الأحد، سبتمبر 20، 2009

بدي عيدية

من و انا صغيرة تعودت على قصص كتيرة بالعيد
تياب جديدة و شكلات شعر . و بوت او ايا يكن و حتى الثياب الداخلية لازم تكون جديدة
كان الها فرحة غريبة . يعني طول الليل كنت ابقى صاحية لاسمع بس ادان العيد و اتطمن على لبسي و على شكلات شعري
و بس يعلن اول شعاعه من الشمس اختراقه لسما الليل كنت فز من التخت و اعمل دوشة مصطنعة و متعمدة لافيق اخواني و اركض على ايد ستي بوسها و اسالها : وين العيدية
و ترد بس تلبسي اواعيكي - مع ابتسامة من عينيها
و نبلش بعد المصاري و مين معو اكتر و بما اني اكبر اخواني و اول بنت للعيلة كنت احظى بنصيب جيد من ثروة العيد
و مرقت الايام و السنين و ما كبرت على العيد متل ما بقولوا
لهلا بشتري تياب جديدة و كل شي لازم يكون جديد
و الي طقوس معينة ليلة العيد لازم اعملها بس فرق العيد زمان عن هلا بعدة اشياء اهمها اتنين
الفرحة .... ما عم حس بالفرحة ذاتها يا جماعة ليش ما بعرف يمكن لاني كبرت و فهمت شو يعني انو في عالم بمر العيد من جنبهم رافع راسو و ما بطل عليهم حتى بنظرة
تاني شي : بطلوا العالم يعيدوني قال كبرت و صرت انا لازم اللي اعيد بما اني من الطبقة الكادحة و بشتغل
يعني هادا حكي ... القصة مش بالمصاري
القصة انو العيدية بتفرحني - قال كبرت
مين قال اني كبرت ؟ مين كذب هالكذبة هاي ؟
عن جد بدي عيدية
و كل عام و انتو بخير :)



هامش : ما قدرت اعمل نشر قبل ما احكي
انو في عالم قراب علينا كتير بس العيد بضل يتكبر عليهم بفلسطين - العراق - اليمن حاليا - المخيمات - الفقرا -يمكن يكون جارك و يمكن تكون انت
و الله اعلم وين بكرا

هناك 25 تعليقًا:

حمدى جعوان يقول...

فكرتينى بايام زمان ..
استحاله انام ليلة العيد ( ومازلت ) صلاة العيد حاجه مقدسه اذا فاتتنى فاتنى العيد ( يمكن لان بلدى صغيره والعيد فيها هو الصلاة ) ... ولااااازم طبعا كله جديد فى جديد غير كدا ممنوع الخروج من البيت .. مكنتش بتفرق معايا موضوع العيديه بجد .. بس احسن حاجه كنت بتحصل عليها ( كانت الحضن الكبير بتاع امى _ الله يرحمها _ مفتقده بجد )
وبما اننا كبرنا خلااااص بقيت انا اللى لازم اعطى العيديه ولسه اولاد اخواتى كانوا هنا واخدوا كل اللى معايا

فكرونى بنفسى زمااان

- جميل اوى انك تفتكرى اخواتنا المسلمين فى كل مكان وخصوصا اهلنا فى فلسطين والمخيمات فى كل بلد عربى . وفى العراق وف اليمن واخواتنا المسلمين فى الصومال يارب فرج كربهم يارب

كل سنه وانتى طيبه ... وتعطى عيديه

حمدى جعوان يقول...

نسيت اعطيكى العيديه
هتلاقيها هنا

http://www.imbh.net/images/100dollar-large.jpg

ميسم يقول...

كل عام وانت بألف خير يارب بتعرفي شو كنت أحط أواعي العيد عا تخت(عاسرير)وأزعل كتير لما امي تشيلهوم وأعد أحسب أنا وأخوي كم نص راح نتعيد وين كانت النص كنز مع انه هادا الحكي من شي كم سنه بس حاسيته من زمان وللأسف صار يوم العيد متل أي يوم تاني:(

jafra يقول...

