الخميس، سبتمبر 30، 2010

الحمار ما رح يغرّد



لما تكون مدرس أو معلم و نافخ قلبك اعدادات مشان العام الدراسي الجديد و تحضر حالك لسنة دراسية جديدة المفروض تكون متفائل نوعا ما
لكن لو كنت معلم علوم بمدرسة خاصة عربية تعتبر الجاجة اللي بتبيض دهب لصاحبها لازم تتوقع غير هيك




انو يا جماعة انا بستغرب على قوة قلب ولي الأمر لعدة أسباب لهلا بقول هادا مو رجل او ست طبيعية لازم يكون فيهم جينات سوبرمانية ليكونوا هيك مثلا بيسجل ابنوا مع 40 طالب بالصف الواحد . اذا مو اكتر و احسب كم صف بالمدرسة يعني ممكن نقول كم الف طالب بالمدرسة و الحسبة شغالة مع هيك ببعتوا و ما بودعوا على الباب انا لو كنت ولية امر كنت بوست ابني و بكيت كاني رح شوفوا لاخر مرة



ليش



تخيل التدافع اللي بصير اول و وسط و اخر الدوام على الدرج



بلاش



تخيل تدافع اكتر من 400 طالب على شباك المقصف المدرسي و هو ما بيوسع اكتر من 50 ولد



بلاش



تخيل قعدته بالصف مع تعطيل التكييف و الرطوبة و الحر غير الطوز



يعني عن جد رحمة ربنا كبيرة



لا و ولي الامر مع كل هادا بدو خدمة اكستر ا



مش انو نحنا بنكون قاعدين بنعلم و بنظم و بنأسس في مبادئ بدو اكتر من هيك



يعني اذا المعلمة صرخت شوي على 40 راس ليسكتوا لتعرف تبدا حصتها



هون بتكون معلمة غير كفؤ و لازم تلاقي وسيلة احسن


مو مهم كيف تتوفر و من وين . لا . و هادا الحكي لجيل ما عادت الصور بتلفت نظروا


هادا جيل PSP


بدي اسأل ولي الأمر لما ولادك بعملوا دوشة بالبيت انت كيف بتسكتهم ؟و هم 4 او 5 على اكبر تقدير


لا و لازم تكون مصلحة الكتب و حافظة اسماء كل الاولاد و كنيتهم كمان و لازم هو يجي من اول يوم يسألها عن المحروس فتجاوب على طول بتقرير مفصل عن مستواه كامل مع انو نحنا ما كملنا اسبوعين



و المعلمة لازم تكون حريصة على غرز مبادئ النظافة و الترتيب و النظام في عقول هالطلاب


مع انو الطالب منهم بروّح على بيت أهلوا بنسى شو عمل و اتعلم لانو الست الماما و البابا بعلموا انو هو فوق الكل و بشيلوا الوسخ من تحتوا


و من أول يوم لازم تعرف المعلمة انو كل الطلاب بلا استثناء اذكياء و الأوائل و معدلاتهم عالية و مؤدبين وولاد عيل و أهاليهم دافعين دم قلبهم


ما قلنا شي بس يا أخي المعلمة هاي لهلا بني ادمة ما تحولت لربوت . لما تتحول ممكن تعملوا اللي بدكم اياه


مع هادا كلو غير الادارة و الزميلات المعلمات و المقالب و الزحمة و الدوشة


على فكرة ولي الامر بكون دافع شي 1500 دولار يا اخي قبل ما تحمل العالم جميلة بدم قلبك فكر بتحديد النسل مشان تقدر تعلموا بمدارس احسن و بعدين هاي 1500 لمدة عام دراسي احسبوها باليومية كانو الطالب مستاجر سكوتر فيهم مش قسط مدرسة . و بعدين المعلمة ما بتاخدهم بجيبتها هم كم ملطوش باخر الشهر يا دوب يا دوب يكفوا


و ما تقولوا بدنا نحرر فلسطين كيف و نرفع راية ابصر شو


مش بكترتهم ......... بعقلهم ....... و بتعليمهم


ما هو تخلف 4 او 5 او 10 مشان يكبروا و يشحدوا الرواتب شحدة و يلفوا على رجليهم طول النهار ما رح يلاقوا وقت لشي او حتى نشرة اخبار


