الاثنين، أغسطس 30، 2010

تخت شرقي


من أول رمضان و أنا في غيبوبة


مش عارفة الوقت كيف عم يمشي بطريقة غريبة - سهر طول الليل و نوم بالنهار انتقاما لرضان الماضي اللي داومت فيه تخيلوا صيام و ما في قهوة و حر و اربعين طالب راجعين متل القرود بدهم يصرفوا كل الطاقة اللي حوشوها طول 3 شهور على راس المعلمة الصايمة


غير الادارة و القوانين و هالقصص


رمضان هادا اجازة معناها نوم و راحة و تدليل و قطايف و كنافة كانوا بعد رمضان رح يخلص الاكل و الحلويات فالكل نازل نسف


حتى النت ما بمر عليه الا بسرعة مش عارفة ليش بس السهرات و العزايم ماخدة وقت البيت كلو و الانجاز الكبير اني بتابع مسلسل طبعا مش باب الحارة و هيك بكون ضمنت بال طويل لبعد رمضان يعني تخيلوا مسلسل حلو و دعايات بتنط بوجه الواحد كل 3 دقايق


شي بجلط لكن بهون لانو بعد هيك اكيد رح اعتزل التلفزيون و ارجع للروتين


المسلسل هو تخت شرقي . طبعا انا مش ناقدة و ما بعرف انتقد شي بس بحكي بحس المشاهد المعتر بعد حروب المسلسلات التركية و الايرانية و المكسيكية اللي غرقنا فيها قبل فترة


طبعا انا من محبي الدراما السورية خاصة لو توجت باسم حاتم علي بس المسلسل اللي بتابعوا مش من اخراجه من اخراج رشا شربتجي و تمثيل نخبة من الممثيل الرائعين برايي


اللي شدني بهادا المسلسل هو طبيعة الواقع المحظور اللي ما حدا بقرب عليه لانو الخوض فيه و برمضان يعتبر خطر لكن من رايي القصة مش رمضان او غيروا فاللي ما بنحضر برمضان هو نفسوا اللي ما بنحضر بعد رمضان


المبدأ لا يتجزأ


لهيك عم تابع حلقاتوا باستمتاع المشاهد اللي عم يشوف حالات من العالم ممكن تكون حوليه او عايش معها و يوم من الايام تعرف عليها او يمكن يصدف حالة بتشبهوا او نقيضوا


اللي بحبوا في نوعية هيك اعمال الطريقة اللي بتسلسل فيها الامور بسلاسة و بدون تعقيد و طبعا طريقة تقديم الشخصيات مش ممل بالعكس كل يوم او فترة بتكتشفي شي عن الشخصية


يمكن انا من النوع اللي بهمني سياق الدراما و الاستنتاج و ما بحب صحون الفضة اللي بتتقدم فيه المعلومات هيك على استهبال و بدون مراعاة لعقلي


ليش عم احكيلكم عن المسلسل ؟؟؟ ممممممم


لفت نظري عبارة قالها عبد الهادي صباغ في حلقة من الحلقات و بصراحة بتنطبق على جيلنا لو فكرنا فيها منيح و هي :


انتوا جيل فقد سمة التعاطف الانساني . لازم يكون في سبب لكل شي . و نسيوا انو الانسانية اهم سبب .....


احنا وصلنا لهاي المرحلة و ما بنقدر ننكرها ممكن يكون فينا شوي لكن على طريق الانقراض


تعوا نتخيل متلا هادا الحادث لو صار 1960 مثلا او قبل 1990 لانو بهادا العام انفرضت فيه نظريات جديدة و كتيرة


سمعت صوت صراخ استغاثة من شقة انت ما بتعرف مين ساكن فيها


صدقوني العالم بتلتم و الرجال اللي في العمارة ما رح يضلهم يتفرجوا و يمكن يكسروا الباب كمان المهم الحالة الانسانية اللي جوا


بعد ال 2000 لو سمعت صوت جارتك اللي ما بتعرفها او بتعرفها مش مهم ...بتستغيث ..... اغلب سكان العمارة رح يسكروا الشباك و الباب و ما النا دخل هي الجملة الاساسية و بيتبعا خبرها خلينا في حالنا ......


