PEACE yA mAn

هي : شو رايك بطرق السلام هالأيام ( صوت الارجيلة يعلو كانك تغطس بالبحر و بتبقبق )


أنا : و الله مسخرة


هي : ليش ( سحابة دخانية متطايرة )


تبديل البربيش من يد لاخرى


أنا : يعني انا برايي انو السلام من منطق قوة بصير سلام بس طرف ضاغط على التاني ما بصير سلام


يعني يا حبيبتي انت عم تلوي ايدي ساعتها ما بتقولي سلمي بتقولي استسلمي و نحنا وصلنا لمرحلة مقرفة تجاوزت الاستسلام


و كل واحد نازل يستغل فينا من ناحية اللي بدو ينكش الكبار بيدعمنا و اللي بدو رضاهم بدعس على رغبتنا


و احنا من قد الدعس بلشنا نفرط - مرة فتح و مرة حماس و حكومة مقالة و حكومة مش عارفة شو و سيارات مرسيدس و علام و احقر جندي امو مش عارفة مين ابو بدخل على ايا بيت بفتش و بأمر و بيعتقل و أيا حركة بننضرب فسفوري و بتقولي سلام والا مفاوضات


دخيلك ايا سلام هادا اذا نحنا مآدن ما عم نمون نبني و هم بصروا على دولة يهودية يعني اذا قلنا اسلام صرنا متطرفين بس ادا قلنا يهودية صارت القصة فيها طرح جديد


مستوطنات و عم تنبني - اقصى و عم ينهد - ترحيل - جدار - قصف - اعتقالات - ملف اسرى - انتشار المخدرات - بطالة - فساد - هادا اللي احنا فيه


