الاثنين، فبراير 01، 2010

اجازة الربيع


اليوم رسميا بدأت اجازة منتصف العام الدراسي .
ما كنت يوم متحمسة لاجازة زي هلا
دائما قبل اي اجازة حتى لو لمدة يومين كنت اعمل مخطط و مشروع
و برنامج و قصص بس لهاي الاجازة طعم اخر
عن جد كنت محتاجة لاجازة لاعيد ترتيب اوراقي لعدة اشياء منها
اتعلم طرق جديدة بالتعليم و وسائل احدث و ترتيب علاقتي بالعمل و بالغير
اكتشفت اخر فترة اني انسانة مدمنة عمل

اذا كنت عم تشتغل 24على 24 و بتحس حالك مقصر ؟؟؟؟؟

اذا بتنام 4 ساعات بس في اليوم و يتحس انك ضيعت وقت بالنوم لانو في شغل اهم منو
و لما تنام تحلم في الشغل او بنتائج المسابقات او حتى بالتصليح ؟؟؟

اذا كنت عم تركض بالشغل و مش ملحق و كل مرة بتكون دايس و حاسس حالك عم تفوت بالحيط ؟؟؟؟

عم تأجل كل علاقاتك الشخصية لتخلص الشغل
و الشغل ما عم يخلص و تخسر اصحابك و علاقاتك
و تبطل تشوف اهلك اللي انت ساكن معهم بنفس البيت
و لتعرف اخبار اختك او اخوك لازم تتصل فيهم لانك ما فضيت تحكيهم
و انت معهم في البيت لانك متسمر قدام الكمبيوتر ؟؟؟؟

و انو اذا خلص مرحلة الضغط بالشغل بتحس بفراغ و انك بدك اي شي لتشتغلوا ؟؟؟؟
اي شي بس ما تقعد فاضي ؟

اعرف انك مدمن شغل و انك قربت من حالة الانهيار

و انك رح تحس بملل و وحدة

و يمكن تتطور الامر معك لتوصل لاكتئاب و مرض نفسي

و لهيك ما خططت لاي شي بهاي الاجازة و حابة انها تمضى ببديهية - لمدة اسبوعين لا غير

يعني كيف ببديهية ؟؟؟
يعني اصحى الصبح اشرب القهوة و اسمع فيروز و اروح امشي على البحر و العصر اقرا كتاب و غيروا

بدون خطط و اقعد مع ماما و نثرثر و ننم شوي
و ممكن اضيف للخطط اني اتفرج على التلفزيون
بس بعد هوسة الكرة ما تخلص و يمكن سينما

و يمكن و يمكن ........................


افتتحت الاجازة بقراءة ثالثة ليوميات الحزن العادي - محمود درويش

و رح روح شوف لي كتاب بالمكتبة - مشتاقة للقراءة بشكل مو طبيعي

اذا بتنصحوني بشي كتاب ما عندي مانع :)

هامش : على فكرة يا رفيق لهلا ما نزل عنا الكتاب - تخيل ؟؟؟؟صرت لافة اغلب مكتبات البلد و ما في الو اي اثر و ممكن ادخل مكتبة و ما يعرفوا اسم درويش ؟؟
تخيل اني لهلا ما قراتوا
وحتى على النت لاني بحب درويش على الورق لانو بكون اقرب و بتكون ذاكرتي اقوى على الورق

هناك 10 تعليقات:

أشرف محيي الدين يقول...

صباحك جميل jafra

في البداية أتمنى لك إجازة بديهية سعيدة مع صوت الرائعه فيروز وأمواج البحر وهي تعانق حبات الرمال لعلك تسرقين لحظات جميلة من هذا الزمن الكئيب .

بصراحة أنا في هذه الأيام بدأت بالقراءة بكثافة للرائعة أحلام المستغانمي .

ولا أدري إذا كنتي قد قرأتي كتابها
الجديد ( نسيان com ) والذي يتناول مجموعة من النصائح الموجهه للمرأه العربية .

كل التحية .

لبنــــــــــى يقول...

صباح النور اشرف
شكرا لتمنياتك و اتمنى لك يوما دافئا
مطر غزير عنا
احلام رائعة لم افوت لها اي من كتبها او المقالات لكن صدقامش متشجعة ابدا لموضوع كتابها الجديد مع اني ما قراتوا بس مقتطفات
بس شكلوا لازملوا قراءة
تحية

mohra يقول...

جربى "يوم غائم فى البر الغربى" لمحمد المنسى قنديل

اجازه سعيده

لبنــــــــــى يقول...

مهرة مساء الخير
و بصراحة ما سمعت عنها قبل هيك و حابة اقرا شي جديد
و بما انك نصحتيني فيها رح تكون باول القائمة بس يا رب لاقيها عنا هون

شكرا الك :)

رفيق يقول...

بتمنالك اجازة سعيدة .
انا حكتلك من اول اشحنلك الكتاب وانت ما سمعتي مني .

لبنــــــــــى يقول...

رفيق : اكيد عم تشرب قهوتك
شكرا لتمنياتك
تشحنلي الكتاب ؟؟؟ يعني العرض لهلا مستمر :)

تحية

Whisper يقول...

الله يعطيكي العافيه

ان شاء الله بتنبسطي فيها لاخر ثانيه لتعطيكي دافع للفصل الجاي اللي واضح انه راح يكون متعب

لبنــــــــــى يقول...

الفصل الاول كان مرهق نفسيا جدا
و اليوم كان عندي احساس غريب بيقولي ما تداومي و قدمي استقالتك
لاني تعبت
هاي المهنة لازم تندرج تحت بند المهن الصعبة جدا جدا جدا

Unknown يقول...

التدريس

مهنه مستحيله انا خلص تركت الكليه ورجعت للبرمجه

اسهل واصفى راس بمراحل

لبنــــــــــى يقول...

مياسي : مبروك الشغل الجديد
بس انا بحب التدريس عم تحسي حالك عم تنجزي بالمجتمع بس ظروف المعلم عنا بالوطن العربي خاصة المعلم العبي في مدرسة عربية جدا سيئة من المرتبات لعدد الحصص لتوفير احتياجات المعلم من وسائل و راحة و قصص كتيرة
انا ما بخفي عليكي انو عم دور على شغل بشكل دائم بس حابة انو يكون مناسب و بحقق فيه شي مش ايا شغل بمرتب و السلام لاني انسانة ملولة بطبعي و ما بحب قعدة المكاتب كتير فحابة استقر بشغل الو مواصفات قريبة مني و خبرتي لحتى ما اكون ضيعت هاي السنين على حكي فاضي
و مع هيك ما عم لاقي مجال كويس او مكان ارتاح فيه
التدريس صعب كتير خاصة في هالايام لكن بالنسبة الي نوعا ما متعة بس اكيد محدودة الوقت و رح اضل ادور على مكان مناسب

بتمنالك التوفيق
تحية