و البنات اللي معي كانوا مصدومين من ردة فعلي مع انهم ساندوني




من وقتها قررت انو اي مشوار بعيد او قريب لازم اركب تاكسي




و اني ما اعرض حالي لاي مسبة او تحرش لاني عصبية و ممكن تكون ردة فعلي كبيرة




..........................................................




كنا بنمارس رياضة المشي باربد




و العصر الناس كلها بتكون موجودة بمدينة الحسن الرياضية




و كنت بحب امشي هناك . لفت نظري ولد عم يتحركش ببنت و قرصها و ركض




المهم انو في ناس عم تركض وراه




طبعا باتجاهي




و انا بدون ما افكر باي شي ابدا و لا استعرض قوتي




مديت رجلي و خليت الولد يوقع و انقضوا عليه و هلكوا قرص لاجت الشرطة تكمل قرص




ما كنت مبسوطة او ايا شي




مشيت عادي و بعدت عن كل الموقف




البنت اجت من بعيد و قالتلي شكرا انا مش عارفة شو صابني تركتها و مشيت




لهلا مش عارفة كيف عملت هيك




بس لو انا تعرضت لهيك موقف ما كنت رح اسكت




و ضليت امشي هناك لانو الناس بعد هادا الموقف صارت تنتبه اكتر




و اي واحد مشبوه او مش مع عيلته كانوا تضل عينهم عليه




..........................................................................




داخل الحرم الجامعي كان في واحد مش عارفة هو شو لهلا




يمشي وراي طول الوقت و يروح و يجي و حالتو حالة




لمدة اسبوع لانتبهوا صاحباتي عليه




كنت ممكن اشكيه او احكي لاي شب من العيلة بس ليش دائما البنت لازم تكون الجناح المكسور و اللي لازمه حماية بما انها بتقدر تتصرف




مشي وراي مرة




وقفت لفيت وجهي قلتلوا انت ما عنك محاضرات . اهلك باعتينك تحرسني . شكرا




بس انا ما بدي حراسة و انتبه لدروسك اكتر




و مشيت




ما شفتو ابدا بعدها :) اكيد خاف مني




....................................................................




في السوق اي شب كان يخفف دمو كنت اهمل الموضوع الا اذا تجاوز حدوده فكنت صلبة و ما بخاف و هادا الشي بفضل شباب العيلة اللي زرعوا ثقتهم فيي لدرجة كبيرة و ما كنت اخاف من الجنس الاخر








...................................................................




من فترة قصيرة كنت واقفة قدام البيت عم انطر صاحبتي




و اختي ليمروا علي ياخدوني معهم .




تاخروا شوي .مرت سيارة مرة و اتنين و تلاتة فيها ست .




انا فكرتها انها تايهة .




نزلت الشباك و بلشت تعمل حركات و انا متل الهبلة :)




بحكيلها معلش مو سامعة .




اي بيت




و بعدها اشرتلي انو استني




و رمتلي ورقة جنب رجلي . فيها رقم التلفون و كلام ........... طبعا انا انصدمت ...




و دخلت البيت و حكيت لاهلي اللي انصدموا




لهون وصلت الامور




..................................................................




طيب شو رايكم نحكي عن الشباب لما يتعاكسوا




هادا الموقف ما رح انساه . كان ورا السكن بيت صغير ساكنين فيه شباب و شكلو الصبايا راصدين واحد منهم . و لازم يمر من تحت السكن بممر داخلي صغير ليدخل البيت




طبعا انا كنت اسمع اصوات و ما افهم بس فضولي خلاني افتح الشباك و لقيتهم عم يتغزلوا في الشب من صدمتي




( انو احنا وين يا جماعة ) سكرت الشباك و بعدها عرفت انو الصبايا صاروا يرموا عليه اشياء و المشرفة عطتهم انذار بعد ما الشب المسكين اشتكاهم .




و فصلوهم من السكن لانهم رموا عليه مرة بيض و زبالة




و اكيد نقل من البيت




شكلوا الصبايا ما عندهم اخوان يخافوا عليهم




.............................................................




