الأحد، سبتمبر 13، 2009

الفيس بوك و ادميتي

حدث معي كالاتي
من كم يوم كان الشغل شوي خفيف و ما في ضغط و دار الحديث بيني و بين بعض الاشخاص
الشخص : انت الك اكاونت على الفيس بوك
انا : لا ما عندي ( ببلاهة و بلادة انسان صايم و عطشان )
الشخص : هلا عن جد بتحكي انا دورت بالفعل على اسمك و ما لقيت بس لهلا من كل عقلك ما عندك
انا : يعني فكرت انو اعمل اكاونت بس ما فضيت او كسلت
الشخص : انت يعني ضد فكرة الفيس بوك
انا : لا بس عن جد ما لقيت وقت و بعملوا على روقان
الشخص : اذا ما بتعرفي انا بعملك واحد
انا : يا سيدي اذا احتجت اييا شي رح اسالك
و تم الحوار مع اندهاش الشخص بشكل كبير انو بنت في 2009 ما عندها اكاونت على الفيس بوك ( و الله طلعت الشغلة كبيرة )
في الردهة المؤدية الى غرفتي في العمل
فتاة عشرينية : و لك سمعت انو ما عندك اكاونت على الفيس بوك فضحتينا
انا : ول لهالدرجة الموضوع خطير ( قلتها بطريقة فلاح نزل على المدينة و مندهش ) خلص هلا بشبك و بعمل اكاونت
و بما انو العمو فيس بوك ما بكلف و مجاني فما في داعي تستنى على اول الشهر و الراتب و لا في اي داعي لاي سلفة او قرض و بنتسلى لنضيع الوقت شغلت الاب توب و شبكت على النت و تصفحت المدونة و الا بنفس الشخص الاول يدخل الغرفة ...
الشخص : عملتي اكاونت او لا ؟ يلا اعملي واحد و ابعتيلي لاضيفك .
انا في بالي بحكي يعني مو ناقصني انك طول اليوم بخلقتي و كمان اضيفك على الفيس بوك . لا رح اكون ديكتاتورية و اعملك بلوك او ما اضيفك اصلا
و بعد قراءة جريدة الغد و العرب اليوم و الدستور و طبعا فاضية و عم حاول اقتل الوقت قلت يلا نطلع من الرجعية اللي انا فيها و اعمل اكاونت بلكن بمر الوقت اسرع لاني بلشت اعطش كتير و ازهق
المهم و انا في خضم تسجيلي مرت بالقرب مني الفتاة العشرينية
الفتاة العشرينية : يلا سجلي و خليكي تصيري بني ادمة و تتحضري شوي ولك فضحتينا انت اول وحدة بشوفها بلا فيس بوك
انا : عم سجل
بصراحة ما التفتت للكلمة الا بعد وقت بتعرفوا استيعاب الصايم . هلا يعني انا بدون فيس بوك ما بصير بني ادمة و كمان بفضح ؟
يعني الفيس بوك باشا هو اللي بدو يعطيني صك الادمية ؟ و التحضر كمان ؟ طيب ما اغلب الشباب العربي اذا مش كلهم عندهم فيس بوك هادا الشي خلاهم بني ادمين و متحضرين و يحترمهم العالم المتقدم و صار النا باع و صاع و فاع في الدنيا من وراه
طيب انا مو شايفة هيك ببساطة متلا انو كتير من اهل غزة عندهم فيس بوك بس ما حدا عملهم اعتبار و ضربوهم بالفسفور حتى احنا ما قدرنا نعملهم اشي ؟
طيب الشعوب العربية المضطهدة من الخليج الى ابصر وين ما بقدر احدد لانو الخارطة قابلة للتغيير كل شوي . ما عمللهم شي الفيس بوك و هيهم متل ما هم و زاد قعدتهم اللي بلا فايدة على النت
طيب بلاش هلا انا رجعية يا سيدي . يعني على ايام ستي كانت الفضيحة انو البنت يشوف صورتها حدا غريب هلا بدنا نتقدم و نعرض الصور على النت يلا تطور و انا مش ضدوا اكيد لتقولوا عني متخلفة او جاية من كابول القصة مش هيك بس هلا عن جد الواحد بلات فيس بوك بينفضح ؟؟؟؟؟؟
بس انا عنيدة و مش الفيس بوك هو اللي بخليني بني ادمة و سكرت معي بسبب الصيام اولا و بسبب الافكار السابقة و سكرت الصفحة بنص التسجيل و قلت
يلا بلا وحدة متحضرة بهالعالم العربي يعني مشان العين ما تطرقنا - خليني انا قربان التخلف الموجود و المرئي كمان
انا شخصيا مش محتاجة اعتراف بادميتي من الفيس بوك و من اتنين ما بفرقوا بين الالف و كوز الدرة
طيب و اذا حبيت اعمل اكاونت في يوم ما ؟؟؟؟؟؟؟ اكيد رح اعمل لسبب غير اني اكون ادمية متحضرة بنظر عالم .....




