الثلاثاء، سبتمبر 14، 2010

بحكي مع حالي - جدل ذاتي

في البداية حابة اوضح انو هالحكي كلو براسي و من راسي للازرار و انتو عم تشوفوا هلا يعني هادا جدل مع حالي
وصلت لمرحلة في الفترة الاخيرة كتير احكي و احلل مع حالي الامور اللي بتعرضلها و لهيك حبيت اني احكي بصوت مسموع شوي و هو عبارة عن دقة كم زر يمكن اوصل لسلام روحي و مصالحة مع ذاتي
و اول ما بلشت كنت رح احكي بموضوع تاني تماما لكن لقيت حالي عم ادرج موضوع مختلف عن اللي كنت عم افكر فيه
الموضوع المختلف هو " المسامح كريم "
انو ليش يا جماعة المسامح كريم و هون ببدا الجدل العقيم و اللي بيوصل لافكار غريبة و هي الحالة اللي انا عايشة فيها هلا
من زمان و انا بحاول امشي على شوية مبادئ منها المسامح كريم و التعاطف و تقدير الظروف و هون الواحد بينجر مرة و را مرة لخازوق اجتماعي من نوع معروف للكل
مثلا زمان كنت عم اتعامل بمبدأ من ضربك على خدك الايمن ادر له خدك الايسر و استمريت لفترة طويلة من حياتي على هادا المنوال و طبعا هون بيلحقك موضوع المسامح كريم و الحق عند الله ما بضيع بتوصل لمرحلة معينة بحياتك بتلاقي حالك وصل لمفترق طرق
الاول بقولك الحق ما بضيع و انو الله رح يبعتلك مين ياخد بحقك خاصة لو كان الكف فولتو عالي
بتستنى و بتضل تتسامح لتوصل لمفترق طرق تاني
الاول منه انك بتضل تاكل كفوف و تستنى رحمة ربي فاي دعسة بالبطن معناها انك تتقبل الامور لتوصل لمرحلة انك تلوم حالك و تتقوقع عليها و تحط الحق على حالك مهما كان فبالاخير بتصفي متوحد مع حالة الذنب و عدم الثقة بالنفس و تحسب الف حساب لاي خطوة اجتماعية و ما رح توصل لاشي و بترجع لتقول ليش الله ما اخدلي حقي و انا مظلومة ؟
يا الله وينك عني و حسب قوة الكف و الايمان ممكن توصل للالحاد الداخلي
و هون بتكون جمعت كم كف و كم دعسة بالبطن و بتتجه للانتقام ممكن من اشخاص اصلا ما غلطوا و بتمشي على الحياة و الناس بطرف كعب حذاءك العالي و تراكميا بترجع وبتحط الحق على حالك و هيك ما استفدت اشي و الانتقام الالهي ممكن يكون منك مش من غيرك
لكن لو رجعنا للمفترق الاول بنلاقي انك لو ما استنيت و تراجعت و غلطت حالك و حملتها اعباء الذنوب اللي ما اقترفتها و اخدت موقف من الاول و تعلمت من الكف و عشت بنظريات اخرى كان ممكن تتلافى كل هالتعب النفسي و الجدل
ما هو المساح كريم بس بحدود يعني حدا دعس على رجلي بالغلط ممكن
بس حدا يدعس ببطنك و مشان تقدر تقوم مرة تاني بتكون ضيعت من عمرك سنة او اكتر ؟ هون ما بكون المسامح كريم بكون انسان ماشي مع طرش الغنم لوين ؟؟ هو اصلا ما بعرف
لهيك وصلت لقرار العين بالعين و السن بالسن و البادي اظلم
مع هيك بردوا العالم بقولولي مستقوية و كاني انا اللي بدات ؟ مع اني انا اللي اندعس ببطني لكن للموضوع عدة فوائد جنيتها من تجربتي الشخصية على المستوى الاجتماعي و هي
انك تقعد تحط ايدك على خدك و تقول بكرا الله بياخد حقي ممكن بس مادام بايدك تاخد حقك فكرم منك انك ترحم المخطئ من غضب ربنا
و ترحم حالك من النطرة و هز الثثقة بالنفس و النطرة لسنين لحد ما تصحى
و حاول ما تكون ردة الفعل اكبر من الفعل نفسو مشان ما تتجنى و اوعك توصل معك للقتل الجسدي او الروحي الموضوع لو تحكمت فيه من الاول رح تلاقي نفسك كريم و متعاطف و كمان عادل بس بتاخد حقك
و هيك ممكن تستمر بهدوء
مش قصة انك تقتلوا لا
بس على الاقل تكون راضي عن نفسك و ما توصل لمرحلة القوقعة و لا الاحساس بالذنب تجاه المجتمع كلو و تكرّم اي واحد ما مشي من جنبك و مــــــــــــــا دعس ببطنك
و تعتبره من الاله المنقرضة و تضرب فيه المثل
و بهيك كمان بترحم حالك من الانضمام للطرش الماشي بلا وجهة معينة و بتكون فرد قادر على اتخاذ موقف ولو شخصي من ناحية معينة بلكن بنقدر بعد هيك ناخد موقف علني لاشيا كتير بحياتنا
عمرو طرش الغنم ما توفق انو ياخد حقو حتى من العشب و المي لهيك اخترعوا ابر الهرمونات
و انا مش ناوية اخد هرمونات لهيك رح اتخذ موقف من كل شي حولي و احاول اني اغير و اتغير بس للاحسن و اطلع من هالقوقعة
و بصراحة ما عاد عندي مساحة للمسامحة لانو الموضوع مش اني بخيلة او مش مؤمنة او .............
لا الموضوع اني بدي اكون برة طرش الغنم
و مع العالم الحقيقي و بس