كان عنا T A امور شوي و علق مع شوية صبايا من اللي بينحبوا كتير و شغل تهديد للرجال




و اللي تلزق فيه




و اللي تسمعو حكي




لدرجة انو الشب اشتكاهم عند الدكتور :))))




و اجا بهدلهم و جبلهم بالاخر انذار مشان الشب يعرف يشتغل




تخيلوا




.....................................................




هلا بالنسبة للمعاكسات انحدر مستواها و صارت خطرة بانحدار ثقافة المجتمع




يعني بلشت بثقافة شو يا حلو .... و بعد الفضائيات ما اكتفوا بالحكي




بس نفسي افهم الشب او البنت اللي بعملوا هيك شو بيستفيدوا ؟؟؟؟؟












حكيت كتيييييييييييييييييييييييييييير

هناك 17 تعليقًا:

Sozan يقول...

انا باتفق معك انه ما بيهم شو لابسه الوحده اللي بده يتحركش بيتحركش حلوة قوة شخصيتك واعتمادك ع نفسك!
تقبلي مروري عزيزتي:)

jafra يقول...

مع اختلاف التوقيت هينا عم نتلاقى :))

شكرا لاطرائك سوزان و نورتي المدونة
صباح الخير
بالنسبة الي ما بعرف كيف الوقت عندكم بس للاحتياط صباح - مسا الخير

UmmOmar يقول...

لوووووووووووووول
ماعرفتك يا شريره
جدن حلوين ري أكشناتك خصوصي لمى عرقلتي الشب الزنخ

أنا مني وعليّ رح بشجع بنتي إنا ما تسكت للمعاكسه وتلاقيها حل ت تطلع منها

الزمن اللي إوصلناله بخوف كتير ومش مضمون بالمره

الله يحمينا ويحمي بناتنا يارب

noor يقول...

مواقف بتصير مع الكل, مستوى الانحطاط زاد فعلا, بس كل مرة بسأل حالي ليش ما بتعلم البنت تحمي حالها, يعني ايش المانع لو كل وحدة بهدلت اللي بعاكسها, بتعرفي شو المانع, احيانا الفضيحة بتكون للبنت شو ما حكى الشب و احيانا و بجد في بنات بحبوا يتعاكسوا و يسمعوا كلام, بس لما يزيد الكلام عن الحد اللي بدهم اياه بيتدايقوا, نوع من الاحساس بالانوثة
فالبنات مش احسن من الشباب و معاكسات البنات للشباب الها اسم تاني, تزبيط, يعني زبطيه و تزوجيه
:)

noor يقول...

مواقف بتصير مع الكل و مستوى الانحطاط زاد فعلا
انا بحس هيك باربد كل مرة بمشي بالبلد بسأل حالي همه الناس مضيعين اشي بوجهي و بدوروا عليه ؟؟؟؟؟
البحلقة لحالها بتكفي
ايش المانع انه البنت تبهدل كل واحد بعاكسها؟ اكيد رح تكون هيه الغلطانة بنظر المجتمع
و في سبب تاني انه البنات بحبوا يتعاكسوا احيانا كنوع من الاحساس بالانوثة بس لما يزيد عن الحد اللي بدهم اياه بكون الشب وقح
اما معاكسات البنات الها اسم تاني
تزبيييييييط
:)

Haitham هيثم Al-Sheeshany الشيشاني يقول...

و الله يا جفرا بشكرك :)
المقدمة اللي كتبتيها منيحة مشان ما حدا يفهم غلط و هيك، و أمثلتك واقعية و من شاكلة "الواحد بيتعلم من كيسه"
:)

شكرا ً للمشاركة
--
كثير مرات بتقولي إنك عصبية و ردة فعلك قوية بس بكتاباتك هالشي ما ببيّن! (برايي)
---
الواحد/الوحدة حر/ة شو تلبس --> شكلو حنطاوش :))))
بس هذا ليس مبررا ً لتسويغ التحرش بأي شكل كان
---
الشب اللي عرقلتيه = ذكرتيني مرة عملت نفس الإشي بولد صغير كان هارب من شباب و أنا وقّعته على الأرض! كان معاه بيرة و مشروبات! لما وقعتو أنا ما كنت عارف ! بس وقع منو الكيس و بيّن شو معه! "هيثم حكى كثير و بلش يدخّل مواضيع ببعض!"
:)

خليني أهرب قبل ما تطلع عصبية التكناوية :]

jafra يقول...