الطفولة امتد الها هادا المرض


يعني و نحنا صغار و بنلعب في ساحة البناية العصر كنا نشوف مثلا جار حامل معوا اغراض او جارة حاملة كياس فالعادي انا نركض نساعدها و في بالنا كلنا ياي هلا انا الله بحبني لاني بساعد الناس الكبار و طبعا الكبار بستغلوا الصغار و بغروهم بحبة شوكولا او مديح قدام الام و هيك النفسية بتطلع بالسما


هلا الماما بتعلم الولد انو انت حبيبي مو شغال لحدا اوعك تحمل كياس و لو شاف الولد اي عجوز حاملة غرض او وقعت و لا هو هون و ممكن يدير ظهروا و بخبر القصة و بنقلها للماما و اذا سالتوا انت شو عملت بهز كتافوا و بقول انا مو شغال عند حدا


ليش لانو سمة التعاطف اللي ذكرناها بلشت تنقرض


او انقرضت الا الباقي اللي ضل للذكرى


عرفتوا ليش بحب بعض المسلسلات السورية


في شي بينحكى بضل بالبال


منها عبارة تانية انا باكدها كتير


الممثلين كانوا بيحكوا عن الموسيقى الشرقية و التخت الشرقي الاصيل و العبارة هي :


الناس نسيوا الشرقي و ما تذكروا الا التخت





صحيح مين شاف مسلسل ذاكرة جسد ؟؟؟؟ طبعا انا اجلتوا لبعد رمضان يعني معقول اقعد اتابع مسلسلين ؟؟؟ صعب





عم حاول لحق كل اللي انكتب برمضان طولوا بالكم شو هالنشاط يا جماعة انا لحالي بغيبوبة ؟

هناك 24 تعليقًا:

Khadija.april يقول...

حلوة هالتدوينة متل كأنها بتحكي عني أنا كمان رمضان هاد نفس برنامجك انتقامًا من وضعي السنة الماضية وأنا توجيهي (بكالوريا) ما بعرف العطلة يلي عنا عملت تعطيل للكل وسهرات للصبح ونوم طوال فترة الصيام .. صراحة هالشي ما بيرضيني بس بعملو مجبورة ما بعرف ليه عنا لو بتجي موجة حر قاسية أو موجة برد كبيرة بيتوقف كل شي وقت كأس العالم كل شي توقف وهيك كمان وقت رمضان من أول اليوم بتجهز للفطور ومن أول الليلة بتجهز للسحور وبينهما بتجهز للمسلسلات :(
بالنسبة لـ تخت شرقي بأول حلقات المسلسل كنت مو متجشعة أحضرو بس بعد فترة كتير قصيرة صرت ما ضيع أي مشهد وبالعكس اتأمل بالحوارات يلي عم بتصير بالفعل الكاتبة"يم مشهدي" أبدعت النص وكان محشو بكل الواقعية والبساطة وهادف في معظم الأماكن، كل الشخصيات على الأغلب مشغولة كاملة من كتير جوانب وتجميعها مع بعضها ما بيوحي بالتكلف ولا حتى بانها مكتوبة لتتمثل يعني بتحسسك انك بأحد برامج تلفزيون الواقع بكتير لحظات، فكرة مسلسل لرمضان ولبرا رمضان مرتبطة مو بس بمسألة ما بعرض داخل المسلسل كمان مرتبطة بتحول الجو الرمضاني لجو مسلسلات طغى على سمات أخرى متل تجمع العيلة وهيك وخفف كتير من متعة هالشهر، يعني مصر طلعت ب100 عمل رمضاني وهاد فوق حد الاشباع وكتير لازم يتم التوزيع لانو بالنهاية المسلسل الأنجح دعاية والأقرب للناس هوي يلي بيمشي في حين مسلسل مكلف جدا مو سهل يمشي، يعني برمضان مو كتير بهتم احضر مسلسل عن القعقاع بن عمرو التميمي أو همام شيخ العرب، يعني بدي شي أخف :)
بالنسبة الي تخت شرقي ومسلسل وراء الشمس هني الأفضل هاي السنة مع اني ما تابعت الكل بس كتير شدوني.
وكان وجود الأبطال الفعلي فيهن سبب كتير قوي يعني قصي خولي بدور يعرب وبسام كوسا بدور بدر وأكيد غيرهن بالمسلسلين بس هدول سبب مشاهدتي الأول.
بالنسبة لمسلسل ذاكرة الجسد أنا ما شفت انو على المستوى المطلوب وحسيت انو البطلة مختلفة عن حياة يلي انا تخيلتها والزيادات بالأحداث يلي مو موجودة بالرواية ما خلتني كمل المسلسل يعني حسيت انو الرواية انتهت لكن بالنسبة الي وجود جمال سليمان كتير وازن الكفة بس عجبنتي كتير الشارة من حيث اللحن والكلمات وبشكل عام هوي حلو لكن في شي مفقود.
وبشكل عام انا كتبت كتير يا حرام كيف بدك تقري كل هاد...
بس انو بحب هالموضوع انا
إلي رجعة :)
بمزح أكيد .. رمضان كريم وكل سنة وانتي سالمة.

