الأحد، سبتمبر 12، 2010

قبل ما ينسرق الفرح

كل عام و انت بخير
طيب مين قال اصلا انو انا بخير على رأي المعلم زياد :)
هلا أنا ممكن أكون بخير طبقا لمعايير مش عارفة مين حددها بس اللي أنا بأكد عليه
اني مستعدة للفرح
قبل العيد بيوم سألت حالي
" كيف أهل غزة رح يعيدوا "
" مساكين أهل باكستان "
" و دارفور "
" و الضفة ؟ لا كل فلسطين "
" حتى فرانسسكو ؟ )
هاجس كل عيد
مش بس العيد هاجس كل فرح ممكن يصيبني بيطلعلي ميت شغلة براسي بتخليني تعاطفا مع الناس ما افرح
او ابدي استعدادي للفرح او بالاصح استحي اني افرح يعني ممكن اكون انا منهم
" بلشت احكي متل العواجيز انا مش اكتر من 32 سنة "
المهم . كنت صغيرة و كان وقتها بالتمانينات و الانتفاضة الاولى القوية اللي هزت العالم و صور الولاد اللي كسروا الجنود الاسرائيليين ايديهم بالحجار طازة و مش متذكرة شو كان صاير بلبنان وقتها و صدف عيد ميلادي
و كان المفروض انو ماما تعملي عيد ميلاد كبير لسبب ما و لكن بابا رفض و كانت بالنسبة الي صدمة
و اتطلعت على العلم الاسود اللي معلق على البلكونة و سمعت بابا بيحكي لماما
كيف بدك تعملي حفلة و عيد ميلاد و العالم بتموت هناك كيف الكم نفس تفرحوا و الضفة مولعة و طبعا صوت موسيقى تراجيدي و كمل القصة على راسي جدو و كل رجال العيلة
بحضرة جارتنا لبنانية قالت انتوا احرار بس لا اهل الضفة و لا لبنان رح يزعلوا من العالم لما تفرح
هم اصلا بتمنوا يفرحوا و فاجأتني بعيد ميلاد الو طنة و رنة تاني يوم
وقالتلي يا حبيبتي افرحي قد ما بتقدري بكرا بنسرق منك الفرح و ما بتعودي بتلاقيه و رح تندمي
و ما حدا بزعل منك لما بتنبسطي
الله بحب الانبساط لهيك خلقت التبولة و الدبكة بس للبنانيين .. الله بحبنا
مش عارفة شو الرابط بين لبنان و التبولة :)
المهم قررت اني افرح بهالعيد و العالم مستغربة من نشاطي الزايد و سؤالي عن الناس و تلفونات اشتغلت
و طلعت لبس جديد و حضرت حالي و على اقرب صالون و استلمت ضيافة العيد و انا اللي رتبت الكعك ( اكيد جاهز )
هاي انا اللي كنت من كم سنة ما احب اصحى بكير بالعيد و اضل اقول الله يعين العالم
قررت افرح لايا شي و اي مناسبة رح استغلها لانو ببساطة ما حدا بزعل من فرحتي
بس اكيد ما رح انسى انو في ناس بتمنوها
و انو في ناس العيد عندهم بس يفتح المعبر او يدق باب حدا
حامل معو كم كيس او قافلة مساعدات لاطفال قتلهم العطش و الحر
بفرحوا
تخيل انو العيد يكون عندك بس تقدر تفتح شباك الغرفة
و تحتفل لانك فتحت شباك
و تلبس اواعي جديدة و تبارك للعالم بس لانك قدرت تتنفس من الهوا اللي دخل من الشباك
عن جد دنيا مسخرة
بس حتى لو كانت مسخرة رح احتفل و افرح لايا شي جاي من بعيد
قبل ما ينسرق الفرح
متل ما انسرق اشيا كتير غيروا
رح افرح كمان باشياء ابسط متلا عم هيئ حالي و افرح لاني قربت اداوم
حتى لو صرت اكره شغلي بس خلص - خلي للفرح مطرح لو بالغصب
لهيك كل عام و انتوا بفرح
( و العيد لالنا ) معلش اول مرة جوليا انا ما بكون معك
شو بالنسبة للعيدية ما حدا لهلا عيدني
شو القصة
بردوا حجة الاقتصاد العالمي
لا
مش علي
بدي عيدية

هناك 15 تعليقًا:

Ahmad Merie يقول...