اما واحد . اتنين بتعليم كويس ببيئة كويسة يمكن يطلع معهم شي


هيك انا بحسبها


بس يا جماعة كل سنة الواحد بتطلع باكتشاف جديد


يا أخي الحمار لو ضليت طول عمرك الممتد لعمر سيدنا أيوب تعلموا يغرد ما رح يغرّد


انك تعلم 40 طالب انو يا حبايب قلبي هون سلة الزبالة اللي بتقدروا تكبوا فيها بلاويكم بلاش على الأرض لمدة 5 سنين و في الصف الخامس تكتشف انهم ما تعلموا .......... وين المشكلة اكيد مو بالمدرسة و لا بالحكومة و لا تحت قبة البرلمان اكيد


المشكلة فردية و مسؤولية فرد


كمان ما فيك تلوم الوزارات و الحكومة و لا المعارضة اذا الطلاب الهم 5 سنين بيتعلموا يصفوا دور و طابور و ما في فايدة ؟


كل سنة بتبدأ تعلم و تغرس مبادئ


لكن هل التربة اللي انت بتغرس فيها صالحة . و البيئة مناسبة لنمو و عيش هاي المبادئ ؟


ما حدا يزعل من التشبيه بالحمار على الأقل ما قلت قرود


بس اللي لقيتوا انو الحمار هو الوحيد اللي ما رح يغرّد


و أخيرا الخميس و نهاية الأسبوع


عن جد بحاجة كبيرة لأني ارتاح من كل هالقصص و التفكير


مع اني ما أظن انو رح اريح بالي


هاي عادتي


ما أنا حكيتلكم


الحمار ما رح يغرّد





نهاية اسبوع سعيدة

هناك 22 تعليقًا:

فتاه من الصعيد يقول...

نسخه بالكربون من شكاوي والدي لما كان مدير لمدرسه خاصه عربي هنا كمان :)

واولياء الامور كانوا تاعبين المدرسين وطبعا دافعين فلوس وعايزين ابنهم يبقا الاول والاخير في المدرسه

المشاكل في الدول العربيه نسخه بالكربون

موش عارفه ليه القوميه العربيه فشلت :)

تحياتي

مياسي يقول...

ما بقدر أحكي غير كان الله بعونك!!

Saleh يقول...

مسكين هالحمار لولا إنه حمار كان زعل، ع الأقل الحمار معظم الوقت بيعرف وين صالحه و بيمشي فيه، هالقواريط إللي بتحكي عنهم كم واحد عارف مصلحته، بلاش همة، أهاليهم كم واحد عارف مصلحته أو مصلحة إبنه/بنته، الله أعلم، لكن فيه مبادئ أساسية بتفرق الإنسان عن الحيوان، أهمها الإحترام: إحترام الأهل، إحترام المدرس و المدرسة، إحترام الآخر، إحترام البيئة، إحترام الوطن، شوفي كم واحد في عنده شوية إحترام للشارع مثلاً، للإنسان الآخر، معظم الناس ما بتفرق عنده لو رمى زبالته في الشارع (أو حتي في بيوت الناس)، ما بيشوف فيها شي لو تجاوز ع أملاك الوطن (كلمة أملاك دولة تعبير خاطئ)، ما فيها شي لو سب (بسبب أو بدون سبب) على الناس الثانيين.

الله بيعين، هاي ضريبة إضافية عشان الإمتياز إللي بنتمتع فيه كوننا جزء من أمة العرب

naysan يقول...

الله يعطيكِ العافيه وجميع المعلمين والمعلمات ... نعم هو البيت اساس التربيه ...والمعلم في كثير من الاحيان ممزق ما بين واجبه ومسؤؤليته وما بين الاهالي "الي دافعين دم قلبهم " وما ين الاداه اللي همها ان لا تخسر مصدر بيضات الذهب ...جربت التدريس فتره قصيره من الزمن كبديله في احدى المدارس الخاصه ....وافهم تماما ما تعانيه

Che_wildwing يقول...

استمتعي بأجازة سعيدة ... ودعك من الحمار والتغريدة

marwa joe يقول...