Khadija.april يقول...
أزال أحد مشرفي المدونة هذا التعليق.
طبــشورة يقول...

هممم ،
أنا بشكل شخصي بؤمن بأنـّو الإنسان دائما ً مفطور على الخير و فعل الخير ، و لكن الخوف بخليه يتخلى عن هالخير و يصير عنيف .. و هاد اللي عم يحصل اليوم برأي ..

غير هيك من فترة كنت بسوريا و صار معي موقف بدأت ب الكتابة عنـّه و ما كملته ، هلأ ذكرتيني فيه .. بيحكي عن فكرة " ما دخلنا " ..

رح بنشره قريبا ً ..

تحياتي

ميسم يقول...

جفرااا
انا بحضروا للمسلسل وناويه أكتب عنو بس لما يخلص
ولاني ما بعتبر رمضان غير عن غيروا يعني الحرام برمضان مش حلال بغير رمضان ايعني هاشغله بتذكرني بهديك الواحده الي كانت تتحجب أو تصلي برمضان وتنسى كل شي لبعد رمضان مع اني بعتبر انو الدين لا يتجزأ وبالنهايه الموضوع هو عباره عن أمر شخصي بين الشخص وخالقه
بس والله المسلسل رائع
وبالنسبه للتخت طلع التخت الشرقي هو عباره عن نظام موسيقي بضم مجموعه من العازفين على مجموعه من الالات الموسيقيه وماعرفت معنى الكلمه الاجديد
وصحيح المسلسل جريء لكن مش وقح هو بس تجاوز كم خط أحمر بالتعبير عن المواضيع
وبالنسبه ل ذاكرة الجسد هو حلو بس والله يا خيتي حسيت انو الواحد لما يحضر اشي كاين قارئو بقتل الشخصيات الي كانت بذهنو وتصوره عنها
طولت صح .......
ههههههه
تحياتي

Whisper يقول...

سمعت عن هالمسلسل اشي بحكي انه جريء و اشي بحكي انه واقعي....
انا اجمالا من محبين المسلسلات السورية لانها بكتير من الاوقات بتظهر الواقع المخفي عن الناس, او اللي الناس ما بتحب تسمع او تعرف عنه

مش عارفه اذا حيصحلي فرصه بعد رمضان احضره, لان مسلسلات رمضان الماضي اللي كنت مقرره احضرها و عادوها 100 مرة ما شفت اشي منها :)

nissan يقول...

مساء الفل جفرا
الدراما السوريه قمة الواقعيه البسيطه بدون تكلف وبدون تعقيدات عشان هيك قدرت تجذبنا في اخر فتره اكتر من المسلسلات المصريه ...سمعت عن المسلسل ولكن ما قدرت القطه لا هون ولا هناك ...زي ما قلتي ....سهرات وعزايم وبرامج مقلوبه
ان شاء الله يصحلي اشوفه بعد رمضان وكمان مسلسل ما ملكت ايمانكم....