هناك 13 تعليقًا:

مياسي يقول...

بقدر احكي انو هاي التدوينة اجت عالوجع وفي وقت مهم جدا!! معك حق الانسان لما يضل يحط تراكمات وغبن بتكون ردة الفعل مبالغ فيها وبيأذي ناس مالهم خص

بشد ع ايدك، ما تسمحي لحالك حد يدعس ببطنك مع احترامي :)

jafra يقول...

:))))))))))))))

حلوة هاي يدعس ببطنك
مش عارفة ليش ضحكت من قلبي
يمكن من زمان ما بيوصل الشي لدعس البطن بس التراكمات بتمغص و بتحسيها دعسة قوية
المهم اني ما ارجع مع طرش الغنم الله وكيلك قربت اماعي انا

مياسي يقول...

هههه انا قصدي يعني عالحالة الاكستريم
انا بس استعرتها من التدوينة بصراحه شفت "يرفش ببطنو" أحسن وأقوى بس حكيت بلا ما استخدمها:)

منيح اللي ضحكتي الحمدلله:)
لا ديري بالك كلنا صايرين طرش الا من رحم ربي، لو تشوفي قديش صايره طرش انا بس مشان الله حلّو
يالله كلها 50 سنه وبتفرج ع قولة المتفائل:)

Whisper يقول...

يا الله
كأنك بتحكي اللي بعقلي

لمّا اكون بالمسجد و الشيخ يحكي عن المسامحه, بيجو ببالي اللي اذوني, وبصير اصنفهم هاد اوك ممكن اسمحه, بس هاد مستحيل اسامحه...و بدعي ربنا اني يقدّرني اخد حقي منه و اذا ما قدرت انه هو ياخد حقي منه و يفرجيني بعيني حتى يهدّى بالي

بعدين بفكر يا الله شو قلبك اسود, بعدين الوجع برجع بزكرني بحاله انه ما حطيب الا بس تنتقمي...وهلّم جرّ

في مبادئ كتيره و اعتقد انه المفروض احنا نميز كل مبدأ مع مين نستخدمه
المسامحه...الانتقام...
في ناس لئمه و اذا انت اكرمت الئيم تمردا..فبدك تاخدي حقك و بنفس اللحظه وما تطلعي عليهم هالاشكال

بس مقدرتنا عالتمييز دائما بتخونا و بتيجي على راسنا :(

لهلأ مش مستقره على رأي انا...و زي ما انتي ملاحظه الجدال ما زال مستمر لانه لا شعور الظالم ولا المظلوم برّيح :(

نورس من شاطيء غزه يقول...

الجريمة والعقاب ,
الحياة الانسانية على البسيطة ابتدأت بجريمة عندما قام قابيل بقتل اخيه هابيل, ففتح باب الصراع الازلي بين الخير والشر , وقد نظمت بعض الاديان السماوية وغير السماوية قواعد الثواب والعقاب ,وظهرة اولى الابتكارات البشرية لمواجهة الجريمة بشكل واقعي في القانون .
ولكن هل يطبق العقاب بشكل عادل سواء بين افراد المجمتع , وهل يوجد عدل بين جميع افراد المجتمع ؟
ولماذا يتحمل الضعفاء ظلم الناس والحياة دائما ويدفعون الثمن ؟
ولماذا نكون ضعفاء ؟

أشرف محيي الدين يقول...