سلام قال ؟


هي : انتي شو بتحكي و بطلي احضري هالاشياء الله يخليكي انا مو قصدي هيك


أنا : شو قصدك ؟


هي : يعني شو رأيك بموضة السلام الدارجة " هاي " بدل السلام عليكم شي مقرف صح


سحابة دخان برائحة العنب و قربت تمطر
أنا : مقرف ... ? وجهة نظر

بحكي مع حالي - جدل ذاتي

في البداية حابة اوضح انو هالحكي كلو براسي و من راسي للازرار و انتو عم تشوفوا هلا يعني هادا جدل مع حالي
وصلت لمرحلة في الفترة الاخيرة كتير احكي و احلل مع حالي الامور اللي بتعرضلها و لهيك حبيت اني احكي بصوت مسموع شوي و هو عبارة عن دقة كم زر يمكن اوصل لسلام روحي و مصالحة مع ذاتي
و اول ما بلشت كنت رح احكي بموضوع تاني تماما لكن لقيت حالي عم ادرج موضوع مختلف عن اللي كنت عم افكر فيه
الموضوع المختلف هو " المسامح كريم "
انو ليش يا جماعة المسامح كريم و هون ببدا الجدل العقيم و اللي بيوصل لافكار غريبة و هي الحالة اللي انا عايشة فيها هلا
من زمان و انا بحاول امشي على شوية مبادئ منها المسامح كريم و التعاطف و تقدير الظروف و هون الواحد بينجر مرة و را مرة لخازوق اجتماعي من نوع معروف للكل
مثلا زمان كنت عم اتعامل بمبدأ من ضربك على خدك الايمن ادر له خدك الايسر و استمريت لفترة طويلة من حياتي على هادا المنوال و طبعا هون بيلحقك موضوع المسامح كريم و الحق عند الله ما بضيع بتوصل لمرحلة معينة بحياتك بتلاقي حالك وصل لمفترق طرق
الاول بقولك الحق ما بضيع و انو الله رح يبعتلك مين ياخد بحقك خاصة لو كان الكف فولتو عالي
بتستنى و بتضل تتسامح لتوصل لمفترق طرق تاني
الاول منه انك بتضل تاكل كفوف و تستنى رحمة ربي فاي دعسة بالبطن معناها انك تتقبل الامور لتوصل لمرحلة انك تلوم حالك و تتقوقع عليها و تحط الحق على حالك مهما كان فبالاخير بتصفي متوحد مع حالة الذنب و عدم الثقة بالنفس و تحسب الف حساب لاي خطوة اجتماعية و ما رح توصل لاشي و بترجع لتقول ليش الله ما اخدلي حقي و انا مظلومة ؟
يا الله وينك عني و حسب قوة الكف و الايمان ممكن توصل للالحاد الداخلي
و هون بتكون جمعت كم كف و كم دعسة بالبطن و بتتجه للانتقام ممكن من اشخاص اصلا ما غلطوا و بتمشي على الحياة و الناس بطرف كعب حذاءك العالي و تراكميا بترجع وبتحط الحق على حالك و هيك ما استفدت اشي و الانتقام الالهي ممكن يكون منك مش من غيرك
لكن لو رجعنا للمفترق الاول بنلاقي انك لو ما استنيت و تراجعت و غلطت حالك و حملتها اعباء الذنوب اللي ما اقترفتها و اخدت موقف من الاول و تعلمت من الكف و عشت بنظريات اخرى كان ممكن تتلافى كل هالتعب النفسي و الجدل
ما هو المساح كريم بس بحدود يعني حدا دعس على رجلي بالغلط ممكن
بس حدا يدعس ببطنك و مشان تقدر تقوم مرة تاني بتكون ضيعت من عمرك سنة او اكتر ؟ هون ما بكون المسامح كريم بكون انسان ماشي مع طرش الغنم لوين ؟؟ هو اصلا ما بعرف
لهيك وصلت لقرار العين بالعين و السن بالسن و البادي اظلم
مع هيك بردوا العالم بقولولي مستقوية و كاني انا اللي بدات ؟ مع اني انا اللي اندعس ببطني لكن للموضوع عدة فوائد جنيتها من تجربتي الشخصية على المستوى الاجتماعي و هي
انك تقعد تحط ايدك على خدك و تقول بكرا الله بياخد حقي ممكن بس مادام بايدك تاخد حقك فكرم منك انك ترحم المخطئ من غضب ربنا
و ترحم حالك من النطرة و هز الثثقة بالنفس و النطرة لسنين لحد ما تصحى
و حاول ما تكون ردة الفعل اكبر من الفعل نفسو مشان ما تتجنى و اوعك توصل معك للقتل الجسدي او الروحي الموضوع لو تحكمت فيه من الاول رح تلاقي نفسك كريم و متعاطف و كمان عادل بس بتاخد حقك
و هيك ممكن تستمر بهدوء
مش قصة انك تقتلوا لا
بس على الاقل تكون راضي عن نفسك و ما توصل لمرحلة القوقعة و لا الاحساس بالذنب تجاه المجتمع كلو و تكرّم اي واحد ما مشي من جنبك و مــــــــــــــا دعس ببطنك
و تعتبره من الاله المنقرضة و تضرب فيه المثل
و بهيك كمان بترحم حالك من الانضمام للطرش الماشي بلا وجهة معينة و بتكون فرد قادر على اتخاذ موقف ولو شخصي من ناحية معينة بلكن بنقدر بعد هيك ناخد موقف علني لاشيا كتير بحياتنا
عمرو طرش الغنم ما توفق انو ياخد حقو حتى من العشب و المي لهيك اخترعوا ابر الهرمونات
و انا مش ناوية اخد هرمونات لهيك رح اتخذ موقف من كل شي حولي و احاول اني اغير و اتغير بس للاحسن و اطلع من هالقوقعة
و بصراحة ما عاد عندي مساحة للمسامحة لانو الموضوع مش اني بخيلة او مش مؤمنة او .............
لا الموضوع اني بدي اكون برة طرش الغنم
و مع العالم الحقيقي و بس

سيجارة

حوار بين نون النسوة في مقهى خارج اطار المونديال

نون : هلا لنحكي عن جد لايمتى بدك تضلي هيك

هي : مالني ؟

نون : يعني عزابية و بلا ارتباط يعني لتكوني مرتبطة و نحنا ما بنعرف
رشفة قهوة . نفثت دخانها
هي : لا يا ستي و اذا بدي ارتبط ليش ما بدي احكي ؟؟
نون : هلا و لا بعمرك ارتبطي ؟
هي : ارتبطت و انتي عارفة بمين ليش بتسالي
نون : بدي اوصل لشي
هي : و الله كنت عارفة.... اساليني دغري بلا لف و لا دوران
نون : هلا كل هالحب و العشرة كل هالسنين .. وين راح و ليش ما كملتوا ؟
هي : نصيب .... معك ولاعة و لاعتي بطلت تشتغل شكلو بدها غاز

