الخميس، يوليو 29، 2010

قبل الموعد ...










دارت في غرفتها اكثر من مرة


ككل موعد معه ترتبك و تبدو و كانها طفلة تبحث عن شيئ ما تاه منها اثناء اللعب


" وين حطيته يا ربي "

تبدو مستعجلة تماما مع ان الوقت ما زال رفيقها و تربت عقارب الساعة على كتفها و تقول لها خذي وقتك يا صغيرة

تتوقف برهة تنتبه انها وضعت فرشاتها على السرير بدلا من الطاولة

اخذت تسرح شعرها اترفعه ام تسدله على اكتافها ستلبس فستانها اولا ثم تقرر

اين ذهب الفستان ؟

وضعت القليل من حمرة الخدود - لا تريد ان تزيدها فخداها يصبحان كرزيان اللون عندما تنظر اليه

" هادا اللون مش حلو للصبح "

غيرت الفستان عدة مرات تاهت بين الابيض و الاسود و استقرت على الوردي

" قصير شوي . بس حلو "

لمت شعرها فردته مرة اخرى

" يا ربي "

قررت ان تضع القليل من احمر الشفاه الذي اشترته بالامس

" مش حلو مع لون الفستان "

خلعت الفستان و رمته كمن اذنب ذنبا و جلست على طرف السرير و ارتدت الخلخال الفضي نظرت اليه بحب

" انت رح تقرر معي شو البس "

عادت لترتدي الابيض وقفت امام المراة

ماذا يفعل هو في هذه الاثناء

" اكيد لبس بنطلون الجينز و البلوزة البيضا . الها ياقة فيها خط كحلي و ساعة و رش برفان و هلا بقلي ليش تاخرت . اه صحيح حط جِــل "

" لم على المرأة أن تكتفي بالرجل كما هو او برجولته بينما هو يريدها دوما كحلم مشرق لا يسمح له ابدا بالغروب و ان حدث ... يحل له المجتمع ان يتزوج عليها و لا يلومه احد ان رافق غيرها ؟

عليها ان تتانق بينما هو لا يتعب نفسه في اغلب الاحيان بل يكفي ان ينظر اليها بحب و كلمة ثناء عن جمالها فتنسى هي بدورها تعب الوقوف امام المراة و الحيرة . "
في الساعات التي امضتها هي في التانق كانت تفكر به و كيف تريد ان تعجبه و يراها دوما مشرقة

ليتنا مثل الرجل لا يحتاج كثيرا ليتانق يكفينا فيه رائحة العطر و التبغ .

هل ارتدي الكعب العالي . اين سنذهب ؟ في بالها الف سؤال .

امسكت الهاتف تريد ان تساله ؟

لا

قررت ان ترتدي الكعب العالي لتوازيه في الطول قليلا

و حملت حقيبتها و مشت

" اه نسيت الساعة و الخاتم و .......... "

....

التقته على باب الحديقة و همت بركوب السيارة نظرت اليه نظرة فاحصة سريعة و ابتسمت

يرتدي البنطلون الجينز و البلوزة البيضاء و لكن رائحة عطره كانت اقوى

" شو هالحلو ؟ " ......... هو

احست بوهج بداخلها و ارتفعت الحرارة الى ان اصبح الكرز يحتل خديها

" كيفك . اتاخرت ؟ " ......هي

" ابدا . بس نص ساعة متل العادة " ............. هو

نظرت مرة اخرى اليه و مدت يدها لياق التيشيرت و عدلتها و قالت في سرها .

لو كنت فقط تغير بنطال الجينز لعرفت لم تاخرت "

هناك 15 تعليقًا:

أشرف محيي الدين يقول...

مرحبا جفرا

أسلوب رائع كالمعتاد في طرح أفكار عميقه :)

ولكني لست مع تعلق المرأة برجل لا يهتم أن يكون بكامل أناقته أمامها فهو كما يحب أن يشاهدها دائما في أبهى وأروع صورة فمن حقها هي كذلك أن يتأنق دوما لأجلها .

كل الود

لبنــــــــــى يقول...

اشرف انا محظوظة انك بتابع خربشاتي
و انك اول تعليق هون :)
يمكن هو مزوق بس مهما كان الرجل بيهتم و بخصص وقت ليلبس و يحلق و يجهز حالوا
المراة دائما بتفوق عليه
خاصة بالوقوف امام المراة قبل اي موعد او date بالاصح

نورت :)

قط البكتريا يقول...

المرة تهتم بالتفاصيل اكثر من الرجل ... بصراحه الرجل يميل للتبسيط لامور ... لدرجه انو بعض الاحيان بكون مستفز ....


عفكرة مستغماني هيوتها جنبي وبتقلك ايش يا طميتنا

لبنــــــــــى يقول...

قط البكتيريا احلام شو بتعمل جنبك قلها قومي اكتبيلك شي رواية اشتقنالك

يعني هادا اعتراف رجولي بحت
و بتعرف اكتر شي ممكن يكسر البنت لما تكون واقفة على المراية 100 ساعة و لما يشوفها ما يعلق ولا شي يعني كانو ما في شي جديد
باكدلك انو الانثى وقتها الادرينالين عندها عالي و ممكن تصور قتيل فدير بالك :)

قط البكتريا يقول...

يسلمو على النصيحه ... عموما انا كل ما اشوف بنت صار الي فترة مش شايفها بقلها نحفانه :D , حتي لو نصحانه كانت هع هع هع

مستغماني بتقلك وين اروح انا بين الوحوش ...
قصدها وحوش الكتابة الجدد انتي وويسبر

Kenan Alqurhaly يقول...