مرحبا جفرا

بصراحه بنصحك بالابتعاد عن الجدل الذاتي وإنك تحكي مع حالك كتير وإسألي مجرب لأنها بعد هيك بتصير عندك الحالة متل الادمان ما بتقدري تبعدي عنها وبتصيري دايما بحاجة لجرعات مهدئه من محادثة النفس :)

عجبتني كتير لما قلتي إذا كان الكف فولتو عالي :)

عموما أنا مع مبدأ المسامح كريم إذا كانت حدود الغلطة لا تتجاوز دعسة الرجل متل ما قلتي بس مش أكتر من هيك .

وكمان أنا مش مع مبدأ الانتقام من غلطات الدعس بالبطن ولكن مع مبدأ الحيطة والحذر في المستقبل من الوقوع في نفس الغلطة عن طريق تجنب كل الطرق اللي ممكن تعرضني للوقوع مع أشخاص من هذا النوع .

يسعد صباحك

jafra يقول...

مياسي حرام و الله حزنت على حالي هي ممكن توصل للرفش بالبطن ؟
ممكن
:)
بس انت اللي متفائلة يعني هي كانت بعد 100 سنة بتهون
و اول 100 سنة صعبة خليتيهم 50
تفاءلت انا :)


ويسبر : و هاي شغلة كمان بنتشابه فيها
يعني انا بدي الانتقام قدام عيني مشان ارتاح
ول شو هالحقد :))))
انا متلك
بس تعبت من قصة تصنيف و استخدام
بدي اكون انا و الكل يعاملني من غير تصنيف
يعني هاي الشخصية ما تقربلها بالشر لانو رح ينوبك طرطشة كبيرة
و هيك ممكن ارتاح شوي
مش قلتلك بدي اصير شريرة و هاي اول خطوة
تحية

jafra يقول...

نورس : هون السؤال ليش لنكون ضعفاء و انو الديانات السماوية لما نظمت الغريزة الانسانية ما قالت كونوا ضعفاء ؟
اذا الانسان المسامح قوي و المنتقم قوي لكن مين بتفضل تكون فيهم و شو بيحكم عليك المجتمع بعدها ؟
نورت


اشرف محي الدين : و شو بدك تعمل اذا الناس عم تتغير متل موج البحر ؟
مد و جزر
و ممكن يكون الشخص ببيتك هاي الليلة و يكون ثقة و فجاة بتلاقيه ضدك من غير ما يكون في سبب منك ؟ ممكن ظرف اضطروا بس مش ضروري اتحمل كمان اعباء ظروف الاخر
العلاقات الاجتماعية الها اسس لكن للاسف غير ثابته ممكن انو الاديان رتبتها و نظمتها
لكن خلق الانسان اكثر جدلا
يسعد مساك
نورت

مياسي يقول...

جفرا: حكيتلك الكلمة عنيفه شوي:) يسلملي التفاؤل

ويسبر: بصراحة كل ما اتخيلك قاعدة بتنصفي والشيخ بيحكي بحشش جد:)

نادر احمد يقول...

مساؤك سعيد يا رفيقة
جفرا ... مرة قرأت أنك بتحبي الدبكة
فاللي بيجي فيكي
ادبكي على شواربو
هاي هي بكل بساطة
وبنفس الوقت يا جفرا لازم انقدر اللي بحبونا كتير
اللي بشوفك بعين شوفو انتة بتنتين
كل الود يا رفيقة

saydtalzorka يقول...

أنا هون ها..واستدليت الطريق على بيتك بعد ماحن عليِّ الشعب وبعتلي كم بروكسي

خلينا نشوفك

jafra يقول...

مياسي : شفتي ويسبر عندها قوى خفية
بتسمع و بتحاسب حالها و بتكتب لتخبرنا
ما بدي احسدها بس انا يا دوب ركز
نورتي يا قمر



نادر : حلوة قصة الدبك على الشوارب طيب اللي ما الو شوارب شو نعمل فيه :)
نورت

jafra يقول...

سيدة الزرقة
يسلملي البركسي ما احلاه
اشتقنالك
عندك تاج
ما تنسي