حمدي جعوان
كل عام و انت بخير
على فكرة انا بحس انو العيد في القرى و المدن الصغيرة بكون حميم اكتر و فيه تقاليد كتير حلوة
لازم صلاة العيد انا بحب اسمعها
و الله يخليك لصغار العيلة و تعيش و تعيد
و الله يفرجها على الكل
و وجودك هون اكبر عيدية
بس و الله محرزة هالمية دولار :)
تسلمالايادي

syriangavroche يقول...

كل سنة و انتي سالمة, و ينعاد علينا و عليكم و على جميع بني البشر بالخير و السعادة و الصحة و العافية


:) تحياتي

jafra يقول...

ياسين
شكرا الك
و ينعاد علينا بهداوة البال بس ما بدنا اكتر

إسلام محمد يقول...

/

طقوس العيد تتغير مع تغير نفوسنا ..
منذ أن كبرت قبل اربع سنوات أو حتى خمس لم أعد اشعر بفرحة العيد ولا بعطائه .. ولولا أن الله أمر بأن نفرح لكنت جعلته موسماً للكآبة !

همسة يقول...

كل عام وانتي بخير جفرا :)
انا باخد عيدية والله $: يعني بالمنيح بالسلبطة باخد ..ومعك حق انو تطلبي عيدية وقضيتك قضية عادلة

والله يفرح قلوب الكل و يفرج همهم وفعلا العيد مش عند كل

jafra يقول...

اسلام كل عام و انت بخير و ان شاء الله يعم الخير علينا
لا ما تكابي حالك الكآبة جاية لحالها فما تغلبي حالك
:)
يعني هي الايام بدها تمر غصب عنا
يمكن ما النا ايد بتغييرها على الاقل نفرح شوي و الله من حقنا

بتمنالك الفرح يا زميلة :)



همسة
و الله قضيتي عادلة فكرك بعملولي شي محكمة دولية لو نشرتها و جرصت العالم فيها :)ما اظن
لهيك رح اعتمد اسلوبي بالنق و اخدها غصب
اصلي انا ناصرية الهوى و بصدقوا لما قال ما اخذ بالقوة لا يسترد الا بالقوة
هم منعوا العيدية بالقوة و انا رح استردها بالقوة :)

كل عام و انت بخير و اللي بتحبيهم بخير

تحية

قط البكتريا يقول...

العبي غيرها ما راح اعيدك ...:D
كل سنه وانتي سالمه

مسرور يقول...

اولاً كل سنة وانت طيبة
ثانياًتفضلي العيدية 12255655$
ثالثاً مهما كانت الظروف من حولنا لازم نفرح بالعيد D:

Whisper يقول...

يا الله كأنك بتحكي عني
انا لهلا ما بنام الا وانا معلقه اللبستين قدامي و مجهزه كل اشي

اه لبستين وحده للبيت و وحده للطلعه...بتعرفي بنت وحيده و مدللله و بس كبرت دللت حالي انا :)

معك حق الفرحه اختفت, الحمد لله على كل حال
و بالنسبه للعيديه الله يخللي بابا وخالو الوحيدين اللي بعبروني
يعني عيديتي 30 دينار 20 من بابا و 10 من خالو
يلااا ولا البلاش :)

الله يفرجها علينا وعليهم يا رب و ترجعلهم فرحتهم بايامهم كلها

jafra يقول...

قط البكتيريا : له له له ما فكرتك هيك حريص :(
كل عام و انت بخير

مسرور : شو قصة الدولارات هاليومين
بس بتعرف و الله عيدية حلوة
بس مش قد وجودك هون :)

ويسبر : يعني في ناس زيي هيك بتعمل لبسة للبيت و لبسة لبرة البيت :))) فكرت انا لحالي
الله يخليلك البابا و خالو
بالنسبة للعيدية هلا بابا و ماما اجباري و كمان اخواني هدول ما بسميهم عيدية بسميهم اتاوة :)
انا القرايب فهون ما عنا حدا تقريبا
و الله الصغار هم الماكلينها شوكولا و عيديات
كل عام و انت بخير و الاهل كمان بخير

Wa2el يقول...