Rita يقول...

تخت شرقي .. المسلسل تقريبا الوحيد اللي حضرتو السنة (تقريبا لانو حضرت كمان مسلسل انعرض السنة اللي فاتت هيهي) .

لفت نظري كتير اشيا بالمسلسل ... منها الجملة الي اشرتيلها هون.
لما تبع الكباريه قال انو الناس هون ما بتفهم بالتخت الشرقي .. بتفهم بالتخت فقط !

الشخصيات قريبة للقلب .. و بتحسي انو موجودة فعلا عـ ارض الواقع .. يعني انا متل يعرب صار مارق علي شخصين اذا مش اكتر (من شلة اصدقائي الهمل و هيك ) =] .. نفس الشي اماني و هنادي ..
اي انو بعتقد المسلسل واقعي و قريب للقلب .. مشان هيك بحبو .

سلامات :)

Ahmad M. Al-Mahrouq يقول...

مبارح قرأت تدوينة لفرح بطارنة .. بتحكي عن هالمسلسل انه قمة الوقاحة الشرقية .. انا صرت ادافع عن المسلسل مع اني ماشفته .. بس حسيته عم يطرح قضايا مهمة .. هي قالتلي انه المواضيع مبالغ فيها وانها جنسية بحتة ... عن هاد المسلسل وعن (ما ملكت أيمانكم) .. هي زرعت ببالي فكرة .. انه يمكن المواضيع هاي مهمة للطرح بس الوقاحة بالاخرج وتصوير المشاهد

تحياتي :)

jafra يقول...

كيفك خديجة
بالنسبة للكم الهائل اللي قلتي عليه و برافقوا اعلانات من نوعية سخيفة ( انا بكره الاعلانات السخيفة )
كلها تجارة و اللي بحدد نوعية اللي راح ينعرض السنوات الجاية هو المشاهد يعني مادام في متابعين و اعلانات ما رح نخلص من هاي الظاهرة اللي بترافق احداث كتير حكيتي عنها متل كاس العالم حتى الشيبس صار بلعب كرة
ذاكرة جسد : بالنسبة للرواية انا كتير بحبها و كنت عارفة انو المسلسل ما راح يوفيها حقها و هادا صار باكتر من عمل عندك اللص و الكلاب لنجيب محفوظ لما صار فيلم كتير اكل من الرواية و ما انصفها
الكتاب دائما بكون اروع لانو بيعطي لخيالنا مساحة اوسع من المشاهدة
بس احسن شي صار بالمسلسل اختيار جمال سليمان
انا كتير بحترموا لهالشخص
و بتنوريني دايما
و طولي متل ما بدك البياض كلو تحت امرك يا قمر

jafra يقول...

طبشورة : بالفعل الخوف هو الاساس اللي عم نبني عليه كل شي حتى علاقاتنا الخاصة
بصراحة هالزمن بخوف

بانتظار موضوعك

jafra يقول...

ميسم كيفك :
يا ستي انا كمان من رايك الرواية بتعطي روح غير شكل عن المسلسل و هيك علقت على حكي خديجة
بس صدقيني نحنا وصلنا لزمن ما في خط احمر
يعني بدي اعرف شو هو الخط الاحمر اذا بنشوف هاي المناظر بالشارع و التلفزيون و حولينا
و بالنسبة لموضوع هادا بنفع برمضان و هادا ما بنفع انا معك و ذكرتيني بمعلمة عنا بتقولي اتحجبي بس برمضان شو يعني بدو يصير

شو بدو يصير ؟

jafra يقول...

ويسبر كيفو الحلو ؟
اشتقنالك :)
هلا كل واحد بشوف الشغلة من منظاروا الخاص و طبيعة المجتمع اللي راسمها بخيالوا معلش انا مو بعيدة عن كتير مجتمعات و عم شوف اللي بنعرض طبيعي و بكل الشخصيات
يمكن تاثير السكن ايام الجامعة اللي بيحوي اكتر من 400 بنت من مختلف البلدان و الافكار و العادات بخليني اعرف انو اللي عم يصير بالمسلسل او برة خرج عن الخط الاحمر و طوط من زمان بس نحنا لهلا بننكر او بنستطرش

حلوة بنستطرش هاي :)

بنصحك تشوفيه لذيذ و خفيف بس برايي حلو
تحية

jafra يقول...

