الخميس، سبتمبر 10، 2009

حدا بس يرفع معنوياتي - و بكفي حكي

بصراحة
مش عارفة شو احكي بس رح احكي شوية حكي يمكن حدا يفهم علي
يعني مع كترة البرامج الدينية في الفضائيات و كترة المساجد و تغيير المناهج و اضافة مناهج حيانية بتهتم بالانسان و تهذيب الافعال و ضبط النفس
مع ازدياد عدد الجامعات و ازدياد عدد المتعلمين بتناسب طردي يعني كل يوم بتفتح فيه جامعة او كلية شكل بتلاقي بكل بساطة ازدياد الاقبال على الدراسة
غير الانترنت و الفيس بوك و المدونات
و غير الفضائيات و النساء العاريات
غير الحكي عن الديموقراطية و الازدياد في طلب الحريات
بس يا جماعة هو اشي من اتنين
يا صايبني عمى الوان . و هدا شي ممكن ....
يا انو عم شوف اشيا ما حدا بشوفها .....
و السؤال هو كالاتي :,,,
ليش السلبيات بمجتمعنا عم تزيد يوم عن يوم ؟
ليش الجهل و الانحطاط الاخلاقي عم يزيد ؟
ليش الاتجار بالبشر عم يزيد ؟
على ايام ستي الله يرحمها ما كان في منظمات حقوق انسان ولا فضائيات دينية بتبث 24/24 و لا شيوخ زي اللي بطلعوا على التلفزيون و لا انترنت طبعا و يا دوب هو الراديو و كم ساعة بث على التلفزيون بس كان ياجماعة في اخلاق اكثر و قيمة اعلى للانسان
يعني متلا :
انا الي فترة مش عم اشوف ظاهرة ايجابية بالمجتمع ولا اي ظاهرة وحدة .... و عن جد عم احكي
هلا طبعا موضة انفلونزا الخنازير مع هيك لا عناية بالنظافة زادت و لا تعقيم و اول يوم دوام بالمدرسة العالم نزلت تبويس ببعض لقالوا بس و الاوضاع متل ما هي تكدس بالصفوف و زيادة اعداد الطلبة و الحمامات متل ما هي و عاملين غرفة للعزل متر بمتر و حاطين فيها و حدة تكيف و ضو معلق بالسقف يعني الطالب اللي بشتبهوا فيه يا بموت من الرعبة يا بموت من البرد او رح يطلع زقرت و يتعود على اسلوب المخابرات بالاستجواب .
طيب بلاش
مو هلا رمضان . و العالم كلها عاملة حالها شيوخ و بتهدي و بتفتي انا مش شايفة اي مظاهر ايجابية في المجتمع ؟؟؟؟؟
و لا ايا ظاهرة .....
يمكن المرض اثر علي كتير بس انا متاكدة من اللي بحكيه ...
دعما لمعنوياتي اللي شايف شي واحد ايجابي يبقى يحكيلي لاني نوعا ما دخلت بمرحلة اكتئاب
و منيح ما ادخل بالمرحلة اللي " الرفيق" فيها :) و هي الغيبوبة ...

( خربشتها و درجة حرارتي 39.5 يعني ما حدا يعتب علي :) )


هناك 13 تعليقًا:

غير معرف يقول...

للاسف يا ريت كان فيني ارفعلك
معنوياتك بس من وين يا حسرة الدنيا كل مانها لورا وللاسوء
يعني لا معك عمى الوان ولا شي لانو اللون واحد وين ما رحتي وكلامك كفى ووفى

وشوشة:معافاية وسلامة قلبك ..ان شاء الله ما على قلبك شر..خففي مشاهدة التي في حفاظاً عالصحة(:

لبنــــــــــى يقول...

ياسمين
و الله يا دوب عم بتفرج على مسلسل واحد اسمو شتاء ساخن و جابلي اكتئاب فصرت اسمع الاحداث من ماما احسن ما انعل لاني تقريبا وقفت مع المجرم و انحزت الو تماما و الله يسلمك

على العموم وجودك هون رفعلي معنوياتي
:)

خالد السعود يقول...

صباح الخير جفرا ..
الله يسترك من الغيبوبة..
وهون بس بصير الموضوع بخوف .
احكيلك اشي وممكن يكون فيه منه :
مش المشكلة بالمظاهر الي بتشوفيها المشكلة بالاصل هي بالأيمان وبالمبادىء المشكلة بشكل عام بالاسس ..
وديري بالك من الغيبوبة

youssuf يقول...

الأيجابي في مجتمعنا مفيش ...

الأيجبيات دائما فردية تخص حياتك الشخصية ...

يمكن ان تجدي فيها ايجابيات ...

لكن المجتمع مستمر في الانحدار ...

لأنه متمسك بالمظهر و تارك المضمون ...

مجتمع رد فعل ... و ليس مجتمع فعل ...

مجتمع يخشي و يهرب من مواجهة عيوبه و مشاكله ...

و يزينها دائما و يهرب منها بالمظاهر و التقاليد و يبقي الألم مستمرا

تحياتي لكي و علي التدوينة و المدونة

لبنــــــــــى يقول...