هناك 18 تعليقًا:

ياسمين..وثلجٌ أبيض يقول...

صديقتي..
في حال اقتنعتِ وعملتي اكاونت
في المستقبل
ابقي عمليلي اكاونت معك بركي بتكسبي فيني ثواب..على هيك طلعت رجعية وكائنة مريخية انا مش آدمية
يه يه والله مش خبرية(:
لا يواخذنا مستر فايس بوك

jafra يقول...

ياسميــــن : فكرك الحق على الفيس بوك
او على العالم اللي مو عارفة بشو تتفشش لتثبت لحالها انها على قيد الحياة

تحية

همسة يقول...

اه كيف ما الك حساب عالفيس بوك صحيح D:

سيبك منهم ولا تدققي ولا تاخدي ببالك !!
شوفي قديش صغرنا البني آدم و حقرناه لحتى صار قيمه بحساب عالفيس بوك !!
هالمعيار بحد ذاته قمة بالتخلف

هامش : عندي حساب من حوالي سنة او اكتر شوي ..وحياتك وحياتك ..ما بعرف استخدمه
فـ بتسمعي بالبطالة المقّنعة .لو عرفوا رح يتهموني اني متخلفة مقّنعة $:

jafra يقول...

شايفة يا همسة لهلا انا رجعية
بتعرفي انا من العالم اللي ما بتحب التغيير بسرعة و مقتنعة بالمدونة

بس و الله قصة هالفيس بوك كبيرة و انا مش عارفة
بس حتى لو عملت اكاونت رح انضم لحزبك
التخلف المقنع :)

خالد السعود يقول...

سلام ..
والله لهلأ بدور على الباسورد ما لقيته ..
مش عارف اعيش بدون الفيس بوك .

مجنون يقول...

أذكر أني قمت بإنشاء حساب على الفيس بوك منذ زمن ..
ولم أتفقده إلا منذ فترة قريبة .

في المحصلة وعودة للتدوينة ..
من لا يعرف جفرا بعيداً عن الفيس بوك ..
لن يعرفها من خلاله ..

مجنون

Cognition Sense يقول...

هههههه

يا الله ما أطيبك يا جفرا

نصيحة من واحدة ضاقت المرار من فايس بوك: بلالك هالشغلة...
أنا شخصياً (و بعيداً عن التحصّر و الرقى و البني آدمية و كل هالحكي...) كتير بحب فايس بوك و مأدمنة عليه و بقضي وقت كبير عليه... يعني بياخد أوقات من وقت شغلي.

تحيّاتي يا أجمل مدوّنة

حسام كراسنه يقول...

ما عندك حساب على الفيس بوك..!؟ :) :p
يعني مفهوم الآدمية بتغير مع تقدم الزمن..!، على هذا الاساس انا الي سنة ونص تقريبا بني آدم، قبل ما أعمل حساب شو كنت...!
الله أعلم شو مفهوم الآدمية بعد سنة، عيش كثير... بتشوف كثير :)

jafra يقول...

خالد السعود
: له له يا خالد الا الفيس بوك كيف عايش هيك ؟؟؟:)
لازم تصلح غلطتك هاي كبيرة
:o
_______________________


مجنون : و الله خجلتني كلك زوء
( من لا يعرف جفرا بعيداً عن الفيس بوك ..
لن يعرفها من خلاله .. )

شكرا..........

____________________

Cognition Sense:

يعني طيبة بس مو كتير حسيت انو كتير طيبة انا :)......

هلا هو عن جد في اشياء حلوة بس مش مغرية كتير و اكيد في ناس بتحبوا و بتستفيد منو
بس انو بلا فيس بوك بكون بلا ادمية
صعبة شوي

فكرك بالايام الجاية رح يعملوا مصحات للتخلص من ادمان فيس بوك ؟؟؟؟؟
__________________________

حسام كراسنة : بالفعل هلا انت الك سنةو نص بني ادم انا لا لهلا ما صرت بني ادمة مو عارفة شو انا بالزبط بس ممكن اكون متلا ثلاجة :))))

و متل ما قلت عيش كتير بنشوف كتير

حمدى جعوان يقول...

اضحكتينى والله يا جفرا
نفس هذا الحوار دار بينى وبين بعض الاصدقاء منذ سنه تقريبا ... وحينها انفجروا فى الضحك عندما علموا بانى لا امتلك حساب على الفيس بوك ...
اضطررت ان اسجل حتى لا اكون الوحيد الذى لا يمتلك حساب فى الفيس بوك ... فقد خفت ان ياتى يوما وارى الاطفال تجرى خلفى ويضحكون ويقولون .... هذا الذى لا يملك حساب على الفيس بوك

قط البكتريا يقول...