يا الله كم اعاني من نفس المشاكل و نفس المعاناة ...
انا كمان معلمة و المفوض انو المدرسة اللي بعلم فيها "اكستر" ايزوا و مش ايزو و من هالحكي الفاضي ..بالمقابل اعدادا الطلاب كل يوم عم بتزيد زيادة طردية مع ارتفاع الأقساط !!
مش معقول اديش عم بنعاني بس لتسكيت هالجيل بس هال 40 دقيقة مشان نشرح هالدرس ..
والله بتكون الحصة مخطط الها لتكون سوبر بس مع هالعفاريت يتتأضى على هص و اسكت ..
لو تلاحظي حتى الأولاد ما عندهم لغة تواصل سوا الا بالضرب !! مش معقولين !! كل شي حواليهم من كرتون لألعاب بعلمهم هالحكي و انتي لازم تكوني مش روبوت لازم تكوني خارقة !!
لسا اليوم بحكي بالدارة لازم راتبنا يوصل ال 1000 دينار عالمر اللي بنشوفه كل يوم .. الله بعين
قبل كم يوم كنت حاطة بوست , ما بعرف ازا شفتيه
http://andaree-2.blogspot.com/2010/09/hellllppppppppppp.html

Haitham هيثم Al-Sheeshany الشيشاني يقول...

حزنتيني على حالي! عندي 40 طالب -مرحلة الدبلوم- ، بعرف المقارنة غير عادلة بس كلامك على الوجع فعلا ً و خلاني أفكر يوم السبت أقدم طلب لفصل الشعبة.

مين عارف، بلكي هالحمار غرّد ساعتها!

jafra يقول...

فتاة من الصعيد ما كانت رح تنفع معنا القومية تطبيقا للنظرية العلمية
الاقطاب المتشابهة تتنافر
لهيك عم نتنافر و بنزيد تنافر كل ما زدنا ... بلاش نقول تخلف هالكلمة ما بحبها



مياسي : هادا بس لانك عديتي لبر الامان لهيك صرتي تدعيلنا
و خلصتي :)

jafra يقول...

صالح : امة العرب امة العرب هم ما كانوا بني ادمين زينا ليش مش انو نحنا اللي بنعر و بنوطي من امة العرب
كونا بنحكي عن امة اذا بنحكي عن مجموعة افراد
و نحنا بننتمي شئنا او ابينا لهاي الامة
شو عملنا نحنا ؟ صفر و منفضين ايدينا
المشكلة هي انو فهمنا تعبير املاك الدولة غلط فصرنا متل الكرسي بالحديقة ملك - عبد - مش للوطن يا ريت و لا للحكومة كان ما غلبنا بس صرنا هيك بلا طريق
او اغلبنا لانو في ناس لهلا عم تحاول

Tareq M. Samhouri يقول...

Thank God I'm teaching here and I have just 20 in the class.
Today I just had a workshop bout motivation, I think u need that

jafra يقول...

نيسان
حلو انك جربتي
نفسي الاهل كلهم يجربوا يمكن يصير في تطور بالعملية التربوية
و يكون في حل اذا مو من المدرسة يكون من البيت
تحية


Che_wildwing
قالتلي اليوم زميلة الي كلمة عجبتني
نفضي ودانك :)
بس فكرك رح نقدر ؟


مروة : نورت المدونة
بالفعل اللي عم يشوفوه و العاب الكمبيوتر عم تعلمهم العنف الزائد زيدي عليه نوعية الطعام اللي بعمل هايبر :)
و بعدها بتقولي حصة و استماع
اكيد رح شوف الموضوع
صار عندي قناعة بانو اصحاب المدارس الخاصة كلهم بدهم بس فلوس و ما في اي هدف تربوي
و لا حتى هدف واحد
صرت مجربة كتير و بصراحة مليت
و شكلي اخر سنة الي بالتدريس على الاكيد

هيثم الشيشاني : هلا ما فينا نقارن حسب السن بس حسب الاحتياجات اكيد الوضع بتشابه
فكرك الحمار بغرد
انا براي لا ما بغرد ابدا
لكان الله خلقوا على غير شكل :)


طارق :
بعتقد اني بحاجة كتير من ورش العمل لكن بدك بيئة مناسبة لتطبيق اي مفهوم توصلت الو
نحنا بمدرستنا دائما بنبلش من الصفر . ما في فايدة
احيانا بحس انو هدف من اهداف المدرسة انك تبلش من الصفر
يمكن ؟

Eng.A.S.M يقول...