أفرحي يا جفرا و على قولتك قبل ما ينسرق الفرح!!

و كل عام و إنت بألف خير يا رب..

و على فكرة!! مش مقتنع بالتعليق تاعي!!
لأنه البوست تاعك ولا أروع!!
إستمري بالفرح و الله يديم الفرحة و ينصر اهلنا في فلسطين و العراق و لبنان و دارفور و أفغانسان و كل مكان!! و يديم الفرحة في قلوبهم و قلوبنا :)

شو بالنسبة للعيدية؟ P:

jafra يقول...

ينعاد عليك احمد
و تفرح مش بس بالعيد
لا دايما
المهم انك تكون موجود
هادا الشي بيسعدني
تحية

نادر احمد يقول...

صباح الخير يا رفيقة
أخيرا سأبوح بسري (المكتوم) ولكن أرجو ألا تهتز صورتي الثورية في عينكم
تخيلي يا جفرا اني من مواليد
2-11-1976
يعني من مواليد وعد بلفور، وتخيلي عاد لما كنت اصحى انو على اساس اليوم عيد ميلادي، واول ما افتح التلفزيون او الراديو، يبلش المذيع العبارات ما غيرها " في هذا اليوم المشؤوم" وعبارات من هالحكي ( طبعا هاد كان قبل اتفاقية السلام)، اليوم ما في منو هالحكي
افرحي يا جفرا وكلي تبولة
كتير علينا ازا سرقنا يوم نفرح فيه من هالدهور السودا اللي عشناها
اسأل الله أن تتحرر الأمة بأسرها من اغلالها في يوم 2-11 من أي سنة مقبلة حتى تنتهي عقدة الذنب التي تلازمني
اكرر اعتذاري مرة اخرى يا رفيقة
كل عام وانت جفرا

جفرا يقول...

كل عام و انت بفرح دائم
فلا احد سيفرح بابتسامتك وفرحك اكثر من شعب المنسين
الذي ما زال يعيش بفرح حتى في المنفى ما زال الفلسطيني يوسع مكانا للفرح في قلبه
كل عام ونحن اقوى من كل الظلام والنسيان كل عام ونحن اكثر فرحا

jafra يقول...

نادر : كل عام و انت بفرح
متخيلة هادا الشي
اصحى بعيد ميلادي و الاقي عالم بتحكي شو هاليوم الزفت
الشغلة بدها تاقلم
على فكرة عقدة الذنب اللي عم تصيبنا هاي مش غريبة
شكلها وراثة
دم بفرح رفيق



جفرا : بالفعل نحنا عم نحاول نوسع مكان للفرح فما في داعي لتانيب الضمير :)
كل عام و انت بخير

مهندس مصري يقول...

كل سنة و انتي طيبة
إفرحي و يارب كلنا نفرح و ما يكون فينا حزين

غير معرف يقول...

