الأربعاء، أغسطس 12، 2009

هو و هي - جدل البديهيات -



اجتمعا الاربعة كما ايام الجامعة في احد المطاعم المطلة على البحر


استعادوا ذاكرة الايام التي اوقعتهم هم الاربعة في شرك الزواج و الخيار المقدس


هما


هو و هي يجلسان على طرف الطاولة قد فاض بهم اختلافهم في كل شيئ الى الارتباط و مع انهما متزوجان منذ اربعة اعوام لم يتذكر ابدا كيف تشرب قهوتها و هي لم تتذكر ابدا ان لديه حساسية مفرطة من البيض فتعده و يبدآن بالجدل


لكن مع اهمال كل التفاصيل الصغيرة استمرا


الحياة بالنسبة لهما مجرد استمرارية بغض النظر عما يستمران به من اختلاف في كل شيئ


الاخران صديقان من ايام الدراسة الجامعية قرر الاربعة الالتقاء ببعضهم على طاولة مستديرة


هو و هي يتبادلان الحديث و الضحك و الخلاف في نفس الدقيقة


و بعد الغذاء و مشادات الحلفان العادي في كل مطعم عربي حول من يدفع الحساب


استغرق الرجلان في الحديث عن السياسة





سالتها بعد النظر مطولا الى شعرها البني الطويل


- اليوم شعرك بجنن عند مين عملتي


هي - عند جو هادا اللي الو محل في الدائري السابع اعلانوا كبير و محلو ثلاث طوابق عرفتي ؟


- لا بس لازم اروح اجربوا بصراحة شعري خربان - و مين اللي بعملك اياه ؟


هي - جو نفسو رح اعطيكي الكرت


و اذا بزوجها يلتفت اليها


- مين جو


- اللي بعملي شعري


- زلمة ؟


- اه حبيبي ولو ما انت دايما بتوصلني هناك ؟


- بس ما بعرف انو اللي بعملك شعرك هو السيد جو


- و انت عمرك ما سالتني اصلا انت ما بتسالني ابدا على ايا شي


- من غير ما اسال يا عمري من البديهي انو اللي بعملك شعرك وحدة مش واحد هادا اللي انا بفهموا


- و طلع واحد شو الفرق


- الفرق اني ما بقبل


- ليش


- يا ستي من الغريزة الرجولية اني ما بقبل واحد يمسك شعرك و ..... انتي انجنيتي ؟


- اي غريزة هلا من كل عقلك انت بتحكي


- هلا في عقل ضل انت دايما تصرفاتك غلط اسألي كل اللي في الشارع بترضى زلمة يعمل لمرتك شعرها بقلك لا


- اها 99% من الرجال العرب ما برضوا


- على اساس اني من باريس


- لا مش على اساس ايا شي بس لما اغلب رجال البلد هاي ما برضوا انو زلمة يعمل شعر نسوانهم ممكن تفهمني ليش كل يوم بفتح محل كوافير جديد و اللي بشتغلوا فيه رجال . انت ما بتسمع عن جو وعن مروان و عن كتير نجحوا و ملينوا يعني اللي بعملوا عندهم جايين من برة البلد؟


- هاي مو مشكلتي احكيلك احلقي على الصفر احسن من انو رجال غيري يمسك شعرك و انتهى


و ظلت المناقشات سارية و لكن الحياة استمرت و مازالا على قيدها يتجادلان .





و الآخران لهما حوار اخر

















هناك 8 تعليقات:

ياسمين..وثلجٌ أبيض يقول...

هذا هو المضحك المبكي
وبيقولولك لازم الحياة الزوجية يكون فيها بهارات وتوابل
لك خليني عزابية كل عمري وما بدي هالتوابل(:
حوار ممتع كعادتكِ سيدتي الجميلة(:

ماء تشرين يقول...

بصي يالجوء هما اصلا مختلفين جدا وفي ستات كتير بتحط نفسها ند لرجل مع انو للمرأه طبيعتها ولرجل طبيعته التى تختلف تماما عن المرأه لماذا دائما حواء حطه راسها براس الرجل هو مش اعلى منها اصلا هو بس مختلف


دمتى بكل الود والحب

jafra يقول...

ياسمين كم تسعدني متابعتك لي الدائمة التي تشجعني دوما على ان بياضا متالقا سيغزو فكري مع كل خربشة اذنب و اقوم بها

البهارات و التوابل حكي اللي ما الو حجة يا صديقتي
و على رايك عزابية و ما بدنا هالتوابل اللي بتنقص العمر :)
تحية

jafra يقول...

ماء تشرين :
كيفك ؟
القصة مش رجل و امراة و اختلاف هو وين التوافق و على شو
يعني هي و هو مختلفين باقل الاشياء و الحوار بينهما اختلاف لابسط الامور
المهم اين ميزة التوافق
لاحظي ان زواجهم نجم عن اختلاف
و هي مختلفة فقط
مش حابو تكون ند بس يمكن بنقصهم بعض الاتفاق


يسعدني وجودك :)

مسرور يقول...

النكد العربي الاصيل
في ثوب الابداع
-----
حوار جعلني استمتع بالنكد

تحياتي لك

jafra يقول...

مسرور :
في وقتها يكون اسمه نكد بس بعد فترة حسب تقبل الاشخاص طبعا
بكون اسمو قلة عقل مع ضحكة

تحية

Amjad Wadiِ يقول...

مرحبا

هاي قصة والا حقيقة :)

صراحة هذا جدال لا ينتهي .. و ما راح يفضي الى نتيجة ... بسبب بسيط انه كل واحد حاط ند للثاني زي ما تفضلت تشرين

jafra يقول...

امجد :
نورت المدونة المتواضعة
بالنسبة للقصة يعني فيك تقول انها نص حقيقة و نص من خيالي انا

الندية ام التكامل ؟ هي هون مشكلتنا اللي ما رح تنتهي
بس صدقني انا بعرف قصص زواج ناجحة كتير سببها التكامل بين الزوجين مع بعد الندية

تحية