هههههههههههه
الظاهر انك عانيتي كتير كتير طوال هالاسبوع ،،
الله يعينك على هالوضع ، فعلا مهنة التدريس مهنة متعبة جداً ، وما في تقدير من اي حد للمدرس ودوره الكبير ، زمان كان الشعار قم للمدرس وفه التبجيلا ..

حاليا لا بيقوموا ولا بيقعدوا حتى
الجيل تغير ، والفساد كل مالو بيتشري في الصغار قبل الكبار ، طلاب المدارس في الابتدائي صاروا يدخنوا ، ويمشوا ورا البنات ، والانحراف تبعهم زاد ، جيل بيسلم التاني للاسوأ مش للافضل ، ناهيكي عن انو ما في اي مراعاة لا من اهل ولا من طاقم تدريسي ..

يعني في النهاية
الك الله
انتي اعملي اللي عليكي والباقي على ربنا :)

الله يعينك على هالوضع
والمقالة كتير حلوة هههه
شدتني وخلتني اضحك على اخر الليل :)


مشكورة
وان شاء الله حكون من متابعي مدونتك

سلامي

سقراط مصر يقول...

يمكن ما بملك تعليق محدد لكن اكيد امتلك سعادة ونشوه عند قراءة كتاباتك حقيقي يسعدني قراءة تجارب الاخرين

فيه ملاحظة عن جد قوية
ط انو لما تعلموا طيلة الخمس سنين يرمي الزبالة بالسلة وييجي في خامسه ابتدائي ويرميها بره السلة يبقى الحل مش تحت قبة البرمان ولا المدرسة ..الخ

رائع جدا يا جفرا
تحياتي الك والى اهل فلسطين

naysan يقول...

جفرا
...فيه شغله نسيتها بالتعليق الاول ...انه ليش الاهالي دائماً اعتراضهم على المعلم ؟ ليش مثلاً ما يعترضوا على التكييف المعطل؟ او على الاربعين قرد في شعبه وحده ؟ أو على بقية المرافق المعطوبه في المدرسه
من الواقع اللي عايشته مع اولادي ما بين المدارس الحكوميه والخاصه وجدت انه الاهالي بتدفع اقساط للمدارس الخاصه مقابل رفاهيات ومرافق المدرسه مثل صفوف اوسع واقل عددا بالطلاب و التدفئه شتاءا وملعب الرياضه و متابعه ادق للحضور والغياب اما بالنسبه للمستوى التعليمي ...لم يتغير مستوى اولادي الدراسي كثيرا عندما نقلتهم من مدارس الحكومه الى الخاصه الشاطر ضلو شاطر...والوسط بقي في الوسط

اخر شي ...استمتعي بالعطله والله يعطيكم العافيه

jafra يقول...

نيسان الهدف الاول و الاخير هو مستوى تعليمي و تربوي
للاسف الاهل بفشوا خلقهم بالاضعف اللي هو المعلم للاسف
يعني لو توجهتي لصاحب المدرسة و اعترضتي على المعلم ممكن يستغنوا عنو بسهولة لكن لو اعترضتي على مرافق المدرسة او العدد في الفصل الواحد بيجيك الرد صارم
هادا اللي موجود و مش عاجبكم اسحبوا اولادكم
و هيك ما في مجال لولي الامر خاصة المغترب الا انو يرضى بالامر الواقع لانو الاغلبية ما بطلعلهم حق يسجلوا بالمدارس الحكومية
و هون بكون مضطر و اذا بدو يتفشش فالمعلمة هي طريقوا الوحيد

Rita يقول...

"على الأقل ما قلت قرود"
مع انو القرود ادق تاريخيا =) !

المشكلة ، الاهالي بيعتمدو عـ المدرسة بشكل كبير تتربي الطفل (خاصة في المدارس الخاصة) هيك بحس .. اي انو الاهل بدهم اعادة تربية لـحتى يفهمو انو ايد وحدة ما بتزقف ..

عوجا !

jafra يقول...

ريتا : هلا لو قلنا قرود يا ويلي كان شو رح يصير فينا
يعني قليل ما قالوا المعلمة ملحدة :)
فهمانين كتير هم و انتي عارفة الباقي
ايا تربية يا ريتا المدارس الخاصة اللي بتعتني بالتلميذ قليلة
ااهم شي انو يسدد القسط و يشترك بانشطة ليدفع
مش ليتعلم

Whisper يقول...