لو ضليتي ع فكرة إنه يا حرام و كيف بدهم يعيدوا و إلخخخ،، رح توصلي لمرحلة إنه لأ مش رح أعيّد إلا اذا كنت منهم؟؟!!!!
ما احنا بنعيّد يا عالم هينا :)
أول يوم بالعيد( طبعا مش رح ينفع تعمليها بالوقت الحالي لإنو خلص العيد بتعمليها بالعيد الجاي) اصحي بكير بوقت الادان
و اذا كان في جامع قريب من البيت رح تكوني محظوظة
لإنو رح تسمعي التكبير بالجوامع
و بتوقفي ع البلكونة بتشوفي الناس رايحة ع الصلاة و شي رايح يجيب غرض متأخر عنو و بتشوفي قديش في ألوان بالشارع ،، و بتشوفي مرجيحة ابن اسماعيل الي تحت الدار،، و ماكينة البرد الي على قبالو و في نسمة هوا باردة و ريحة القهوة الي لسة ع النار و الشمس لسة بتفوت ع البيوت
فهاد هو الفرح و هاد هو العيد،، العيدية؟؟ مش كثير أمر مهم،، الأواعي الجديدة؟؟ مش كثير أمر مهم (طبعا بالنسبة لشخص عدّى العشرين)
فإنو هينا بنعيّد بغزة باعتبارها منطقة تعاطف عالمي غير شكل :)
عادي
فرح :)
بس ضيقي الدائرة شوي،، الي مش رح يفرق معو عيد ولا سعيد هو الي عندو أسير أو شهيد( السجع ما كان مقصود) :)

فإنو انسرق الفرح

خالد أبجيك يقول...

عيدك مبارك سعيد، وتقبل الله منا ومنكم صالح الأعمال

سعيد بتعرفي على هذه المدونة الطيبة..

كنت هنا.. وسأبقى بإذن الله

jafra يقول...

مهندس مصري : امين يا رب و كل عام و انت بخير و فرح

غير معرف : كل عام و انت بخير
اها يعني بغزة نفس الطقوس بس الفرق واضح اولهم نسمة هوا بارد ( الله يخلي التكييف ) و مرجيحة لا ولا حتى اسماعيل
بس هي ذاتها البساطة المطلوبة
لبس العيد ممكن بس العيدية لا
حتى لو قرشين و نص بس بتضل غير شكل
انا بحب اسمع ادان العيد لهيك يا بصحى متل القرود او ما بنام
و الناس ماشية بالشوارع
حلو
و اللي عندو اسير او اشهيد الله يعينوا و يصبروا ما هو هون اللي بقهر
بنقتلوا و بناسروا و اللي بالي بالك على طاولة مفاوضات مباشرة بتحل دم العايشين او الباقيين
شكرا لزيارتك
نورت


خالد كل عام و انت بخير
اسعدني مرورك
كن بالقرب

Rita يقول...

ينعاد عليكي .. بالاشيا الظريفة حصرا =)!

jafra يقول...

ريتا حصري ؟؟
من وين يا حسرة اذا الفرح الروتيني و بنحس انو عم ينسرق كيف الحصري

كل حلم و انت بخير
كل فرح و انت بخير

Ibrahim يقول...

فعلا افرحي باي وقت بيصحلك تفرجي فيه يا جفرا
لانو اليوم اللي بيروح وما بنفرح فيه بنعاود نندم عليه
والله لو شو ما صار العيد بيظل عيد
تحياتي جفرا

Whisper يقول...

افرحي يا قمر
الله لا يجيب مقت و نكد....الحمد لله دائما موجود فلازم اي فرصه فرح نعيشها لاخر قطره :)

كل عام و كل ايامك و اوقاتك خير وفرح يا رب

سقراط مصر يقول...

خلي للفرح مطرح لو بالغصب
لهيك كل عام و انتوا بفرح

زي ما قولتي يا جفرا
خلى للفر مطرح ولو بالغصب
ربنا يديم فرحك ويفرحنا كلنا ان شاءالله بتحرير الامه العربية من الحزن والاسى

كل سنه وانتِ طيبة واسف على التاخير جدا
تحياتي

www.mycammacym.blogspot.com

jafra يقول...

ابراهيم : احيانا طعم الفرح بمرره تانيب الضمير
على شو ؟ افتح قناة الجزية ووطي الصوت و اقرا الشريط الاخباري بكفي هم لسنة مع هيك اكيد في مساحة لفرح


ويسبر : و انت بخير و امين الله لا يجيب نكد
مع انو بلش الدوام :(


سقراط مصر : كل عام و انت بخير
و رح نخلي مطرح للفرح بس لعلو ما يكون فاضي