انا من زمان مؤمن بمقولة: العيد للصغار..
يعني نحنا الكبار ما عاد يعبّي براسنا العيد :)
أحلى شي بالعيد هو اتصال مع قريب\صديق مرت فترة طويلة ما سمعت فيها صوته..

كل عام وانت وكل الشعب العربي بخير..
وائل

jafra يقول...

وائل : لا العيد النا كلنا شو صغار ما ضغار يعني العيدية و امنا بالله كمان العيد
لا يا عمي انا بحب اعيد
:)
الفكرة بالاشياء البسيطة و انت قلتها اتصال او حتى مسج ممكن يخلينا نحس انو اليوم مميز عن بقية الايام

كل عام وانت و اللي بتحبن بخير

حسام كراسنه يقول...

بما انك من الطبقة الكادحة، عيديني :)
وحجة ما معي فراطة صارت قديمة، انا بفرطلك
العيد ممل جداً، بالنسبة الي صار كعك وقهوة سادة وقراص العيد
وكل عام وانت والامة الاسلامية بالف خير ان شاء الله

jafra يقول...

له يا حسام
انا اللي معي فراطة ما هم الطبقة الكادحة هم اللي بفرطوا للطبقات الاخرى
و لا يهمك
و العيد بالنسبة للبنات وقفة و تقديم و ان عصبت ابتسامة بتملي وجهك و لازم تكون لبق و على استعداد دايما لاستقبال الضيف اللي ممكن يدق الباب باي وقت

بس يعني تغيير هي وقفت على ضغط العيد ما كلو ضغط بضغط
على الاقل اجازة بترتاح فيها من شوفة كم بني ادم بالشغل

youssif يقول...

كل سنة وانتي طيبة ...
ذكريات جميلة ياريتها كانت تدوم ...
بس بإذن الهل إللي جاي يكون حلو برضه ...
كل سنة وانتي طيبة و بخير و سعيدة دايما يارب

jafra يقول...

يوسف و انت و الاهل بخير
تحية

jumana يقول...

jfra habebtii.. lesatna bel 3eed..
inchallah kel sene w enti salmi..

wala ana ma b7s bel 3eed hon.. bel mara.. w bfadel ashte'3el 3shan ansa :S

mwa mwa t3ali a3aydek .. ($$) ;) mabsora :P

jafra يقول...

جمانة هلا على طول جاية اذا فيها عيدية
و بالدولار كمان
يقطع المقاطعة لا لازم تحوليهم :)

كل عام و انت بخير
اشتغلي بالمكتب احلى ما تشتغلي بالقهوة و الشاي :) هادا هو العيدهون

نورس من شاطيء غزه يقول...

للعيد مذاق خاص بالذاكره اكتر مما هو في الواقع .
كل عام وانت بخير .

jafra يقول...

نورس من شاطئ غزة
كل التحية لك
و ينعاد عليك كما تتمنى و اكثر
مرورك اسعدني

الرفيق يقول...

كل عام جميع الضعفاء والمستضعفين بخير وما راح احكي انشالله السنة الجاي السلام بعم العالم بدي اتمنى انه كل الضعفاء يكونوا اقوى وبس ....
كل عام وانت بخير يا رفيقة ..
والله لو اني قريب عليك كان عيدتك 20 دينار ..\ابسط ياعم \
حتى خليتيني افكر احولك اياهم !

jafra يقول...

الرفيق
كيفك ؟ يعني قلنا بنستنى بعد رمضان ليرجع التركيز
خلص رمضان و بلشت العزلة
بس من حقك - انا عارفة و مقدرة
بالنسبة ل 20 ليرة
هالقد كنت بحزن و بكسر الخاطر ؟:(
بالنسبة للعام الجاي انا بدعي و بتمنى معك
هامش ( عن جد رجعلك تركيزك :) )