برجع و بكررها

الله يعينكم يا المدرسين....من وحده جربت التدريس 4 شهور و ما قدرت تكمّل فيه

هو من قليل بعطوكم اجازه طويله....مهو لترجع نفسيتكم و اعصابكم تستقر و بتبدا سنه جديده

الاهالي مشكلتهم انهم بفكرو هالمعلم خص نص لابنهم, بنسو ال 40 طالب و بفكرو ان ابنهم الوحيد الموجود, و فعلا كأنهم بدفعولك راتبك بهالقسط

الله يعين

قط البكتريا يقول...

التربية و التعليم عبارة عن عملية كبيرة مسئول عنها المجتمع , جزئية صغيرة منها المدرسة والمدرس

بس عنا الكل برمي غلطو على التاني يعني اهل الطالب اذا ابنهم سطل ومش مؤدب بحكو المدرسة ما بطلعو على تربيتهم الو
الدولة بترمي الحمل على المجتمع40 طالب انتو بتخلفو كتير ومابقدر اوفر ميزانية كافية

يعني انتي بتلفي بدائرة مغلقة

بالاخر انتي كمدرسة الحلقة الاضعف

jafra يقول...

ويسبر : يعني انا ما ظلمتهم للاهل
:) بكرا يا جماعة بس تصيروا اهل تذكروني


قط البكتيريا
عجبتني قصة سطل مع انو عندي قناعة انو ما في طفل سطل بس الاهل هم اللي بحطوه بالسطل
عن جد الاطفال هدول مسؤولية و اللي مستغربتوا انو العالم نازلة خلفة كانهم ما بعرفوا بقصة المسؤولية او انو انا مكبرة الموضوع

تحية

القطب اليساري يقول...

عزيزتي جفرا تفركشت بمدونتك بينما كنت ابحث عن قصيدة محمود درويش الاخيرة "انت منذ الآن غيرك " استغربت قليلاً وجود فتاة/ سيدة فلسطينية تقدمية سياسية وأنثى لا أقل ولا أكثر " عنجد غريبة .

المهم

كمعلم علوم مثلك تماماً ولكن بمدرسة حكومية اسمحيلي اقلك أنه مشكلتك نفسية أكثر منها مشكلة تعليمية أو مشكلة طلاب او اولياء امور ، مشكلتك أنك معلمة بمدرسة خاصة هذا وحده يكفي للشعور بأنك مستعبدة من قبل الجميع اولياء الامور ، ادارة المدرسة ، مالك المدرسة ، وربما الطلاب لو كنت بمدرسة حكومية ستعطي كل ما تعتبريه عبء عليكي الان وبنفس راضية
مش عارف شو موقعك هالوقعة الخاصة في مدرسة خاصة .

jafra يقول...

القطب اليساري
يمكن انو وضع المدارس الخاصة في البلد هون مختلف شوي
يعني العالم هون بتحط ولادها في المدرسة الخاصة مضطرة لانو المدارس الحكومية خاصة للمواطنين بس
لهيك الطبقات الاجتماعية للناس اللي بتدرس ولادها بمدارس خاصة " عربية "
بتكون متفاوتة و عند الاغلبية احترام للمعلم و التعليم و بجد اغلبيتهم بدهم ولادهم يدرسوا طبعا في اختلافات في الثقافة و الاحترام
بس هم مش من طبقة عالية بتتعالى على الموظف
عنا اولياء امور اميين بيبكوا مشان و لادهم يتعلموا .
المشكلة مش هون ابدا
لكن ثقافتنا باحترام المعلم و التعليم
للاسف اختلفت و صار المعلم اللي المفروض يكون عملوا مش اقل من الجندي او حتى القاضي او الطبيب
مثار للسخرية بالاعلام و تباعا في اي بيت
هون لازم تثبت انك متميز و انك قادر على التغيير
و تحاول قد ما بتقدر انك تغير لاو هدول الاطفال بكرا رح يكبوا بلكن بيقدروا يعملوا شي
الخطا مش بالمعلم او الادارة او ولي الامر
الخطا بالمنظومة التعليمية اللي موجودة باغلب البلدان