الأربعاء، سبتمبر 01، 2010

يمكن ......... تفجروا انتوا الثورة

كالعادة و في هذا التاريخ في الايام العادية الخالية من رمضان
تُزج صوره و يكتب الاخرون عنه
و لكن الان رمضان يا ابو خالد الناس مش فاضية
الله يرحمك
شو كنت عملت لو مثلا مثلا مش اكتر حضرت اخبار امبارح على قناة الجزيرة
رئيس السلطة و الوزراء للسطة الفلسطينية ---- اها صار عنا سلطة و دولة انت فاتك الكتير -
بدينوا قتل 4 مستوطنين و بعتبرها مؤامرة على الفلسطينيين .............
يلعن اخت الشغلة يا زلمة فش حيا بالمرة
- اللهم اني صائم -
سمعت بدهم ينقلوك و يحطوك جنب صاحبك ؟ يمكن تتفقوا على شي بعد خناقاتكم بالدنيا
و من مكانكم تفجروا ثورة .. يمكن
كل مرة بدور فيها على شي يعبر عن الوضع الفلسطيني المغبر-- الحالي ---المعتر
بلاقيك انت
سلام لروحك أبو خالد

يومها التقيت بناجي العلي

هناك 16 تعليقًا:

نيسآان يقول...

سلام لروحه ولأرواح الشهداء اجمعين ...اللهم الحقنا بهم قريباً

sheeshany يقول...
أزال المؤلف هذا التعليق.
Ahmad M. Al-Mahrouq يقول...

آمين نيسان !!

جفرا .. معك حق , حنظلة وحده يكفينا

لبنــــــــــى يقول...

نيسان : يا رب تلحقنا فيهم بس بالشهادة و بدون تجريح متل ما صار فيهم


هيثم : في ناس عم يقولوا هدول ما الهم شهادة لانهم كفار
و لعلمك لو قلتلهم شو بشتغل ناجي العلي ما بيعرفوا و لا بيعرفوا حنظلة بس برددوا زي الببغاء شو ما انحكالهم



احمد : هل فكر ناجي العلي و هو بيخط اول خط برسمة حنظلة انو رح يصير رمز لامة ؟ ولوطن ؟

sheeshany يقول...

و لا تحسبن الذين قتلوا في سبيل الله أمواتا .... شهادة من ربّ العالمين ، أهناك أروع من ذلك!

شكرا ً لكلماتك

sheeshany يقول...

جفرا: أنا لغيت التعليق لأني كنت كانب نص الآية خطأ !

و توني أعدت كتابته

المهم: معك حق ، بعرف ناس كثير بيفرحوا بذكرى وفاة ناجي العلي أو بذكروه بالشر لما تنجاب سيرته و مرات يحتد ّ الكلام و بيصيروا يحكوا : "أصلا ً هوه عميل" ! فأنا بسكت و ... بس بسكت :(

*طبعا ً نفس المسألة تحدث مع شخصيات نضالية كثيرة -للأسف-

Mahmoud يقول...

بعرف انه رايي بجوز ينفهم غلط، وبجوز سواءً فُهم غلطًا ولا صحّاً ما يعجب شريحة كبيرة، بس أنا الي جلطني وخلاني نفسي اكسر التلفزيون هو تصريح فوزي برهوم الي قال انه العملية " جاءت ردًا طبيعيًا على ممارسات الاحتلال"

يا الله قديشها ورطة لو هالراجل وامثاله مصدقين انه احنا بنصدقهم، رد طبيعي؟، شوّهوا الطبيعة والله، اقسم بالله شوّهوها، صار العمل المقاوم المقدّس مجرد كرت آخر على طاولة القمار بين فتح وحماس، مجرّد وسيلة لفرض وجهة النظر، والبندقية التي تقاوم لم تعد ملونة بلون العلم، صارت خضراء وتريد كل شيء مصبوغا بالاخضر.