يا فضيحتك يا ام شحادة , ويا شماتة ابله ضاضا فيكي
معقول ماعندكيش اكونت بالفيس بوك ؟؟؟ كيف كيف يعني مش عارف كيف منكن اعبر
يعني انا منصدم ومرتطم بارض الواقع ... امبوسيبول نو وي ... الله اكبر مستحيل

نرجع شوي للجد ونوقف الردح

مش لهل حد تخلف الناس شو كاين الفيس بوك يعني شو ميزاتو وشو ممكن استفيد وافيد منو
سيبك منهم دول ناس رايقة

jafra يقول...

حمدي جعوان : فكرك رح توصل لهالمواصيل و يركضوا الولاد الصغار ورانا........ لا الفيس بوك ارحم :)
نورت


قط البكتيريا : شايف طلعتلي ابلة ظاظا و خالتها و عمتها
ما كنت عارفة هالقصة كبيرة هالقد
و بعيد عن المزح انا بسال نفس السؤال اللي انت سالتوا

youssif يقول...

لأننا مجتمع استهلاكي ثقافته استهلاكية ...
حتي في التكنلوجيا ...
تم استعمال الموبيل او الاب توب او اجهزة المبيوتر و لو تتذكروا في بدايات الأنترنت الأميل ... نهاية بالفيس بوك ... مجرد موضة ... مجرد استهلاك ...

ثقافة استهلاكية بحتة ...
اعاننا الله علي الجهلاء

jumana يقول...

العمه على هل عالم شو بلا زوء.. بس برافو عليكي ما أصرتي فيهون..

أنا صرلي سنه تقريباً عامله اكاونت عل فيس بوك.. يعني منو هل شي.. أنا بستفيد منو إنو بشوف صور اخواتي و ولادون وأريايبيني، رفقاتي يلي تعرفت عليهون اونلاين.. من الأخر ناس موثوق فيها مو أي حد!و حاطه صورة وحده لا إلي من أد ما نقو علي!!
وما في حد من الشغل عندي عل ليست... خصوصاً العرب منون!!
بتسدقي إنو هل موقع سبب مشاكل كتير لعائلات ..

المهم هلأ عملتي اكاونت أما لسا؟؟؟ عشان اعملك أدددد هيهيهي!!

jafra يقول...

يوسف بالفعل احنا حتى الثقافة صارت عنا استهلاكية
يعني متل ايا وجبة سريعة مضارها اكتر من فوائدها
احنا تعودنا على الشلفقة حتى بادق و اهم الامور
الا من رحم ربي طبعا :)



جمانة : كيفك
الايام هاي ما في زوء يا جمانة انت عن شو بتحكي
الزوء صار تراث
بالنسبة للفيس بوك اكيد في فوائد منو و في ناس بتستغلوا بشكل صحيح
بالنسبة الي لهلا ما عملت اكاونت
اكيد رح خبرك لتضيفيني عندك :)

تحية

مهندس مصري يقول...

أنا مش بأحب الفيس بوك
أنا إضطريت لعمل حساب عليه لما وجدت بعض المدونين لا ينشرون بعض إنتاجهم و لا يعلنون عن بعض نشاطاتهم سوى عليه
فإشتركت به للمتابعة فقط
و لكنني لست شخصاً فاعلاً فيه فقلما أهتم بالبحث عن أشياء أقرأها عليه
و نادراً ما أنشر عليه أي شئ
ثم إنني لا أشعر فيه بشعور الدفء و االحميمية الموجدين بالمدونات
أحسه عالم بارد و مظهري و ملئ بالتفاهات
قد أكون مخطئاً و لكنني عرفت الكثيرين ممن لا يدونون و لكنهم عندهم حساب على الفيس بوك للتعرف على البنات و الإنخراط معهم في صداقات الشات و ما شابه
أي أن الفيس بوك لديهم تسلية و مكان ممتاز للعثور على الكثير من الفتيات
و هو مما يزيد نفوري من الفيس بوك

jafra يقول...

في ناس بحبو الفيس بوم يا باشمهندس و بيلاقوا فيه الغاية اللي هم بدهم اياها
و اختلفت الغايات
بس متلا في ناس تعرفوا على ابناء عائلاتهم بالغربة و ناس صارت علاقتهم افضل و اللي لقي اصحاب الو من زمان ما قابلهم
و في ناس ما بتحب القراءة و لا الكتابة لقيت غايتها بانها تتسلى و تلاقي حالها بالفيس بوك و نتاس متل ما اتفضلت و حكيت للتعرف على البنات و العكس صحيح
يعني هي حسب شخصية المستخدم

على كل مرورك اسعدني و كل عام و انت بخير

Haitham Jafar يقول...

لا للفيس بوك نعم لتويتر!

:-]
------------
هذا الإدراج = قديم
شو رأيك الآن؟ :)