نون تناولها ولاعة محترمة و طقطقة الولاعة لم تنسي نون ما تريد ان تعرفه

نون : طيب و بعد النصيب و هالقصص ... شو السبب

هي بخباثة و ضحكة جانبية لئيمة : القدر
نون تلوح بيدها و كانها تقول لها التالي التالي : و بعد القدر و النصيب شو السبب الاساسي
هي : يا ستي طلب مني اني اوقف تدخين
نون : مش هو اللي كان يجيبلك الدخان من السوق السودا و بسعر ارخص
هي : اها
نون : و شو خطر على بالوا ؟
هي : عنت على بالوا الزلومية و بلشت المشاكل بعدها ...
نون : طيب بس انتي كنتي بتحبيه كتير هيك انا بعرف .... ليش ما بطلتي مشانوا كنتي حاولي
هي : ما انا ابديت استعدادي بس نوقف دخان مع بعض يعني انا و هو
نون : هلا هو شو دخلوا دخيلك ؟ هادا رجال
هي : ليش حبيبتي هو الدخان بسرطن بس البنات ؟ و بضرنا لحالنا شوفي يا ستي الدخان و الزنا و شرب المي متل بعض ما فيها شي اسمو رجال و مرة - يعني اللي بضروا بضرني و اللي بعيبوا بعيبني و اللي بيحتاجوا انا كمان بحتاجوا هي ما فيها رجال و مرة
نون : بس العالم مو هيك بتفكر
هي : لو فكرنا كيف العالم بتفكر لكنا اصلا ما ارتبطنا انا و هو من الاساس .... المبدأ واحد ..
نون : هادا تفكيري انا و انتي بس مش كل العالم
هي : و الله هادا اللي اجاه
نون : اكيد زعلتي لما افترقتوا بتذكر كانت حالتك صعبة بس ما طولتي
هي : بنص الاسبوع ماتت القطة اللي كنت مربيتها
نون : اه بتذكر
هي : فالتهيت بالزعل على القطة و نسيت موضوعوا
نون : يا سلام ليش يعني ؟
هي : القطة كانت بتحبني متل ما انا بعيوبي و بسيجارتي
و ما الها شروط لتعيش معي هو بلش يتفصحن و يحط شروط بعد 4 سنين
.......مين اللي بعادوا بزعل اكتر برايك ؟
نون : القطة طبعا .. ما بتعرفي عنو اخبار ؟
هي : اكيد
نون : شو ؟؟ احكي
هي : مرتوا كانت حردانة الاسبوع الماضي
نون : يا ويلي عليكي كيف عرفتي
هي ما هو اتزوج بنت ..........................................

و لم يبقى من القصة الا بقايا بن يلف الفنجان و دخان بدأ يتلاشى

شو بدك بالحكي - القلب على اليسار

هي " هاي البنت شو جنسيتها

أنا : هلا شو بدك بالجنسية بكفي انها بني ادمة و فوق هيك بتحكي عربي

هي : انتي لهلا قومية عربية

أنا : الله يرحمك يا ابونا بس هلا عم حاول اكون قومية انسانية

هي : ليش

أنا : اذا الانسان نفسو ما عاد الو احترام ؟

العربي رح يكون الو احترام ؟ نرجع بني ادمين بعدين بنحكي بالقوميات

____________________

هي : هلا فتح و الا حماس ؟؟؟

أنا : حاليا ما بقدر كون الا خضرا شوي و صفرا شوي

هي : ليش ؟

أنا : صرت استحي من زلم المنظمة و عمايلهم و الله اشي بخزي

هي : يعني انتي اخوان ؟

انا : هلا انتي شايفة في شبه بيني و بين الاخوان اشي ؟؟؟؟؟

الله وكيلك كل واحد منا من اب شكل بس هي الام اللي بتكسر الخاطر

هي : لا بس موقفك ....

انا : زلم فتح و السلطة خلونا نكرههم و لك شوفي

اي مقابلة تلفزيونية بردحوا فيها

و الله اشي بخزي و عاملين زي بياعة الفجل

هي : يعني انت مو اسلامية

انا : لا

هي : الله لا يوطرزلك لتكوني شيوعية ...انا كنت حاسة انك منهم .....

انا هههههههههههه : لا بس بحبهم اخلاقهم عالية اكتر من الراسماليين

هي : مالهم الراص ماليين

انا : الله وكيلك نازلين هز على جيبتنا

لفضيت و بعدين انا من الفقرا عمرك شفتي فقير راسمالي ؟

هي : علمانية ؟

انا : مش عارفة بس الله عندي بكون بكل اشي ما بقدر افصل و اكون بين و بين

هي : طيب ايا من ايا حزب

انا : لا ما بحب التزم بحزب -

انا بني ادمة هادا هو الحزب تبعي

لو التزمت بحزب يعني لازم افكر زيو و اكون وفية الو

بكل عمايلو و برر اخطاءوا و سامحوا

انا ما بعرف اعمل هيك -

انا معترة بحكي للاعور اعور بعينوا و ما بعرف احكي بسياسة

ما عندي ادب سياسي .

اصلي فلاحة فاهمة شو يعني فلاحة

هي : بس ميالة لشي على الاكيد

انا : يا بنتي القلب على اليسار هو مايل لحالوا شو بدك بهالحكي

تعي نشرب القهوة بردت

و الله ربطة الحمار صعبة

المكان قاعة كبيرة في أحد الفنادق الضخمة

المناسبة : محاضرة لتطوير التعليم الاكتروني

الوقت : من زمان :)

هي : الفنادق الضخمة لها هيبة كبيرة - انا هون رح اعمل عرسي بعد 300 سنة

أنا : انت لاقي المسخم اللي رح يتجوزك و بعدين فكري بالفندق

هي : على رأيك .