خالد السعود : كيفك
لا انا متاكدة انو الغريزة الانسانية اللي هذبتها الاديان السماوية و عملت كنترول محترم عليها ما اله لا هي و لا الاديان
المشكلة صدقني فينا نحنا
و نسبة الايمان فينا
اصلا بتخيل كمان عشر سنين رح نتحول لبلاستيك و نفقد البديهيات و الغريزة الاولى للانسانية و اللي هي الشعور
و نمشي هيك
ساعتها كلنا بغيبوبة رسمي

هامش : ما تخاف علي من الغيبوبة انا و الرفيق بنحب نتناوب عليها :)

لبنــــــــــى يقول...

يوسف : نورت .....
بتعرف انا كان قصدي انو نفسي لاقي بس واحد بيعمل شي منيح بلاش يعمل يتخد قرار منيح
و الو شخصصي يعني المجتمع منظومة افراد لو واحد عمل منيح يمكن الباقي يحسوا على دمهم شوي
و على فكرة انا من الباقي لاني لاحظت انو من فترة ما عملت شي ايجابي ؟؟

زيارتك اسعدتني كتير
كن بالقرب :)

لبنــــــــــى يقول...

قط البكتيريا
يعني بتفاؤلك رفعت معنوياتي شوي بس للاسف انا عم شوف انو المظاهر السلبية اللي كانت على استحياء في التسعينات صارت موضة بالالفين و طالع
بتعرف المشكلة مش بالنظم و لا المبادئ احيانا بقول انو الانسان بحب يحصر نفسه بمبدا مغاير للي بامن فيه ليكون اسهل عليه انو يكفر فيه

ما بعرف بس يا ريت تكون الفكرة واضحة

نورت مدوني

Whisper يقول...

سلامتك من الاكتئاب و الحراره و الغيبوبه

انا معك بانه في انحطاط بالاخلاق و بالحياه اجمالا عند بعض الناس
لكن بالجهه المقابله انا شايفه انه في صحوه دينيه كبيره عند الشباب خصوصا

ما بنكر ان في نسبه لا بأس فيها من الناس بتغطو بغطاء الدين ليقومو باعمالهم القذره, وان في ناس بفصلو الدين عن الحياه بمعاملاتهم, لكن برضه في نسبه ملتزمه و عايشين حياتهم بطريقه صح بعيده عن التزمت و التخلف والانحطاط

بعرف ان انت ما بتحكي عن الدين بالذات لكن الدين دائما بهذب الشخص و بنعكس على التصرفات الحياتيه كلها :)

غير معرف يقول...

slamet albek habebtii..
bs be2oli hae 3alamat esa3a w allahu a3lam :)

y3ni arabeeet!! Lol

لبنــــــــــى يقول...

ويسبر : كيفك
القصة مش قصة دين مع انو في مجتمعنا الشرقي ما بنقدر نفصل الدين عن المجتمع بس المشكلة انو الكل عم يحكي هلا بالدين ؟؟؟؟؟ و كلو متناقض ؟؟؟؟
انا من الناس اللي تابعت و سمعت و عطيت نفسي فرصة كويسة لكن ضعت
و حاليا بعتمد على حالي
و حكاية الشباب اللي عم تتجه للدين في سؤال ؟؟؟؟ ايا دين و ايا اتجاه و كيف عم يتوجهوا
ما كتير بتوجهوا للدين منهم اللي فجروا صالات الافراح بعمان
انا من راي دريد لحام
انا مش مشكلتي مع - الله - ( جل جلاله طبعا ) انا مشكلتي مع الناس اللي بفكروا حالهم محل الله

طيب و اذا الشباب اللي بتوجهوا للدين كتروا ليش السلبيات عم تزيد
وين المشكلة
ما بعتقد انها بالدين
بس بالعقل الانساني اللي صاير عندو احتباس حاد للافكار و الاتجاهات

لبنــــــــــى يقول...

جمانة يا هلا وين عم تغطي ؟؟؟؟ عم نشتالك
بتعرفي زمان قبل صلاح الدين الايوبي قالوا انو اللي عم يصير من علامات الساعة و كمان عند مقتل الامام الحسين حفيد الرسول صلى الله عيه و سلم قالوا انها من علامات الساعة
ووقت تفجير البرجين كمان :)
يعني فكرك هلا كل ما يصير شي بدنا نقول من علامات الساعة و كلنا نستنى
قوليلي وين رح تستني لاجي معك
لنتسلى
لانو القصة طويلة الهيئة :)

حسام كراسنه يقول...

"ان لم تستحي فاصنع ما شئت"
"لكل دين خلق وخلق الإسلام الحياء"
... اذا حد رفعلك معنوياتك خبريني :(
انتحار، انحطاط أخلاق، عشائرية، قتل، عطوات، سرقة، خطف...
البلد ضاعت

لبنــــــــــى يقول...

حسام كيفك ؟
بتعرف اللي رفعلي معنوياتي انو في ناس زيكم حاسة بنفس الشي هادا بعني انو انا لهلا ما دخلت بشي فوبيا :)