نيسان : كل انسان ببني رايه على الشي اللي بشوفه حوليه و ممكن يكون مر عليه او احيانا بعيش فيه :)
لهيك عم تلاقينا اقرب للدراما السورية
بتعرفي اكتر شي بستفزني .. لما يصوروا بالشتا بكون رح اموت من قهري لاني بحب الشتا
بالنسبة لمسلسل ما ملكت ايمانكم
انا الي رايي الشخصي
يعني لما بدنا نحضر هيك نوعية مسلسلات فيها جدل لازم نهتم اولا بالكاتب و المخرج . و زيو كمان مسلسل الجماعة
كيف بدي احضر شي و ابني عليه فكرة ( لانو هيك نوعيات من المسلسلات مش للتسلية بس )
اذا كنت عارفة توجه و افكار الكاتب او المخرج من قبل
مثال نجدت انزور الو اتجاه معين بالنسبة لهيك مواضع فمارح يكون حيادي و منصف لهيك ما اظن اانو المسلسل رح يكون منصف و بالنسبة لمسلسل الجماعة اللي بحكي تاريخ الاخوان
كاتبه بكون وحيد حامد اللي كتب عدة افلام لعادل امام متل طيور الظلام و غيره ضد الاخوان اذا كيف رح يكون طريقة عرضوا ؟ مع اني مو من سايد الاخوان و فكرهم بس مع هيك بحب شوف شي نضيف و بيعرض الافكار دون اسبقيات الاستنتاجات
هادا رايي و لو عجبك مسلسل ما ملكت ايمانكم قوليلنا ...
تحية

jafra يقول...

ريتا : اها يعني متابعة . اذا فاتني شي بسالك
يعرب يااااااه
انا مرق علي شخص او اتنين متل يعرب
ما بعرف ليش هالاشخاص نضاف كتير من جوا بس الناس من برة بتحكم عليهم

بس ما فهمت شي بالمسلسل
شو يعني نازح ؟ فلسطيني ؟

jafra يقول...

احمد المحروق طبعا كل واحد الو رايوا و احتراموا لكن انا شفت انو المسلسل ( تخت شرقي ) ممكن يكون جريئ بس هادا هو الواقع وواقعنا اظنوا مش بريئ لهاي الدرجة بس القضايا اللي عم يطرحها ( ما بعرف اذا كانت فيها جنس بحت ؟؟؟
) ما فهمت اي موضوع انطرح بناقش هاي النقطة مع انو في مشاهد جريئة اللي بتفرج و متابع اي قناة او اغنية اتعود عليها .. مع اني احيانا ما بايد عرضها لعدة اسباب
بس اظن انو في مواضيع كتير اهم و اجدر بانا نركز عليها
و متل ما حكيت بالاول كل انسان الو رايوا الخاص و نظرتوا
بالنسبة لما ملكت ايمانكم فانا ما شفتوا
فما بقدر احكم عليه

Khadija.april يقول...

رح جاوب على سؤالك لانو كمان كان ببالي
يعرب مو نازح فلسطيني هوي من الجولان المحتل :)
حسب ما فهمت طبعًا.

NasEr يقول...

welcome back! :)
I only watch Abu Janti, bekaffi :)

jafra يقول...

خديجة تصدقي انا اتوقعت بس ما اظن انو الجولاني بقولوا عنو هيك هو اولا و اخيرا سوري لهيك انا استبعدت هادا الموضوع يعني شفتي لما قالت عنو زميلتوا نازح
معقول



ناصر
ابو جانتي ملك اللانسر :)
ما حبيتوا مش عارفة ليش الممثل دمو تقيل

مياسي يقول...