فلاش صورة مفاجئ في نص عيني

هي : شوفي المصور شو امور شكلو مندوب عن جريدة ...........

او صحفي بشبه اسمر و الله و احلى منو . انت بتحبي الصحفيين

أنا : اسكتي بلشوا حكي ... مين أسمر؟

هي : مش عارفة اسمر وين عايشة انتي ؟ بذمتك مش لو خلوه هو يحكي احسن

أنا : هششششششششششش

فلاش تاني بقوة و بعد الوميض الابيض نظرة من المصور باتجاهنا مع ابتسامة

أنا : العمى انعميت انا

هي : مش مشكلة انعمي بعد ما تشوفي هالجمال احسن ما تنعمي على منظر قبيح

ضحكة خافتة

وقت الأسئلة

أنا : بالنسبة للمشروع المتضمن تطوير التعلمي الالكتروني

بالمنطقة اثبت فشله و سلبيته في التاثير على التلاميذ

و تم ايقافه و استبداله من بعض الدول و العودة الى الطريقة القديمة .

لماذا يجب علينا ان نجرب ما فشلت به الدول المتقدمة

على الدوام و لم لا نبدا بتجربة ما نجحوا به و لا نضطر الى

استخدام هذه التقنيات فقط لدعم بعض الشركات ؟؟؟

المنظر :::::

وجوه غاضبة و صاحب المشروع عيونو طلعوا لبرة

و انا حسيت بانتصار لاني ما بحب الاستهبال .

احد الموجهين الفنيين اشار لي بابهامه - ممتاز -

بعض الحضور نظروا الي و صاحب المشروع بعت يعرف اسمي

و لا رد على السؤال فجاة 3 فلاشات قوية بعيني كاني رح انزل الانتخابات

و اجابة ما سمعت نصها من صاحب المشروع المخنوق مني

هي : الله لا يوفقك هادا سؤال

أنا : لازم يقنعونا بالمنتج و ايجابياته

هي : بس صاحبنا ما شال عينو عنك

انتهت المحاضرة و اتجه الجمع للبوفيه

هي اسمعي بنشرب قهوة و بعدها بنروح

عيون صاحب المشروع لهلا ما فارقتني كانو بقولي سم يسمك

أنا : اسمعي انا برة بالسيارة جيبي قهوتك و تعالي

الشب الوسيم يقاطع بلطافة و بلهجة انجليزية مهجنة

Hi Im Jano - photographer from

................ newspaper . im from India

ابتسامة متبادلة

Hi

- can you translate your question to ? relly they are surprised

- هي : انا اللي اتسربزت على الاخر

و بعد الترجمة وعدنا بانو رح يبعت الصور النا على المدرسة

و بعد فترة خبرني الموجه الفني اللي ذكرتو فوق .

انو صاحب المشروع بالرغم من انو حقد علي

بس اعجب بطريقة تفكيري ووعيي بس ما قبل ترشيحي لتطبيق البرنامج

و عمل تجربة نظرية و بحث مترافق معو

شو ذكرني بالقصة

مممممممممممممم اني ما بعرف اربط الحمار يا مياسي ؟؟؟؟ صعبة

للتقليل من الخيانة فقط

هي : انا حامل

انا : مبروك لكن مش استعجلت شوي . ابنك ما كمل السنة و نص

هي : هيك احسن ورا بعض بتربوا مرة وحدة

انا : اسم الله صار عندك اربعة و هادا الخامس و انتي عارفة الدنيا و الغلا و قصص الاقامة

و المدارس و انت بطلت تشتغلي و الاهم انك عم تهلكي جسمك و كل ولد مش عم ياخد حقو منيح

هي : لا هيك احسن خليه يبطل يبصبص و يتطلع برة

انا : ؟؟؟؟؟؟؟ زوجك ؟؟؟

هي : اه

انا : بس هاي مش طريقة يعني قصة اربطيه بالاولاد صارت قديمة شوفي شو اللي ناقصه

هي: ناقصه عقل و دين

انا : و انت راضية

هي: شو بدي اعمل هيني بحاول

انا : لا انت بتخلفي مش بتحاولي و هاي مش طريقة و.....

هي : الله يخليكي بلا حكي كتب و تلفزيونات بدي اخليه ما يعرف يرفع راسو

بعد فترة من الزمن و بوقت قياسي و بعد الطفل السادس

انا : هلا ما عاد يطًلع لبرة

هي : خف عن زمان صار بس مع وحدة انا عارفتها كويس

- يعني خفف خيانته و صار .. مرة بالاسبوع انا هيك حاسة

انا : ممتاز الله معك و للعاشر بكون انهد حيله (و بسري حكيت :و حيلك و حيل المجتمع معاه )