ام عمر مرة شفت حلقة من برنامج اوبرا كانت بتحكي فيه عن التحرش و كيف لازم نعلم ولادنا انهم يتصدوا لهاي الظاهرة خاصة من الناس المقربين و اللي بكون وجودهم عادي بالبيت بصراحة عجبتني و لازم كل ام تشوفها فيها خطوات سهلة على الولد يعملها و يتبعها ليخبر الاهل بدون ما تتاثر نفسيتوا او يتعرض لاكتر من التحرش
بعدين انا شريرة :(
احسن ما اضل سنفورة هبلة صح ؟:)
اللي وصلناله هادا من فعل البنات نفسهم
مرة بيحبوا يتعاكسوا و مرة لا ... و ما بقدروا يواجهوا
نوعا ما الاهالي و المجتمع عليهم حق
يعني معلش . هاي لابسة و هاي عاملة و هاي سوت
صحيح انو في شي اسمو التزام اخلاقي و ديني بس كل واحد بشوفوا من منظوروا الشخصي و نحنا مجتمعاتنا مش مثالية و عندها عقدة الجنس
لهيك لازم خطوة لقدام اولها الدفاع عن النفس :) من وين جبتي الصاعق لهلا عم اسال انا


نور هلا في معاكسات لطيفة خفيفة اصلا ما بتخرج عن كلمة يا حلو يا قمر ياكذا ..هاي صارت قديمة بس محتملة
و المستوى الاخلاقي و الاعلمي و الثقافي و كلو صار دنيئ فالطبيعي انو تصير المعاكسات دنيئة ووقحة
و من زمان جدي و ستي كان في غزل و قصص بس الموضوع ما ضل معاكسة و غزل صار اسمو تحرش
و هادا خارج طاقة الاحتمال
تزبييييييييييط اها مش تقولولي
عجبتني زبطيه و تجوزيه
قصدك اتبلي عليه
هادا اسمو تحرش كمان

jafra يقول...

شيشاني كيفك ؟
لا ما بدنا نطاوش مش قلتلك انو كل شي وجهة نظر :)

اول شي شكرا الك لمتابعتي و بكون مبسوطةانك هون
تاني شي انا مشكلتي العصبية بس نوعا ما بحاول اتحكم فيها و اتجنب المواقف اللي بتعصبني
لانو بصراحة بس عصب ببطل اشوف الضو ابدا لهيك تعلمي اني احاول اركز و ما اغلط و اول خطوة تعلمتها اني لما اعصب احاول اوطي صوتي بالتدريج لحتى اضبط حالي و الحكي و طبعا هادا الشي اخد وقت طويل كتير و مجهود كبير
لوصلت لهيك مرحلة خاصة انو العيلة كلها اسم الله عصبية فبتبلش تتعلم من غيرك و اخطاء غيرك :)

لا انتا احكي براحتك مش بينا ما انا بحكي بمدونتك كمان كتير و الا قصدك اخفف ؟:)
ما قلتلنا الشباب لاحقين الولد ياخدوا منو المشروب يعني ؟؟؟:)

مياسي يقول...

لا حلوه القصص كتير
ما بينخاف عليكي جفرا :)

زينة زيدان يقول...

جفرا صدقي جد أنت اليوم حكيتي كتير
مو عارفة أبدأ من وين بتعليقي بس للامانة حكياتك مهضومين ومشوقين

تسلمي ويسلمو شباب العيلة إلى عودوكي ما تخافي

وصحيح هلا البنات صاروا يعاكسوا الشباب
شكلو ما عندهم اخوات صبيان يخافوا عليهم
هههههههههه

jafra يقول...

مياسي نورت يا صبية وينك و شو اخبارك
قوية .... بس بلاااااااااااش



زينة شكرا حبيبتي عن جد حكيت كتير
بجد هالبنات ما عندهم اخوان يخافوا عليهم انا شخصيا عندي:))
شباب العيلة كانوا مركزين معي شوي لاني اول بنت فتعودوا يخافوا علي اكتر شي و هم متل اخواني بالزبط و الكل بلاحظ انهم لهلا بعد ما اتزجوا و خلفوا بنات بردوا بضلهم يخافوا علي يعني الشغلة تعود:)

UmmOmar يقول...