تخت شرقي رائع!
تقريبا المسلسل الوحيد اللي بحضرو وعن جد حلو
الواقعيه في الحوارات والشخصيات غير شكل

زي مثلا كيف الشخصيات كشكل مو كتير مزبطه وكيف البنات اللي عايشات لوحدهم بيعانو-حوارات هنادي وريما روعه- ذكروني بأشياء كتير

حتى سلوم حداد وهوشاتو مع مرتو واقعيه جدا، ولينا مرة سعد قديش في ستات مجنونات متلها(أنا بكرهها ع فكره) :)
وقصي خولي مبدع اشي مسخره

الحوارات للاسف بلحق نصها بس لما ارجع اقرأها عالنت جد بحبهم اكتر

اعتراضي الوحيد ع مشاهد-مكسيم وسلافه- بصراحه مو ضروري هالقد انو يعني النيه هاي مسلسلات للكل مش هيك فجأة تصدمونا في صغار يا عمو!!
اللي بيفرق المسلسل السوري عن المصري انو الشخصيه الها ابعاد يعني مثلا شوفي كيف مكسيم خليل هيك دايما عاوج تمو وكيف سلاف الها ضحكه هيك غريبه وعلى وجهها نمش متل الاجنبيات فعلا!

وبالاخر ع قولة يعرب، "انو اسرائيل لو طحشت كم متر شوي، كان صرنا انا وانتي نازحين بحمص"

التعليق طلع حاره- الله يعينك عالدوام انا عن جد هلكانه وبدي رمضان يخلص!

jafra يقول...

مياسي كيفك
لا انا مو مداومة هلا
اصلا انا اول مرة بصحى بنهار رمضان مش عارفة شو مصحيني لهلا
قصي خولي نهفة و سلاف بصراحة جريئة بس ضحكتها واقعية انا عندي صديقة بتضحك زيها تماما كانت تنرفزني بس هلا اشتقتلها
مكسيم و سلاف
يعني انا بعتقد انهم مش غريبين علينا في المجتمع و الصغار صار عندهم مناعة من المسلسلات التركي
طبعا انا ما بدافع بس من المفروض بهيك وقت يكونوا الصغار اصلا نايمين؟

اول مرة الاقي حدا بحكي زيي
ايمتى بخلص رمضان
مع اني بس يخلص بزعل

Rita يقول...

و انا بحس انو الناس اللي متل يعرب نضاف من جوا .. و بحس انو عندهم منظور معين بيشوو فيه القصص..
منظور غير تقليدي و هاد الشي الظريف .

بالنسبة لـ نازح بعتقد انو جولاني =)
لانو لو فلسطيني كان قالو فلسطيني .. لانو طارق متلا بيحكو انو "فلسطيني" مش انو "نازح" ..

بس ما بعرف عـ الاكيد يعني ..

jafra يقول...

ريتا
على هيك الله يكتر من اليعربات
على الاقل من جوا انسان
يمكن هو بالمسلسل من الجولان
بس معقول يعتبروا نازحين و هم من اهل البلد
مش عارفة كل شي عنا بصير
تحية

Ahmad Merie يقول...

للأسف ما عم احضر ولا مسلسل .. حاولت في البداية اني احضر ذاكرة الجسد .. حضرت 8 حلقات و بعد هيك استسلمت:)

مش من متابعين المسلسلات بجميع اشكالها و جنسياتها

hamdaalabdulla@gmail.com يقول...

مرحبا :

بالنسبة للمدونة حلوه وممتعه ,

راي في مسلسل تخت شرقي /رائع وممتع والحوار كذلك يحتوي على الكثير من الحقائق والحكم ,ولكن صورة المتحجبة مؤذيه جدا للمحجبات لانة مجرد حجاب شكلي وليس امتثال لله وكذلك المسلسلات السورية لاتبين اهمية الدين في حياة الانسان لان الدين هو صمام الامان وغذاء الروح.



مثل زواج الرجل الصغير بامراه اكبر منة او حتى الحب الذي يربط بينهم ...

وعلاقه الالمانية بالفلسطيني علاقة محرمة ومستمرة ,,