ملاحظة : رايي بالاعلى لا يتناقض اطلاقا مع اعتباري ممارسات سلطة فياض في الضفة ممارسات قمعية وخادمة لاسرائيل بالدرجة الاولى.

Rita يقول...

شو بقي اذا عم نستنى من "اموات" انهم يفجرو ثورة؟

بامن انو ناجي و "رفيقو" =) ممكن يفجرو ثورة في حالة وحدة فقط .. لو لقو مين يتبنى افكارهم و بيني عليها على ارض الواقع ..
على ارض الـ "احياء" ..

غيـر هيك .. "لا حياة لمن تنادي" .. نظامي لا حياة يعني ..

تحياتي :)

Whisper يقول...

الله يرحمه....

ماضي ...وحاضر.. ومستقبل

الله يفرجها

Kenan Alqurhaly يقول...

الله يرحمو..
فعلا هالمفاوضات الحالية كاريكاتير حقيقي

لبنــــــــــى يقول...

هيثم و لا يهمك بس بصراحة ما انتبهت اذا في غلط :)
بالنسبة لناجي العلي ممكن تلاقي اللي بحكي عنو خاين معروف انتماؤه
لانو الغلط مش بناجي
الغلط باللي رسمهم و فضحهم ناجي و معروفين مين هم

لا انا بصراحة ما بسكت يمكن ببعض المواضع و بعض الناس بكون متعصبة
بس ما باللههم
يعني اذا في غلط فهو واضح و اذا في صح برضوا بكون واضح

نورت

لبنــــــــــى يقول...

محمود : هلا انا بصراحة ما علقت على العملية او اللي عملها مبدا المقاومة ما حدا بيقدر يحكي فيه خاصة انا لكن ...
بالنسبة لتوقيت العملية فهو واضح الغية منو بدون تحليل هو بس لاحراج السلطة في اول اعلان للتفاوض المباشر و طبعا السلطة بتستاهل لانو المفاوضات المباشرة ما رح ينتج عنها شي و لو نتج بالاخير هو مش بصالح الشعب
حماس و فتح او السلطة خلوا القضية تتجزا و على هواهم و طبعا الوضع من سيئ الى اسوا و هادا الشي ما بيخفى على حدا
يعني هل المقاومة وقتية و فقط لمكايدة ؟
مع احترامنا لشهداء فلسطين كلهم بدون تقسيمات او تحزيب

لبنــــــــــى يقول...

ريتا : اللي بروح ما بيرجع
لازم يكون هناك فكرة
اي ثورة او حياة كانت اولها فكرة
بس متل ما قلتي
المهم انو يكون في حياة - او حياء
عدمناهم يا ريتا و السلطة اول من ترحم عليهم


كنان : المفاوضات ؟؟؟ بتعرف كتير مصطلحات درسناها زمان غلط منها المفاوضات يا هم كانوا بعلمونا غلط يا احنا فهمناهم غلط بالحالتين اكلنا ... مفاوضات

تحية

لبنــــــــــى يقول...

ويسبر : كيفك
الله يفرجها و هينا بنستنى :)
فكرك بنستاهل يفرجها

NasEr يقول...

أولا أعتقد إنو ما كان لازم تخلطي ذكرى ناجي العلي بموضوع المفاوضات، ولذلك رح أخلي رأيي باللي حكيتيه عن المفاوضات وإدانة قتل المستوطنين لوقت آخر. إن حصل.
ثانيا: ناجي. يا ريتني شفته زي ما شفتيه وإنتي زغيرة :)

لبنــــــــــى يقول...

ناصر كيفك
يا سيدي الوضع كلو خلط بخلط و اشي بقهر بس لاني مو متابعة منيح للاخبار هالايام
ما اظن اني رح اكتب لما يكون الحكي منقوص
و انا لا هدول و لا هدول عاجبيني و لا فاهمتهم

ناجي العلي ... يا ريتوا ضل او بلاش يموت شهيد و لا يموت بجلطة
تحية