حلوة كتير
على فكرة هو بيكون مفكر حالو تعب وهلك حتى طلع بهالمنظر واذا ضل دقيقتين ع المراية منشان الجل هي بيعتبرها أكبر تحدي بس مستحيل الذكر يقدر تعب الصبية من أجله لأنه تعود ع الموضوع وأصبح حق مكتسب بالتقادم :)
منيحة نبهتيني ع هالنقطة والله أنو تغيير الجينز مفيد أحيانا :)

لبنــــــــــى يقول...

طيب قط البكتيريا اتبنانا انا وويسبر و عملنا شي كتاب و مسلسلين و فيلم بلكن بنروح على كان


شفت هادا هو الاستغلال

و على فكرة هاي طريقة حلوة لتحي او تعبر للبنت فيها و الله نحنا بنكيف على هالموضوع
:)))
كشفت اسرار البنات انا
اي نصيحة انا جاهزة ابو البكتير






كنان : لا تغيير الجينز مش مفيد احيانا و بس لا مهم و ضروري يعني بصراحة احكي شي و ما يزعلوا الشباب
تخيل انو دايما لابس جينز دايما يعني بصير محفور بالذاكرة انو بجينز زي الرسوم التحركة اللي ما بغيرولهم اواعيهم بالمرة
صح ؟

هيك شكلو الصبايا رح تحقد بس و الله انا نيتي سليمة
و اي نصيحة كنان انا جاهزة :)

sheeshany يقول...

جميل جدا ً و الله.
ما بين صمت الرجل -في أفعاله كما أقواله- و ثرثرة المرأة -أيضا ً في أفعالها- :)

لبنــــــــــى يقول...

هيثم المراة دائما تثرثر حتى بافعالها
بالزبط متل موج البحر لو سكت في عوالم كتير رح تسكت
لهيك خليها تثرثر
:)

نورت

Whisper يقول...

ما حد يزعل مني....بس انا بحب كتاباتك اكتر من مستغانمي :)


"تبدو مستعجلة تماما مع ان الوقت ما زال رفيقها و تربت عقارب الساعة على كتفها و تقول لها خذي وقتك يا صغيرة "

جميل جدا....

كشفتي قصص البنات يا جفرا...بس يلا بسيطه و لأكشف سر انا كمان, العطر مهم جدا , وحتى هالشي اللي ما باخد ثواني في شباب بنسوه :(

@ قط البكتريا
ههههههههههه ضحكتني على " نحفانه" هيك لازم نحكي للبنات اللي بتشوفهم عن سرّك :)
طيب اذا كانت سمنانه...بتقدر تخبي نظرة الازبهلال عن وجهك ؟؟ اتوقع حتنصدم وما راح تعرف تحكي وقتها :)

قط البكتريا يقول...

@ويسبر

هع هع هع هع , ضحكتيني ويسبر وانا مش ناوي .

بدور على كم كلمة لطيفة عشان ما انحرج

لبنــــــــــى يقول...

ويسبر : كيفك
لا يا ويسبر طولي بالك
هي في زي احلام بالنفس الطويل
بيني و بينك انا لو بعيد قراءة اللي بكتبوا مرة وحدة بشطبوا


احكيلهم يا ويسبر قديش العطر مهم
لانهم بلشوا يتناسوا هادا الموضوع تماما :)


كوني بخير ويسبر

سلام

لبنــــــــــى يقول...

بكتيري : ان شاء الله دايما بتضحك
يا سيدي انا بقلك استمر يعني مادام الصبايا مبسوطين شو يعني هم مو عارفين
لا عارفين
بس ما بحبوا كتير الحقيقة المرة

فاتيما يقول...

الله


رقيقة جداااااااااا
يا جفرا

انتى بتوصفى حال
كل حبيبة و عاشقة


يا حبيبتى التفاصيل الدقيقة
دى هى شغل المرأة الشاغل
و هى ما يميزها عن الرجل


فكرة التأنق
حتى تتوهج فى عيون حبيبها

و اوعى تفتكرى
انه مش بيلاحظ هذا المجهود


لااااا
بالعكس


و هذا ما يجعلنا محبوبات
من وجهة نظرى مختلفات عن غيرنا


مش الشكل ..لأ
ما وراء الشكل


اللى معناه
الاهتمام بإرضائهم
و ان نكون جميلات فى عيونهم
دا نوع من الاحتفاء بيهم
و درجة من الاهمية ليهم
و شكل من اشكال الحب

و كمان عجبتنى جدااااااا
تفصيلة انها تعدله اللياقة دى
منتهى الرقة و الأنوثة
و يخربيت رقتك يا جفرا

على فكرة
يخربيت دى
مش شتيمة


دى زى كلمة فيروز الرائعة
يخربيت عيونك يا عالية


فيخربيت تفاصيلك يا جفرا
شو حلوييييين


خالص حبى ليكى يا عزيزتى

لبنــــــــــى يقول...

فاتيما هنا يا مرحبا
نورت يا قمر
بجد زيارتك خلتني مبسوطة
على فكرة كلمة يخرب بيتك بنقولها هيك على سبيل المودة دايما :)
الاناقة نسبية بين المجتمعات و الاشخاص لكن الرابط الاساسي دائما ان الانثى هي صديقة المرآة و هاي قوة منها تخيلي اهتمامنا بانعكاس الصورة بيعكس قوة شخصية المراة عكس ما الرجل بيتهكم عليها بهاي الخاصية
اي انسانة بتحب رح تكون قبل الموعد هيك او اكتر
و اكيد هو رح يهتم انو يشوفها بطريقة خاصة فيه على اي حال رح يشوفها حلوة
بس هلا بخاصة 2010 صار لازم الرجل يكون الو اهتمام اكتر بشكلوا بس اكيد ما يبالغ فيه
و متل ما قالت ويسبر
العطر من الاساسيات


نورت كمان مرة
كوني بخير