أحلى خبر ممكن تسمعيه


حبس شاب تحرش في فتاه داخل باص للنقل العام-الاردن

لبنــــــــــى يقول...

ام عمر هي وصلت للباصات :))

عقبال الشوارع كمان خلي العالم هاي تخاف شوي و تستحي و تبطل تقول ما هي البنت ...و .....و........

فكرك ام عمر بكرا بحطوا قانون لحماية الشباب من التحرش :)))
شفتي نحن البنات بنقدر المساواة كيف :)

Haitham هيثم Al-Sheeshany الشيشاني يقول...

على فكرة مش عم يوصلوني التعليقات الجديدة!
:(

على كلّ
:)
بما إنو احكي عراحتي فذنبك على جنبك :)

و أكيد بنبسط إذا بتعملي الشيء نفسه
---
الولاد كانوا لاحقينه لأنهم بدهم يضربوه لأنو بيسكر و/أو بجيب مشروب لناس و هيك

Whisper يقول...

انا بنت وحيده بين شباب برضه و قربي من خواني برضه اثر بشخصيتي و لكن بالنسبة لشباب العيله كان الموضوع "ممنوع اللمس او التصوير" هيك ماما معلنتها بالعيله :)

كله كوم و اللي بالحديقه كوم...جد قهرني و بستاهل اللي صرلو

موضوع المعاكسات و التحرشات خطير وكبير ولكن للاسف البنات بسكتو لانهم مش فاهمين او خايفين

روحـ يقول...

هههههههه

قصصك كتير حلوة :)

بصراحة قصة المعاكسات قصة هاي

بصراحة صحيح انا شب بس قصة المعاكسات هاي ما بحبها لسبب بجد بحسها انها تخلف وشغل ولدنة , واللي بيعمله يا اما فاضي يا اما همه بالدنيا ورسالته السماوية هالمعاكسة عايش ع هيك حكي ,

بالنسبة للعملية المعكوسة بصراحة انا مريت بهالتجربة بسنة اولى جامعة وانا باستنى بباص الجامعة الا وكام بنت المشكلة اصغر مني بالسن من مدرسة قريبة بيحكي بس بس ...

هههه يخرب عقلهن

بصراحة هالاعمال هاي ما بدل الا ع دناءة صاحبها واستخفافه بعقله وحجمه..

اما بالنسبة لحكاية اللباس اللي بيعاكس ما بيهتم كتير للبس مستعد يعاكس بسة ماشية بالشارع , لكن لما تكون الواحدة لابسها لبس نص كم فبجد بتلاقيه لا ارادية بيعاكس وبيكون عنده الوقاحة والجراءة اكتر ما تكون البنت ساترة حالها ولابسة منيح .

ويا رب يهدي الجميع ...

لبنــــــــــى يقول...

شيشاني : التعليقات اللي عندك مني رح تكون باسم غير معرف مش زابط اعلق من الكاونت تبعي مش عارفة ليش ؟؟؟

حلو انهم ضربوه بس كان الاولى انهم يعرفوا لوين رايح فيهم :)
يمكن انا بختلف معك شوي هم ما الهم فيه حتى لو الموضوع بخص الشرب مادام ما عم بشرب بالشارع و ماذي حدا
مش قلت انو رح نختلف :))))))

بسيطة الخلاف بالراي لا يفسد للاحترام و الود قضية
ما هيك يا رفيق ؟؟


ويسبر الحلوة : يمكن بالغربة الوضع بيختلف الناس و العيلة بتكون ملموة كتير و عندها نوع من الللل....مش عارفة التعبير لهيك نحنا تربينا مع بعض كتل الاخوة بنتشارك بكل شي و همنا واحد
و هاي انا بعتبرها ميزة و كتير ناس بتستغرب من علاقتنا هاي بس يمكن هادا تقليد بالعيلة متبع لانو اهل ماما و اهل بابا هيك نفس الشي مع قرايبهم
المشكلة بالمعاكسات انو البنات تعلموا يسكتوا لينفضحوا ؟ تخيلي تقبل التحرش و هي الضحية و ما تحكي مشان ما تنفضح
مسخرة
نورتييييي ما تطولي بشتقلك انا